Indi Wanta waNzambi hiChumanyi?

INDI Yesu wadiñi nakushimwina hamutwinyi? Kwesekeja nachahosheli Yesu, wadiñi nakushimwina haWanta waNzambi. (Luka 4:43) Hampinji yadiñawu antu nakumutiyililawu Yesu, kakavulu wateneneña haWanta. Komana antu ahayamini? Komana amwihwili nawu Wanta weniwu hichumanyi? Inehi. Nsañu Yayiwahi hiyashimuna hamalwihu amuchidiwuku. Komana antu wenawa adiña awiluka Wanta waNzambi?

Walala wudi wakwila nawu, Nyikanda yajila yakushankulu yalemesheluwu aYudeya hamu neyi yajila, yalumbulwili Wanta weniwu, nikuwushimuna chatiyakana nawa nichiwalumbuluka niyuma yiwukakoña. Makonu, tunateli kudiza yuma yayivulu kutalisha haWanta neyi cheliluwu aYudeya kuhitila mukuzatisha Bayibolu. Ichi dinu tushinshikenu hayikuma yitanu nayiyedi yatudizishaña Bayibolu kutalisha haWanta. Yikuma yisatu yakusambila ayilukili kudi aYudeya amumafuku aYesu nawa henohu Yesu kanda yenzi. Yikuma yisatu yinahiñuhu ayishimwini kudi Kristu hela kudi apostolu indi munkulakaji yayaaka yakusambila. Chikuma chakukumishaku chatiyakana mumafuku etu.

1. Wanta waNzambi hinfulumendi yalala yikayula haya nyaka. Wuprofwetu watachi wamuBayibolu wamwekesheli nawu Nzambi wamba katuma chamwinu kumuchidi wamuntu washinshika. Muntu yeniwu atenañawu nawu ‘mbutu,’ Diyi wamba kamanisha kukala kwejima kwatachikiluwu akwakudikaña Adama, Evu niSatana. (Kutachika 3:15) Mukuhita kwampinji, Mwanta Davidi washinshika amulejeli chuma chamutiyishili kuwaha kutalisha hadi ‘mbutu,’ hela Mesiya. Wakekala Mwanta waWanta. Wanta weniwu wakekala wambukaku namawanta ejima. Wakayula haya nyaka nanyaka.—2 Samweli 7:12-14.

2. Wanta waNzambi wakafumishahu nfulumendi jawantu jejima. Kaprofwetu Danyeli amwinkeli chimwenu mwamweniyi kusinsashana kwajinfulumendi jasweja ñovu kufuma tuhu kunyaka kushika nimumpinji yetu. Tiyenu ichi chimwenu chiyanachikunkululuwu chiwahi nawu: ‘Hamafuku amba kekala anyantowu [antu akukumishaku] Nzambi wamwiwulu wamba kaloñesha wanta wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaka.’ Dichi mawanta hela jinfulumendi jejima, jamukanu kaayi—hamu nimajita, makabisha nimaseleka—akayijilumuna haya nyaka. Neyi chinashimuni wuprofwetu waDanyeli, Wanta waNzambi wemikawu dehi keña wutachiki kuyula iseki dejima. (Danyeli 2:44, 45) Bayi neyi Wanta weniwu wukekalaku hohuku, ilaña wakayula cheñi iseki dejima. *

3. Wanta waNzambi wakamanisha majita, yikatu, nzala yakapwelendendi nikufwa. Wuprofwetu wawuwahi wamuBayibolu wamwekeshaña chuma chikakoña Wanta waNzambi hanu heseki. Nfulumendi yeniyi yakakoña yuma yakañanya nfulumendi jawantu kunyima nimpinji yakumbidi. Toñojokenu hampinji yakela yitwa yanjita yejima anayijilumuni chikupu! “Diyi wakumishaña majita mwakumina iseki dejima.” (Masamu 46:9) Hikwakela andotolu, yipatela hela nyisoñu yashiyashanaku. “Mwenimbu hakahosha nindi, Ami nakataku.” (Isaya 33:24) Hikwakekala nzala yakapwelendendi, kukeha kwayakudya hela musoñu wanzalaku. ‘Hanu hamaseki hakavula kudya kwansaachi.’ (Masamu 72:16) Hikwakekala yipenji, kukama hayimpenji, malaalu, mochali nimakabi amakwawuku. Kufwa chilumbu chetu wakukumishaku, nkumininaku akamujilumuna. Nzambi ‘wakaminya kufwa chahaya nyaka; Yehova wakakombola madilu kumesu awantu ejima.’—Isaya 25:8.

4. Wanta waNzambi wukweti Nyuli atondawu kudi Nzambi. Mesiya haditondeli yomweni  kwikala nyuli, hela hiyamutondeli kudi antu abula kumanininaku. Ilaña amutondeli kudi Yehova Nzambi. Nkumbu jakutena nawu Mesiya niKristu jamwekeshaña nawu amutondeli kudi Nzambi. Mazu ejima ayedi alumbuluka nawu “waWayishewa.” Dichi Mwanta yeniwu amuwayisha kudi Yehova. Nzambi wahosha hadi yeni nindi: “Talenu kambuñami inakwata kuchikasa wami natonda inatiyaña kuwaha mumuchima wami. Nashi Spiritu yami hadi yena. Wakamwekeshela aJentili wuñaji.” (Isaya 42:1; Matewu 12:17, 18) Nleñi yetu diyi welukisha Nyuli yitwakeñaña.

5. Nyuli yaWanta waNzambi namwekeshi kulema kwindi kudi antu ejima. Yesu wakuNazareta wekalili Mesiya wuyashimwineñahu dehi. Wavwalikilili muchisaka chatondeliyi Nzambi. (Kutachika 22:18; 1 Kushindulula 17:11; Matewu 1:1) Hampinji yadiñiyi heseki, washikijili wuprofwetu wawuvulu wasonekeluwu hadi Mesiya hankulakaji jayaaka yakusambila. Amwilukili cheñi mwiwulu nawu hiMesiya. Indi chumichi chazatikili ñahi? Nzambi wahosheli nezu datiyakana kufuma mwiwulu, nakumwilukisha Yesu hamu neyi Mwanindi wumu hohu; añelu amushimwini Yesu nawu Mesiya ashimwineñahu dehi; nawa kakavulu Yesu wakoñeli yihayamisha hamesu awantu amavulu nawa chumichi chinakumwekesha nawu wazatishileña ñovu jaNzambi. * Yesu kakavulu wamwekesheli muchidi waNyuli wukekalayi. Hadiñi hohu nañovu jakukwasha antuku, ilaña nimpwila yakukwasha antu. (Matewu 8:1-3) Hadiñi nalwisuku, wayitiyilileña antu wushona, wadiñi nawulobu nawa wadiñi wadizoza. Nsañu yasonekawu kutalisha hawumi windi henohu wudi hamaseki yekala muBayibolu kulonda ejima ayitañeña.

6. Wanta waNzambi wukweti anyuli 144,000 akayula hamu naKristu. Yesu wahosheli nindi, amakwawu kubombelaku apostolu indi, akayulaña nindi mwiwulu. Wateneni izanvu denidi nindi ‘kamukanka kanyanya.’ (Luka 12:32) Nkumininaku, kapostolu Yowanu amulejeli nawu aka kamukanka kanyanya kakashika ku 144,000. Akekala namudimu wawuwahi mwiwulu, akayula naKristu hamu neyi anyanta nawa akakalakalaña hamu neyi atupristu.—Chimwekeshu 5:9, 10; 14:1, 3.

7. Wanta waNzambi, wunakuyula mwiwulu, keña wutachiki kuyula iseki dejima. Ichi chikuma chakukumishaku hichikuma chachiwahi chitunateli kudiza. Bayibolu yashimunaña wunsahu wawuvulu wakwila nawu Yesu amwinka ñovu yakwikala Mwanta mwiwulu. Chayinu mpinji Yesu nakuyula mwiwulu, nawa keña yatachiki kuyula iseki dejima nikushikija wuprofwetu walema wutunateni. Hanu dinu tunateli kwiluka ñahi netu Wanta waNzambi wunakuyula hayinu mpinji? Nawa mpinjinyi yiwakatachika kuyula iseki dejima?

[Tumazu twaheshina]