Yehova Watiyaña Chitwatambikaña

“Mesu aYehova atalaña antu aloña, nimatu indi atiyililaña chakutambikawu.”—MASAMU 34:15.

1, 2. (a) Indi antu amavulu makonu atoñojokaña nawudi? (b) Muloñadi yumiyi chiyabulaña kutuhayamisha?

 KOMANA munakumona makabi? Neyi munakumona makabi, akwenu niwena anakumona yihuñu. Antu amavulu anakumona kukala hakwila omiki makabi amonañawu mafuku ejima mukanu kaayi katama. Antu amakwawu, atoñojokaña nawu hiyakutwesha kuumikaku. Atiyaña neyi chatiyiliyi Davidi ñimbi yamasamu, wasonekeli nindi: “Nazeyi, natiyi mabinjila nankashi. Nabulumi chakubuluma nakutaza mumuchima wami. Muchima wami hiwukuluza, ñovu jami jinakumi; hela kumona to-o namesu ami chinanfumi.”—Masamu 38:8, 10.

² Hakwikala eniKristu, hichatuhayamishaña hakumona makabiku. Tweluka netu ‘ntachikilu yayihuñu’ yekala hakachi kachinjikijilu chatenenuwu dehi chakwinza kwaYesu. (Maku 13:8; Matewu 24:3) Izu dachiGriki dabalumunawu nawu ‘ntachikilu yayihuñu’ datalisha kunyisoñu yasweja yatiyañayi mumbanda hakuvwala mwana. Iyi nyisoñu yinesekani chikupu namakabi asweja anakumonawu antu muyinu “nyaka yakala.”—2 Timotewu 3:1.

Yehova Weluka Yihuñu Yetu

3. Chumanyi antu jaNzambi chiyelukawu chikupu?

³ Antu jaYehova eluka chikupu nawu niwena amonaña yihuñu, nawa chakadi kujina, iyi yihuñu yikuswejelaku. Kubombela hayihuñu yinakumona muchidi wamuntu wejima, ninetu ambuña aNzambi twatalañanaña ‘namukwankunyi netu Diyabolu,’ wunakufwila kukisañana chikuhwelelu chetu. (1 Petulu 5:8) Chumichi chikutwiletesha kutiya neyi chatiyililiyi Davidi wahosheli nindi: “Muchima wami wunabaluki nakundiwula kudi antu, kumuchima wami kunalemi nankashi mbe; natalajanini nami nimoni antu akuñanakenahu, hinayimwenuku, nami nimoni hela akwakukundeja hinayimwenuku.”—Masamu 69:20.

4. Chumanyi chatwikundejaña neyi tunakutalañana nakukala?

⁴ Komana Davidi watwalili mukwila nindi hadiñi nakuchiñejaku? Nehi. Talenu mazu amakwawu ahosheliyi munidi isamu: “Yehova watiyaña ahalwa, antu indi akasawu hayisekeshañaku.” (Masamu 69:33) Mpinji yikwawu twatiyaña neyi tudi muwuduñu muloña wayihuñu. Chinateli kumwekena neyi antu amakwawu hiyaneluki kukala kutukwetiku—hadaha eluka wanyi. Kufwana Davidi, kwiluka netu Yehova weluka kukala kwetu chikupu kunateli kutukundeja.—Masamu 34:15.

5. Chikuhwelelwinyi chadiña naMwanta Solomoni?

⁵ Solomoni mwana kaDavidi wakonkomweneni hanichi chikuma hakuhana tembeli muYerusalema. (Tañenu 2 Kushindulula 6:29-31.) Wamulembeleleli Yehova kulonda yotiyi kulomba kwamuntu wejima washinshika wukumusolomoka mukulomba kutalisha ‘hayipupu yindi niyihuñu yindi.’ Indi Nzambi watela kwila ñahi nakulomba kwanawa antu adi nakukala? Solomoni wahosheli nachikuhwelelu nindi Nzambi hakutiya hohu kulomba kwawuku, ilaña wukuyikwasha. Muloñadi? Muloña weluka chikupu yuma yidi ‘munyichima yawanyana kawantu.’

6. Munjilanyi mutukuumikila yuma yaleñelaña kwakama, nawa muloñadi?

⁶ Anetu nawa tunateli kumusolomoka Yehova mukulomba kutalisha ‘hayipupu yetu niyihuñu yetu’ kukala kutunakumona. Twatela kukundejewa neyi twiluka netu Yehova weluka  kukala kwetu nawa watwakamenaña. Kapostolu Petulu wetejeli chumichi hakuhosha nindi: “Mutwikenu kwakama kwenu kwejima, muloña yena wayihembaña.” (1 Petulu 5:7) Yehova watwakamenaña hamuloña wayuma yitwamonaña. Yesu wakonkomweneni nindi Yehova wakamenaña chikupu hakuhosha nindi: “Tujila twanyanya tuyedi hiyatulandishaña nakadaluku? Hosi kakajila kamu kaholokelaña heseki chakadi Tata yenu [kwilukaku]; ilaña ninsuki jakunyitu yenu jajeni ajichinda dehi jejima. Dichi bayi mutiyaña womaku; enu mwalema chakubadika tujila twatuvulu.”—Matewu 10:29-31.

Shindamenenu Hawukwashu waYehova

7. Wukwashu wamuchidinyi watukanawu?

⁷ Tunateli kukuhwelela chikupu netu Yehova wakeñaña nawa wafwilaña kutukwasha neyi tudi nakukala. “Nzambi diyi chiswamu chetu, diyi ñovu yetu, diyi watukwashañaku muyuma yakala, wudi mwamwihi, hakala kumuwanaku.” (Masamu 34:15-18; 46:1) Indi Nzambi wakwashaña ñahi? Toñojokenu chahosha mukanda wa 1 Akorinda 10:13 nawu: “Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.” Yehova natweshi kuhana njila mwakumanishila kukala kwetu, hela wukutwinka ñovu kulonda tuumiki. Muyuma yejima, Yehova wukatukwasha.

8. Tunateli kuzatisha ñahi wukwashu waNzambi?

⁸ Tunateli kuzatisha ñahi iwu wukwashu? Talenu chuma chiyanatulejuwu kwila nawu: ‘Mutwikenu kwakama kwenu kwejima.’ Chumichi chinakulumbulula nawu tumwinki Yehova mudimu wakwakamena kwetu kwejima muchifwikija. Twafwilaña kuleka kwakamena nakumukuhwelela Yehova kutwinka yuma yitwakeñaña. (Matewu 6:25-32) Twatela kudizoza hakwila twikala nachikuhwelelu chamuchidiwu, bayi kushindamena hañovu jetu hela hamaana etuku. Neyi tukudizoza “mwishina dachikasa chaNzambi chañovu,” tukwiluka netu twakehelamu. (Tañenu 1 Petulu 5:6.) Neyi tukwila mwenimu, chikutukwashaña kuumika yuma yejima yikwitejayi Nzambi. Hadaha tunakufwila netu atwamwini yoyenoyu mpinji, ilaña twakuhwelela netu Yehova weluka mpinji yikatwamwinayi nichakatupulwishayi kumakabi.—Masamu 54:7; Isaya 41:10.

9. Chitelu chamuchidinyi Davidi chateleleli kuumbilayi hadi Yehova?

⁹ Anukenu mazu aDavidi asonekawu haMasamu 55:22 akwila nawu: “Umbilaku chiteli cheyi hadi Yehova, yena wukukwashaku; hamba kamwitija mukwakuloña kukosomokaku.” Davidi hakusoneka awa mazu, wadiñi muyihuñu yamaneni. (Masamu 55:4) Chelukewa nawu idi isamu adisonekeli hampinji yakasiliyi mwanindi Abisalomi kafuta kakumutambula wanta. Ahitofweli, mukwakuleja Davidi maana wakuhweleleliyi chikupu, wadibombeli muniyi mpuña. Davidi watemukili muYerusalema kulonda yopulwishi wumi windi. (2 Samweli 15:12-14) Hela chakwila wadiña mukukala kwamuchidiwu, Davidi watwalekeluhu nakumukuhwelela Nzambi, nawa hamumbiluku.

10. Chumanyi chitwatela kwila neyi tudi nakukala?

¹⁰ Kufwana Davidi, anetu nawa twatela kumusolomoka Yehova mukulomba kutalisha hakukala kwejima kutunakumona. Tushinshikenu hayuma yitwatela kwila yatukonkomweneni kapostolu Pawulu. (Tañenu Afwilipi 4:6, 7.) Yumanyi yikufuma mukulomba kwakufuma hamuchima? “Kuwunda kwaNzambi kwabadika maana ejima kwakahemba nyichima [yetu] niyitoñojoka [yetu] mudi Kristu Yesu.”

11. Indi “kuwunda kwaNzambi” kwakiñaña ñahi nyichima yetu niyitoñojoka?

 ¹¹ Komana kulomba kunateli kukeheshaku kukala kumukweti? Kunateli. Twatela kwiluka netu, mpinji yejima Yehova hakulaña kulomba kwetu kwesekeja nachitunakukeñaku. Hela chochu, kulomba kwatukwashaña kwikala nayitoñojoka yayiwahi, kulonda kukala kutunakumona kubuli kutwiluwañesha. “Kuwunda kwaNzambi” kunateli kutwiwundisha neyi tudi nakukala. Kufwana mukanka wamashidika anenkuwu mudimu wakukiña musumba kulonda abuli kuwulukuka kudi ayilumbu, “kuwunda kwaNzambi” kukakiña nyichima yetu niyitoñojoka yetu. Cheñi kuwunda kwaNzambi kukatukwasha kubula kujinooka, woma, nimazu akudimbulula nawa kukatwikwasha kubula kwila yuma mulufuchi nawa chakubula kutoñojoka.—Masamu 145:18.

12. Lumbululenu muntu chinateliyi kubula kwakamena.

¹² Tunateli kubula kwakamena ñahi henohu tunakumona kukala? Talenu chakutalilahu chinakulumbulula kukala kutwamonaña. Muntu weñijawu mudimu nateli kuzata namukulumpi wanyidimu wazuwa nankashi. Hela chochu, muntu weñijawu mudimu hakumuleja mwinikampani, wukweti luwi, nawa washinshika. Mwinikampani hakuhosha nindi mwaabu weyi nawutiyi nawa hakumuleja nindi mukulumpi wanyidimu katataka yamufumishi hachifulu chindi. Indi muntu weñijawu mudimu wukutiya ñahi? Hamuloña wakukuhwelela mazu anamulejuwu nikwiluka chuma chikumwekana chikuletesha yatwalekuhu nanyidimu yindi, hela chakwila wukumona kukala kwantesha haniyi mpinji. Hohamu, anetu nawa tweluka netu Yehova weluka yihuñu yetu, nawa watukana nindi katataka ‘mwanta wayulaña mpata yamunu mwishina keña yekali chimwañaji.’ (Yowanu 12:31) Chumichi chatuzañaleshaña hama!

13. Kubombela hakulomba, yumanyi yikwawu yitwatela kwila?

¹³ Komana, twatela kumulejaña hohu Yehova kukala kwetu mukulomba? Nehi. Kudi yuma yayivulu yakeñekaña. Twatela kuzata kwesekeja nakulomba kwetu. Hampinji yatemesheliyi Mwanta Sawulu antu kuya kwitala daDavidi nakumujaha, Davidi walombeli nindi: “Mpulwishi kudi ayilumbu jami, eyi Nzambi yami; ñushi hewulu wunsweki kuchina akunnyamukila. Mpulwishi kudi akoñaña yakuluwa, ñamwini kudi akwawubanji.” (Masamu 59:1, 2) Chelili nalombi dehi, Davidi watiyilili cheñi mwiizu dañodindi nawa watemukili. (1 Samweli 19:11, 12) Anetu nawa, tunateli kulomba maana kulonda atukwashi chakuzata nakukala hadaha nikukeheshaku kukala kwetu.—Yakoba 1:5.

Chitwatela Kwikala naÑovu yaKuumika

14. Chumanyi chinateli kutukwasha kuumika hampinji yitunakumona kukala?

¹⁴ Kukala kwetu hikunateli kumana hayoyenoyu mpinjuku. Kunateli nikutwalekahu hadi mpinji yayilehi. Neyi chikala mwenimu, chumanyi chikatukwasha kuumika? Chatachi, anukenu nenu neyi tutwalekahu kumukalakela Yehova nakashinshi hela tudi nakukala, twamwekeshaña netu twamukeña Yehova. (Yililu 14:22) Anukenuña Satana chamutwambililiyi Yoba nindi: “Ochu Yoba wamwakama Nzambi chamukunkulu, tahindi? Hiwunamukolekeli niyena, niitala dindi, niyuma yindi yejima ikoli kwi-ndo mbadi jejimaku? Nyidimu yakumakasindi wunayikiswili nkisu, niyimuna yindi yasemunwina dehi mwituña. Ololaku ntahi chikasa cheyi katataka wukwati hayuma yindi yejima, wutali neyi wukubula kukuhosha chatama kumesu eyi.” (Yoba 1:9-11) Hamuloña wakashinshi kindi, Yoba wamwekesheli hatooka to-o nindi ana mazu adiña akutwamba. Ninetu nawa  tukweti kukooleka kwakumwekesha netu Satana hintwambi, neyi tuumika mumpinji yakukala. Dichi, kuumika kwetu kwakoleshaña chikuhwelelu chetu.—Yakoba 1:4.

15. Yakutalilahwinyi yinateli kutukolesha?

¹⁵ Chamuchiyedi, ilukenu nenu “ana kwenu adi mumpata yamunu mwishina niwena enda awanisha makabi wowamu.” (1 Petulu 5:9) Eña, “Hikunayiwani kweseka kwabulaña kutweshawu antu ejimaku.” (1 Akorinda 10:13) Dichi munateli kwikala nañovu nikubula woma kuhitila mukutoñojoka hayakutalilahu yawantu amakwawu kubadika kushinshika hakukala kwenu. (1 Atesalonika 1:5-7; Aheberu 12:1) Wanenuku mpinji yakutoñojoka hachakutalilahu chawantu yimweluka anomiki nakashinshi hela chakwila anahiti mukukala kwasweja. Komana, mwasandujolahu dehi yakuhumañana yamuwumi yasonekawu, nakukeña nsañu yawantu anahiti mukukala kwadifwana nakumunakumona? Iyi nsañu yinateli kuyikolesha chikupu.

16. Indi Nzambi watukoleshaña ñahi neyi tumona kweseka kwashiyashana?

¹⁶ Chamuchisatu, anukenu nenu Yehova “diyi Tata wavulishaña luwi, Nzambi wakukundeja kwejima, watukundejaña mulukadi lwetu lwejima, kulonda tutweshi kukundeja akwetu adi mulukadi nakukundeja kwanatukundejuwu nachu kudi Nzambi.” (2 Akorinda 1:3, 4) Chidi neyi Nzambi nemani kwakwihi nanetu nakutukolesha, bayi neyi mukukala kutunakumona katataka hohuku, ilaña ‘mukukala kwetu kwejima.’ Ichi chatukwashaña kukundeja amakwawu ‘mukukala kudi kwejima.’ Pawulu wamweni kulumbuluka kwanawa mazu.—2 Akorinda 4:8, 9; 11:23-27.

17. Indi Bayibolu yinateli kutukwasha ñahi kuzata nakukala kutwamonaña?

¹⁷ Chamuchiwana, tukweti Izu daNzambi, Bayibolu, “yawaha kuleja nachu, nikutanyisha nachu, nikwolola nachu, nikufumba nachu mwaloña; kulonda muntu waNzambi awanini chikupu, awahili nyidimu yayiwahi yejima.” (2 Timotewu 3:16, 17) Izu daNzambi hidatwileñelaña kwikala “awanina” nawa ‘awahila nyidimu yayiwahi yejima’ hohuku. Ilaña datwileñelaña cheñi kuzata nakukala kutwamonaña. Datuleñelaña kwikala ‘awanina chikupu’ nawa ‘awahila chikupu.’ Izu dachiGriki dakwila nawu ‘awahila chikupu’ daya mukwila nawu ‘kutelela.’ Idi izu atela adizatishileña kushankulu kutalisha kuwatu muyashileña yuma yejima yakeñekeleña halwendu lwamuwatu hela ikina dateleleli kukoña yuma yidi yejima yakuhweleleluwu nawu dikukoña. Hohamu, Yehova kuhitila Mwizu dindi watwinkaña yuma yejima yitwakeñaña kulonda kutwesha kwila yuma yejima yitunateli kumona. Dichi tunateli kuhosha netu, “Neyi Nzambi yeteja kukala kudi kwejima, nateli kuumika chikupu, nawukwashu windi.”

Kupuluka kuYihuñu Yejima Yitunakumona

18. Chumanyi chikwawu chitukutoñojokañahu chikutukwasha kuumika nakashinshi?

¹⁸ Chamuchitanu, mpinji yejima tutoñojokeña chikupu netu Yehova keña yapulwishi antu mukukala kwejima. (Masamu 34:19; 37:9-11; 2 Petulu 2:9) Chikukashikijewa, Nzambi hakatwipulwisha kuyihuñu yitunakumona hohuku, ilaña wakatwinka cheñi kukooleka kwakwikala nawumi wahaya nyaka, chili mwiwulu hamu naYesu hela muparadisa hamaseki.

19. Chumanyi chikutukwasha kuumika nakashinshi?

¹⁹ Dichi tukutwalekahu kuumika yihuñu yitunakumona mukanu kaayi sampu iyi mpinji yinashiki. Twatalilaña chikupu mpinji yakafumishahu yuma yejimiyi. (Masamu 55:6-8) Twatela kwanuka netu neyi tuumika nakashinshi twamwekeshaña nawu Diyabolu hintwambi. Tuwanenu ñovu mukulomba nimudi amana kwetu awiniKristu, nikwanukaña netu amana kwetu niwena anakumona yihuñu yoyimu. Twalekenuhu kwikala awanina nawa awahila chikupu kuhitila mukuzatisha chachiwahi Izu daNzambi. Bayi muleka chikuhwelelu chenu chimwakuhwelela mukwakamena ‘kwaNzambi wakukundeja kwejima’ chizeyuku. Anukenu nenu “mesu aYehova atalaña antu aloña, nimatu indi atiyililaña chakutambikawu.”—Masamu 34:15.

Munateli Kwakula?

• Indi Davidi watiyili ñahi nayihuñu yamweniyi?

• Chikuhwelelwinyi chamwekesheliyi Mwanta Solomoni?

• Yumanyi yinateli kutukwasha kuumika yuma yetejañayi Yehova?

[Malwihu aKuzatisha haKudiza]

[Mwevulu wudi hefu 19]

Solomoni wakuhweleleli nindi Yehova wukuyikwasha antu Jindi adiñi mukukala