Indi Etu Antu Twafumini Kudihi?

MULOÑADI CHITWATELA KWILUKILA KUTWAFUMA? Antu amavulu ayidizishaña nawu yileñaleña hanu hamaseki yenjiluku hohu yayenayu. Ayilejaña nawu kuhitila muyuma yadimwekenaña yayeni, mukubalumoka kwayuma dimwafumini muntu wukweti maana, kashinshi, nawa wukweti yitoñojoka yakuspiritu.

Dichi talenu yuma chiyadi kwikala: Neyi chakwila etu antu mwalala twabalumukili hohu, chakadi Nleñi, mutenowu antu adi kwikala anshona. Antu hiyadi kwikala nakwakuwana maanaku, nawa kwosi wadi kutukwasha kumanisha kukala kutwamonaña. Twadi kushindamenaña hohu hamaana awuntu kulonda kukañesha yuma yakisañanaña iseki, kumanisha yikonkojola yajamatuña, nikutuleja mwakwilila nakukala kutunakumona.

Komana kushindamena hohu hamaana awuntu kwayileñelaña enu kubula kwakamena? Neyi kwayileñelaña kwakamena, toñojokenu hadi muntu mukwawu wasweja maana. Nsañu yeniyi yaletaña ikoku nawa yidi namuyatalisha.

Chahoshaña Bayibolu

Bayibolu yatañishaña nawu antu ayileñeli kudi Nzambi. Bayi neyi twafuma kuyuma yabalumokaña yabulaña kwakamena nikutoñojokaku. Ilaña, tudi anyana kaTata wakukeña nawa wukweti maana. Talenu iyi nsañu yalumbululawu chachiwahi muBayibolu.

Kutachika 1:27. “Nzambi yoleña muntu neyi chekalayi yomweni, chochekalayi Nzambi dichi chamuleñeliyi; wayileñeli niiyala nimumbanda.”

Masamu 139:14. “Nakusakilili; chanantuñuwu chakala chakuhayama hohu! Nyidimu yeyi yakuhayama hohu; muchima wami wunachiluki nankashi.”

Matewu 19:4-6. “Himunatañi nsañu yakwila nawu, wayileñeli hatachi, wayileñeli niiyala nimumbandaku, tahindi? nindi, Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu. Hiyadi cheñi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku.”

Yililu 17:24, 25. “Yowu Nzambi waleñeli mpata yamunu mwishina niyuma yejima yidumu, diyi Mwanta wamwiwulu niweseki. Hashakamaña kwindi mumatembeli akutuña namakasa awantuku; hela kumukalakela hiyamukalakelaña namakasa awantu, mwaka eli nindi nakeñi chumaku. Muloña yena diyi wenkaña antu wumi nimuuya niyuma yejima.”

Chimwekeshu 4:11. ‘Eyi Yehova, eyi Nzambi yetu, wunateli kutambula kulema nimpuhu niñovu, muloña yeyi waleñeli yuma yejima, nawa muloña wankeñelu yeyi dichi chiyekalilaku, dichayileñeleluwu.’

Ñakwilu yaBayibolu Chiyaleñelaña Kubula Kwakamena

Kwiluka netu kudi Nzambi ‘dikwatambwilaña yisaka yejima . . . yahamaseki ijina’ kwatukwashaña kutoñojokelaku antu amakwawu. (Aefwesesa 3:15) Cheñi kwikala nayitoñojoka yamuchidiwu kwatuleñelaña kwiluka chitwadimonaña etu aweni nichakumanisha kukala kutukweti. Yitoñojoka yetu yikutukwashaku munjila jinalondeluhu.

Neyi hitukufuukula hayuma yakala, yitoñojoka yawantu yaheña hiyikutwileñela etu kusweja kwakamaku. Ilaña, twakashindamena chikupu hakufumba kwaBayibolu. Muloñadi? Muloña ‘Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu,  nikwolola nachu, nikufumba nachu mwaloña; kulonda muntu waNzambi awanini chikupu, awahili nyidimu yayiwahi yejima.’—2 Timotewu 3:16, 17.

Eña, chakeñekaña kuzata nañovu nikudihemba hakwila nawu tuzatishi kufumba kwamuBayibolu. Mpinji yikwawu kufumba kwamuBayibolu kunateli kutuleteshetu kwila yuma munjila yambukaku nachitunafuukuli. (Kutachika 8:21) Dichi, neyi tukwiteja netu Tata yetu wekala mwiwulu wukweti kukeña diyi watuleñeli, tukwiluka netu wakeñaña nindi tufuukuleña mwamuwahi. (Isaya 55:9) Izu dindi datukonkomwenaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” (Yishimu 3:5, 6) Neyi tukuzatisha iku kufumba, hitukwikalaña nachineñi chitwatiyaña neyi tunamoni kukala nihakufuukulaku.

Neyi tutalañana nachaambu, hichakatukata kumuchima netu twakehelamu nakutoñojoka netu tudi antu amukunkulwayi abadikawu kudi antu akumuza wacheñi hela antu akuyisemwa yacheñuku. Ilaña, twakatoñojoka netu twalema. Muloñadi? Muloña Tata yetu, Yehova Nzambi, “haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.”—Yililu 10:34, 35.

Kwiluka nsañu yamuchidiwu kukatukwashaku cheñi kubula kumwekesha chaambu kudi amakwawu. Tukeluka netu hichatelela etu kudisamba netu twabadika nyuza yacheñuku, muloña Nzambi “wafumishili kudi muntu wumu nyuza yawantu ejima, kulonda ashakami heseki dejima.”—Yililu 17:26.

Mwamweni, chitweluka netu atuleñeli nawa Nleñi yetu watwakamenaña chikutukwashaku kubula kwakamena. Ilaña kudi yuma yikwawu yitwatela kwiluka hakwila nawu tubuleña kwakamena.

[Mazu ekoku adi hefu 4]

Komana muchidi wamuntu wabalumukili hohu?