Ikalenu “naMuchima waWushona”

ANTU amavulu adi mukukankila kweneni nankashi nawa twatela kuyitiyila wushona hampinji yinakukabakanawu nanzala yakapwelendendi, yikatu, wuzweñi, wubanji, madombu niwubanji wadinjilaña waweni. Wushona hikutiyila muntu wunakukabakana luwi hela kufwila kumukwashaku hakukala kunamoniyi. Neyi chochatoñekaña itañwa, kutiyila muntu wushona kunateli kukundeja muntu wudi mukukala, kukeheshaku kukala, nikukolesha muntu wunakukabakana.

Tunateli kumwekesha wushona kuhitila muyililu yetu nimunhoshelu nikwakamena amakwawu hampinji yaduwu mukukala kunakukeñeka wukwashu. Dichi bayi tumwekeshaña hohu wushona kudi amuchisaka, amabwambu, niantu yitwelukaku. Twatela kutiyila antu ejima wushona ninowu yitwabula kwiluka. Hampinji yahaniniyi Yesu Kristu Mpanji yindi yahaMpidi, wehwili nindi, “Muloña neyi mukukeña antu ayikeñaña hohu, mwakadiila mwodi?” Yesu Kristu, wadiña nakutiyila antu wushona wahosheli cheñi nindi: “Dichi yejima yimunakeñi antu kuyililenu, ninenu nawa yililenu mwomumu.”—Matewu 5:46, 47; 7: 12.

Munateli kutaña nsañu yeniyi muNyikanda Yajila. Amavulu etejaña nawu Bayibolu himukanda wawuwahi wunateli kutukwasha hakumwekesha wushona. Bayibolu yatukonkomwenaña kukwasha antu anakukañanya kudikwasha aweni hamuloña wudi wejima. Bayibolu yamulumbulula Nsoneki nawa Nleñi yetu, Yehova Nzambi, nawu diyi chakutalilahu chachiwahi chakumwekesha wushona.

Chakutalilahu twatañaña nawu: “[Nzambi] diyi wasompelaña ninshona, nintuluwa, diyi wakeñaña mwenyi, hakumwinka niyakudya niyakuvwala.” (Kuhituluka 10:18) Yehova Nzambi amulumbulula nawu, “akabishawu wayisompelaña, atiya[ña] nzala wayinkaña yakudya.” (Masamu 146:7) Kutalisha kudi añinza adiña nakukabakana, Yehova wahanini nshimbi yakwila nawu: “Mwenyi . . . akekalaña neyi mwenimbu wenu, wakamukeñaña neyi chiwadikeña eyi aweni.”—Alevi 19:34.

Hela chochu, hichekalaña chaswayi kumwekesha wushona mpinji yejimaku. Kapostolu Pawulu wasonekeleli eniKristu akuKolose nindi: ‘Vuulenu muntu wamukulu nimwelañayi; muvwali muntu wamwiha, wayaña  nakubalumuka wamwiha nakwiluka chalala, kulonda afwani neyi wamuleñeli . . . Hamu neyi antu aNzambi atondawu, ajila, akeñewa, vwalenu muchima wawushona.’—Akolose 3:9, 10, 12.

Dichi hakwikala nachililu chakumwekesha wushona chakeñekaña kuzata nañovu. Chililu chenichi himbadi ‘yamuntu wamwiha’ yatela kuvwalawu eniKristu. Pawulu wadiñi mukaayi katama kaRoma wakunyaka. Wakolesheli akwawu akakwitiya kuhimpa wuntu wawu kulonda kwikala antu akutiyila akwawu wushona chikupu.

Chichawahila Kumwekesha Wushona

Antu amakwawu amonaña ana amwekeshaña wushona neyi hiyantu azeya. Komana yitoñojoka yeniyi yalala?

Iyi yitoñojoka yakutwamba! Chuma chaleñelaña antu kumwekesha wushona waweni, hikukeña kwalala kwafumaña kudi Nzambi, mweni chililu chenichi. ‘Nzambi diyi kukeña.’ (1 Yowanu 4:16) Yehova amutenaña nawu “diyi Tata wavulishaña luwi, Nzambi wakukundeja kwejima.” (2 Akorinda 1:3) Nhoshelu yakwila nawu “wavulishaña luwi” yalumbuluka nawu, “kutiyila wushona antu anakukabakana.” Chalala, Yehova “watiyilaña luwi antu abulaña kusakilila, niatama”!—Luka 6:35.

Nleñi yetu wakeñaña nindi ninetu tumwekesheña yililu yayiwahi yidi neyi wushona. HaMika 6:8 twatañañahu nawu: “Eyi muntu, yena nakuleji dehi chuma chinawahi. Indi Yehova nakeñi chumanyi kudeyi? Nakeñi wili chaloña, wukeñi luwi.” HaYishimu 19:22 twatañañahu nawu: “Chaleñesha muntu kumukeña kudi akwawu lwoluwi lwindi.” Yesu Kristu, Mwana kaNzambi, wembujolileña yililu yaTata yindi, niyena wayisoñamishili atumbanji twindi nindi: “Ikalenu akwaluwi neyi chekalayi Tata yenu mukwaluwi.” (Luka 6:36)

Komana twatela kutiyila antu luwi chineli mukumwekesha wushona mwafumaña nkisu jajivulu. Kakavulu twamonaña kushikijewa kwamazu asonekawu haYishimu 11:17: “Muntu wekala naluwi wadiwahishaña yomweni.” Neyi tutiyila muntu wunakankili luwi, Nzambi wachimonaña neyi anamwilili Yena kakawahi. Yehova wakana nindi wakafweta akwakudifukula indi amwekeshaña wushona. Mwanta Solomoni amoneneni hakuhosha nindi: “Muntu wamutiyilaña kazweñi luwi wudi nakusondamisha Yehova, yena wakamufweta  cheñi nachuma chachiwahi chaneliyi.” (Yishimu 19:17) Pawulu niyena wasonekeli nindi: “Mwiluki nenu muntu wukwila chachiwahi, . . . wakatambwilamu kudi Yehova.”—Aefwesesa. 6:8.

Luwi lwekala nañovu jakuleta kuwunda nawa lwakwashaña antu kumanisha yikonkojola. Kumwekesha wushona kwakwashaña muntu kumanisha yiluwa nawa kwaleñelaña antu kudanakena. Kubula kutiyañana kunateli kumwekana hamuloña wakubula kuhosha yuma yitunakutoñojoka hela yitwakeñaña kuhosha, indi kwiji yuma yitwakoña anateli kuyishimwina mwacheñi. Neyi kukala kweniku kunamwekani, wushona wunateli kutukwasha kumanisha kukala nikuleta kuwunda. Chaswayi kwanakena muntu welukawu nawu wukweti wushona. Wushona watukwasha kutiyilila kufumba kwaPawulu kwafumbiliyi eniKristu nindi: ‘Twalekenuhu kudovwahila nikudanakena muntu namukwawu. Neyi kudi muntu wukweti muloña namukwawu amwanakeni.’—Akolose 3:13.

Kumwekesha Wushona Munzatilu

Kubombelahu, wushona wukweti ñovu yakuwundisha antu anakukabakana. Neyi chitunamoni, wushona waleñelaña muntu kutiyila antu anakukabakana luwi nikuyandila nawu hamu. Wushona wabombelamu kwakamena antu adi mukukala nikukoñahu chuma chatela kuyikwasha.

EniKristu amwimbujolaña Yesu kuhitila mukutiyila antu luwi. Yesu wadiña nampinji yakukwasha antu lwakumunjimba nilwakuspiritu. Hampinji yamweneñayi nindi amakwawu anakukankila, wawanineña njila yakuyikwashilamu.

Talenu chuma cheliliyi Yesu hampinji yamweniyi mazaza alekeluwu kudowu ateleleli kuyikwasha lwakuspiritu: “Ilaña chanamoniyi mazaza awantu, hakuyitiyila wushona, muloña akabakeni, apalañeni neyi nyikoku yakadi kabiña.” (Matewu 9:36) Kadizi waBayibolu wumu wahosheli kutalisha hanhoshelu yakwila nawu “hakuyitiyila wushona,” nindi “hiyitoñojoka yaleñelaña muntu kusweja kutiya wushona chikupu.” Awa mazu adi hakachi kamazu asweja kukunama nankashi azatishañawu hakutiya luwi muchiGriki.

Munjila yoyimu, eniKristu ekala nawushona anyakalaña kukwasha akwawu anakankili lwakumujimba hela anakukeña wukwashu wakuspiritu. Kapostolu Petulu wasonekeli nindi: “Toñojokenu wejima wenu mwomumu, nakutiyila akwenu wushona, nakukeñañana neyi chamwivumu denu, nakwikala nanyichima yaluwi.” (1 Petulu 3:8) Chakutalilahu, chelili chisaka chimu chaweniKristu chayanda chiyi kwiluña dacheñi hamuloña wayikatu, akwawu akakwitiya ayitejeli kushakama mwitala dawu chakubula kufweta mali hadi tukweji tutanu nakamu. Tata yawantu wahosheli nindi: “Mpinji yejima enjileña nakututala nawa mazu ahosheleñawu akutukolesha atuzañalesheleña hama.”

EniKristu alala niwena akamenaña enyi adi nakukankila. Azatishaña mpinji yawu, ñovu, niyuma yikwawu kulonda kukwasha antu abula kwilukawu. A Yinsahu jaYehova diwu atuñili izanvu dawakwakudihana akwashili antu abula kwilukawu anashimuniwu muchibaba chinafumuhu.

Dichi chipompelu chaweniKristu chenzala nawantu amwekeshaña wushona niluwi lwabadika. Kukeña dikwaleteshaña antu amuchipompelu kufwila kuwana njila yakukwashilamu antu. Hamuloña wakukala kwashiyashana kunakumonawu antu, anshona niantuluwa adi muchipompelu hekwawu anakukeña kuyakamena nikuyitiyila wushona. Komana munateli kukwasha antu amuchidiwu adi nawuzweñi, abula yitumbu yashikila, abula matala, nikukala kukwawu kwamonaña muntu himuntu?

Talenu chuma chamwekeni kudi adisumbula mwituña daGreece. Iyala wakatili kalepa. Yena niñodindi ayitwalili kuchipatela chakwakulehi. Dichi tumali twawu twantesha twafumineña mukukumuna malalanji. Hanu dinu hinyi wadi kuyikumwina malalanji awu hampinji yayiluwu kuchipatela? Chipompelu chawu chafuukwiluhu kuyikumwina. Akumwini malalanji  ejima nikuyilandishila kulonda ekaluku namali akudikwasha nachu, cheñi nawa nikuwundisha nyichima yawu.

Tunateli kumwekesha wushona munjila yayivulu. Chakutalilahu, eniKristu akweti wushona atoñojokaña nawu, mpinji jikwawu chuma chakeñañawu antu anakukabakana hikuyihempula kudi antu anateli kutiya kwaaba kwawu, nikuyikundeja kuhitila mukuzatisha Nsona.—Aroma 12:15.

Ikalenu Hamu naWantu Amwekeshaña Wushona

Chipompelu chamukaayi kejima chaweniKristu, hichiswamu mwekala kuwunda nikukundeja nawa dimu mwamwekeshañawu wushona niluwi. EniKristu alala eluka nawu kumwekesha wushona kwaletaña ikoku, ilaña wukatu watemunaña. Dichi hampinji yinakwesekawu kwimbujola Tata yawu wamwiwulu, afwilaña kwikala “namuchima wawushona” munjila jajiwahi.

A Yinsahu jaYehova anakuyitambika kulonda mudimweni chaditiyilañawu eniKristu wushona, chiyadikeñawu nichiyadakamenañawu. Aneluki chikupu nawu chimwenza akayitambwila nachisambu chikupu.—Aroma 15:7.

[Mwevulu wudi hefu 5]

Pawulu wakonkomweneni eniKristu akuKolose kwikala namuchima wawushona

[Nyevulu yidi hefu 7]

Hampinji yelukileñayi Yesu nindi antu anakukeña wukwashu, wayitiyilileña wushona nikuyikwasha