Imbujolenu kaMishonali Muneni
Imbujolenu kaMishonali Muneni
‘Ikalenu akwakuñimbujola ami, neyi chinelaña ami nawa nembujolaña Kristu.’—1 AKORINDA 11:1.
1. Muloñadi wutwatela kumwimbujolila Yesu Kristu?
KAPOSTOLU Pawulu wembujoleli kaMishonali muneni, Yesu Kristu. Pawulu niyena wakonkomweneni akwawu eniKristu nindi: “Ikalenu akwakuñimbujola ami, neyi chinelaña ami nawa nembujolaña Kristu.” (1 Akorinda 11:1) Chelili Yesu nahani dehi chakutalilahu kudi apostolu indi chakudizoza hampinji yawelesheliyi nyendu yawu, wayilejeli nindi: “Ami nayileji chuma chakwimbujola, kulonda ninenu nawa mwilaña neyi munayilenu.” (Yowanu 13:12-15) Makonu etu eniKristu, tukweti mudimu wakwimbujola Yesu Kristu munhoshelu nimunzatilu yetu nawa nimuyililu yitwamwekeshaña.—1 Petulu 2:21.
2. Hela chakwila Izaza Dalombolaña kanda diyitondi kwikala amishonali, mwatela kwikala naspiritu yamuchidinyi?
2 Muchibaba chinafumihu, twadizili netu kamishonali himuntu anatemeshuwu neyi mukwakushimwina—muntu watwalaña nsañu yayiwahi kudi akwawu. Ichi dichaletesheli Pawulu kwihula malwihu amawahi. (Tañenu Aroma 10:11-15.) Kapostolu wehwili nindi: “Akutiya ñahi chakadi mukwakushimuna?” Kuhiñahu wahosheli mazu awuprofwetu waIsaya akwila nawu: “O lubanji lwanyendu yawantu akuleta nsañu yayiwahi yayuma yakuluñisha!” (Isaya 52:7) Hela chakwila kanda ayitondihu nikuyitemesha nakukalakala neyi amishonali mwituña dacheñi, munateli kwikala naspiritu yakushimwina, kwimbujola Yesu hamu neyi mukwakushimwina wadikita wansañu yayiwahi. Mwaka waadi, akwakushimwina aWanta 6,957,852 ‘akalakeli mudimu wakushimwina’ mumatuña 236.—2 Timotewu 4:5.
“Tunashiyi Yuma Yejima, Tunakulondeli”
3, 4. Yumanyi yashiliyi Yesu mwiwulu, nawa chumanyi chitwatela kwila kulonda twikali atumbanji twindi?
3 Hakwila nawu yashikiji mudimu windi hanu hamaseki, Yesu “wadibalumwini kwikala wakadi kulema, hakwikala mwekalila nduñu,” washili chihandilu chamwiwulu nikulema. (Afwilipi 2:7) Yuma yejima yitwelaña hakumwimbujola Kristu hiyikwesekana nayuma yakoñeliyi Yesu hampinji yenjiliyi hanu hamasekuku. Ilaña tunateli kutwalekahu kwikala atumbanji twindi akola, chakubula kutoñojoka hayuma yitwashiya mukaayi kaSatana.—1 Yowanu 5:19.
4 Mpinji yimu kapostolu Petulu wamulejeli Yesu nindi: “Tala, etu tunashiyi yuma yejima, tunakulondeli.” (Matewu 19:27) Yesu chatambikiliyi Petulu, Anderi, Yakoba niYowanu kumulonda hohenohu hiyakushiya wanda wawu. Alekeli mudimu wakukwata inshi nakusha maana kumudimu wawu wakushimwina. Kwesekeja naNsañu Yayiwahi yaLuka, Petulu wahosheli nindi: ‘Tala, etu tunashiyi yuma yetu, tunakulondi.’ (Luka 18:28) Etu amavulu hitwashiya “yuma yetu” yejima hakwila tumulondi Yesuku. Hela chochu, ‘twadibondeli’ hakwila twikali atumbanji twaKristu nawa ambuña aYehova adihana namuchima wejima. (Matewu 16:24) Ichi chihandilu chinatuleteli nkisu jajivulu nankashi. (Tañenu Matewu 19:29.) Kwikala naspiritu yakushimwina hakumwimbujola Kristu kwatuletelaña muzañalu, sweje-e neyi twakwashahu dehi muntu kukundama kwakwihi naNzambi niMwanindi akeñayi.
5. Shimunenu chakuhumañana chinakumwekesha ñinza chatela kwilayi chadizayi chalala chaBayibolu.
5 Valmir wakuBrazil washakamaña mukachi ketuña daSuriname, wadiñi mukwakwimba wuru. Iwu iyala wadiñi chinwa walwa nawa washakamineña chihandilu chatama. Hampinji yadiñiyi mumusumba, aYinsahu jaYehova atachikili kudiza nindi Bayibolu. Wadizileña hefuku hefuku, nawa wahimpili yililu yindi, nkumininaku wapapatisheweli. Chamweniyi nindi mudimu windi wamukañesheleña kulondela mwaya ntañishilu yaBayibolu, walandishili maheta indi nakufunta kuBrazil kulonda kukwasha chisaka chindi kuwana maheta akuspiritu. Añinza amavulu chadizawu chalala chaBayibolu, alekaña nyidimu mumatuña mwekala maheta nakufunta kumatuñawu nankeñelu yakukwasha antaña jawu niantu amakwawu kuswila kwakwihi naYehova. Akwakushimwina aWanta amuchidiwu amwekeshaña spiritu yayeni yakushimwina.
6. Chumanyi chitunateli kwila neyi chakwila hitukutwesha kuya kwiluña kudi kukankila kweneni kawakwakushimwina aWantaku?
6 A Yinsahu amavulu ayaña kumaluña kudi kukankila kweneni kwawakwakushimwina aWanta. Amakwawu ayaña kumatuña acheñi. Hadaha hitunateli kuya nakuzatila kwiluña dacheñiku, ilaña tunateli kumwimbujola Yesu kuhitila mukudikita mpinji yejima mumudimu wakushimwina.
Yehova Watudizishaña Mwatelela
7. Mashikolanyi adizishaña antu anakukeña kuwejelaku wuswa wawu neyi akwakushimwina aWanta?
7 Neyi chochamudizishiluwu Yesu kudi Tata yindi, anetu nawa tunateli kuhetelamu mushikola yinakuloñeshayi Yehova makonu. Yesu wahosheli nindi: ‘Anasoneki munyikanda yawatuprofwetu nawu, Antu ejima akayileja kudi Yehova.’ (Yowanu 6:45; Isaya 54:13) Makonu, kudi mashikola analoñeshiwu kulonda kutudizisha hamu neyi akwakushimwina aWanta. Mwalala, wejima wetu tunahetelumu muShikola yaMudimu waTeokalatiki yamuyipompelu yetu. Apayiniya akweti kukooleka kakuwanika kuShikola yaMudimu wawaPayiniya. Apayiniya amavulu anashimbuli mumudimu wawu adiñi nakukooleka kwakuwanika kushikola kamuchiyedi. Aeluda niankoñi akuzatila awanikaña kuShikola yaMudimu waWanta kulonda kuwahishaku ntañishilu yawu nimudimu wakukalakela akwawu akakwitiya. Aeluda amavulu ajiki niankoñi akuzatila awanikaña kuShikola yaKudiza Mudimu wawuNkoñi, yayidizishaña kukwasha amakwawu mumudimu wakushimwina. Nawa amana kwetu amavulu niahela anatemeshuwu mumudimu wawumishonali kumatuña acheñi ayidizishaña haWatchtower Bible School of Gilead.
8. Yumanyi yinakushiyawu amana kwetu amakwawu mukudikeñela kulonda kuyidizisha kudi Yehova?
8 A Yinsahu jaYehova amavulu anahimpi nzatilu yawu kulonda kuwanika kumashikola wenawa. Hakwila nawu Yugu yawaniki kuShikola yaKudiza Mudimu wawuNkoñi kuCanada, walekeli mudimu wakumujimba muloña mukulumpi wamudimu wakanini kumwinka mafuku akunooka alombeliyi. Yugu wahosheli nindi: “Hinaditoñeshañaku. Kafwampi neyi anyinkeli mafuku akunooka hamu neyi mwakunkwashila, adi kunkuhwelela kumwekesha kashinshi kuhitila mukutwalekahu kuzata mpinji yejima. Ilaña chayinu mpinji nadiloñeshi kuzata mudimu wudi wejima wunateli kunyinkayi Yehova.” Antu amavulu mukudikeñela anashiyi yuma yalemesheluwu kulonda kuyidizisha kudi Nzambi.—Luka 5:28.
9. Hanenu chakutalilahu chinakumwekesha yuma yafumaña mukudizisha kwamuNsona nikuzata nañovu.
9 Kudizisha kwamuNsona nikuzata nañovu kunateli kukwasha antu kunyakala kuyilaku hambidi chikupu. (2 Timotewu 3:16, 17) Talenu chuma chazatikili kudi Saulo muGuatemala. Wasemukili nakawufwayi muyitoñojoka, ntañishi yindi wamumbanda walejeli mama yindi nindi bayi yakanjikijaña kansi kudiza kutañaku, muloña wukuluwankana. Saulo walekeli shikola chakadi kwiluka kutaña. Hela chochu, mana kwetu wamudizishili Saulo kutaña, kuzatisha broshuwa yaApply Yourself to Reading and Writing. Mukuhita kwampinji, Saulo welukili kutaña chakwila watachikili kuhana mpanji muShikola yaMudimu waTeokalatiki. Chimwahitili mafuku hampinji yadiñiyi mama yaSaulo mumudimu wakwitala nikwitala wadiwanini nantañishi yaSaulo. Chatiyiliyi nindi Saulo wadiza dehi kutaña, ntañishi wamulejeli mama yindi nindi yakamutwali kwitala dindi mulungu wukalondelahu. Saulo chayiliyi kwitala dantañishi, ntañishi wamwihwili Saulo nindi, “Chumanyi chiwukundizisha?” Saulo watachikili kutaña parakalafu mumukanda waChumanyi Chacheni Chatañishaña Bayibolu? Ntañishi wahosheli nindi: “Nahayami hakumona neyi hiwukundizisha.” Ntañishi watachikili kudila muloña wamuzañalu nawa wamukumbatili Saulo.
Ntañishilu Yasañumunaña Muchima
10. Chitwanyi chachiwahi chiduku chakuzatisha hakutañisha nsañu yalala yamuBayibolu?
10 Ntañishilu yaYesu yashindameneni hayuma yamudizishiluwu kudi Yehova nihanshimbi yakela Mwizu daNzambi dasonekawu. (Luka 4:16-21; Yowanu 8:28) Twembujolaña Yesu kuhitila mukuzatisha kufumba kwindi nikutañisha yuma yekala muNsona. Dichi wejima wetu twahoshaña nikutoñojoka mwomumu, nawa chumichi chaletaña kunuñañana hakachi ketu. (1 Akorinda 1:10) Tunakuhameka chikupu muloña ‘nduñu wamaana nikashinshi’ waloñeshaña nyikanda yashindamena haBayibolu kulonda kutukwasha kuhoshaña mazu wowamu muntañishilu yetu nikushikija mudimu wetu hamu neyi akwakushimwina. (Matewu 24:45; 28:19, 20) Hakachi kanyikanda yeniyi hadi mukanda waChatañishaña Bayibolu wudi dehi mumadimi akushika ku 179.
11. Indi muhela wakuEthiopia washindili ñahi ikañesha kuhitila mukuzatisha mukanda waChatañishaña Bayibolu?
11 Kudiza Nsona kuhitila mukuzatisha mukanda waChatañishaña Bayibolu kunateli kuhimpa muchima wawakwakudimbulula. Muhela Lula payiniya wamuEthiopia, mpinji yadiñiyi nakulombola kudiza kwaBayibolu, ntaña yakadizi wamumbanda wenjili nawa wahosheli nindi hiyatela kwikala nakudiza kwamuchidiwuku. Ilaña Lula wahanjekeli nindi mukuwunda kuhitila mukuzatisha chakutalilahu chamali akutwamba chamukapetulu 15 mumukanda waChatañishaña Bayibolu. Iwu mumbanda wawundishili muchima nawa wayilekeli atwalekuhu nakudiza. Hela chochu, wawanikiluku kukudiza kwahiñiluhu nawa wakeñeli nindi amudizisheña Bayibolu, wakeñeleña nikufweta. Watachikili kudiza mapampa kasatu mumulungu nawa wayililuku hambidi chikupu lwakuspiritu.
12. Hanenu chakutalilahu chinakumwekesha ochu atwansi chiyanateli kudizishawu chachiwahi nsañu yalala yamuBayibolu.
12 Atwansi niwena anateli kukwasha amakwawu kuhitila mukuzatisha mukanda waChatañishaña Bayibolu. Hampinji Keanu wayaaka 11 muHawaii hatañileñayi iwu mukanda mushikola, mukwawu mukashikola wamwihwili nindi, “Muloñadi chiwabulilaña kwanakana mafuku akunooka?” Keanu watañili ñakwilu yidi muApendikisi hamutu wakwila nawu “Komana Twatela Kwanakana Mafuku Akunooka?” Kufumahu wabakwili hefu hanakwila nawu yuma yidimu nakumwihula mukwawu mutu wansañu wamutiyishili kuwaha. Atachikili kudiza Bayibolu. Chaka chamudimu chinamani, aYinsahu jaYehova alombweli kudiza kwaBayibolu 6,561,426, amavulu azatishili chachiwahi mukanda waChatañishaña Bayibolu. Komana, munakuzatisha ichi chitwa hakulombola kudiza kwaBayibolu?
13. Indi kudiza Bayibolu nawantu kunateli kuyikwasha ñahi?
13 Kudiza Bayibolu kuhitila mukuzatisha mukanda waChatañishaña Bayibolu kunateli kukwasha chikupu antu anakufwila kwila nkeñelu yaNzambi. Eyala namumbanda apayiniya adimena muNorway, atachikili kudiza Bayibolu nachisaka chafumini muZambia. Awa eyala namumbanda afumini muZambia adiñi nawanyana asatu nawa hiyakeñeleña kwikala namwana mukwawuku. Dichi mumbanda chemitiliyi, afuukwiluhu kufumisha ivumu. Mafuku antesha henohu kanda adimoni nandotolu, adizili kapetulu kahoshaña nawu ‘Nzambi Chawumonañayi Wumi.’ Mwevulu wankemba wuchidi kanda yovwaliki wudi munaka kapetulu wayishikili hamuchima chikupu chakwila afuukwiluhu kubula kufumisha ivumu. Atwalekeluhu kukula lwakuspiritu nawa mwanawu weyala wavwalikili amutumbili ijina deyala wayidizishileña.
14. Lumbululenu yuma yayiwahi yinateli kufumamu neyi chakwila tuzatishaña yuma yitwatañishaña.
14 Njila yalema yatañishilileñamu Yesu yadiña yakuzatisha yuma yatañishileñayi. Antu amavulu atiyaña kuwaha nayililu yayiwahi yamwekeshañawu aYinsahu jaYehova, embujolaña Yesu muniyi njila. Mukwakulanda nakulandulula muNew Zealand amwiñililili mumotoka kudi amakombi nawa amwiyilili ipakumuna dindi. Washimwini kudi akapokola, nawa amulejeli nawu: “Ipakumuna deyi dinateli kumwekana, chiña neyi Chinsahu chaYehova yadiwana.” Chinsahu wamumbanda wadiñi nakutwala yipapilu yansañu waweni idi ipakumuna. Chiyamulejeluwu nawu Chinsahu wamumbanda nadiwani, mwini ipakumuna wayili kwitala damuhela. Chawaniniyi chipapilu chindi chadiñi chasweja kulema kwitala damuhela wazañaleli chikupu. Muhela wamulejeli nindi: “Chachiwahi chinakufuntishili chuma cheyi, chineli nidi Chinsahu chaYehova.” Mukwakulanda nakulandulula wahayamini, wanukili mazu amulejeluwu kudi kapokola hefuku denadina nabudidi. Chakubula kujinooka, eniKristu alala anakushakama kwesekeja nantañishilu yekala muBayibolu nikwimbujola Yesu.—Aheberu 13:18.
Imbujolenu Yililu yaYesu yaKwakamena Antu
15, 16. Tunateli kukokola ñahi antu kunsañu yitwashimwinaña?
15 Yililu yaYesu yakwakamena antu yakwokweleña antu kutiyilila kunsañu yindi. Chakutalilahu, kukeña kwindi nikudikehesha kwaleñeleli atuzweñi kwinza kudi yena. Watiyilileña wushona antu enjili kudi yena nawa wayikundejeleña namazu awushona, nikuuka antu amavulu. (Tañenu Maku 2:1-5) Hitunatweshi kukoña yihayamishaku, ilaña tunateli kumwekesha kukeña, kudikehesha niwushona—yililu yakokolaña antu kuchalala.
16 Wushona wamukwashili chikupu payiniya wadimena wejina daTariua hampinji yendeleliyi kashinakaji wejina daBeere, washakamaña hachitutu chekala hakachi kayitutu yekala kwakulehi yamuKiribati kukabeta kambwela kaPacific. Hela chakwila iwu muntu wamwekesheli kadiwu, Tariua wamutiyilili wushona chamumweniyi nindi wudi nakalepa. Wamwihwili nindi: “Mweluka chayikanayi Nzambi antu akata niatushinakaji?” Kufumahu watañili mukuku wamazu kufuma muwuprofwetu waIsaya. (Tañenu Isaya 35:5, 6.) Iwu muntu wahayamini nakuhosha nindi: “Bayibolu nayitañi hadi yaaka yayivulu nawa kamishonali wamunsakililu yami nanhempuli hadi yaaka yayivulu, ilaña kanda nitañeñahu dehi mazu amuchidiwu muBayiboluku.” Beere watachikili kudiza Bayibolu nawa wakulililuku lwakuspiritu. Mwalala wadiña nakalepa, ilaña chayinu mpinji wapapatishewa nawa diyi walombolaña nakwakamena izanvu dahachitutu chenichi nawa nakutwesha kwenda chitutu chejima nakushimwina nsañu yayiwahi.
Twalekenuhu Kwimbujola Kristu
17, 18. (a) Munateli kwikala ñahi mukwakushimwina washikahu chikupu? (b) Chumanyi chikatambwilawu antu akalakalaña mudimu wawu wakushimwina namuchima wejima?
17 Neyi chamwekeshaña yakuhumañana yayiwahi mumudimu wakushimwina, tunateli kwikala akwakushimwina ashikahu chikupu neyi twikala nayililu yamwekesheliyi Yesu nikuyimwekesha muchihandilu chetu. Komana, chidi chashikila kwimbujola Kristu hamu neyi akwakushimwina adikita.
18 Antu amakwawu chekaliluwu atumbanji twaYesu munkulakanji yayaaka yakusambila, Petulu wehwili nindi: “Indi etu twakatambuladi?” Yesu wakwili nindi: “Ejima anashiyi hela matala, hela ana kwawu, hela ahelawu, hela atata jawu, hela amama jawu, hela anyana, hela maha, hansañu yejina dami, akatambwilamu nkulakaji, akaswana niwumi wahaya nyaka.” (Matewu 19:27-29) Neyi tutwalekahu kwimbujola kaMishonali muneni, Yesu Kristu, mwalala twakamona walala wamazu wenawa.
Mukwakula Nenudi?
• Indi Yehova nakutudizisha ñahi kwikala akwakushimwina?
• Muloñadi mukanda waChatañishaña Bayibolu chiwunekalili wawuwahi mumudimu wetu wakushimwina?
• Tunateli kumwimbujola ñahi Yesu muyililu yetu yakwakamena antu?
[Malwihu aKuzatisha haKudiza]
[Mwevulu wudi hefu 21]
Yesu chayitambikiliyi aPetulu, Anderi, Yakoba niYowanu kulonda amulondi, etejeli chakubula kulaba
[Mwevulu wudi hefu 23]
Nyikanda yidi neyi mukanda ‘waChatañishaña Bayibolu’ yatukwashaña kutañisha mazu wowamu