Antu Anakukeñakeña Ñakwilu

“Chineli tuneluki dehi mwakudihembela nichakukwasha yisaka yetu munsañu jamali, nawa tukweti yuma yayiwahi yitwabulili kwiluka kunyaka yidi neyi matala amawahi, yisanji yayiwahi ninyotoka yayiwahi, chaleteshaña muntu kufwila kwiluka ‘muloña’ wutwekalilaku. Muloñadi antu chiyanakudibechelawu nakufwila kwikala nachihandilu chachiwahi kubadika akwawu? Nawa awaninañamu mwodi?” —David G. Myers, professor of psychology at Hope College, Holland, Michigan, U.S.A.

MUKWAKULA nenudi malwihu enhwiliyi nkuluñaña David G. Myers? Amakwawu atoñojokaña nawu kukeñakeña ñakwilu hikumba hohu mpinji. Hela chochu, kudiwula malwihu amuchidiwu chidi neyi munakudiwula kadilola kaneñili munsapatu yenu. Mukutwalekahu nalwendu lwenu, ilaña hilukuwahaku muloña wakadilola kadi munsapatu.

Neyi mwatoñojokaña nenu kudi chuma chaletesha twikaluku, bayi neyi yenu hohu mwatoñojokaña mwenimuku. Kwesekeja nachahosheli Mutayi weneni wasandujolaña hayuma yalemeshawu antu, antu amavulu mumatuña amavulu anakutoñojoka “hakulema kwawumi nichitwekalilaku.”

Hakwila nawu mubuleña kwakama, mwatela kwiluka ñakwilu yanawa malwihu amaneni asatu.

Indi etu antu twafumini kudihi?

Muloñadi chitwekalilaku?

Yumanyi yikamwekana kumbidi?

Kudihi kumwatela kuwana ñakwilu yakumanisha mpwila yanawa malwihu alema? Chatela muwani ñakwilu kuhitila mukuboka hela kushindamena hamaana awantu, mafu analondeluhu akuhana ñakwilu yekala Mwizu daNzambi, Bayibolu. Mwani bakulenu Bayibolu yenu kulonda muditañili enu aweni mazu ekalamu.