Indi Kwinza Kwakristu—Kunayilumbulukilidi?
Indi Kwinza Kwakristu—Kunayilumbulukilidi?
‘Chinjikijilwinyi chakwiluka nachu hiwamba kenzeyi nihamba kakuma nyaka yamakonu?’—MATEWU 24:3.
1. Lwihwinyi lwaluwahi lwamwihwiluwu Yesu kudi atumbanji twindi?
KWAKWIHI nayaaka makombakaji ayedi anahituhu, atumbanji twaYesu awana ehwili lwihu hampinji yahanjekeleñawu kwakankawawu naNkuluñaña yawu hampidi yaOliveta. Ehwili nawu: ‘Mpinjinyi hamba kela yumiyi, nawa chinjikijilwinyi chakwiluka nachu hiwamba kenzeyi, nihamba kakuma nyaka yamakonu?’ (Matewu 24:3) Munilu lwihu, atumbanji azatishili nhoshelu jajiwahi jiyedi, jakwila nawu “hiwamba kenzeyi” “nihamba kakuma nyaka yamakonu.” Indi nhoshelu yeniyi yatalisha mudihi?
2. Indi izu dakwila nawu ‘kukuma’ datalisha mudihi?
2 Tusambilenu kutala hanhoshelu yamuchiyedi yakwila nawu ‘kukuma,’ kubalumuna kwezu dachiGriki syn·teʹlei·a. MuNew Word Translation, izu denidi dakwila nawu ‘kukuma’ adizatishaña kakavulu, ilaña izu dodimu muchiGriki, te’los, adibalumuna nawu “kumana.” Chambu chidi hakulumbuluka kwanawa mazu ayedi tunateli kuchilumbulula kuhitila muchakutalilahu champanji yahanañawu Hetala daWanta. Mpanji yakumaña nachibalu chakunsa kwazatishañayi nhoshi maminiti antesha kulonda kwanukisha izaza yuma yinahosheñayi nikushimuna nsañu yeniyi chiyinakundami izaza. Mpanji yamanaña neyi nhoshi nafumuhu dehi hachinañamu. Munjila yoyimu, kwesekeja nachahosha Bayibolu, nhoshelu yakwila nawu ‘kukuma kwanyaka yamakonu’ yatalisha kumpinji yakuya nakushika kukukuma nikumana kwanyaka yamakonu.
3. Yumanyi yikwawu yamwekanaña mumpinji yakwinza kwaYesu?
3 Indi izu dakwila nawu ‘kwinza’ diyehwiluwu atumbanji datalisha mudihi? Idi hiizu dachiGriki diyabalumunawu nawu pa·rou·siʹa. * Kwinza kwaKristu hela pa·rou·siʹa, kwatachikili hampinji yamuswanyikiluwu Yesu neyi Mwanta mwiwulu mu 1914 nawa kwatwalekahu kushika “kulukadi lwasweja,” hampinji yamba kenzayi nakujilumuna antu atama. (Matewu 24:21) Muyinu mpinji yakwinza kwaYesu munakumwekana yuma yayivulu yashiyashana yinabombelumu ‘mafuku akukuminina’ anyaka yamakonu yatama, kupompesha antu atondawu, nikusañukila kuwumi wamwiwulu. (2 Timotewu 3:1; 1 Akorinda 15:23; 1 Atesalonika 4:15-17; 2 Atesalonika 2:1) Tunateli kuhosha netu mpinji yinabombelumu ‘kukuma kwanyaka yamakonu’ (syn·teʹlei·a) yinesekani nampinji yakutena nawu kwinza kwaKristu (pa·rou·siʹa).
Mpinji Yayilehi
4. Indi kwinza kwaKristu kunadifwani ñahi nayuma yamwekeneña mumafuku aNowa?
4 Walala wakwila nawu izu dapa·rou·siʹa datalisha kumpinji yayilehi wunesekani nayuma yahosheliyi Yesu kutalisha hakwinza kwindi. (Tañenu Matewu 24:37-39.) Anukenu nenu Yesu hafwanishili kwinza kwindi kumpinji yantesha yaDibaji damwekeni mumafuku aNowaku. Ilaña wesekejeli kwinza kwindi kumpinji yayilehi chikupu yashikili nikuDibaji. Muniyi mpinji mwabombeleli kutuña watu nimudimu windi wakushimwina ndo-o nikumpinji yenjili Dibaji. Yuma yeniyi yazatikili hadi yaaka yayivulu. Munjila yoyimu, kwinza kwaKristu kwabombelamu yuma yinakumwekana kushika nikulukadi lwasweja.—2 Atesalonika 1:6-9.
5. Indi mazu asonekawu muChimwekeshu kapetulu 6, amwekeshaña ñahi nawu kwinza kwaYesu himpinji yayilehi?
5 Wuprofwetu wukwawu wamuBayibolu washimuna hatooka to-o nawu kwinza kwaKristu kwatalisha kumpinji yayilehi bayi kwinza nakujilumuna antu atama hohuku. Mukanda waChimwekeshu wamumwekesha Yesu nakwendela hakawalu katooka nawa anamwinki chibaaba. (Tañenu Chimwekeshu 6:1-8.) Hanyima yakumuvwika chibaaba chaWanta mu 1914, Yesu amumwekesha nakuya ‘nakwimika mushindu kulonda nawa akemikaña mushindu ho-o.’ Kuhiñahu nsañu yamwekesha nawu anakumulondela kudi akwakwendela hatuwalu twashiyashana wulombu. Kwesekeja nawuprofwetu, atuwalu wenawa emenañaku njita, nzala yakapwelendendi, niyipupu, nawa yuma yejimiyi yinamwekani hadi mpinji yayilehi yatenañawu nawu ‘mafuku akukuminina.’ Tunakumona kushikijewa kwawuprofwetu weniwu mumpinji yetu.
6. Indi Chimwekeshu kapetulu 12 kanakutukwasha ñahi kutiyishisha kwinza kwaKristu?
6 Mukanda waChimwekeshu kapetulu 12 washimunaña wunsahu wukwawu kutalisha hakwimika kwaWanta waNzambi mwiwulu. Munaka kapetulu twatañañamu njita yavulumukili muwanta wabulaña kumwekana. Mikeli—Yesu Kristu muchifulu chindi chamwiwulu—niañelu jindi hiyakwasa njita naDiyabolu niañelu jindi. Nkumininaku, Satana Diyabolu niañelu jindi hiyakuyinatila hamaseki. Hampinji yeniyi, nsañu yatulejaña nawu Diyabolu wudi nandombu yayeni “chanelukiyi nindi kunashali dehi mpinji yindi yantesha hohu.” (Tañenu Chimwekeshu 12:7-12.) Dichi chakubula nikujinooka, hanyima yakwimika Wanta waKristu mwiwulu, halondela mpinji ‘yayihuñu’ yasweja hamaseki niantu ashakamahu.
7. Indi isamu damuchiyedi dahoshaña hankahi, nawa kukoolekanyi kunashimunuwu mwisamu denidi?
7 Isamu damuchiyedi nidena dahosha hawuprofwetu wakuswanyika Yesu hamu neyi Mwanta haMpidi yaZiyona yamwiwulu. (Tañenu Masamu 2:5-9; 110:1, 2.) Cheñi nawa, isamu denidi damwekeshaña nawu kudi mpinji yakayinkawu anyuli aheseki, hamu tuhu niantu jawu, kukoleka kwakwovwahila chiyulu chaKristu. Anayikonkomweni ‘kwikala ababala’ ‘nikukwata maana.’ Chalala, hampinji yeniyi “ejima abatamaña mudi yena [Nzambi] anakooleki” kuhitila mukukalakela Yehova niMwanta windi atondayi. Dichi kwinza kwaYesu muñovu jawanta kunahani kukooleka kudi anyuli niantu jawu kulonda ahimpi yililu yawu.—Masamu 2:10-12.
Kwiluka Chinjikijilu
8, 9. Anyi atela kwiluka chinjikijilu chakwinza kwaYesu nikutiyishisha kulumbuluka kwachu?
8 Chamwihwiluwu kudi Afwarisi hamba kenza Wanta waNzambi, Yesu wayakwili nindi Wanta waNzambi hiwakenza “nakuwutala namesuku” kwesekeja nachiyatoñojokeleñawu. (Luka 17:20, 21) Antu abula kwitiya hiyanateli kutiyishishaku. Chalala hiyanateluku. Akañenyi nikumwiluka Yesu neyi Mwanta wawu wakumbidi. Dichi dinu anyi atela kwiluka chinjikijilu chakwinza kwaKristu nikutiyishisha kulema kwachu?
9 Yesu watwalekeluhu kuhosha nindi atumbanji twindi akamona chachiwahi chinjikijilu neyi chamonañawu “nvula yikukena kumutamba wumu wewulu, kutooka nikumutamba wukwawu.” (Tañenu Luka 17:24-29.) Chidi chamuzañalu kwiluka netu Matewu 24:23-27 yashimuna hatooka to-o nawu Yesu wahosheleña hachinjikijilu chakwinza kwaKristu.
Chisaka chinaKumona Chinjikijilu
10, 11. (a) Indi kunyima alumbulwili nawudi kutalisha ‘hachisaka’ chatenawu haMatewu 24:34? (b) Atumbanji twaYesu amu adihi elukili nawu ayibombela munichi “chisaka”?
10 Kunyima, ayinu magazini yalumbulwili nawu munkulakaji yayaaka yakusambila, “chisakichi” chatenawu haMatewu 24:34 chatalishili ‘kwikiñu dawaYudeya abula kwitiya adiñaku hampinji yoyimu.’ * Kulumbulula kweniku kwateleleli muloña muNyikanda yikwawu Yesu wateneneña idi izu dakwila nawu “chisaka” munjila yatama, nawa kakavulu wazatishileña izu daheña dakwila nawu ‘kutama’ hakutena ichi chisaka. (Matewu 12:39; 17:17; Maku 8:38) Magazini yeniyi yalumbulwili chatiyakana nawu mukushikijewa kwamakonu, Yesu watalishileña ‘kuchisaka’ chawantu abula kwitiya akamona yuma yejima yiyedi yakwilukisha “kukuma kwanyaka yamakonu” (syn·teʹlei·a) nikumana kwanyaka (te’los).
11 Chalala, hampinji Yesu hazatishiliyi izu dakwila nawu “Chisaka” munjila yatama, wadiñi nakutalisha hela nakutena antu atama amumafuku indi. Mwalala komana izu dakwila nawu “chisaka” datenawu haMatewu 24:34 dadiñi nakutalisha kudi antu atama amumpinji yindi? Anukenu nenu atumbanji twaYesu awana amusolomokeli “kwakanka wawu.” (Matewu 24:3) Chineli Yesu hazatishili mazu atama hampinji yahosheleñayi nawu kutalisha ‘hachisakichuku,’ chakubula nikujinooka, apostolu atela elukili nawu wena niakwawu atumbanji adi kwikala mbadi ‘yachisaka’ chikabula kuhita ‘nichamba kamwekana yuma yejimiyi.’
12. Indi iyi nsañu yinakumwekesha ñahi antu ateneniyi Yesu hampinji yazatishiliyi izu dakwila nawu “chisaka”?
12 Tunateli kukunkulula kushindamena hachikumanyi? Kuhitila mukushinshika chachiwahi nsañu yitunakuhoshahu. Kwesekeja nachiyasonekawu haMatewu 24:32, 33, Yesu wahosheli nindi: ‘Dichi kwatilenu maana kumutondu wachikuyu. Chiwelaña neyi mutayi wawu wunovwahi dehi, hiwukusapuka mafu awu, himukwiluka nenu mayinza adi kwakwihi. Dichi ninenu nawa chimwakamona yuma yejimiyi, kelukenu nenu yena wudi kwakwihi, kwokuyisu kachi.’ (Esekejenu Maku 13:28-30; Luka 21:30-32.) Cheñi haMatewu 24:34, twatañañahu nawu: ‘Nukuyileja chalala nami chisakichi hichakahitaku, chiña yuma yejimiyi yinamani.’
13, 14. Muloñadi chitukuhoshela netu “chisaka” chadiña nakutenayi Yesu adiña atumbanji twindi?
13 Yesu wahosheli nindi adiñi atumbanji twindi, adiñi kwakwihi nakuyiwahisha naspiritu yajila, nawa diwu adi kukunkulula neyi anamoni dehi “yuma yejimiyi” yinamani. Dichi Yesu watela watalishileña kudi atumbanji twindi hampinji yahosheliyi awa mazu nindi: “Chisakichi hichakahitaku, chiña yuma yejimiyi yinamani.”
14 Kwambukaku nawantu abula kwitiya, atumbanji twaYesu hiyadi kumona hohu chinjikijiluku, ilaña adi kutiyishisha nikulema kwachu. Adi ‘kudizila’ kuyuma yamwekeshaña ichi chinjikijilu ‘nikwiluka’ muyatalisha. Adi kwiluka nawu “wudi kwakwihi, kwokuyisu kachi.” Mwalala hela chakwila ejima wawu aYudeya abula kwitiya nieniKristu ashinshika awayishewa amweni kushikijewa kwantesha kwamazu aYesu munkulakaji yayaaka yakusambila, chiña atumbanji twindi awayishewa hohu akumafuku akunyima diwu adizilili kuniyi yuma—nikutiyishisha kulumbuluka kwalala kwayuma yamwenuwu.
15. (a) Hiyanyi atuña “chisaka” chamakonu chateneniyi Yesu? (b) Muloñadi chitukukañenya kuchinda kuleha kwakweni kwampinji ‘yachisakichi’? (Talenu chikasha chidi hefu 25.)
15 Antu abula kwiluka chalala chaNzambi makonu atoñojokaña nawu chinjikijilu chakwinza kwaYesu ‘hitunakuchimona namesuku.’ Ahoshaña nawu yuma yejima yinatwalekuhu neyi chiyadiñi kumafuku akunyima. (2 Petulu 3:4) Ilaña, amana kwaKristu ashinshika awayishewa, izanvu daYowanu damakonu, aneluki hatooka to-o chinjikijilu chenichi neyi chochiyanateli kwiluka kukenashana kwanvula nawa aneluki kulumbuluka kwalala kwanichi chinjikijilu. Hamu neyi izanvu, awa awayishewa diwu atuña “chisaka” chamakonu chawantu akabula kuhita “chiña yuma yejimiyi yinamani.” * Ichi chinakumwekesha nawu amana kwaKristu amakwawu awayishewa akekala amomi hanu heseki hampinji yikatachika yihuñu yeneni yatenenuwu dehi.
“Tonenu”
16. Chumanyi chiyatela kwila atumbanji twaKristu ejima?
16 Kudi chuma chitwatela kwila kubadika kwiluka hohu chinjikijilu. Yesu watwalekeluhu kuhosha nindi: ‘Chinukuyilenu, nayili niantu ejima, nami, Tonenu.’ (Maku 13:37) Makonu chumichi chalema nankashi kudi wejima wetu chili mudi awayishewa hela amwizaza deneni. Munahiti dehi yaaka kubadika ha 90 kufuma hampinji yamuswanyikiluwu Yesu neyi Mwanta mwiwulu mu 1914. Hela chikali ñahi, twatela kwikala adiloñesha nawa atona. Kwiluka netu Kristu nakuyula neyi Mwanta chatukwashaña kwila mwenimu. Nawa chatwisoñamishaña kwiluka netu keña yenzi nakukisañana ayilumbu jindi ‘hampinji yitukubula kutoñojoka.’—Luka 12:40.
17. Indi kutiyishisha chalumbuluka kwinza kwaKristu kunakutukwasha kwiladi, nawa chumanyi chitwatela kufwila kwila?
17 Kutiyishisha chalumbulula kwinza kwaKristu kwatukwashaña kwikala asoñama chikupu. Tweluka netu Yesu wenza dehi nawa nakuyula neyi Mwanta wabulaña kumwekana mwiwulu kutachika mu 1914. Keña yenzi nakujilumuna antu atama nikuhimpa yuma yashiyashana mukaayi kejima. Dichi twatela kufwila kukalakala chikupu mumudimu wateneniyi Yesu hampinji yahosheliyi nindi: ‘Ninsañu iyi yawanta akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha [teʹlos].’—Matewu 24:14.
[Tumazu twaheshina]
^ Tunamoni kulumbuluka kwezu dapa·rou·siʹa hakachi kachaambu chidi hamazu akapostolu Pawulu akwila nawu ‘kwinza’ ‘nihinidi kwacheñi’ ekala ha 2 Akorinda 10:10, 11 niAfwilipi 2:12. Hakwilukilahu nsañu jikwawu, talenu Insight on the Scriptures Volume 2, mafu 676-9.
^ Talenu Kaposhi Kakutalila kachizungu kaNovember 1, 1995, mafu 11-15, 19, 30, 31.
^ Mpinji yadiñaku “chisakichi” yinamwekani neyi yinesekani nampinji yahituluhu yachimwenu chakusambila chamu mukanda waChimwekeshu. (Chimwekeshu 1:10–3:22) Chinjikijilu chenichi chefuku daMwanta chatwalekahu kufuma mu 1914 kushika nihampinji yakufwa kwamana kwaKristu wawayishewa wakukumishaku nichakamusañulawu.—Talenu mukanda waUkusokolola—Akalume ka Kuko Kakalamba Nakapalama! ifu 24, parakalafu 4.
Mukwakula Nenudi?
• Tweluka ñahi netu kwinza kwaYesu himpinji yayilehi?
• Hiyanyi eluka chinjikijilu chakwinza kwaYesu nikutiyishisha chichalumbuluka?
• Hiyanyi atuña chisaka chamakonu chatenawu haMatewu 24:34?
• Muloñadi chitukukañenya kuchinda mpinji yayeni yakuleha ‘kwachisakichi’?
[Malwihu aKuzatisha haKudiza]
[Chikasha chidi hefu 29]
Komana, Tunateli Kuchinda Kuleha kwaMpinji ‘yaChisakichi’?
Izu dakwila nawu “chisaka” kakavulu datalisha kudi antu ayaaka yashiyashana anakushakama hanoyu mpinji. Chakutalilahu, Kwidika 1:6 yatulejaña nawu: ‘Yosefu wafwili, afwili niana kwindi ejima, niakwawu ejima avwalikiluwu nawu.’ Yosefu niana kwindi adiñi ashiyashana muyaaka, ilaña adiñaku mumpinji yoyimu. ‘Muchina chisaka’ mwadiña ana kwaYosefu amakwawu avwalikili henohu yena kanda yovwaliki. Amakwawu ashakamini yaaka yayivulu kubadika Yosefu. (Kutachika 50:24) Amakwawu ‘amuchina chisaka,’ adi neyi Benjamini, avwalikili henohu Yosefu wavwalika dehi nawa atwalekeluhu nakuhanda henohu Yosefu wafwa dehi.
Dichi neyi izu dakwila nawu “chisaka” anadizatishi kutalisha kudi antu anakushakama hanoyu mpinji, kuleha kwakweni kwampinji hiyanateli kuyitenaku, ilaña mpinji yinateli kukuma nawa hiyinateli kuleha nankashuku. Dichi, hakuzatisha izu dakwila nawu “chisakichi,” neyi chasonekawu haMatewu 24:34, Yesu hayinkeli atumbanji twindi njila yakwiluka nachu mpinji yikamana ‘mafuku akukumininaku.’ Ilaña, Yesu watwalekeluhu nakukonkomwena nindi hiyakeluka ‘itañwodu hela mpinji oyuku.’—2 Timotewu 3:1; Matewu 24:36.
[Mwevulu wudi hefu 26, 27]
Hanyima yakumuvwika chibaaba chaWanta mu 1914, Yesu amumwekesha nawu nakuya “nakwimika mushindu”
[Mwevulu wudi hefu 28]
‘Chisakichi hichakahitaku, chiña yuma yejimiyi yinamani’