Yesu Kristu—kaMishonali Muneni

“Ami namwiluka, muloña diku nafumini, yena diyi wantemesheli.”—YOWANU 7:29.

1, 2. Indi kamishonali hinyi, nawa hinyi yitwatela kutena netu kaMishonali muneni?

 NEYI mutiya izu dakwila nawu “mishonali” mwatoñojokaña nenudi? Antu amakwawu atoñojokaña hadi amishonali amuKristendomu, akulujokaña munsañu jamatuña hela munsañu jamali mumatuña mwazatilañawu. Ilaña enu, hakwikala Chinsahu chaYehova mwatoñojokaña hadi amishonali atemeshañawu kudi Izaza Dalombolaña kuya nakushimwina nsañu yayiwahi mumatuña ashiyashana mukaayi kejima. (Matewu 24:14) Awa amishonali azatishaña mpinji yawu niñovu kumudimu walema wakukwasha antu kukundama kwakwihi naYehova Nzambi nikwikala nawubwambu waweni nayena.—Yakoba 4:8.

² Mazu akwila nawu “mishonali” ‘niamishonali’ muBayibolu yaNew World Translation of the Holy Scriptures hiyayisoneka mumavasuku. Ilaña tumazu twaheshina tudi haAefwesesa 4:11, Reference Bible yahoshaña nawu izu dachiGriki dabalumunawu “akwakushimwina” anateli kudibalumuna cheñi nawu “amishonali.” Yehova diyi Mukwakushimwina muneni, ilaña hitunatweshi kumutena netu kaMishonali munenuku, muloña kwosi muntu wamutemesheli. Yesu Kristu wahosheli hadi Tata yindi wamwiwulu nindi: “Ami namwiluka, muloña diku nafumini, yena diyi wantemesheli.” (Yowanu 7:29) Hakwila yamwekeshi chaswejeliyi kukeña muchidi wamuntu, Yehova watemesheli Mwanindi wumu hohu hamaseki. (Yowanu 3:16) Dichi twatela kumutena Yesu netu kaMishonali muneni, kaMishonali wamuwahi, muloña amutemesheli hamaseki kulonda ‘yekali chinsahu chansañu yalala.’ (Yowanu 18:37) Watwesheli chikupu kushimwina nsañu yayiwahi yaWanta, nikulelu tuchidi kuhetelamu mumudimu wakoñeliyi. Chakutalilahu, tunateli kwimbujola ntañishilu yindi mumudimu wetu wakushimwina, hela chakwila tudi amishonali hela nehi.

3. Malwihwinyi yitukuhanjekahu?

³ Mudimu waYesu wakushimwina Wanta watwileñelaña kwihula malwihu akwila nawu: Yumanyi yamweniyi Yesu mumudimu windi wakushimwina? Muloñadi ntañishilu yindi chiyashikileña antu hamuchima? Nawa chumanyi chaletesheleña mudimu windi wakushimwina kusoña nyikabu?

Yesu Wateleleli Kwikala naSpiritu yaKudihana haKushimwina Hamaseki

4-6. Yumanyi yahimpikili hampinji yamutemesheluwu Yesu hamaseki?

⁴ Amishonali amunanu mafuku nieniKristu amakwawu atuntukilaña kumaluña kudi kukankila kweneni kwawakwakushimwina aWanta, anateli kuhimpa chihandilu chawu kubadika chiyahandileñawu hakusambila. Hitunateli kwesekeja chihandilu chaYesu chahamaseki nachadiñayi nachu mwiwulu, mwadiñiyi naTata  yindi hakachi kawañelu adiña nakumukalakela Yehova nankeñelu yayiwahiku. (Yoba 1:6; 2:1) Yuma yahimpikili hampinji yenjili nakushakamayi nawakwanshidi mwituña datama. (Maku 7:20-23) Cheñi Yesu womikili ichima dadiñi hakachi kawatumbanji twindi adikundiliyi nawu. (Luka 20:46; 22:24) Hela chochu, yuma yejima yamweniyi hamaseki wayimanishili munjila yaloña.

⁵ Yesu hatachikili kuhosha idimi dawantu muchihayamishaku; ilaña wadizilili kuwansi. Hadiña kuhimpika kweneni kufuma hachifulu chakulombola añelu mwiwulu! Chadiñiyi hamaseki, Yesu wahosheleña idimi dimu ‘dahamadimi awantu.’ Idimi denidi dadiñi dambukaku chikupu ‘nedimi dawañelu.’ (1 Akorinda 13:1) Hela chochu, kwosi muntu niwumu watwesheleña kuhosha mazu amawahi neyi chahosheleñayi Yesu.—Luka 4:22.

⁶ Talenu njila jikwawu mwahimpikilili yuma chikupu cheliliyi Mwana kaNzambi yenzi hamaseki. Hela chakwila Yesu haswanini nshidi yaAdamaku, ilaña wekalili muntu, neyi chadiña ana akekala “ana kwindi,” hela atumbanji awayishewa. (Tañenu Aheberu 2:17, 18.) Hawufuku wakukumisha wumi windi waheseki, Yesu hamulombeli Tata yindi wamwiwulu kumutemeshela ‘añelu akubadika nyikanka ikumi nayiyeduku.’ Toñojokenu hadi añelu abadikiliyi ñovu hakwikala Mikeli Mukulumpi waWañelu! (Matewu 26:53; Yuda 9) Eña, Yesu wakoñeli yihayamisha; ilaña yuma yakoñeliyi hanu hamaseki yantesha nankashi neyi kuyesekeja nayuma yadi kukoñayi mwiwulu.

7. Chumanyi chelileñawu aYudeya kutalisha hakulondela Nshimbi?

⁷ Henohu wuchidi mwiwulu neyi “Izu,” Yesu watela diyi Wamuhosheleleñaku Nzambi walombweleña aIsarela mwisaña. (Yowanu 1:1; Kwidika 23:20-23) Hela chochu, ‘chatambwiluwu Nshimbi oyu kudi añelu, wena kuyihemba nehi.’ (Yililu 7:53; Aheberu 2:2, 3) Akulumpi jansakililu awaYudeya amuyaaka nkulakaji yatachi akañenyi kwiluka mwatalishilili Nshimbi. Chakutalilahu, talenu chadiñi nshimbi yaSabata. (Tañenu Maku 3:4-6.) Ansoneki niaFwarisi ‘alekeli kwila yuma yanshimbi yalema, kwokusompa, niluwi, nikukuhwelela.’ (Matewu 23:23) Ilaña, Yesu hatoñojokeli jakuleka kuyikwasha nikubula kuyishimwina chalalaku.

8. Muloñadi Yesu chatela kutukwashilayi?

⁸ Yesu wadiña namuchima wakudihana. Kukeña kwakeñeliyi antu dikwamusañumwineña nawa wakeñeli kuyikwasha chikupu. Watwalekeluhu naspiritu yakushimwina. Hamuloña wakwikala nakashinshi kudi Yehova hampinji yadiñiyi hamaseki, Yesu ‘wekalili mukwakubuza njila yawamwinu wahaya nyaka wawejima akumwovwahila.’ Cheñi nawa, “chakabiliyi yomweni nakumweseka, yena natweshi kukwasha antu [adi neyi etu] akwesekawu.”—Aheberu 2:18; 5:8, 9.

Amudizishili Chiwahi Kwikala Ntañishi

9, 10. Kufumba kwamuchidinyi kwatambwililiyi Yesu henohu kanda amutemeshi hamaseki?

⁹ Henohu eniKristu amunanu mafuku kanda ayitemeshi neyi amishonali, Izaza Dalombolaña daloñeshaña shikola yakuyidizisha. Komana Yesu Kristu niyena amudizishili? Eñañi, ilaña hayili kumashikola awaYudeya henohu kanda amuwayishi kwikala Mesiyaku; nawa hiyamutañishili kudi akulumpi jansakililu akuluka yitembuku. (Yowanu 7:15; esekejenu Yililu 22:3.) Hanu dinu, muloñadi Yesu chekaliliyi wakuluka yitembi mukutañisha?

¹⁰ Hela chakwila amudizishili kudi mama yindi, Maliya, nitata yindi wakuwanamu, Yosefu, Yesu watambwilili kufumba kweneni nankashi kwakuzatisha mumudimu wakushimwina kudi Yehova, washikiluhu kumudizisha chikupu. Yesu wahosheli hayumiyi nindi: “Hinahoshi chakumuchima wamami awenuku; Tata wantemesheli diyi nanleji munukuleja antu, nimunukuhosha.” (Yowanu 12:49) Ahanu tunamoni kwila nawu Mwana amulejeli chikupu yuma yakutañisha. Henohu kanda yenzi hamaseki, Yesu washakamini yaaka yayivulu nakutiya chamulejeleñayi Tata yindi. Eñani, Yesu watambwilili kufumba kwakuwahi nankashi.

11. Indi Yesu wembujoleli ñahi yililu yaTata yindi yakwakamena antu?

¹¹ Kufuma hamuleñeluwu, iwu Mwana waswejeli kudikunda naTata yindi. Henohu  wuchidi mwiwulu, Yesu wamweneña Nzambi chayakameneneñayi antu kuhitila mukushinshika chayihembeleñayi Yehova. Mwana wayikeñeli antu neyi chochayikeñeluwu kudi Nzambi chakwila Yesu afwanishawu neyi maana, wahosheli nindi: “Natiyilaña kuwaha nawanyana kawantu.”—Yishimu 8:22, 31.

12, 13. (a) Indi Yesu wadizili ñahi kuhitila mukushinshika chazatileñayi Tata yindi nawaIsarela? (b) Indi Yesu wazatishileña ñahi yuma yamulejeluwu?

¹² Kudiza kwadiziliyi Mwana kwabombelelumu kushinshika chazatileñayi Tata yindi nayuma yakala. Chakutalilahu, talenu chazatiliyi Yehova nawaIsarela akwakudikaña. HaNehemiya 9:28 hahoshaña nawu: “Cheliluwu ananooki dehi, afuntilili cheñi kwila chatama kumesu eyi [Yehova], nineyi hiwukuyilekela kudi ayilumbu jawu mwaka ekalaña anyanta jawu. Hela chochu, chafuntiluwu cheñi nakudilila kudeyi, eyi muna mwiwulu watiyili, wayipulwishili kakavulu mwaya wushona weyi wawuvulu.” Hamuloña wakuzatila hamu naYehova nikushinshika chelileñayi chamuletesheli Yesu niyena kutiyila antu wushona mwiluña mwashimwinineñayi.—Yowanu 5:19.

¹³ Yesu wazatishileña yuma yadiziliyi hakutiyila atumbanji twindi wushona. Hawufuku wakukumishaku henohu kanda yofwi, apostolu ejima akeñeliyi nankashi “amushiya nikumushiya, atemoka nikutemoka.” (Matewu 26:56; Yowanu 13:1) Kwila dinu kapostolu Petulu wamukaanini Kristu mapampa kasatu! Ilaña Yesu wayitejeli apostolu indi kufunta kudi yena. Wamulejeli Petulu nindi: “Ami nakulembeleli kulonda kukuhwelela kweyi kubuli kukañanya. Nineyi, chiwakabalumuka mumuchima, wakakoleshaña ana kweyi.” (Luka 22:32) A Isarela akuspiritu ayituñila hachikuku “chawapostolu nawatuprofwetu,” nihamalola akwiwombu ambañu yaYerusalema Yayiha hekala majina awapostolu ashinshika 12 aKana kaMukoku, Yesu Kristu. Nikulelu, eniKristu awayishewa hamu nawalundanawu adihana, “anyikoku acheñi,” anakutwalekahu mumudimu wawu wakushimwina Wanta mukuloñesha kudi muchikasa chaNzambi chañovu nimuwunlomboli waMwanindi wakeñewa.—Aefwesesa 2:20; Yowanu 10:16; Chimwekeshu 21:14.

 Yesu Chatañishileñayi

14, 15. Indi ntañishilu yaYesu yaambukili ñahi nantañishilu yawansoneki niyawaFwarisi?

¹⁴ Munjilanyi mwazatishililiyi Yesu yuma yadiziliyi hakutañisha atumbanji twindi? Neyi tukwila netu twesekeji ntañishilu yaYesu nayawakulumpi jansakililu jawaYudeya, twamonaña chikupu kulema kwantañishilu yaYesu. Ansoneki nawaFwarisi ‘apepesheli izu daNzambi nachaaku chawu.’ Kwambukaku, yuma yahosheleñayi Yesu hiyafumineña mumuchima winduku; ilaña watañishileña izu daNzambi. (Matewu 15:6; Yowanu 14:10) Anetu nawa dichitwatela kwila.

¹⁵ Kudi chuma chikwawu chaletesheli Yesu kwambukaku chikupu nawakulumpi jansakililu. Yesu wahosheli hadi ansoneki niaFwarisi nindi: “Ilenuña yuma yejima yakuyilejawu muyihembi, ilaña bayi mwimbujolaña mwelañawuku; muloña akuminaña dakuhosha hohu, kwilamu nehi.” (Matewu 23:3) Yesu wazatishileña yuma yatañishileñayi. Tutalenu chakutalilahu chinakumwekesha chazatishileñayi Yesu yuma yatañishileñayi.

16. Muloñadi chimukuhoshela nenu Yesu wakoñeleña kwesekeja namazu indi asonekawu haMatewu 6:19-21?

¹⁶ Yesu wayikonkomweneni atumbanji twindi ‘kulumbika maheta mwiwulu.’ (Tañenu Matewu 6:19-21) Komana Yesu yomweni walondeleli iku kufumba? Eña, muloña wahosheli chalala hadi yomwenindi nindi: “Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila mutu winduku.” (Luka 9:58) Yesu wadiñi nachihandilu chapela. Waswejeli kusha muchima kukushimwina nsañu yayiwahi yaWanta, nawa wamwekesheli chalumbuluka kubula kwakamena kwenzaña hamuloña wakulumbikila maheta hamaseki. Yesu walumbulwili nindi chachiwahi kulumbika maheta mwiwulu, “mwabula tububu, hela ndala yanoñeshaña, mwabula amakombi alokolaña matala nakwiya.” Komana ninenu munakulondela kufumba kwaYesu kwakulumbika maheta mwiwulu?

Yililu Yaletesheli Yesu Amukeñi Kudi Antu

17. Yililwinyi yamuletesheli Yesu kwikala mukwakushimwina wakuluka yitembi?

¹⁷ Yililwinyi yamuletesheli Yesu kwikala mukwakushimwina wakuluka yitembi? Chililu chimu chadiñi chakutoñojokelaku antu akwashileñayi. Yililu yayiwahi yaYehova yakudizoza, kukeña, niwushona diyi yembujolileñayi Yesu. Talenu iyi yililu chiyakokweleña antu amavulu kudi Yesu.

18. Muloñadi chitukuhoshela netu Yesu wadiñi wadizoza?

¹⁸ Chetejeliyi mudimu wakwinza hanu hamaseki, Yesu “wadibalumwini kwikala wakadi kulema, hakwikala mwekalila nduñu, hakwikala chaduwu antu.” (Afwilipi 2:7) Eñañi, Yesu wamwekesheli kudizoza. Kubombelahu cheñi, Yesu hadiwileña antuku. Hadiñi nayitoñojoka yakwila nawu: ‘Ami nafumi mwiwulu mwamulehi, dichi enu chiña mutiyeña munukuhoshaña.’ Kwambukaku nawamesiya akutwamba, Yesu hatwili kabobobu hachifulu chindi nindi yena diyi Mesiya walalaku. Mpinji yikwawu walejeleña antu nindi bayi amutiyakesha kudi antu hela kuyileja yuma yinakoñiyuku. (Matewu 12:15-21) Yesu wakeñeleña antu kudifuukwila aweni kumulonda nakushindamena hayuma yamweneñawu. Atumbanji twindi ahetelelumu chikupu muloña Mwanta wawu hakeñeleña nindi ekali neyi añelu aloña adiñayi nawu mwiwuluku.

19, 20. Munjilanyi kukeña niwushona chikwamuletesheli Yesu kukwasha antu?

¹⁹ Yesu Kristu wamwekesheleña cheñi kukeña, chililu chabadika chaTata yindi. (1 Yowanu 4:8) Kukeña kwamuletesheli Yesu kudizisha mazaza awantu. Chakutalilahu, talenu chamukeñeliyi nyuli wamukwenzi. (Tañenu Maku 10:17-22.) Yesu “hakumukeña” nawa wafwilileña kumukwasha, ilaña iwu nyuli hashiyili maheta indi amavulu nakwikala kambanji kaKristuku.

²⁰ Wushona wadiñi hakachi kayililu yayiwahi yaYesu. Kufwana antu ejima abula kuloña, antu amweneña kukala diwu etejeleña ntañishilu yindi. Chelukiliyi yumiyi, Yesu wayitañishileña munjila yawushona nawa yaluwi. Chakutalilahu: Mpinji yimu, Yesu niapostolu indi  nyidimu yayiswejeleli chakwila akañenyi nikuwana mpinji yakudya. Indi Yesu welili ñahi chamweniyi izaza dawantu dinapompi? ‘Hakuyitiyila wushona muloña adiñi neyi anyikoku akadi kabiña; hakutachika kuyileja yuma yayivulu.’ (Maku 6:34) Yesu wamweneña kukala kwadiñi nawantu amwiluña dindi, dichi wazatili nañovu nakuyitañisha nikwila yihayamisha kulonda kuyikwasha. Yililu yindi yayiwahi yakokweli antu amakwawu, nimazu ahosheleñayi ayishikili hanyichima chakwila ekalili atumbanji twindi.

21. Chumanyi chitukadiza muchibaba chinalondeluhu?

²¹ Kudi yuma yayivulu yitwatela kudizilaku kumudimu waYesu waheseki, neyi chikuhosha chibaba chinalondeluhu. Munjilanyi jikwawu mutunateli kumwimbujolila Yesu Kristu, kaMishonali muneni?

Mukwakula Nenudi?

• Kudizanyi kwatambwililiyi Yesu henohu kanda yenzi hamaseki?

• Indi ntañishilu yaYesu yabadikili ñahi ntañishilu yawansoneki niaFwarisi?

• Yililwinyi yamuletesheli Yesu kumukeña kudi antu?

[Malwihu aKuzatisha haKudiza]

[Mwevulu wudi hefu 18]

Indi Yesu watañishileña ñahi mazaza awantu?