Chumanyi Chaleñelaña Wumi Kwikala Wawuwahi?

“Mutiyi Nzambi woma, hembaku kuleja kwindi.”—MUKWAKUTAŊISHA 12:13.

1, 2. Tunateli kuhetelamu ñahi mukudiza mukanda waMukwakutaŋisha?

 TOÑOJOKENU hadi muntu wamwekanaña neyi wukweti yuma yejima. Himuntu waya mpuhu, nawa waheta hakachi kawantu asweja kuheta hanu heseki, nawa himuntu wasweja maana mwikiñu dindi. Hela chakwila wukweti yuma yejimiyi, ilaña wadihulaña nindi, ‘Chumanyi chaleñelaña wumi kwikala wawuwahi?’

² Muntu wamuchidiwu wadiñakoku—yaaka makombakaji asatu anahituhu. Muntu yeniwu wadiña Solomoni, nawa mumukanda waMukwakutañisha, dimutwawanaña chalumbululayi chadiña nakukeñayi muzañalu. (Mukwakutaŋisha 1:13) Tukudizilaku yuma yayivulu kuchuma chamweniyi Solomoni. Eña, maana awanikaña mumukanda waMukwakutaŋisha anateli kutwikwasha kwimika yikonkwanyi yikutwiletela muzañalu muchihandilu.

‘Kukabila Mpepela’

3. Wunsahwinyi wakuhayamisha kutalisha hawumi wawantu wutwatela kushinshika wejima wetu?

³ Solomoni walumbulula nindi Nzambi waleñeli yuma yayivulu yalubanji hanu heseki, yuma yasweja kuvula nichuma chakuhayamisha chaletaña muzañalu wabulaña kumana. Hela chochu, hitunateli kutachi kusandujola yileñaleña yaNzambuku, muloña wumi wetu wakampinji kantesha. (Mukwakutaŋisha 3:11; 8:17) Kwesekeja nachahoshaña Bayibolu, mafuku etu antesha nawa ahitaña swañu. (Yoba 14:1, 2; Mukwakutaŋisha 6:12) Iwu wunsahu wakuhayamisha watela kutwileñela kuzatisha wumi wetu chachiwahi. Hichapelaku, chineli ituña daSatana nidena datela kutwileñela kulondela njila yatama.

4. (a) Indi izu dachiHeberu dabalumunawu nawu “kuhemesha hohu” datalisha mudihi? (b) Yumanyi yafwilañawu antu muwumi yitukudiza?

⁴ Hakulumbulula kutama kwekala mukuzatisha wumi wetu mukufwila yuma yamukunkulwayi, Solomoni wazatisha izu dakwila nawu “kuhemesha hohu” nimazu amakwawu adifwanaku kwakwihi namapampa 30 mumukanda waMukwakutañisha. Izu dachiHeberu diyabalumuna nawu “kuhemesha hohu” datalishaña kuchuma chamukunkulwayi, chabula kulumbuluka, hela chabula nimuchaya. (Mukwakutaŋisha 1:2, 3) Mpinji yikwawu Solomoni wazatisha izu dakwila nawu “kuhemesha hohu” hamu neyi izu desekana ‘nakukabila tuhu mpepela.’ (Mukwakutaŋisha 1:14; 2:11) Chakadi nikujina, kufwila kukwata mpepela kwamukunkulwayi. Muntu wesekaña kwila mwenimu wadikabishaña hohu. Kufwila yikonkwanyi yamukunkulwayi kwaneñeshaña hohu. Wumi wamukanu kaayi wamafuku antesha hiwudi wakukisila hayuma yamukunkulwayuku. Dichi, hakwila nawu chitukwashuku kubula kufwila yuma yeniyi, tutalenu hayakutalilahu yayuma yavula kufwila antu muwumi yashimunayi Solomoni. Muchinu chibaba, tukusambila kutala hakukeña chiseki nimaheta. Kuhiñahu, tukuhanjeka hakulema kwamudimu wamuzañaleshaña Nzambi.

Komana Kufwila Chiseki Kunateli Kutwizañalesha?

5. Muyumanyi mwakeñeleñayi Solomoni kuwana muzañalu?

⁵ Solomoni wakeñeleña kwikala namuzañalu kuhitila mukukeña chiseki, neyi chinakwila antu amavulu makonu. Washimuna nindi: “kwosi kuluña kunalekesheli muchima wamuku.” (Mukwakutaŋisha 2:10) Kudihi kwakeñeleñayi kuwana muzañalu? Kwesekeja naMukwakutaŋisha kapetulu 2, ‘wazañalesheli mujimba windi navinyu’—mpinji yoyimu nikudihemba—nawa welili nyidimu yidi neyi kuwahisha iluña, kutuña yipañu, kutiyilila kutumina, nikudiluñisha nayakudya yayiwahi.

6. (a) Komana chatama kudiluñisha yuma yayiwahi muwumi? (b) Kutalisha kuyisela yakunooka, kwesekeja kwamuchidinyi kwakeñekaña?

 ⁶ Komana Bayibolu yahishaña kwikala nampinji yakudiluñisha nawamabwambu jetu? Inehi. Chakutalilahu Solomoni wahosheli nindi, kudya yakudya hampinji yayiwahi hanyima yakuzata mudimu weneni hichamukunkulu chakudi Nzambi. (Tañenu Mukwakutaŋisha 2:24; 3:12, 13.) Kubombelahu, Yehova walejaña atwansi nindi ‘zañalalenu, nyichima yenu yiyiluñishi’ munjila yatelela. (Mukwakutaŋisha 11:9) Twakeñaña kwikala nampinji yakunooka. (Esekejenuku Maku 6:31.) Hela chochu, muwumi wetu bayi tusweja kutwamijaku yisela yakunookaku. Ilaña, kunooka kwatela kwikala neyi kachakudya kitwabombelañahu hanyima yakukumisha kudya, bayi nshima yayenuku. Munateli kwiteja nenu hela chakwila mwadiluñishaña nayakudya yatowala yakubombelahu, neyi muyidya chakadi kudya nshima mukunyakala kuyidiwula nawa hiyekutishañaku. Chochimu, Solomoni welukili nindi wumi washindamena hakukeña chiseki kwadiña “hikukabila tuhu mpepela.”—Mukwakutaŋisha 2:10, 11.

7. Muloñadi wutwatela kusakula yisela yakunooka chachiwahi?

⁷ Kubombelahu, bayi neyi yisela yakunooka yejima yayiwahuku. Yisela yayivulu yafwana yinateli kukisañana wubwambu wetu naYehova nikutwileñela kwila yuma yatama. Yihita yawantu añahi anamoni kukala muloña ‘wakukeña kwikala nampinji yayiwahi,’ kuzatisha yitumbu yashetana, kusweja kunwa walwa, hela kuhema yisela yalwisu? Yehova watusoñamishaña munjila yayiwahi nindi neyi twiteja muchima wetu hela mesu etu atwileñela kwila yuma yatama, twatela kwiluka netu tukumona kukala.—Aŋalija 6:7.

8. Muloñadi chichalemena kushinshika hachihandilu chetu?

⁸ Kubombelahu, neyi tusweja kukeña chiseki, chikutwikañesha kutwamijaku yuma yalema. Ilukenu nenu, wumi wakapinji kantesha nawa hitukukuhwelela netu wumi wetu wakapinji kantesha, mpinji yejima wukwikalaña hohu wakadi yikatu nikukalaku. Ichi chamuleñeleli Solomoni kwiluka cheñi nindi, kuwanika kuchipenji kunateli kutwikolesha, sweje-e kuchipenji chamana kwetu mukwaKristu washinshika hela muhela, kubadika kuya “kwitala kudi kuzañajala.” (Tañenu Mukwakutaŋisha 7:2, 4.) Muloñadi? Hampinji yitunakutiyilila kumpanji yahachipenji nikutoñojoka hachihandilu chañamba yaYehova washinshika wunafwi, chinateli kutwisañumuna kushinshika hachihandilu chetu. Chinateli kutwileñela kuhimpa yikonkwanyi yetu kulonda kuzatisha chachiwahi mafuku etu anashaluku.—Mukwakutaŋisha 12:1.

Komana Maheta Anateli Kutuzañalesha?

9. Chumanyi chelukiliyi Solomoni kutalisha hakwikala namaheta?

⁹ Hampinji yasonekeli Solomoni mukanda waMukwakutañisha wadiña muntu waheta chikupu hakachi kawantu ahamaseki. (2 Kushindulula 9:22) Wadiña namaheta akuwaninamu yuma yejima yakeñeleñayi. Wasonekeli nindi, “Yuma yejima yakeñeli mesu ami hinayibondeliyuku.” (Mukwakutaŋisha 2:10) Hela chochu, welukili nindi kwikala namaheta hikwaletaña muzañaluku. Wakunkulwili nindi: “Wakeña siliva hakela nindi yinawaninuku; niwakeña yayivulu hakela nindi yinavuli dehuku.”—Mukwakutaŋisha 5:10.

10. Yumanyi yaletaña muzañalu walala nimaheta?

¹⁰ Hela chakwila kuwaha kwamaheta kwampinji yantesha, hohamu maheta anateli kwikala nekoku deneni chikupu. Mukusandujola kwatataka muUnited States, 75 pesenti yawatudizi ahashikola yamuñoñi adi muchaaka chakutachikilahu ashimwini nawu chikonkwanyi chawu chekala “chakwikala namali amavulu.” Indi neyi ashikija chikonkwanyi chawu, komana mwalala atela kwikala amuzañalu? Inehi. Akwakusandujola nsañu eluka nawu kusweja kukeña maheta muchihandilu chamuntu, kwakañeshaña kwikala namuzañalu. Kushankulu, Solomoni wakunkulwili mwomumu. Wasonekeli nindi: “Nadipompesheleli nisiliva niwuru, niyuma yalema yambala yawanyanta . . . Komana yejima yakuhemesha hohu, hikukabila tuhu mpepela.” * (Mukwakutaŋisha 2:8, 11) Kwambukaku, neyi tuzatisha wumi wetu mukumukalakela Yehova namuchima wejima nikwikala nankisu yindi, twakekala namaheta alala.—Tañenu Yishimu 10:22.

 Mudimwinyi Waletaña Muzañalu Walala?

11. Indi Nsona yamwekeshaña ñahi kulema kwakuzata mudimu?

¹¹ Yesu wahosheli nindi: “Tata yami wuchidi kukalakala nihanu, ninami nawa nidi nakukalakala.” (Yowanu 5:17) Chakubula nikujinooka Yehova niYesu atiyaña kuwaha kukalakala. Bayibolu yashimunaña chatiyañayi Yehova kuwaha namudimu windi wakuleña, yahoshaña nawu: “Nzambi wamweni yuma yejima yeliliyi nindi yinawahi nankashi.” (Kutachika 1:31) Añelu ‘atachikili kudikuwa nakuzañalala’ chiyamweni yuma yejima yaleñeliyi Nzambi. (Yoba 38:4-7) Chochimu Solomoni niyena welukili kulema kwamudimu walumbuluka.—Mukwakutaŋisha 3:13.

12, 13. (a) Indi antu ayedi anashimuni ñahi muzañalu watiyañawu hamuloña wakuzata nañovu? (b) Muloñadi mudimu wakumujimba chiwatela kutwihilisha mpinji yikwawu?

¹² Antu amavulu eluka kuwaha kwafumaña mukukalakala nañovu. Chakutalilahu, Jose, weluka jakupentapenta, wahosheli nindi: “Chiwapenta mwevulu yiwunakukeña hekubu, wukutiya neyi kwiji wunatuntululi mpidi.” Miguel, * mukwakulanda nakulandulula, wahosheli nindi: Mudimu waletaña muzañalu muloña wukuleñela kuloñeshela chisaka cheyi yuma yakumujimba. Cheñi chikuleñela kuzata nañovu.”

¹³ Munjila yikwawu, nyidimu yayivulu yaletaña kaneñawudi nawa hiyavula kuleñela muntu kuyilaku hambidiku. Mpinji yikwawu antu ahilaña hela ayilaña katama hamudimu hiyazatilañawu. Kwesekeja nachahosheli Solomoni, nkopi hadaha muloña wachifulu chindi watiyañanaña nawantu adi nachifulu chahewulu, nateli kuhetelamu neyi muntu wazataña nañovu. (Mukwakutaŋisha 2:21) Kudi yuma yikwawu yatiyishaña nsonyi. Mudimu wakulanda nakulandulula watela kutachika chiwahi kutwala muna nimuwunayi nehi, muloña mali amukaayi afuntaña mwishina hadaha hamuloña wakululakana chayilulakenu. (Tañenu Mukwakutañisha 9:11.) Kakavulu, muntu wadikitaña nañovu kulonda kuyilaku hambidi wazeyalañamu tuhu nawa chamuhilishaña, hakwiluka nindi ‘nakabakeni mpepela hohu.’—Mukwakutaŋisha 5:16.

14. Mudimwinyi waletaña muzañalu walala mpinji yejima?

¹⁴ Komana kwekalahu mudimu wabulaña kutiyisha nsonyi? Jose, mukwakupentapenta yitwatena dehi hakusambila, wahosheli nindi: “Mukuhita kwayaaka, yuma yakupentapenta yatela kujimbala hela kukisika. Ilaña yuma yitwelaña mumudimu waNzambi hiyajimbalaña hela kukisikaku. Kwovwahila Yehova kuhitila mukushimwina nsañu yayiwahi, nakwashi amakwawu kwikala akwaKristu amwakama Nzambi, nawa chumichi chayikwashaña mpinji yonsu. Ichi dichuma chalema chikupu.” (1 Korinda 3:9-11) Miguel niyena wahosha nindi kushimwina nsañu yaWanta kwamuzañaleshaña chikupu kubadika mudimu wakumujimba. Miguel wahosheli nindi: “Kwosi chuma chinateli kubadika muzañalu wukutiya neyi wumushimwina muntu chalala chamuNsona sweje-e neyi wiluka neyi chalala chinamushiki hamuchima.”

‘Nataku yaKudya Yeyi’

15. Chumanyi chacheni chaleñelaña wumi kwikala wawuwahi?

¹⁵ Hakunkunkululula chikuma, chumanyi chacheni chaleñelaña wumi kwikala wawuwahi? Twekalaña namuzañalu waweni neyi tuzatisha mpinji yetu yantesha mukanu kaayi nakwila yuma yayiwahi nikumuzañalesha Yehova. Tunateli kwikala nawubwambu wawuwahi naNzambi, nawa tunateli kudizisha anyanetu nshimbi jamuBayibolu, tunateli kukwasha amakwawu kumwiluka Yehova, nawa tunateli kwikala nawubwambu wakadi kumana nawamana kwetu niahela. (Aŋalija 6:10) Yuma yejimiyi yikweti mudimu walema nawa yaletaña nkisu kudi antu ayilondelaña. Solomoni wazatishili chesekelu chachiwahi hakulumbulula kulema kwakwila yuma yayiwahi. Wahosheli nindi: “Natilaku yakudya yeyi hameji, neyi munahiti dehi mafuku amavulu wakayiwana cheñi.” (Mukwakutaŋisha 11:1) Yesu walejeli atumbanji twindi nindi: “Hanenuña, kulonda ninenu nawa akayinki.” (Luka 6:38) Kubombelahu, Yehova wakana kusomwena antu elaña kakawahi kudi akwawu.—Yishimu 19:17; tañenu Aheberu 6:10.

16. Mpinjinyi yayiwahi yakufuukulahu yuma yitwatela kwila muchihandilu?

¹⁶ Bayibolu yatukonkomwenaña kufuukula  chachiwahi hampinji yituchidi atwansi kutalisha hachitwatela kuzatisha wumi wetu. Muniyi njila, twakatwesha kukañesha chikela kuyaaka yakumbidi. (Mukwakutaŋisha 12:1) Chinateli kutama chikupu neyi tukisañana yaaka yetu yawukwenzi mukukeña yuma yekoku yamukaayi, nawa kumbidi wiluka neyi yidi hohu neyi kufwila mpepela.

17. Chumanyi chikuyikwasha kutonda chihandilu chachiwahi?

¹⁷ Kufwana nvwali wejima wukweti kukeña, Yehova wakeñaña enu atwansi kudiluñisha muchihandilu, nikwila yuma yayiwahi, nikutondolwela kuneña. (Mukwakutaŋisha 11:9, 10) Chumanyi chikuyikwasha kwila mwenimu? Imikenu yikonkwanyi yakuspiritu nawa zatenu nañovu kulonda kuyishikija. Kwakwihi nayaaka 20 yinahituhu, Javier watondeluhu chuma chimu hakachi kamudimu wawundotolu namudimu wampinji yejima wakushimwina. Wahosheli nindi: “Hela chakwila mudimu wawundotolu wawuwahi, kwosi chuma chinateli kwesekana namuzañalu wunatiyili hampinji yinakwashili antu amavulu kwiluka chalala. Mudimu wampinji yejima wunanleñeli kudiluñisha chikupu muchihandilu. Nadishonaña hohu nami mutenowu natachikili swañu.”

18. Muloñadi chihandilu chaYesu chahamaseki chichadiña chachiwahi?

¹⁸ Hanu dinu, chumanyi chasweja kulema chitwatela kufwila kuheta? Mukanda waMukwakutaŋisha wahosha nawu: “Ijina dadiwahi dabadika malasha evumba dadiwahi, niifuku dakufwa dabadika dakuvwalika.” (Mukwakutaŋisha 7:1) Chihandilu chaYesu hohu dichi chalumbulula chachiwahi iyi nsañu. Mwalala welili ijina dadiwahi naYehova. Yesu chafwiliyi wakashinshi, wajilikili wanta waTata yindi nawa waheni ifutu damuloña, dihashinkwiliyi njila yakupulukilamu etu. (Matewu 20:28) Hampinji yantesha yashakaminiyi heseki, Yesu wemikili chakutalilahu chachihandilu chachiwahi chitwafwilaña kwimbujola.—1 Akorinda 11:1; 1 Petulu 2:21.

19. Kufumbanyi kwakuwahi kwafumbiliyi Solomoni?

¹⁹ Ninetu tunateli kwikala nejina dadiwahi naNzambi. Kwikala nejina dadiwahi kumesu aYehova kwalema kubadika maheta. (Tañenu Matewu 6:19-21.) Ifuku dejima, tunateli kuwana njila jajiwahi jakwililamu yuma yayiwahi kumesu aYehova nawa yikuhetesha chihandilu chetu. Chakutalilahu, tunateli kushimwina nsañu yayiwahi kudi amakwawu, tunateli kukolesha maluwetu niyisaka yetu, nikukolesha wubwambu wetu naYehova kuhitila mukudiza halwetu nikuwanika kukupompa. (Mukwakutaŋisha 11:6; Aheberu 13:16) Komana, munakukeña kudiluñisha chihandilu chachiwahi chikupu? Neyi munakukeña, twalekenuhu kulondela kufumba kwaSolomoni kwakwila nawu: “Mutiyi Nzambi woma, hembaku kuleja kwindi; chuma chatelela muntu chochenichi hohu.”—Mukwakutaŋisha 12:13.

[Tumazu twaheshina]

Mukwakula Nenudi?

• Chumanyi chikutwileñela kutoñojoka chikupu hayikonkwanyi yamuchihandilu chetu?

• Indi kufwila chiseki nimaheta twatela kukwimona ñahi?

• Mudimwinyi waletaña muzañalu walala?

• Chumanyi chalema chitwatela kufwila kuheta?

[Malwihu aKuzatisha haKudiza]

[Mwevulu wudi hefu 31]

Chumanyi chaleñelaña mudimu wakushimwina kwikala wawuwahi chikupu?