Antu Anakukeña Kuyipulwisha

MUGOTI wamakala wekala kwakwihi namusumba waPittsburgh, Pennsylvania, U.S.A., wenzeli namenji. Akakwimba makala atanu nawana ayishinkilili mukadiluña kanyanya kadiñi heseki haleheli jimita 73. Chimwahitili mafuku asatu, edikili mumugoti, amaweni nawa chakadi kudikatisha. Ayipulwishili ñahi?

Kuhitila mukuzatisha mamapu ahamugoti niikina datenañawu nawu Global Positioning System [ikina dazatikaña nasetilayiti dashimunaña iluña hadi chuma], akwakupulwisha alokweli wiina weneni jisentimita 65 nakukunkumwinamu mbeketi kushika hadiñi awa amayala. Atachikili kuyidisha wumu wumu nakuyipulwisha mwiluña mwadi kufwilawu. Amayala ejima apulwishiluwu, azañaleli, awundishili nyichima, nawa asakililili hakuyipulwisha.

Etu amavulu hitunateli kwikala mwiluña didi neyi dadiñuwu ana akakwimba makala atanu nawana hela kusha wumi wetu muwubanjiku. Hela chochu, wonsu wetu tunakukeña kupuluka, muloña twakataña, twashinakajaña nawa twafwaña. Nkakulula wakashinakaji Yoba wahosheli nindi: “Muntu wakuvwala kudi mumbanda wamafuku antesha kwindi, wamona kwayihuñu. Wakenukaña neyi nkenu, amutema nikumutema. Watemukaña neyi mwevulu, hashakamañaku.” (Yoba 14:1, 2) Awa mazu asonekeluwu kwakwihi nayaaka 3,500 yinahituhu, achidi kuzatika nikulelu, muloña hinyi hakachi ketu wukutwesha kutemuka yuma yatama yitwamonaña—kufwa? Hela chakwila tukuhemba mujimba wetu munjila yamuchidinyi, tunakukeña kupuluka kuwudimbwa wamakabi, wushinakaji, nikufwa.

Asayantisiti niantu amakwawu anakudikita chikupu kulonda antu ashakameña yaaka yayivulu kubadika yinakushakamawu antu amakonu. Mutayi wumu wahoshaña nawu wukweti mudimu “wakufumishahu kufwa kwakukasumwisha hohu” nawa “nikukwasha antu jawu kukañesha jinjila jaleñelaña antu kufwa.” Dichi nyidimu yejima yakuyilaku hambidi mujasayansi nikwikala namuchima wakukwasha antu yinakañanyi chikupu kuvulisha yaaka yakuhanda kwawantu kubadika ha 70 hela 80 yashimwiniyi dehi Mosi yaaka 3,500 yinahituhu.—Masamu 90:10.

Dichi hela mwetejaña mwahosheliyi Yoba hansañu yawumi nikufwa hela nehi, chumichi himukutwesha kuchitemukaku muloña mukuhita kwayaaka, anenu nawa ‘mwakatemuka neyi mwevulu,’ nakushiya amabwambu jenu, antaña, mukala, niyuma yejima yimwakoñeli—mufwa nikufwa. Mwanta wamaana Solomoni wamuIsarela wakushankulu wasonekeli nindi: ‘Amomi eluka dehi nawu, twakafwa; hakwila afu hiyeluka chumaku, hiyakamona nawa cheñi wulokuku; muloña hiyayanukaña nawa cheñuku, ayivulamena dehi.’—Mukwakutaŋisha 9:5.

Neyi chinashimuni Bayibolu, chuma chatama chinakumwekana kufwa ‘kuneli neyi mwanta,’ neyi chochayulañayi mwanta wawukatu, muchidi wamuntu. Eñañi, antu anakukeña kuyipulwisha kukufwa chilumbu wakukumishaku. (Aroma 5:14; 1 Akorinda 15:26) Hakwinza antu adizishawu chiwahi nawa ankoñi adizishawu kuzata nyidimu lufuchi neyi kunamwekani kukala hiyakutwesha kuyipulwisha chikupuku. Ilaña, Nleñi yawantu, Yehova Nzambi, naloñeshi kupuluka kwakuwahi kwamuchidiwu.

[Mazu aKusakilila eniMwevulu wudi hefu 3]

Mwevulu wakwatiluwu kudi Gene J. Puskar-Pool/Getty Images