Indi Wanta waNzambi Wakenza Mpinjinyi?

“EYI MWANTA, keña wufuntishi wanta kudi Isarela mafuku anu, tahindi?” (Yililu 1:6) Apostolu akeñeli kwiluka chikupu mpinji yakatachikayi Yesu Wanta windi. Makonu, yaaka 2,000 yinahituhu, antu achidi kukeña kwiluka chikupu: Mpinji yakenza Wanta waNzambi.

Chineli mutu wansañu washimwinineñayi Yesu washindameneni nankashi haWanta, munateli  kutoñojoka nenu wahosheli hanilu lwihu. Mwamweni, wahosheluhu! Kakavulu wahosheleña nankashi kutalisha hampinji yateneniyi kutalisha ‘hakwinza’ kwindi. (Matewu 24:37) Kwinza kweniku akwitalisha kukwinza kwaWanta wawuMesiya. Indi kwinza kweniku hichumanyi? Tushinshikenu hayikuma yiwana yashimunawu muBayibolu kutalisha hakwinza kwaKristu.

1. Kwinza kwaKristu kwatachikili dehi hanyima yakufwa kwindi. Yesu watili chishimu mwadifwanishiliyi nachilolu wumu “wayili kwituña dakwakulehi, nindi akatambuli wanta.” (Luka 19:12) Indi ichi chishimu chawuprofwetu chashikijeweli ñahi? Yesu wafwili nawa amusañwili; kufumahu wayili “kwituña dakwakulehi,” dikwila nawu mwiwulu. Neyi chaprofweteliyi muchishimu chochimu, kwinza kwindi muñovu jawanta kwakenza hohu neyi ‘hanalehi dehi nankashi.’—Matewu 25:19.

Chelili munahiti dehi yaaka yayivulu kufuma hampinji yayiliyi Yesu mwiwulu, kapostolu Pawulu wasonekeli nindi: “Hakwila yena, [Yesu] wadilambwili ekali chimuna chakuketula chahanyiloña chimu chahaya nyaka, hakushakama kuchikasa chaNzambi chachidiilu; kufumisha henohu hakutalila hamba kabalumunawu akwankunyi nindi kwikala itanda dakunyendu yindi.” (Aheberu 10:12, 13) Dichi, mpinji yayilehi yakuhembelela yatachikili hampinji yashikiliyi Yesu mwiwulu. Kuhembelela kweniku kwamanini hampinji yelili Yehova Nzambi yelishi Mwanindi kwikala Mwanta waWanta wawuMesiya yakaninuwu hampinji yayilehi. Iyi diyi mpinji yatachikili kwinza kwaKristu. Komana antu hanu heseki eluka iyi nsañu yakutiyisha kuwaha?

2. Antu hiyakamumona namesu chakenzayiku. Anukenu nenu, Yesu wahosheli hachinjikijilu chakwinza kwindi. (Matewu 24:3) Neyi antu elukili hakwinza kwaYesu, komana adi kukeñaña kwiluka hachinjikijilu chakwinza kwindi? Chakutalilahu: Toñojokenu neyi mudi halwendu lwakuya nakutala kaluñalwiji. Chimukuyaña munjila munateli kumona yinjikijilu yinakuyilombola yidi kunsa yamukwakwa, dichi neyi munashiki dehi kuchikumu chakaluñalwiji, mwimana nikunakumini menji himukumona menji amavulu nankashi mukaluñalwiji, komana munateli kukuhwelela kumona chinjikijilu cheneni chidi hambidi, nawa anasonekuhu izu dakwila nawu “Kaluñalwiji” mujinsona jamaneni? Inehi! Muloñadi wakukeñela kwiluka chinjikijilu hachuma chiwunakudimwena?

Yesu walumbulwili kwinza kwindi, bayi kutena yuma yinateli kumona antu namesu awuku, ilaña kuyikwasha kwiluka yuma yikazatika mwiwulu. Dimuloña wahosheleliyi Yesu nindi: “Wanta waNzambi hiwukwinza nakuwutala namesuku.” (Luka 17:20) Hanu dinu, antu aheseki adi kwiluka ñahi nawu kwinza kwaYesu kwatachika dehi?

3. Kwinza kwaYesu akakwilukila kuhitila mukukala kwasweja kudi hanu hamaseki.  Yesu wahosheli nindi kwinza kwindi hanu heseki hamu neyi Mwanta wamwiwulu akakwilukila kuhitila mumajita, nzala yakapwelendendi, nyitentanshi, yipupu nikuluwalala. (Matewu 24:7-12; Luka 21:10,11) Chumanyi chikakojeja kukala kwejimiku? Bayibolu yalumbulula nawu Satana, “mwanta wayulaña mpata yamunu mwishina,” wudi nandombu yayeni muloña neluki nindi mpinji yindi yinashaliku yantesha hohu chineli kwinza kwaKristu hamu neyi Mwanta kwatachika dehi. (Yowanu 12:31; Chimwekeshu 12:9, 12) Yinjikijilu yandombu yaSatana yinakumwekana hatooka nihakwinza kwaKristu yinavuliluku mumafuku etu. Sweje-e kutachika mu 1914, mwaka welukawu kudi akwakusoneka nsañu yanyaka wadiñi mwaka mwahimpikili yuma, hampinji yamwekeni chinjikijilu chabula kumwekanahu dehi mukaayi kejima.

Yuma yejimiyi yinateli kutiyakana neyi hinsañu yatama, ilaña hiyatamaku. Chinakulumbulula nawu Wanta waMesiya wunakuyula hayinu mpinji mwiwulu. Katataka, nfulumendi yeniyi yitachiki kuyula hanu heseki dejima. Hanu dinu, antu akeluka ñahi kutalisha haWanta weniwu kulonda kwiteja wunyuli weniwu nikwikala antu janfulumendi yeniyi?

4. Mudimu wakushimwina mukaayi kejima wunakumwekesha kwinza kwaYesu. Yesu wahosheli nindi kwinza kwindi kukekala neyi chadiñi “hamafuku aNowa.” * (Matewu 24:37-39) Nowa hadiñi hohu mukwakutuña watuku; ilaña wadiñi cheñi “mukwakushimwina kuloña.” (2 Petulu 2:5) Nowa wasoñamishili antu nindi wunsompeshi waNzambi wadiñi kwakwihi nakwinza. Yesu wahosheli nindi atumbanji twindi heseki niwena akasoñamishaña antu mumpinji yakwinza kwindi. Waprofweteli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Matewu 24:14.

Neyi chitunadizi muchibaba chinafumuhu, Wanta waNzambi wakajilumuna nfulumendi jejima jamukanu kaayi. Mudimu wakushimwina wasoñamishaña antu nawu nfulumendi yamwiwulu yeniyi keña yikoñuhu chuma, kulonda kuyinka antu ejima mpinji yakwila akapuluki kujilumuka kunakwinza nikwikala antu jaWanta weniwu. Dichi lwihu lwabadika kulema ludi lwakwila nawu, Chumanyi chimunateli kwila?

Komana Wanta waNzambi Wukayiletela Nkisu?

Nsañu yashimwinineñayi Yesu yadiñi hinsañu yakubula kwesekeja nakuchiñeja kudi kwejima. Chelili munahiti dehi makombakaji ayaaka kufuma hampinji yakudikaña muEdeni, Yehova Nzambi wafukwiluhu kwimika nfulumendi yikolola yuma chachiwahi, kuyinka antu ashinshika wumi wawuwahi wayitoñweleluwu kudi Nzambi hakutachika—kushakama chahaya nyaka muparadisa hanu hamaseki. Chuma chabadika kuwaha hikwiluka hanfulumendi yakaninuwu dehi yinakuyula katataka mwiwulu. Bayi neyi hichuma chamukunkulwayi hela yitoñojoka yawantuku, ilaña hichuma chalala chikamwekana.

Chayinu mpinji, Mwanta atondawu kudi Nzambi nakuyula hakachi kawayilumbu jindi. (Masamu 110:2) Kanu kaayi katama kamukaana Nzambi, Mesiya nakushikija nkeñelu yaTata yindi yakukeñakeña antu ejima anakukeña kumwiluka Nzambi chekalayi kulonda kudifukulaña kudi yena ‘muspiritu nimuchalala.’ (Yowanu 4:24) Kuchiñeja kwakushakama haya nyaka muWanta waNzambi akwishika kudi antu ejima akunyuza, ayaaka yashiyashana yakusemuka niyisemwa yashiyashana. (Yililu 10:34, 35) Tunayikonkomweni kwiteja kukooleka kwakuwahi kunayinkuwu. Dizenu kutalisha haWanta waNzambi chakatataka, kulonda mwakadiluñishi kushakama muchiyulu chenichi chaloña haya nyaka!—1 Yowanu 2:17.

[Tumazu twaheshina]