Shenu Kashinshi ‘Kuntañishilu Yenu’

‘Shimunaku mazu, . . . konkololaku, hosholaku, konkomwenaku, nakudiwunjika nawa nakwiluka kutañisha.’—2 TIMOTEWU 4:2.

1. Indi Yesu wayilejeli atumbanji twindi kwiladi, nawa chakutalilahwinyi chemikiliyi?

 HELA chakwila Yesu wakoñeli nyidimu yayiwahi nankashi yakuuka mumudimu windi waheseki, amwilukili nawu hintañishi bayi neyi mukwakukoña yihayamisha hela mukwakuukaku. (Maku 12:19; 13:1) Yesu walemesheli chikupu mudimu wakushimwina nsañu yayiwahi yaWanta waNzambi, niatumbanji twindi makonu alemesha mudimu wakushimwina. EniKristu akweti mudimu wakutwalekahu kwilisha atumbanji kuhitila mukutañisha antu kuhemba yuma yejima yayilejeliyi Yesu.—Matewu 28:19, 20.

2. Chumanyi chitwatela kwila hakwila nawu tuzati mudimu wetu wakushimwina?

² Hakwila nawu tuzati mudimu wetu wakwilisha atumbanji, mpinji yejima twafwilaña kwikala antañishi amawahi. Kapostolu Pawulu wakonkomweneni hakulema kwakwikala ntañishi wamuwahi hampinji yasonekeleliyi mukwawu mukwakushimwina Timotewu. Wahosheli nindi: “Dihembi eyi aweni, wuhembi kuleja kuwalejaña akwenu. Kakelaku mwenimu, muloña  chiwukwilamu wukudamwina eyi aweni niantu akukutiya.” (1 Timotewu 4:16) Iku kuleja kwadiña nakutenayi Pawulu bayi neyi hikukumina dakuleja muntu maanaku. Ankalakali awiniKristu akuluka yitembi afwilaña kushika hanyichima yawanta nikuyisañumuna kulonda ahimpi chihandilu chawu. Iku dikwiluka kutunakutena. Dichi, tunateli ‘kwilukisha kutañisha’ ñahi hakushimwina nsañu yayiwahi yaWanta waNzambi kudi antu?—2 Timotewu 4:2.

‘Ilukenu Kutañisha’

3, 4. (a) Tunateli kwikala ñahi ‘elukisha kutañisha’? (b) Indi Shikola yaMudimu waTeokalatiki yatukwashaña ñahi kwikala antañishi akuluka yitembi?

³ Dikishonari yimu yalumbulula izu ‘dakwiluka’ nawu ‘hiwuswa wakwiluka chuma kuhitila mukudiza, kukoña, hela kushinshika.’ Twatela kusha kashinshi kuniyi yuma yejima yisatu hakwila twikali antañishi amawahi ansañu yayiwahi. Tunateli kutiyishisha nsañu yitunakutaña kuhitila hohu mukulomba hakudiza. (Tañenu Masamu 119:27, 34.) Kushinshika chinakutañisha ankalakali akuluka yitembi kwatukwashaña kwiluka chiyatañishaña nikuyimbujola. Nawa neyi tukufwilaña kuzatisha nsañu yitunakudiza mafuku ejima chikutukwasha kuwahisha wuswa wetu wakutañisha.—Luka 6:40; 1 Timotewu 4:13-15.

⁴ Yehova diyi Nleji yetu Muneni. Kuhitila mukuloñesha kwindi kwamwekanaña, wayilejaña ambuñindi ahamaseki jinjila jatela kulondelawu hakukalakala mudimu wawu wakushimwina. (Isaya 30:20, 21) Muniyi njila, yipompelu yejima yekalaña naShikola yaMudimu waTeokalatiki mulungu nimulungu, iyi shikola ayiloñeshela kulonda kukwasha ejima asonekesha kwikala akwakushimwina aWanta waNzambi akuluka yitembi. Mukanda waweni wazatishañawu muniyi shikola hiBayibolu. Izu daYehova donenawu datulejaña nsañu yitwatela kutañisha. Kubombelahu, dashimunaña njila jajiwahi jakutañishilamu nawa jatelela. Shikola yaMudimu waTeokalatiki kakavulu yatwanukishaña nawu tunateli kwikala antañishi amawahi neyi ntañishilu yetu yishindamenaña Hezu daNzambi, kuzatisha malwihu chachiwahi, kutañisha munjila yapela, nikumwekesha netu twayikeña antu chikupu. Tushinshikenu haniyi yikuma chimu nachimu. Kuhiñahu tukuhanjeka chitwatela kushika hamuchima wakadizi.

Kutañisha Kwenu Kushindameneña Hezu daNzambi

5. Indi ntañishilu yetu yatela kushindamena hachumanyi, nawa muloñadi?

⁵ Yesu ntañishi muneni wabadika antañishi awantu ejima, wadiña nakutañisha kushindamena haNyikanda. (Matewu 21:13; Yowanu 6:45; 8:17) Hahosheli yuma yakufuma hamuchima winduku, ilaña wahosheli yuma yakufuma kudi Wamutemesheli. (Yowanu 7:16-18) Ichi dichi chakutalilahu chitwalondelaña. Dichi, yuma yitwahoshaña mumudimu wakwitala nikwitala hela hakulombola kudiza kwaBayibolu yatela kushindamena Hezu daNzambi. (2 Timotewu 3:16, 17) Kwosi yitoñojoka yetu yayiwahi yatela kwesekana nakulema niñovu yekala muNyikanda yonenawuku. Bayibolu yikweti ñovu. Chikuma chejima chitunakufwila kukwasha kadizi kutiyishisha, njila yayiwahi yitwatela kuzatisha yidi yakumuleja kadizi kutaña chahosha Nsona hanochu chikuma.—Tañenu Aheberu 4:12.

6. Chumanyi chatela kwilayi ntañishi kulonda kwiluka nindi kadizi natiyishishi nsañu yinakudizayi?

 ⁶ Ichi hichinayi mukwila nawu ntañishi mwiniKristu hatela kuloñesha kudiza kwaBayiboluku. Ilaña, chinakukeñeka kutoñojokelahu dehi kulonda kwiluka nsona yinatenuwu yatela kutaña ntañishi hela kadizi muBayibolu hampinji yakudiza. Kakavulu, chekala chachiwahi kutaña nsona yahoshaña hansañu yitwakuhwelela. Chekala chachiwahi cheñi kukwasha kadizi kutiyishisha nsona yejima yikutañayi.—1 Akorinda 14:8, 9.

Zatishenu Malwihu Amawahi

7. Muloñadi kuzatisha malwihu chikwekalila njila yayiwahi yakutañishilamu?

⁷ Kuzatisha malwihu amawahi kwaleñelaña kutoñojoka nawa kwakwashaña ntañishi kumushika kadizi hamuchima. Dichi chatela mumulumbulwili kadizi munatalishi nsona, mwilenu yayilumbulwili. Mpinji yikwawu munateli kubombelahu lwihu lukwawu hela malwihu amavulu kulonda kumukwasha kadizi kutiyishisha chachiwahi. Neyi muzatisha malwihu hakutañisha kadizi, dikwila nawu, himunakumukwasha hohu kutiyishisha chikuma chimunakuhoshahu kulonda yatiyishishi chikupuku, ilaña yomweni yeluki ochu chikuma.—Matewu 17:24-26; Luka 10:36, 37.

8. Tunateli kwiluka ñahi yitoñojoka yakadizi?

⁸ Njila yakudiza yazatishawu munyikanda yetu yekala yamalwihu niñakwilu. Chakadi kujina, antu amavulu yimwadizaña nawu Bayibolu anyakalaña kwakula malwihu asonekawu, kuzatisha nsañu yidi mumaparakalafu anowu malwihu. Ilaña, ntañishi wakeñaña kushika hamuchima wakadizi hakutiya kuwaha hohu nañakwilu yaloñaku. Chakutalilahu, kadizi nateli kulumbulula chachiwahi chahosha Bayibolu kutalisha hansañu yawuvumbi. (1 Akorinda 6:18) Hela chochu, malwihu amawahi akukeña kwiluka yitoñojoka yakadizi akumwekesha chatoñojokañayi hansañu yinakudizayi. Dichi, ntañishi nateli kwihula nindi: “Muloñadi Bayibolu chiyakanishila kwila wuvumbi namuntu wabula kwikala wamumaluwi? Indi hanilu lushimbi lwahanayi Nzambi watoñojokañahu ñahi? Komana watoñojokaña neyi wunatela kuhetelamu hakwovwahila nshimbi yaNzambi yaloña?” Chikwakulayi awa malwihu chikumwekesha yitoñojoka yakadizi.—Tañenu Matewu 16:13-17.

Dizishenu muNjila Yapela

9. Chumanyi chitwatela kwanukaña hampinji yitunakudizisha nsañu yamuNsona?

⁹ Nsañu yalala yayivulu yekala Mwizu daNzambi yapela chikupu. Hadaha, antu yitwadizaña nawu Bayibolu ayiluwañesha dehi nantañishilu yamunsakililu yakutwamba. Mudimu wanetu antañishi wekala wakwilisha nsañu yamuBayibolu kwikala yapela kutiyishisha. Antañishi akuluka yitembi atañishaña nsañu munjila yapela, yatiyakana, nawa yoloka. Neyi tulondela iji njila, hitukwilisha chalala kwikala chakala kutiyishisha kubadika chichekala chapelaku. Tondolwelenu yikuma yinakubula kukeñeka. Hichinakukeñeka kuhoshahu hayikuma yejima yansona yitukutañaku. Hoshenu hohu hansañu yalema kulonda mulumbululi chikuma chimunakudizahu. Mukuhita kwampinji kadizi wukatiyisha nsañu yalala yakunama yamuNsona hampinji yikuyilañaku hambidi mukwiluka kwindi.—Aheberu 5:13, 14.

10. Yumanyi yelukishaña kuvula kwansañu yimukutaña hakudiza kwaBayibolu?

¹⁰ Hampinji yakudiza, mwatela kudiza nakushika hadihi? Hakwila twiluki hakukumina, twatela kwikala nakashinshi. Wuswa ninshakaminu yakadizi yatela kushiyashana nayantañishi, ilaña mpinji yejima twatela kwanuka netu chikokwanyi chetu hamu neyi antañishi chidi chikukwasha kadizi kwikala nachikuhwelelu chakola. Dichi, twatela kumwinka mpinji yashikila yakutaña, yatiyishishi, nikwiteja nsañu yalala yekala Mwizu daNzambi. Hitwatela kudiza nsañu yayivulu kubadika yatela kutiyishishayiku. Hampinji yoyimu twatela kudiza nsañu chakubula kufunta hanyima. Dichi kadizi wetu chatiyishishayi chikuma, tukuya hachikuma chikwawu.—Akolose 2:6, 7.

11. Chumanyi chitukudizilaku kudi kapostolu Pawulu kutalisha hakutañisha?

¹¹ Hampinji yahosheleñayi nawantu amaha,  kapostolu Pawulu wadiña nakushimwina munjila yapela. Hela chikwila, wadiña wataña chikupu, hazatishileña mazu akolaku. (Tañenu 1 Akorinda 2:1, 2.) Hamuloña wakwila nsañu yalala yamuNsona yapela yakokolaña nikuzañalesha antu ashinshika. Hakutiyishisha nsañu yalala hichakeñekaña muntu kwikala wataña chikupuku.—Matewu 11:25; Yililu 4:13; 1 Akorinda 1:26, 27.

Kwashenu Atudizi Alemeshi Nsañu Yinakudizawu

12, 13. Chumanyi chikumusañumuna kadizi kuzatila hayuma yinakudizayi? Lumbululenu.

¹² Hakwikala antañishi akuluka yitembi, ntañishilu yetu chiña yishikaña hamuchima wakadizi. Kadizi watela kwiluka chatela kuzatishayi nsañu halwindi, chiyatela kumukwasha, nichatela kuwahishayi chihandilu chindi neyi yalondela nshimbi yamuNsona.—Isaya 48:17, 18.

¹³ Chakutalilahu, hadaha tunakuhanjeka hansona yaAheberu 10:24,25, yakoleshaña eniKristu kupompaña nawakwawu akwakwitiya kulonda kudikolesha najiNsona nikudikunda kwakuwahi. Neyi chakwila kadizi kanda yatachiki kuwanika kukupompa kwachipompelu, tunateli kumuleja mukwihihisha kupompa chikwalombolewaña niyuma yitukadiza. Tunateli kumuleja netu kupompa kwachipompelu himbadi yakudifukula kwetu nawa kwatukwashaña hamuntu hamuntu. Kufumahu tukumuleja kadizi yakenzi nakupompa. Watela kutiyilila nshimbi yamuNsona muloña wakukeña kumwovwahila Yehova, bayi muloña wakukeña kuzañalesha muntu wamudizishañaku.—Aŋalija 6:4, 5.

14, 15. (a) Yumanyi yatela kudiza kadizi waBayibolu kutalisha hadi Yehova? (b) Indi kwiluka yililu yaNzambi kwatela kumukwasha ñahi kadizi waBayibolu?

¹⁴ Kukooleka kwakuwahi kuyawanañawu atudizi hakudiza Bayibolu nikuzatisha nshimbi yekalamu hikumwiluka nikumukeña Yehova hamu neyi muntu. (Isaya 42:8) Bayi neyi Yehova hiTata wakukeña hohu, Nleñi nawa Mwini yuma yejimaku ilaña wamwekeshaña cheñi yililu niñovu yindi kudi antu amukeña nawa amukalakelaña. (Tañenu Kwidika 34:6, 7.) Chelili Mosi wudi kwakwihi nakufumisha muza waIsarela muwunkoli muEjipitu, Yehova wadilumbulwili yomweni kuzatisha mazu akwila nawu: “Ami yami mwomunekalila kwami.” (Kwidika 3:13-15) Ichi chatalishili mukwila nawu, hakwila yashikiji nkeñelu yindi kutalisha hadi antu jindi atondewa, Yehova wateleli kwikala mwejima mukukeña kwikalayi. Chafuminumu, aIsarela amwilukili Yehova hamu neyi Mukwakuyipulwisha, Mukwanjita, Mukwakuyinka yakudya, Mukwakushikija yikaninu, nawa wayikwashili munjila jikwawu.—Kwidika 15:2, 3; 16:2-5; Yoshuwa 23:14.

¹⁵ Atudizi etu hiyatela kuyikwasha kudi Yehova muchihayamisha neyi chiyamukwashiluwu Mosuku. Hela chochu, atudizi etu chiyakukulañawu muchikuhwelelu nikulemesha yuma yinakudizawu nikutachika kuyizatisha, chakubula kujina akumona kulema kwakumukuhwelela Yehova kulonda ayinki ñovu, maana, niwunlomboli. Chakwilawu mwenimu, niwena akumwiluka Yehova nawu himukwamaana niMukwakuyileja maana watela kukuhwelelawu, Mukwakuyikiña, Mukwakuyinka yuma yawu  yejima.—Masamu 55:22; 63:7; Yishimu 3:5, 6.

Mwekeshenu Kukeña

16. Muloñadi kwilukisha kutañisha chikwabulila kwikala chuma chasweja kulema hakwikala ntañishi wakuluka yitembi?

¹⁶ Neyi munakutoñojoka nenu himwelukisha kutañishaku, bayi muzeyaku. Yehova niYesu diwu anakulombola mudimu wakutañisha wunakuzatika mukaayi kejima. (Yililu 1:7, 8; Chimwekeshu 14:6) Anatweshi kukiswila mudimu wetu kulonda mazu etu ashikeña hanyichima yawantu ashinshika. (Yowanu 6:44) Kukeña kwamwekeshañayi chikupu ntañishi kudi kadizi windi kunateli kuwahisha mwakañanyañayi kuwanishayi. Kapostolu Pawulu wamwekesheli chikupu nindi welukili kulema kwakukeña antu anakutañishawu.—Tañenu 1 Atesalonika 2:7, 8.

17. Tunateli kumwekesha ñahi kukeña chikupu kadizi waBayibolu wudi wejima?

¹⁷ Chochimu tunateli kumwekesha kukeña kadizi waBayibolu wudi wejima kuhitila mukwikala nampinji yakumwiluka. Hampinji yitunakudiza nindi nshimbi jamuNsona, tunateli kwiluka chidi chihandilu chindi. Tunateli kumona netu natachiki dehi kuzatisha yikuma yikwawu yinakudizayi muBayibolu. Ilaña kunashali mumaluña mukwawu munakukeñeka kuhimpayi. Kuhitila mukumukwasha kadizi kwiluka chatela kuzatishayi yuma yinadiziyi mukudiza kwaBayibolu, tunateli kumukwasha chikupu kwikala kambanji walala waKristu.

18. Muloñadi chichalemena kulomba hamu nakadizi nikumutena mukulomba?

¹⁸ Chuma chalema nankashi, chidi chakulomba hamu nakadizi nikumutena mukulomba. Kadizi watela kwiluka chikupu nindi tunakukeña kumukwasha yamwilukishi Nleñi yindi, yakundami kwakwihi naYena, nawa yaheteli muwunlomboli Windi. (Tañenu Masamu 25:4, 5.) Hampinji yitunakulomba kudi Yehova kulonda amukwashi kadizi kuzatisha yuma yinakudizayi, kadizi wukwiluka kulema kwakwikala ‘mukwakwila mwaya mazu.’ (Yakoba 1:22) Cheñi kadizi chatiyayi chitunakulomba nakashinshi, niyena wukudiza chakulomba. Kukwasha atudizi aBayibolu kwikala nawubwambu naYehova kwaletaña muzañalu chikupu.

19. Chumanyi chitukahanjekahu muchibaba chinalondeluhu?

¹⁹ Tudi namuzañalu hakwiluka netu aYinsahu akubadika hayihita 6 nichikuku mukaayi kejima anakudikita chikupu nakudiza ‘kwiluka kutañisha,’ nachikonkwanyi chakukwasha antu ashinshika kwovwahila yuma yejima yatulejeliyi Yesu. Yumanyi yinakufumamu mumudimu wetu wakushimwina? Chibaba chinalondeluhu chikwakula ilu lwihu.

Komana Munakwanuka?

• Muloñadi eniKristu chiyatelela ‘kwiluka kutañisha’?

• Tunateli kuwahisha ñahi ntañishilu yetu?

• Chumanyi chatela kuwahisha mutwakañanyaña kuwanisha hakutañisha?

[Malwihu aKuzatisha haKudiza]

[Mwevulu wudi hefu 13]

Komana mwasonekesha muShikola yaMudimu waTeokalatiki?

[Mwevulu wudi hefu 15]

Muloñadi chichalemena kumuleja kadizi wenu kutaña muBayibolu?

[Mwevulu wudi hefu 16]

Lombelenu hamu nakadizi wenu nawa mutenenu mukulomba