‘Shenu Muchima kuMudimu wuMwatambwili Kudi Mwanta’

‘Shaku muchima kumudimu wunatambuli mudi Mwanta, wuwukalakali chalala.’—AKOLOSE 4:17.

1, 2. EniKristu akweti mudimwinyi wakukalakela antu?

 TUKWETI mudimu weneni wakukalakela antu yitwashakama nawu. Kufuukula kuyafuukulañawu makonu kukayiletesha kupuluka hela kufwa hampinji ‘yayihuñu yeneni.’ (Chimwekeshu 7:14) Nsoneki wamukanda waYishimu yonenenuwu wahosheli nindi: “Yipulwishi awa adi nakutwalawu kukufwa, bayi wuleka kufuntisha awa akukeña kutapewaku.” Awa mazu alema chikupu! Neyi tukubula kuyisoñamisha antu hakufuukula kwawu chikutuletesha kwikala namuloña wamashi. Nawa nsañu yoyimu yatwalekahu nawu: “Neyi wukwila neyi, Etu kwetu hitwachilukaku, wapezeleshaña nyichima yawantu hatoñojokaña mwokuku? Niwahembaña wumi weyi hachilukaku? Hakayinka antu ejima yuma yashikila munyidimu yawuku?” Dichi ambuña aYehova hiyatela kuhosha nawu ‘etu kwetu hitweluka’ kukala kunakumona antuku.—Yishimu 24:11, 12.

² Yehova walemesha wumi. Wakonkomwenaña ambuñindi kuzata nañovu kulonda kupulwisha antu amavulu. Mukwakukalakala waNzambi wejima watela kushimwina nsañu yakupulwisha antu yekala Mwiizu daNzambi. Mudimu wetu wadifwana nawamukwakutalatala wasoñamishaña antu neyi namoni nindi kudi kukala. Hitunakukeña mashi awantu adi muwumbanji wakujilumuka akekali hanyitu yetuku. (Ezekeli 33:1-7) Komana chidi chalema nankashi kutwalekahu ‘kushimuna mazu’!—Tañenu 2 Timotewu 4:1, 2, 5.

3. Nsañwinyi yitukudiza munichi chibaba nimuyibaba yiyedi yikalondelahu?

³ Muchinu chibaba mukudiza chimwatela kumanisha kukala mumudimu wenu wakupulwisha antu nichimwatela kukwasha antu amavulu. Chibaba chikalondelahu chikayikwasha kwikala antañishi elukisha kudizisha nsañu yalala yalema. Chibaba chamuchisatu chikahosha hayuma yayiwahi yinakuwanawu akwakushimwina aWanta mukaayi kejima. Henohu kanda tudizi iyi nsañu, chikuwaha neyi tukusambila kushinshika hayuma yinakuletesha mafuku etu kwikala akala.

Chinaleteshi Antu Amavulu Kubula Kwikala naKuchiñeja

4, 5. Kukalanyi kunakumonawu antu, nawa amavulu anakwiladi?

⁴ Yuma yinakumwekana mukaayi yinakumwekesha nawu tunakushakama mumafuku ‘akukuma kwanyaka yamakonu’ cheñi nawu kukuma kudi mukamwihi. Antu anakumona yuma yahosheliyi Yesu niatumbanji twindi nawu yikamwekana “kumafuku akukuminina.” “Yihuñu yakutachika,” yabombelamu majita, nzala, nyitentanshi, nimakabi amakwawu anakuyandisha antu. Kuluwalala, lwisu, niyililu yakubula kumulemesha Nzambi yinatandi kwejima. Hela antu anakufwila kwovwahila nshimbi jamuBayibolu, niwena anakushakama ‘munyaka yakala.’—Matewu 24:3, 6-8, 12; 2 Timotewu 3:1-5.

⁵ Ilaña antu amavulu aneluki wanyi kulema kwakweni kwayinjikijilu yinakumwekana mukaayi. Ichi chinaleteshi amavulu kwakamena mwakudikiñila aweni niyisaka yawu. Kufwisha muntu wakeñawu hela kukala kwahalwawu kwakojejaña antu amavulu kwikala nachineñi.  Awa antu adana kuchiñeja muloña wakubula kwilukisha chaleñelaña yuma yamuchidiwu kumwekena nikwakuwana wukwashu.—Aefwesesa 2:12.

6. Muloñadi ‘Babiloni Muneni’ chinakañenyiyi kukwasha antu jindi?

⁶ ‘Babiloni Muneni,’ wanta wakaayi wansakililu yakutwamba, hanakukundeja muchidi wamuntuku. Cheñi nawa, muloña ‘wavinyu yawuvumbi windi,’ naleteshi antu amavulu kutadañila nakuluwankana lwakuspiritu. Kubombelahu, kuhitila mukwikala neyi chivumbi, nsakililu yakutwamba yinadimbi nikuyula “anyanta ankanu aheseki,” kuzatisha ntañishilu yakutwamba nikupanda kulonda antu ovwahileña jinfulumendi jawu. Dichi, nsakililu yakutwamba yinakulombola nikuluwañesha, cheñi nawa, yinaleki nsañu yalala yansakililu.—Chimwekeshu 17:1, 2, 5; 18:23.

7. Indi antu amavulu adi munjilanyi, nawa tunateli kukwasha ñahi amakwawu?

⁷ Yesu watañishili nindi antu amavulu adi mujila yabwambañana yaya kukujilumuka. (Matewu 7:13, 14) Amakwawu adi muniyi njila yabwambañana muloña anakaani mumushikila yuma yatañishaña Bayibolu, ilaña amavulu adi muniyi njila muloña anayidimbi, hela akulumpi jansakililu anakañanyi kuyidizisha chuma chacheni chakeñañayi Yehova kudi wena. Hadaha amakwawu anateli kuhimpa chihandilu chawu neyi chakwila ayileja chikupu chalala chamuNsona chakwila mwenimu. Ilaña antu akushala muBabiloni Muneni niakutwalekahu kukaana nshimbi jaBayibolu hiyamba kapuluka “yihuñu yeneni” yinakwinzaku.—Chimwekeshu 7:14.

Twalekenuhu Kushimwina ‘Chakadi Kuleka’

8, 9. Chumanyi cheliluwu eniKristu amuyaaka nkulakaji yatachi hampinji yamweniwu ikañesha, nawa muloñadi?

⁸ Yesu wahosheli nindi atumbanji twindi akashimwinaña nsañu yayiwahi yaWanta nikwilisha atumbanji. (Matewu 28:19, 20) Dichi, eniKristu alala mpinji yejima eluka nawu kukalakala mumudimu wakushimwina kwamwekeshaña kashinshi kudi Nzambi nawa dihashindamena chikuhwelelu chawu. Dichi, atumbanji twaYesu akusambila atwalekeluhu kushimwina hela chikwila adiña nakuyikabisha. Ashindameneni hadi Yehova kulonda yayikoleshi nikumulomba yayikwashi kutwalekahu ‘kushimuna mazu [indi] chakadi woma.’ Yehova wakwili kulomba kwawu kuhitila mukuyinka spiritu yajila, nawa ahosheli mazu aNzambi chakadi woma.—Yililu 4:18, 29, 31.

⁹ Chelili ikañesha disweji, komana atumbanji twaYesu alekeli kushimwina nsañu yayiwahi? Alekeli wanyi. Akulumpi jansakililu jawaYudeya ayikasili apostolu, ayikabishili nawa ayeteli muloña mudimu wawapostolu wakushimwina wayihilishileña. Apostolu ‘hiyalekeli kuleja antu nakushimuna nsañu yayiwahi hadi Yesu  nawu diyi Kristuku.’ Elukili chikupu nawu ateleli ‘kwovwahila Nzambi neyi nyuli bayi antuku.’—Yililu 5:28, 29, 40-42.

10. Kukalanyi kwamonañawu eniKristu makonu, ilaña yumanyi yafumaña muyililu yawu yayiwahi?

¹⁰ Makonu ambuña aNzambi amakwawu kanda omikeñahu dehi mahumpu hela kuyisha mukaleya hamuloña wamudimu wawu wakushimwinaku. Hela chochu, eniKristu alala ejima amonaña kukala kwashiyashana. Chakutalilahu, hadaha chilenji chenu chadizishewa naBayibolu chikuyiletesha kwila yuma yabula kutelela hela yililu yikuyiletesha mwikala ambukaku. Akwenu yimwazataña nawu, akashikola, niatuñi nenu, anateli kutoñojoka nawu mwambukaku muloña kufuukula kwenu kwashindamena hanshimbi yamuBayibolu. Hela chochu, bayi mwiteja nhoshelu yawu yabula kutelela yiyizeyeshuku. Muloña kaayi kadi mumwidima wakuspiritu, ilaña eniKristu atela ‘kutoñeka neyi manoñu.’ (Afwilipi 2:15) Hadaha antu ashinshika akumona nikuhameka nyidimu yenu yayiwahi nakumulemesha Yehova.—Tañenu Matewu 5:16.

11. (a) Indi antu amakwawu anateli kwiladi kutalisha kumudimu wakushimwina? (b) Makabi amuchidinyi amweniyi kapostolu Pawulu, nawa welilidi?

¹¹ Twatela kwikala akola kulonda tutwalekuhu kushimwina nsañu yaWanta. Antu amakwawu, hela awusoku wenu, anateli kuyisekesha hela kweseka kuyikañesha. (Matewu 10:36) Kapostolu Pawulu amweteli mapampa kakavulu muloña wamudimu windi wakushimwina. Talenu chuma cheliliyi, wasonekeli nindi: “Helili twakaba dehi nakutwila chatama, hitukuumika mudi Nzambi yetu nakuyishimwinenu nsañu yaNzambi yayiwahi, iku nikumona makabi amavulu.” (1 Atesalonika 2:2) Eña, chamukalilili Pawulu kutwalekahu kushimwina nsañu yayiwahi hanyima yakumukwata, kumusubula mahina, kumweta tubama, nikumunatila mukaleya. (Yililu 16:19-24) Hanu dinu ñovu yakutwalekahu kushimwina chakadi woma wayiwanini kudihi? Wadiña wakola muloña wakeñeli chikupu kukoña mudimu windi wakushimwina wamwinkeluwu kudi Nzambi.—1 Akorinda 9:16.

12, 13. Kukalanyi kwamonañawu amakwawu, nawa anakweseka ñahi kukwimanisha?

¹² Tunateli cheñi kumona kukala kwakutwalekahu kuzata nañovu mumaluña mwabulaña kuwanika antu kakavulu hamatala hela mumaluña mwekala antu adiwulaña nsañu yaWanta yitwashimwinaña. Chumanyi chitwatela kwila mumaluña amuchidiwu? Chikuwaha neyi tukubula woma nakudinkaku chikupu kulonda kushimwina antu wunsahu wamumpanji. Tunateli cheñi kuhimpa ndandanda yetu hela kushimwina nankashi mumaluña mutwatela kuwana antu amavulu.—Esekejenu Yowanu 4:7-15; Yililu 16:13; 17:17.

¹³ Wushinakaji, niyikatu, hikukala kukwawu kunakuumikawu amavulu, yumiyi yinateli kuyikañesha kuzata nañovu mumudimu wakushimwina. Neyi mwakatakataña, hela mwashinakaja dehi, bayi muzeyaku. Yehova weluka kukala kwenu nawa walemesha mudimu wumwakalakalaña.  (Tañenu 2 Akorinda 8:12.) Hela chakwila munakumona makabi adi ejima chili ikañesha, kadiwu hela yikatu—mwatela kuzata kwesekeja nañovu yenu mumudimu wakushimwina nsañu yayiwahi kudi amakwawu.—Yishimu 3:27; esekejenu Maku 12:41-44.

‘Shenu Muchima kuMudimu Wenu’

14. Kapostolu Pawulu wemikilili akwawu eniKristu chakutalilahwinyi, nawa kufumbanyi kwaheniyi?

¹⁴ Kapostolu Pawulu wazatileña nañovu chikupu mumudimu windi wakushimwina, nawa wakolesheli akwawu akakwitiya kwila chochimu. (Yililu 20:20, 21; 1 Akorinda 11:1) Muntu wakolesheliyi Pawulu chikupu wadiña mwiniKristu wamuyaaka nkulakaji yatachi yateneneñawu nawu Akipusa. Mumukanda wasonekeleliyi Akolose, Pawulu wasonekeli nindi: “Mwakamwili Akipusa nenu, Shaku muchima kumudimu wunatambuli mudi Mwanta, wuwukalakali chalala.” (Akolose 4:17) Twamwiluka wanyi Akipusa nichihandilu chindi hitwachilukaku, ilaña watela wetejeli mudimu wakushimwina. Neyi wudi mwiniKristu wadihana kudi Nzambi, nineyi nawa weteja mudimu wakushimwina. Komana munakutwalekahu kusha muchima kumudimu wakushimwina kulonda muwukalakali chalala?

15. Indi kudihana kwawiniKristu kwabombelamu chumanyi, nawa malwihwinyi yitwatela kudihula?

¹⁵ Henohu kanda tupapatishewi, twadihanini kudi Yehova mukulomba kwakufuma kumuchima. Ichi chayili mukwila nawu twafuukwiluhu kwila nkeñelu yindi. Dichi twatela kudihula netu, ‘Komana kwila nkeñelu yaNzambi dichuma chacheni chinalemesha chikupu muchihandilu chami?’ Tunateli kwikala nanyidimu yayivulu yakeñañayi Yehova nindi tukalakali—chidi neyi kuloñeshela chisaka chetu yakudya. (1 Timotewu 5:8) Hanu dinu twazatishaña ñahi mpinji yashalañaku niñovu yetu? Chumanyi chitwalemesha muchihandilu chetu?—Tañenu 2 Akorinda 5:14, 15.

16, 17. Yumanyi yatela kutoñojokahu eniKristu atwansi hela ana adi nanyidimu yantesha?

¹⁶ Komana wudi mwiniKristu wakansi wadihana wunamanishi hela wudi kwakwihi nakumanisha shikola? Chakadi nikujina kanda wikali namudimu weneni wakuhemba chisaka. Dichi dinu, wunafuukuluhu hodi muchihandilu cheyi? Yumanyi yiwukufuukulahu hakwila wutweshi kushikija chikaninu cheyi chakwila nkeñelu yaYehova munjila yayiwahi? Amakwawu atanjika nyidimu yawu kulonda kuzataku wupayiniya, nawa adi namuzañalu weneni chikupu.—Masamu 110:3; Mukwakutaŋisha 12:1.

¹⁷ Hadaha wakula dehi. Nawa wazataña mudimu wakumujimba ilaña hiwukweti nyidimu yayivuluku, wudi hohu namudimu wakudihemba eyi aweni. Chakubula kujina watiyaña kuwaha kuzata nyidimu yamuchipompelu kwesekeja nachidi ndandanda yeyi. Komana watela kukeña kwikala namuzañalu weneni? Komana wunatoñojokuhu kutoheshaku mudimu weyi wakushimwina? (Masamu 34:8; Yishimu 10:22) Mumaluña amakwawu, munakukeñeka kuzata chikupu kulonda kushimwina antu ejima nsañu yalala yakupulwisha wumi. Komana kwila muhimpa chihandilu chenu, hadaha muya nakuzatila kwiluña kudi kukankila kweneni kwawakwakushimwina aWanta nehi?—Tañenu 1 Timotewu 6:6-8.

18. Kuhimpanyi kweliluwu aKevin naElena, nawa chumanyi chafuminumu?

¹⁸ Talenu chakutalilahu chaKevin niElena, akuUnited States. * Neyi chichekala mwiluña dawu kudi chañadima nimukwenzi anadisumbuli, atoñojokeli nawu atela kulanda itala. Wejima wawu azatileña nawa adiña nachihandilu chachiwahi nankashi. Ilaña mudimu wawu wakumujimba ninyidimu  yahetala yayikañesheleña kwikala nampinji yeneni yakuzataku mumudimu wakushimwina. Elukili nawu adiña nakuumbila mpinji yeneni niñovu yawu kumahetawu. Hela chochu, chiyamwenuwu apayiniya adisumbula akweti chihandilu chapela nawa chamuzañalu, aKevin naElena afuukwiluhu kuhimpa chihandilu chawu. Hanyima yakulomba kudi Yehova kulonda yayikwashi kufuukula chachiwahi, alandishili itala dawu nakuya mwitala danyanya. Elena wakehesheliku mpinji yazatileñayi mudimu wakumujimba nawa wekalili payiniya. Kevin walekeli mudimu windi wakumujimba wampinji yejima nakutachika wupayiniya muloña wamuzañalu wawanineñayi ñodindi mumudimu wakushimwina. Mukuhita kwampinji, ayili kwiluña daSouth America kwadiña kukankila kweneni kwawakwakushimwina aWanta. Kevin wahosheli nindi, “mpinji yejima twadiña namuzañalu mumaluwi, ilaña chitwashikijili yikonkwanyi yakuspiritu, muzañalu wetu waswejeleluku.”—Tañenu Matewu 6:19-22.

19, 20. Muloñadi mudimu wakushimwina nsañu yayiwahi chiwunekalili walema chikupu makonu?

¹⁹ Mudimu wakushimwina nsañu yayiwahi diwu mudimu walema nankashi wunakuzatewa heseki makonu. (Chimwekeshu 14:6, 7) Watukwashañaku kujilika ijina daYehova. (Matewu 6:9) Nsañu yamuBayibolu yinakuhimpa yihandilu yawantu amavulu anakuyiteja chaaka nichaaka, nawa yinateli kuyilombola kukupuluka. Kapostolu Pawulu wehwili nindi, “Akutiya ñahi chakadi mukwakushimuna?” (Aroma 10:14, 15) Mwalala, chinateli kukala chikupu neyi kwosi wakushimwina. Komana kwila mufuukulahu kuzata nañovu jenu jejima kulonda mukalakali mudimu wenu wakushimwina nehi?

²⁰ Njila yikwawu yimwatela kukwashilamu antu kwiluka kulema kwananu mafuku akala niyuma yikafuma muyuma yinakufuukulawu yidi yakwikala ntañishi washikahu chikupu. Muchibaba chinalondeluhu twakadiza chimwatela kwila mwenimu.

[Tumazu twaheshina]

Mukwakula Nenudi?

• Indi eniKristu akweti mudimwinyi wakukalakela antu?

• Tunateli kuumika ñahi nakukula mumudimu wetu wakushimwina?

• Tunateli kukalakala ñahi chalala mudimu wetu wutwatambwili?

[Malwihu aKuzatisha haKudiza]

[Mwevulu wudi hefu 9]

Twatela kwikala akola hakushimwina neyi anakutwidimbulula

[Mwevulu wudi hefu 10]

Chumanyi chimwatela kwila neyi mwashimwinaña mwiluña mwabulaña kuwanika antu kakavulu hamatala?