Komana Antu Mwayimonaña Neyi Chayimonañayi Yehova?
Komana Antu Mwayimonaña Neyi Chayimonañayi Yehova?
“Mumujimba mubuli kwikala kwambuka, . . . Yidi yejima yihembañani.” —1 AKORINDA 12:25.
1. Mwatiyili ñahi hampinji yatachi kwiñila muparadisa yakuspiritu?
HAMPINJI yitwalekeli kukoña yuma yamukanu kaayi katama nakutachika kudikunda nawantu jaYehova, twatiyili kuwaha hakumona kukeña kwalala nikudakamena kwadakamenañawu aYinsahu jaYehova. Ilaña ambukaku chikupu nawantu akweti winyi, atama nankashi, akwamadombu anakulombolewa naSatana. Tweñilili muparadisa yakuspiritu, yenzala kuwunda nikunuñañana.—Isaya 48:17, 18; 60:18; 65:25.
2. (a) Chumanyi chikutukojeja kumona amana kwetu munjila yaheña? (b) Chumanyi chitwatela kwila?
2 Hela chochu, mukuhita kwampinji tunateli kutachika kuyimona amana kwetu munjila yaheña muloña wakubula kuwanina. Nawa kwatela kutukojeja kulebumuna yiluwa yawamana kwetu chatela tushinshikeña hohu hayililu yawu yakuspiritu. Hela netu, twavulamenaña kuyimona neyi chayimonañayi Yehova. Neyi tutachika kulebumuna yiluwa yawamana kwetu, chachiwahi kutoñojoka hachitwayimonaña amakwawu kulonda tuyimoneña neyi chayimonañayi Yehova.—Kwidika 33:13.
Yehova Chayimonañayi Amana Kwetu
3. Indi Bayibolu yafwanisha chipompelu chawiniKristu kuchumanyi?
3 Kwesekeja nachasonekawu ha 1 Akorinda 12:2-26 kapostolu Pawulu wafwanishili chipompelu chaweniKristu awayishewa namujimba wekala “nayidi yayivulu.” Neyi chochashiyashana yidi yamujimba yejima, antu amuchipompelu niwena ashiyashana muyililu niwuswa wukwetuwu. Ilaña Yehova watambwilaña antu ejima ashiyashana ekala muchipompelu. Wayikeña nawa walemesha muntu wejima. Cheñi nawa, Pawulu watukonkomwena nindi, antu amuchipompelu ‘atela kuhembañana.’ Ilaña kuhembañana kunateli kukala muloña twashiyashana muyililu.
4. Muloñadi chitwatela kuhimpila chitwamonaña amana kwetu?
4 Tunateli kutachika kushinshika hayiluwa yawana kwetu. Kwila mwenimu, chidi neyi tunakushinshika hohu hachuma chimu chidi hamwevulu. Ilaña, Yehova wamonaña yuma yejima yidi hamwevulu. Etu twashinshikaña hohu hachuma chitunakubula kukeña, ilaña Yehova wamonaña muntu wejima, kubombelahu niyililu yayiwahi yikwetiyi muntu. Neyi tukufwila kumwimbujola Yehova chikupu, tukwikala naspiritu yakukeña nikunuñañana muchipompelu.—Aefwesesa 4:1-3; 5:1, 2.
5. Muloñadi chitukubulila kusompesha akwetu?
5 Yesu welukili chikupu nindi antu abula kuwanina kakavulu ekala nachaaku chakusompesha akwawu. Wakonkomweneni nindi: “Bayi musompeshaña akwenuku, kulonda abuli kuyisompesha ninenu.” (Matewu 7:1). Mwidimi dachiGriki Yesu hahosheli nindi: “Bayi musompeshaña akwenuku”; ilaña wahosheli nindi: “Lekenu kusompesha akwenu.” Welukili nindi antiyilili jindi amavulu adiña nachaaku chakusompesha akwawu. Komana ninetu tunatachiki dehi kusompesha akwetu? Neyi tukweti chaaku chakusompesha amakwawu, twatela kuzata nañovu kulonda tuhimpi, hakwila akabuli kutusompesha. Mwalala, hitukweti wuswa wakusompesha muntu anakuzatishawu kudi Yehova mumudimu hela kuhosha netu hanateleli kwikala muchipompeluku. Mana kwetu nateli kwikala wazeya munjila yimu, ilaña neyi Yehova nakutwalekahu kumuzatisha, komana chikuwaha neyi tukumukaana? (Yowanu 6:44) Komana twakuhwelela chikupu netu Yehova nakulombola kuloñesha kwindi nawa neyi kudi yuma yinakukeñeka kuhimpa, wukayihimpa mumpinji yindi yatelela?—Tañenu Aroma 14:1-4.
6. Indi Yehova wayimonaña ñahi ambuñindi?
6 Yehova wabadika kuwaha muloña wamonaña wuswa wukweti eniKristu ejima chakekalawu neyi anashiki dehi hakuwanina mwituña dadiha. Cheñi nawa wamonaña chiyanakuliluku kuhitila mukuzatisha yuma yinadiziwu muBayibolu. Dichi, hashinshikaña hayiluwa yetuku. HaMasamu 103:12 twatañañahu nawu: “Nafumishi nyiloña yetu, nayitwali kwakulehi neyi kufumisha kumusela nakushika kumujika.” Komana twatela kusakilila chikupu hakubula kushinshika hanyiloña yetu.—Masamu 130:3.
7. Chumanyi chitwadizilaña kudi Yehova chamumweneñayi Davidi?
7 MuNsona twawanañamu wunsahu wakwila nawu Yehova wukweti wuswa wabadika wakushinshika hayililu yayiwahi yakoñañayi muntu. Nzambi wamuteneni Davidi nindi: “Kambuñami Davidi, wahembelaña kuleja kwami wanlondelaña namuchima windi wejima nakwila yaloña hohu kumesu ami.” (1 Anyanta 14:8) Hela chochu, tweluka netu Davidi wakoñeli yuma yatama. Ilaña, Yehova washinshikili hayililu yayiwahi yaDavidi muloña welukili nindi muchima waDavidi wadiña woloka.—1 Kushindulula 29:17.
Monenuña Amana Kwenu Neyi Chayimonañayi Yehova
8, 9. (a) Mujilanyi mutunateli kumwimbujolila Yehova? (b) Indi kumwimbujola Yehova mukukwilumbulula ñahi, nawa tukudizilaku kwodi?
8 Yehova weluka jekala munyichima, ilaña etu hitwelukaku. Iwu diwu muloña waweni wutukubulilaña kusompesha akwetu. Muloña tweluka wanyi yitoñojoka yawantu. Twatela kumwimbojola Yehova kuhitila mukubula kushinshika hayiluwa yawakwetu, muloña yikahita. Komana hichikuwahaku neyi tumwimbujola Yehova, kuhitila mukubula kushinshika hayiluwa yawamana kwetu? Neyi tukwila mwenimu tukutiyashanaña chachiwahi nawamana kwetu niahela.—Aefwesesa 4:23, 24.
9 Chakutalilahu, toñojokenu itala dinakuhumoka—malata anakuzokoka, jinjanina jafumpeka dehi, nawa chibambi chinakisiki dehi namenji. Antu amavulu anakumona idi itala akuhosha nawu atela kudihumuna, muloña dinakumwekana chatama. Ilaña muntu mukwawu wukudimwena munjila yacheñi. Hakutiya kutama nachidinakumwekana hanzuku. Ilaña wukumona nindi itala dejima didi chiwahi, wukukumina dakudiloñesha hohu. Yolanda niitala denidi nakudiloñesha hanatami, ditachika nikumwekana chiwahi. Dichi antu atachika nikuhosha nawu dinakumwekana chiwahi. Komana twatela kwikala neyi iwu muntu wawahishili hela watuñulwili idi itala? Chatela tushinshikeña hayiluwa yawamana kwetu yitunakumona namesu, komana kwila tushinshika hayililu yawu yayiwahi nikwiluka netu anateli kuyilaku hambidi lwakuspiritu nehi? Neyi twila mwenimu, tukuyikeña amana kwetu muloña wayililu yawu yayiwahi yakuspiritu, neyi chayikeñayi Yehova.—Tañenu Aheberu 6:10.
10. Indi kufumba kwekala haAfwilipi 2:3, 4 kwatela kutukwasha ñahi?
10 Kapostolu Pawulu waheni kufumba kwakuwahi kwatela kutukwasha hakudikunda nawantu ejima muchipompelu. Wakonkomweneni eniKristu nindi: “Bayi mwila chuma chakuzuña hela chakudinka wantaku; chiña mutoñojokaña yakudizoza, iwu atoñojoki mukwawu, nindi wambadikami kuwaha. Bayi muntu atoñojokaña nsañu yindi hohuku, chiña nsañu jawakwawu nawa.” (Afwilipi 2:3, 4) Kudizoza kukutukwasha kumona akwetu neyi chayimonañayi Yehova. Kuyakamena akwetu nikumona kakawahi mudi wena kukatukwasha kuyimona neyi chayimonañayi Yehova.
11. Kuhimpikanyi kunakumwekana muyipompelu yikwawu?
11 Makonu, yuma yinakumwekana mukaayi kejima yinaleteshi antu amavulu kuya kumatuña acheñi. Munyisumba yikwawu munakushakama antu afuma kumatuña ashiyashana. Antu amakwawu adi mwiluña mutwashakamaña adi nampwila yakudiza chalala chaBayibolu, nawa tunakudifukula nawu hamu kudi Yehova. Awa antu “akunyuza yejima, akunyichidi yejima, akumatuña ejima, akumadimi ejima.” (Chimwekeshu 7:9) Chumichi, chinaleteshi yipompelu yetu yayivulu kwikala nawantu afuma kumatuña ashiyashana.
12. Twatela kudimona ñahi wumu namukwawu, nawa chumichi chinateli kutukalila ñahi mpinji jikwawu?
12 Twatela kushaku kashinshi kakeni kakudakamena wumu namukwawu muyipompelu yetu. Chumichi chatwanukishaña kufumba kwakapostolu Petulu kwakwila nawu “mukeñi ana kwenu chakadi kudimbana” nawa “keñañanenu chakumuchima chacheni.” (1 Petulu 1:22) Ilaña chinateli kutukalila kumwekesha kukeña kwamuchidiwu chidi neyi muchipompelu mwekala antu amavulu akumatuña acheñi. Hekwawu chisemwa chawakwetu akwakudifukula chinateli kwambuka nachisemwa chetu chikupu, nawa ichi chaambu chinateli kubombelamu kutaña, maheta, nimuza. Komana chayikalilaña kwiluka yitoñojoka hela nzatilu yawakwenu akwakudifukula akwituña dacheñi? Hekwawu niwena dichayitoñojokelañawu. Hela chochu, wejima wetu anatuleji nawu: “Keñenu ana kwenu [ejima].”—1 Petulu 2:17.
13. Yumanyi yitwatela kuhimpa muyitoñojoka yetu?
13 Chikuwaha neyi tukuhimpa yitoñojoka yetu kulonda tusweji kukeñañana nawamana kwetu ejima. (Tañenu 2 Akorinda 6:12, 13.) Komana twahoshaña mazu adi neyi “hinekala nachaambuku, kufumahu . . . ” hitukushimuna yaaku yaheña yitwamonaña mudi antu akwacheñi? Yitoñojoka yamuchidiwu yikutwileñela tuleki chaambu chekala munyichima yetu. Twatela kudihula netu, ‘Komana mpinji yejima nafwilaña kudiluka nawantu akwituña dacheñi?’ Kudihula malwihu amuchidiwu kukutukwashaku kutambwila nikukeña amana kwetu amukaayi kejima.
14, 15. (a) Shimunenu yakutalilahu yawantu ahimpili yitoñojoka yawu nakutachika kumona akwawu munjila yayiwahi? (b) Tunateli kuyimbujola ñahi?
14 Bayibolu yatulejaña yakutalilahu yayiwahi yawantu ahimpili yitoñojoka yawu, chidi neyi kapostolu Petulu. Hakwikala kaYudeya, Petulu hateleli kwiñila mwitala dakaJentiluku. Toñojokenu chatiyili hampinji yamulejeluwu nawu yayi kwitala dakaJentili Konelisu wabulili kwalama! Petulu wahimpili, muloña welukili nindi Nzambi wukweti nkeñelu yakwilisha antu akunyuza yejima ekali muchipompelu chawiniKristu. (Yililu 10:9-35) Sawulu wekalili kapostolu Pawulu, niyena wahimpili yitoñojoka yindi nikuleka chaambu. Wetejeli nindi eniKristu wayiheleli nankashi nawa ‘waswejeli kukabisha chipompelu chaNzambi nikuchikisañana.’ Hela chochu, chelili Mwanta Yesu yamwololi, Pawulu wahimpili chikupu nakutachika kwiteja wunlomboli wawantu akabishileñayi.—Aŋalija 1:13-20.
15 Anetu nawa tunateli kuhimpa yililu yetu nawukwashu waspiritu yaYehova. Neyi twiluka netu tukweti tuyaaku twakumwekesha chaambu, twatela kutwileka kulonda ‘tuhembi kunuñañana kwa[s]piritu, nakudikasa mwonji wakuwunda.’ (Aefwesesa 4:3-6) Bayibolu yatulejaña nawu ‘tudilunjiki kukeña, muloña diyi mpanda yasweja kunuña antu hamu.’—Akolose 3:14.
Chakumwimbujola Yehova muMudimu Wetu waKushimwina
16. Indi Nzambi wukweti nkeñelwinyi kutalisha kudi antu?
16 Kapostolu Pawulu wasonekeli nindi “kudi Nzambi hikwekala kwakama antu kumesuku.” (Aroma 2:11) Nkeñelu yaYehova yidi yakwila nawu antu akunyuza yejima adifukuleña kudi yena. (Tañenu 1 Timotewu 2:3, 4.) Hakwila nawu yashikiji iyi nkeñelu, naloñeshi “nsañu yayiwahi yahaya nyaka” kulonda ayishimwini ‘kunyuza yejima, kunyichidi yejima, nikumadimi ejima, nikudi antu ejima.’ (Chimwekeshu 14:6) Yesu wahosheli nindi: “Iha diyi mpata yamunu mwishina.” (Matewu 13:38) Komana enu nichisaka chenu mwamonaña mudimu wakushimwina nenu walema?
17. Tunateli kukwasha ñahi antu ejima?
17 Bayi neyi antu ejima anateli kuya kumatuña akwakulehi nakushimwina nsañu yaWanta kudi amakwawuku. Hela chochu, tunatweshi kushimwina iyi nsañu kudi antu afuma kumatuña akwakulehi ashakamaña mwiluña detu. Komana twekala asoñama kushimwina antu ejima, kubadika kushimwinaña antu wowamu mpinji yejima? Komana kwila mwimika chikonkwanyi chakushimwina antu abula kutiyahu dehi wunsahu walumbuluka nehi?—Aroma 15:20, 21.
18. Indi Yesu wamwekesheli ñahi nawu wakameneni antu?
18 Yesu wakeñeleña kukwasha antu ejima chikupu. Hashimwinineña hohu mwiluña dimuku. Chileji chimu chaBayibolu chatulejaña nawu Yesu “hakutambatamba munyikala yejima, niyamaneni niyanyanya.” Kulondelahu, “chanamoniyi mazaza awantu, hakuyitiyila wushona” nawa wakeñeli kuyikwasha nankashi.—Matewu 9:35-37.
19, 20. Njilanyi jikwawu mutwatela kumwimbujolela Yehova niYesu hakwakamena antu ejima?
19 Njilanyi jikwawu mumwatela kumwekeshela yililu yamwekesheliyi Yesu? Amakwawu azataña nañovu kulonda kushimwina mumaluña awu muyabulaña kushimwinawu kakavulu. Awa maluña anabombelumu jinkambi mwalandañawu nakulandulula, maluña akunookela, hayitesheni, hela mumatala ekela mumpwembu. Amakwawu niwena anadizi idimi dikwawu kulonda ashimwineña antu akwacheñi anakushakama mwiluña dawu hela antu abula kushimwinawu kakavulu. Kwiluka chakuyimusha mwidimi dawu kunateli kumwekesha chikupu nawu mwayakamena. Neyi hitukutwesha kudiza idimi dacheñiku, komana kwila tukolesha anakudiza kulonda atwalekuhu nehi? Dichi hitwatela kukañesha hela kwihula ana kwetu muloña wunakudizilawu idimi dacheñi kulonda ashimwini kudi antu akwituña dacheñuku. Antu ejima alema kumesu Nzambi, nawa twatela kuyimona neyi chayimonañayi.—Akolose 3:10, 11.
20 Cheñi kumona antu neyi chayimonañayi Nzambi chalumbulula kushimwina antu ejima, hichikweti muloña nachidi chihandilu chawuku. Hadaha amakwawu hiyakweti matalaku, ekala nawuhulu, hela yililu yawu yatama. Neyi antu amakwawu atwila katama, chumichi bayi chitwileñela kuhosha mazu atama hamuza wawu hela chisemwa chawu chejimaku. Pawulu amukoñeli katama kudi antu, ilaña halekeli kushimwina kudi antu awuna muzaku. (Yililu 14:5-7, 19-22) Welukili nindi antu amakwawu anateli kwiteja.
21. Indi kumona amakwawu neyi chayimonañayi Yehova kukuyikwasha ñahi?
21 Ichi tuneluki chikupu netu twatela kumona antu neyi chayimonañayi Yehova hakudikunda nawamana kwetu amuchipompelu, amana kwetu afuma kumatuña acheñi, hela antu yitwawanaña mumudimu wakushimwina. Chitwasweja kumona akwetu neyi chayimonañayi Yehova, chikuleta kuwunda nikunuñañana chikupu. Nawa tukwikala ashikahu kukwasha amakwawu kumukeña Yehova, Nzambi “wabulaña kwakama kumesu” ilaña wamwekeshaña kukeña kudi ejima, “muloña wejima wawu himudimu wamakasindi hohu.”—Yoba 34:19.
Mukutwesha Kwakula?
• Yililwinyi yitwatela kutondolwela hachitwayimonaña amana kwetu?
• Tunateli kumwimbujola ñahi Yehova munjila yitwamwenañamu amana kwetu?
• Yumanyi yimunadizi kutalisha hachitwatela kumona amana kwetu amukaayi kejima?
• Neyi tudi mumudimu wakushimwina tunateli kumona ñahi antu neyi chayimonañayi Yehova?
[Malwihu aKuzatisha haKudiza]