Atwansi Anukenu Nleñi Yenu Yoyinu Mpinji

“Anukaña nawa Nleñi yeyi mumafuku awukwenzi weyi.” —MUKWAKUTAŊISHA. 12:1.

1. Indi Yehova wamwekesha ñahi nindi wayikuhwelela atwansi adifukulaña kudi yena?

 YEHOVA wamonaña atwansi akwaKristu nindi alema neyi chamonañayi mamata awuumi. Dimu, washimwineñahu dehi nindi mwifuku damwanindi “dañovu” atwansi awamayala niawambanda ‘akadilambula namuchima wawu wejima’ mumudimu waKristu. (Masamu 110:3) Iwu wuprofwetu wunakushikijewa mumafuku etu, chineli antu amavulu anakudikaña naNzambi, anadiñiji mukufwila yuma yinakukeñawu nikukeña mali nikubula kwovwahila. Ilaña, Yehova welukili nindi atwansi adifukulaña kudi yena akekala ambukaku. Yehova wayikuhwelela chikupu enu amana kwetu niahela awatwansi.

2. Yumanyi yabombela mukumwanuka Yehova?

² Nzambi wazañalalaña chikupu hakumona atwansi anakumwanuka hamu neyi Nleñi yawu. (Mukwakutaŋisha 12:1) Mwalala, kumwanuka Yehova kwabombelamu yuma yayivulu kubadika kutoñojoka hohu hadi yena. Chatalisha mukwila yuma yamuzañaleshaña, nikwiteja nshimbi jindi kulonda kutwilombola muchihandilu chetu chejima. Cheñi chatalisha mukukuhwelela Yehova, nikwiluka netu watwakamenaña chikupu. (Masamu 37:3; Isaya 48:17, 18) Komana mwatoñojokaña nenu Nleñi yenu wayakamenaña?

“Mukuhweleli Yehova naMuchima Weyi Wejima”

3, 4. Indi Yesu wamwekesheli ñahi kukuhwelela mudi Yehova, nawa muloñadi chichalemena kukuhwelela mudi Yehova makonu?

³ Yesu Kristu diyi wemikili chakutalilahu chachiwahi chikupu, chakumukuhwelela Nzambi. Walondeleleña mazu asonekawu haYishimu 3:5, 6: akwila nawu “Mukuhweleli  Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” Hanyima yakumupapatisha, Yesu amulukukili kudi Satana, wamwesekeli kulonda yeteji ñovu nikulema kwakanu kaayi. (Luka 4:3-13) Yesu hiyamudimbiluku. Welukili nindi “Wuloku wakudizoza niwakumwakama Yehova himaheta nikulema niwumi” walala.—Yishimu 22:4.

⁴ Lwisu nichifwa diyi yililu yinenzali mudi antu makonu. Mukaayi kamuchidiwu, twatela kulondela chakutalilahu chaYesu. Cheñi, ilukenu nenu, Satana wafwilaña kusenuna ambuña aYehova munjila yanyanya yaya kuwumi. Nakukeña antu ejima ekali munjila yeneni yaya kukujilumuka. Bayi Satana yayidimbaku! Ilaña, fwilenu kwanuka Nleñi yenu. Mukuhwelelenu chikupu, nawa kwatenu ‘kuwumi walala’ wudi kwakwihi nakwinza.—1 Timotewu 6:19.

Atwansi Ikalenu Ababala!

5. Watiyaña ñahi kutalisha hayuma yikamwekena kanu kaayi?

⁵ Atwansi anukaña Nleñi yawu ababala kubadika akwawu atwansi. (Tañenu Masamu 119:99, 100.) Muloña amonaña yuma kwesekeja nammwenu yaNzambi, nawa eluka nawu kanu kaayi keña kahiti. Chakadi nikujina muneluki nenu antu amavulu anakutiya woma chikupu nawa anakwakamena hayuma yidi kumbidi. Neyi chakwila wuchidi kushikola, watela watiyahu dehi nsañu yakutamisha yuma nayuma yafwana, kutata kwetuña, kutema nyitondu nikukala kukwawu kwadifwanaku. Antu anakwakamena chikupu hamuloña wayuma yinakumwekana, ilaña aYinsahu jaYehova hohu diwu eluka chikupu nawu iyi yuma yidi hakachi kachinjikijilu chinakumwekesha kukuma kwakaayi kaSatana.—Chimwekeshu 11:18.

6. Munjilanyi atwansi amakwawu munayidimbiluwu?

⁶ Chawushona, ambuña aNzambi amakwawu achidi atwansi analeki kwikala asoñama nawa anadiwuli walala wakwila nawu kunashali hohu kampinji kantesha kakukuma kwakanu kaayi. (2 Petulu 3:3, 4) Amakwawu anafwi mumuhetu wakwila nshindi yeneni kuhitila mukudikunda nawamabwambu atama nikutala nyivwimbimbi yanzekesi. (Yishimu 13:20) Chinateli kutama nankashi kujimbesha wuselewa waNzambi hayinu mpinji yitudi kukamwihi nakukuma kwakanu kaayi! Dichi, dizilenu kuyuma yamwekeneni aIsarela mu 1473 B.C.E. hampinji yateekeleluwu Muyinekineneki yaMowabi, henohu anashiki dehi kwakwihi nakwiñila Mwituña daChikaninu. Chumanyi chayimwekeneni?

Akañenyi Kushikija Chikonkwanyi Chawu

7, 8. (a) Muhetwinyi wazatishiliyi Satana Muyinekineki yaMowabi? (b) Muhetwinyi wunakuzatishayi Satana makonu?

⁷ Kunyima, Satana wakeñeleña chikupu kukañesha aIsarela kutambula wuswana wawu wayikaninuwu. Hanyima yakwila kaprofwetu Balami nakañanyi kuyishiña aIsarela, Satana wazatishili nyihetu yikwawu, wakeñeleña kuyikañesha kulonda abuli kutambwila wuselewa waYehova. Wazatishili ambanda ayivumbi akuMowabi kulonda yoyihuñumuni, nawa haniyi mpinji Satana watwesheli. Antu atachikili kwila wuvumbi nawanyana awambanda akuMowabi nikudifukula kudi Bayali wakuPeyori. Hela chakwila wuswana wawu wawuwahi, Ituña Dachikaninu, dadiñi kukamwihi, aIsarela 24,000 afwili. Chumichi chatamini nankashi!—Kuchinda 25:1-3, 9.

⁸ Makonu, tunakunyakala chikupu kuswila kwakwihi netuña dadiwahi dachikaninu—ituña dadiha. Kuhitila mukuzatisha chaaku chindi, Satana cheñi nakuzatisha yililu yawuvumbi kulonda kuluwañesha antu jaNzambi. Yililu yayiwahi mukaayi yinakutaminaku chikupu chakwila antu anakumona wuvumbi nawu wawuwahi nawa muntu nateli kufuukulahu yomweni kwila wutumwa. Muheletu wumu mukwaKristu wahosheli nindi: “Hetala niKwitala daWanta hohu dikwadizilañawu anyanami nawu wutumwa niwuvumbi hiwetejewa kumesu aNzambuku.”

9. Chumanyi chinateli kumwekana neyi ‘kansi hakusweja kukula,’ nawa atwansi anateli kushinda ñahi iku kukala?

⁹ Atwansi anukaña Nleñi yawu eluka nawu kukama namumbanda hichawana chabombelamu wumi nikuvwala anyana. Dichi, eluka nawu muntu watela kukama namumbanda kwesekeja nachafuukulayi  Yehova dikwila nawu mumaluwi hohu. (Aheberu 13:4) Hela chochu, neyi ‘kansi hakusweja kukula’—diyi mpinji yaswejañayi kutiya wuvumbi, mpinji yeniyi yaluwañeshaña yitoñojoka yakansi—nawa chikumukalila kudihemba. (1 Korinda 7:36) Chumanyi chiwukwila neyi wutachika kutoñojoka hayuma yatama? Lombaku chikupu kudi Yehova kulonda yakukwashi kutoñojokaña hayuma yayiwahi. Mpinji yejima Yehova watiyililaña antu amulombaña chikupu. (Tañenu Luka 11:9-13.) Kuhoshaña hayuma yayiwahi nawa yakoleshaña chikuhwelelu yinateli kukukwasha kubalumuna yitoñojoka yeyi.

Sakulenu Yikonkwanyi Yenu Chiwahi!

10. Yitoñojokanyi yamukunkulwayi yitwatela kutondolwela, nawa malwihwinyi yitwatela kudihula?

¹⁰ Chuma chaleñelaña atwansi amavulu mukaayi kubula kudivumbika nikufwila yiseki muloña hiyakweti ‘chimwenuku’—hiyalombolewaña naNzambi hela kwikala nakuchiñeja kwalala kwakumbiduku. (Yishimu 29:18) Adi neyi aIsarela amumafuku aIsaya alekeli kulondela nshimbi jaNzambi adiñi ‘nakuzañajala, nakutiya kuwaha . . . nikudya mbiji nikunwa walwa.’ (Isaya 22:13) Chatela tukomokeña antu amuchidiwu, komana kwila twikala nampinji yakutoñojoka hakuchiñeja kwakuwahi kunaloñesheliyi Yehova antu jindi ashinshika nehi? Neyi chakwila wudi kambuña Nzambi wakansi, komana watalilaña chikupu ituña dadiha? Komana wazataña nañovu kulonda ‘kushakama . . . nakuwundisha mumesu . . . nakutalila kuchiñeja kwatiyishaña kuwaha’ kunayihembeliyi Yehova? (Titusa 2:12, 13) Ñakwilu yeyi dihakushindamena yikonkwanyi yeyi niyuma yiwakeñaña kwila.

11. Muloñadi atwansi akwaKristu achidi kushikola chiyatela kuzatilawu nañovu?

¹¹ Kaayi kanakukeña atwansi kutwamijaku yikonkwanyi yakumujimba. Kakavulu, enu muchidi kushikola mwazataña nañovu kulonda mwiluki kutaña. Mwatela kwiluka nenu, chikonkwanyi chenu bayi neyi chakukeña hohu mudimu wawuwahuku, ilaña chakwikala chitwa muchipompelu nikwikala mukwakushimwina waWanta wadikita. Hakwila mwili mwenimu, chiña muhoshaña nakulamuna idimi, nikutoñojoka chiwahi, nikuhosha nawantu mumesu akuwunda nawa munjila yakalemesha. Hela chochu, atwansi adizaña Bayibolu nikufwila kulondela nshimbi yekalamu, adizaña shikola yayiwahi nawa atuñaña chikuku chachiwahi kulonda akekali nampinji yayiwahi kumbidi.—Tañenu Masamu 1:1-3. *

12. Chakutalilahwinyi chatela kwimbujola yisaka yawakwaKristu?

¹² Mumpinji yawaIsarela, anvwali ashileñaku  kashinshi chikupu hakudizisha anyana. Anvwali adizishileña anyanawu yuma yejima yamuchihandilu, sweje-e yuma yakuspiritu. (Kuhituluka 6:6, 7) Dichi, atwansi amuIsarela atiyilileña anvwali jawu niakulumpi amakwawu amwakamineña Nzambi, hiyelukili hohu yumaku, ilaña ekalili cheñi namaana, kashinshi nikutoñojoka chiwahi—yililu yafumaña hohu mukudiza hadi Nzambi nikulondela nshimbi jindi. (Yishimu 1:2-4; 2:1-5, 11-15) Makonu yisaka yawakwaKristu niyena yatela kushaku kashinshi kakudiza.

Tiyililenu Munakuyilejawu Antu Ayikeña

13. Kufumbanyi kwayifumbañawu atwansi, nawa muloñadi chiyatela kwikala ababala?

¹³ Atwansi ayifumbaña kudi antu amboka mboka, kubombelahu niakwakufumba ahashikola, afumbaña hohu akashikola hakwikala nachihandilu chachiwahi mukaayi. Dichi lombenu wunlomboli waNzambi hampinji yimunakutoñojoka hakufumba kwayifumbañawu kuhitila mukuzatisha Izu daNzambi ninyikanda yaloñeshaña nduñu wamaana nikashinshi. Kuhitila mukudiza Bayibolu, mweluka nenu atwansi abula kwiluka yuma yayivulu diwu emakenañayi Satana. Chakutalilahu, mwitempa daEdeni Evu mukubula kwiluka yuma yayivulu wamutiyilili Satana, muntu wacheñi wabulili nikumumwekeshela kukeña. Neyi Evu wamutiyilili Yehova wamumwekesheleli kukeña munjila jajivulu, mutenowu, chiña mwafumini yuma yayiwahi.—Kutachika 3:1-6.

14. Muloñadi wutwatelela kumutiyilila Yehova nianvwali jetu etiya?

¹⁴ Nleñi yenu wayikeña, nawa wayikeña namuchima windi wejima. Wakeñaña nindi mwikali namuzañalu wahaya nyaka, bayi neyi hayinu mpinji hohuku! Dichi, hamu neyi nvwali wakamenaña, nayileji enu atwansi niantu ejima adifukulaña kudi yena nindi: “Njila iyi, endenu mwomwenimu.” (Isaya 30:21) Neyi anvwali jenu amukeña Yehova, dikwila nawu mukweti nkisu jikwawu. Tiyililenu kufumba kwawu nakalemesha hampinji yimunakufuukula yuma yimunakukeña kwila nihakwimika yikonkwanyi. (Yishimu 1:8,  9) Ilukenu nenu, anakukeña nawu mwakapuluki, chuma chabadika maheta hela kuya mpuhu mukanu kaayi.—Matewu 16:26.

15, 16. (a) Chumanyi chitwatela kukuhwelela kudi Yehova? (b) Chumanyi chalema chitwadizilaña kuchakutalilahu chaBaruki?

¹⁵ Antu anukaña Nleñi yawu apeleshaña chihandilu chawu, akuhwelela nawu Yehova ‘hamba’ kayilekaku ‘hela’ kuyishiya hakayishiyaku. (Tañenu Aheberu 13:5.) Chineli iyi yitoñojoka yayiwahi yekala yambukaku nayitoñojoka yamukaayi, twatela kwikala ababala hakwila spiritu yamukaayi yibuli kutwiluwañesha. (Aefwesesa 2:2) Muniyi njila, shinshikenu hachakutalilahu chansoneki yaYeremiya, Baruki, washakamineña mumafuku akala akukumishaku muYerusalema kwakwihi nakujilumuka kwamusumba mu 607 B.C.E.

¹⁶ Hadaha Baruki wakeñeleña kwikala nachihandilu chachiwahi muyuma yakumujimba. Yehova welukili chumichi nawa wamusoñamishili Baruki kuleka kukeña ‘yuma yindi yamaneni.’ Baruki wamwekesheli nawu wadiña namaana nikudizoza, muloña wamutiyilili Yehova nawa wapulukili hakujilumuka kwaYerusalema. (Yeremiya 45:2-5) Dichi, amabwambu jaBaruki akeñeli ‘yuma yamaneni’ yakumujimba, nakudiwula kudifukula kwawu kudi Yehova, ajimbesheli yuma yawu yejima hampinji yatambwiluwu aKaladeya Yerusalema. Nawa amavulu afwili. (2 Kushindulula 36:15-18) Chakutalilahu chaBaruki chatwikwashaña kwiluka netu kwikala nawubwambu wawuwahi naNzambi kwalema chikupu kubadika kwikala namaheta nikuya mpuhu mukanu kaayi.

 Imbujolenu Antu Amwekesheli Yakutalilahu Yayiwahi.

17. Muloñadi Yesu, Pawulu niTimotewu chiyekalila yakutalilahu yayiwahi kudi ambuña aYehova makonu?

¹⁷ Hakwila nawu twendi munjila yaya kuwumi, izu daNzambi datukwashaña kwenda munjila yaya kuwumi kuhitila mukutwinka yakutalilahu yayiwahi. Chakutalilahu, Yesu, wadiñi muntu wabadika chikupu nawa welukili yuma yayivulu, ilaña washili kashinshi hachuma chatwesheli kukwasha antu haya nyaka—‘nsañu yayiwahi yaWanta.’ (Luka 4:43) Kapostolu Pawulu washili mudimu wawuwahi nakuzatisha mpinji yindi niñovu hakushimwina nsañu yayiwahi kulonda kumuzatila Yehova chikupu. Timotewu, “mwanami walala mukwitiya,” wembujoleli chakutalilahu chachiwahi chaPawulu. (1 Timotewu 1:2) Hanu dinu, Yesu, Pawulu, niTimotewu aditoñesheli hanjila yasakwiluwu muchihandilu chawu? Hiyaditoñesheluku! Kafwampi, Pawulu wahosheli kutalisha hayuma yekala mukaayi nindi, “hiwuzondu hohu” neyi kuyesekeja nakukoleka kwakumukalakela Nzambi.—Afwilipi 3:8-11.

18. Chumanyi chahimpiliyi mana kwetu wakansi, nawa muloñadi chabulilañayi kuditoñesha?

¹⁸ Makonu atwansi akwaKristu amavulu embujolaña chikuhwelelu chaYesu, Pawulu niTimotewu. Chakutalilahu, mana kwetu wumu wakansi wazatileña mudimu wakutambula mali amavulu wasonekeli nindi: “Muloña wakulondela nshimbi jamuBayibolu, mukunyakashana, anyinkeli chifulu chahewulu. Hela chakwila natambwileña mali amavulu, neluki nami nakabilileña tuhu kwampepela. Chinahosheli namukulumpi wakampani nakumuleja yitoñojoka yami kutalisha hakuzata mudimu wampinji yejima, mukunyakashana anshililuku mali, muloña afwilileña nawu hekwawu nukushakama. Ilaña nadiña nahimpa dehi yitoñojoka yami. Antu amavulu ahayamini hakuleka mudimu wawuwahi nakukeña mudimu wampinji yejima. Muloña nakukeña chikupu kushikija kudihana kwami kudi Nzambi. Muzañalu wunukweti wunabadika chikupu muzañalu wunatiyaña hakwikala namali hela chifulu, muloña wumi wami wunashindameni hakumukalakela Nzambi.”

19. Chumanyi chachiwahi chinayikonkomweniwu atwansi kwila?

¹⁹ Mukaayi kejima, atwansi amavulu anakwila mwomumu. Dichi, enu atwansi, neyi himukutoñojoka hayuma yimukela kumbidi, anukenuña ifuku daYehova. (2 Petulu 3:11, 12) Bayi mukomokaña antu anakuheta mukanu kaayuku. Ilaña tiyililenu antu ayikeña. Kudilumbikila “maheta mwiwulu” dikuswekeja kwalala kuwunateli kuswekeja nawa dikunateli kukwinka wumi wahaya nyaka. (Matewu 6:19, 20; tañenu 1 Yowanu 2:15-17.) Eña, anukenu Nleñi yenu. Neyi mwila mwenimu, Yehova wukayikiswila.

[Tumazu twaheshina]

Munakwanuka?

• Twamwekeshaña ñahi netu twamukuhwelela Nzambi?

• Shikolanyi yabadika kuwaha chikupu?

• Chumanyi chitwatela kudizila kudi Baruki?

• Anyi emenañaku neyi chakutalilahu chachiwahi, nawa muloñadi?

[Malwihu aKuzatisha haKudiza]

[Nyevulu yidi hefu 21]

Yehova waloñeshaña shikola yayiwahi chikupu