Kufwa kwaYesu Chikunateli Kuyipulwisha

KWAKWIHI nayaaka 2,000 yinahituhu, haPaseka yawaYudeya muchaaka cha 33 C.E., muntu wakadi muloña wafwili kulonda kuhandisha antu. Indi iwu iyala wadiñanyi? Wadiñi Yesu wakuNazareta. Nawa anyi atela kuhetelamu muniwu mudimu weneni wakoñeliyi? Muchidi wawantu wejima. Vasi yamuBayibolu yitwelukisha yakunkulula haniwu mulambu wakuhandisha mawumi awantu nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”—Yowanu 3:16.

Hela chakwila antu amavulu eluka nsañu yekala haniyi nsona, antesha hohu diwu eluka chikupu muyalumbulukila. Adihulaña nawu: ‘Muloñadi chitwakeñelaña mulambu waKristu? Indi kufwa kwamuntu wumu kunateli kupulwisha ñahi antu ejima kukufwa kwahaya nyaka?’ Bayibolu yakula awa malwihu munjila yayiwahi nawa yakumanisha mpwila.

Kufwa Chikwatachikili Kuyula Muchidi waMuntu

Antu amakwawu akuhwelela nawu antu ayileñeli kushakama hamaseki hakapinji kantesha hohu, ayekelahu namakabi, adiluñishaku chantesha, nkumininaku afwa nakuya kwiluña dadiwahi. Yitoñojoka yamuchidiwu, yamwekeshaña nawu Nzambi wafuukwili nindi antu akafweña. Ilaña, Bayibolu yashimunaña nawu kudi chuma chacheñi chaleñelaña antu afweña. Yahoshaña nawu: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Aroma 5:12) Iyi vasi yinakumwekesha nawu antu afwaña muloña wanshidi. Hanu dinu iwu “muntu wumu” kweñililili wulembi wanshidi nakusambwisha antu ejima, hinyi?

Mukanda waThe World Book Encyclopedia washimunaña nawu asayantisiti amavulu akuhwelela nawu antu ejima afuma kumu hohu, nawa Bayibolu yashimuna chachiwahi iku kwafumawu antu nawu, “iyala wumu.” HaKutachika 1:27, twatañañahu nawu: “Nzambi yoleña muntu neyi chekalayi yomweni, chochekalayi Nzambi dichi chamuleñeliyi; wayileñeli niiyala nimumbanda.” Dichi Bayibolu yalumbulula nawu antu akusambila ayedi adiñi lubanji lwakulema kwayileñaleña yaNzambi Watwesha Yejima.

Chileji chamukanda waKutachika chawejelahu wunsahu wukwawu wachihandilu chawantu cheliliyi Yehova Nzambi naleñi dehi antu akusambila. Muchina chileji chejima, Nzambi hatenenuhu nsañu jakufwaku chiña hohu neyi adikaña dihadi kufwawu. (Kutachika 2:16, 17) Wakeñeleña antu ashakameña muparadisa yayiwahi heseki, amuzañalu nawa akola kumujimba haya nyaka. Hakeñeleña nindi antu amoneña yihuñu yawushinakaji nkumininaku nakufwaku. Hanu dinu, kufwa kwekalili ñahi mwanta hadi antu ejima?

Kutachika kapetulu 3 kashimuna hadi antu akusambila chafuukwiluwu mumushikila kudikaña naMukwakuyinka Wumi, Yehova Nzambi. Chafuminimu, Nzambi wayitwikili muloña wayilejeliyi hakusambila. Wamulejeli iyala nindi: “Eyi wulunkuñu, nochu wakafunta cheñi mwomulunkuñu.” (Kutachika 3:19) Eñañi, akwakudikaña ayedi afwili neyi chochahosheliyi Nzambi.

Yihuñu yafuminumu hiyakuminini hohu hadi antu akusambila ayeduku. Hamuloña wakudikaña kwawu, chaleñeleli anyanawu kubula kwikala nawumi waloña. Hampinji yayilejeleñayi Adama niEvu, Yehova wabombelelumu niankemba achidi kanda avwaliki munkeñelu yindi yakwila nindi: “Semununenu, muvuleña, muwanini heseki, mudovwahishi; ikalenu anyanta  niawanshi amwijiya, niawatujila ahaluzwizu, niayuma yayumi yejima yendaña hamaseki.” (Kutachika 1:28) Mukuhita kwampinji, muchidi wamuntu wadi kuwanisha iseki nikwikala namuzañalu chikupu chakadi kufwa. Ilaña nkakulula yawu Adama, “iyala wumu” wayilandishili muwuduñu wanshidi, waleñelaña kufwa kwakadi kutondolwela. Kapostolu Pawulu, wakuchikota cheyala watachi, wasonekeli nindi: “Ami nidi wachisemwa chaheseki, anlanda dehi kuwuduñu wanshidi.”—Aroma 7:14.

Neyi chochakisañanañawu akwalukisa yuma yayiwahi yabazañawu achinji makonu, Adama niyena chavulumwiniyi, wakisañeni chikupu yileñaleña yaNzambi yayiwahi, yamuchidi wamuntu. Anyana kaAdama niwena avweli anyanawu, nkumininaku hiyakwikala nawezukulu, nawa atwalekeluhu nakusemununa. Dichi makiñu ejima ahiñileñahu, akulileña, avwalileña anyana, nawa nkumininaku afwileña. Muloñadi ejima chafwilañawu? Muloña wonsu wawu afuma kudi Adama. Bayibolu yahoshaña nawu: ‘Kuvulumuna kwamuntu wumu kunakojeji antu amavulu kufwa.’ (Aroma 5:15) Yikatu, wushinakaji, nikufwila kwila yuma yatama, nikufwa diyuma yatama yaletayi Adama muloña wakulandisha chisaka chindi. Ichi chisaka chinabombelumu wonsu wetu.

Mumukanda windi wayisonekeleliyi akwaKristu muRoma, kapostolu Pawulu wasonekeli hachihandilu chatama chawantu, kushilahu nichihandilu chindi, nikutama kwakulwa nanshidi. Wabili nindi: “Ami nshona! O kukala kunamonaña! Wukuñamwina kumujimbiwu wakufwa, hinyi?” Ilu lwihu lwaluwahi nankashi, netuku? Hinyi wadikumwamwina Pawulu, niantu amakwawu afwilaña kuyamwina, kuyipulwisha kuwuduñu wanshidi nikufwa? Pawulu yomweni wakwili nindi: “Nasakilili Nzambi nami Yesu Kristu Mwanta wetu diyi natweshi.” (Aroma 7:14-25) Eñañi, Nleñi yetu naloñeshi njila yakutupulwishilamu kuhitila mudi Mwanindi, Yesu Kristu.

Mudimu Wukwetiyi Yesu muMudimu waNzambi waKupulwisha Antu

Yesu walumbulwili mudimu windi wakupulwisha antu kuwuduñu watama wanshidi. Wahosheli nindi: ‘Mwana kamuntu walondeli nindi . . . akahani wumi windi wakukuula nachu antu amavulu.’ (Matewu 20:28) Munjilanyi wumi waYesu muwekalila ifutu danyiloña? Indi kufwa kwindi kunatukwashi ñahi?

Bayibolu yamulumbulula nawu Yesu ‘hakweti nshiduku’ nawa “waambuka kudi akwanshidi.” Mukuhanda kwindi kwejima, Yesu wadiñi  nakwovwahila chikupu Nshimbi yaNzambi. (Aheberu 4:15; 7:26) Dichi kufwa kwaYesu bayi neyi kwenjili hamuloña wanshidi hela hamuloña wakudikaña neyi cheliliyi Adamaku. (Ezekeli 18:4) Ilaña Yesu wafwili kufwa kwabulili kumutelela kulonda yatweshi kwila nkeñelu yaTata yindi yakupulwisha antu kunshidi nikukufwa. Neyi chitunashimuni hewulu, mukudikeñela Yesu wenjili ‘nakuhana wumi windi neyi ifutu danyiloña.’ Hamuloña wakukeña kunabadiki kukeña kwawantu ejima nawa kwabulahu dehi kumwekana, mukudikeñela Yesu ‘watompeleli antu ejima kufwa.’—Aheberu 2:9.

Wumi walambwili Yesu wadiñi wesekana chikupu nawumi wajimbesheliyi Adama hampinji yavulumwiniyi. Chumanyi chafumini mukufwa kwaYesu? Yehova wetejeli wuna mulambu nindi “wakukuula nachu antu ejima.” (1 Timotewu 2:6) Dikwila nawu, Nzambi wazatishili wumi waYesu kulonda kulanda nachu, hela kukuula nachu muchidi wamuntu kuwuduñu wanshidi nikufwa.

Bayibolu yakonkomwenaña haniku kukeña kweneni kwamwekesheli Nleñi yawantu. Pawulu wayanukishili akwaKristu nindi “ayilandili dehi nawuseya.” (1 Akorinda 6:20; 7:23) Petulu wasonekeli nindi Nzambi hazatishili wuru hela silivaku, ilaña wazatishili mashi aMwanindi hakupulwisha akwaKristu kuwumi wafwaña. (1 Petulu 1:18, 19) Dichi, Yehova wazatishili ifutu danyiloña damulambu waKristu hakwila yapulwishi muchidi wamuntu kukufwa kwahaya nyaka.

Komana Mukuhetelamu Mwifutu daNyiloña daKristu?

Kapostolu Yowanu wasonekeli hefutu danyiloña daKristu chidasweja kuwaha, nindi: “[Yesu Kristu] diyi ifutu danyiloña yetu; hinyiloña yetwetu hohuku, niyawantu ampata yamunu mwishina ejima.” (1 Yowanu 2:2) Eñañi, mulambu waKristu wawantu ejima. Komana ichi chinayi mukwila nawu antu onsu akushikena dakuhetelamu muniwu mulambu waYesu walema wefutu danyiloña? Inehi. Anukenu nsañu yakupulwisha antu yidi muchibaba chinafumihu. Ana antu adiñi nakupulwisha akwakwimba makala ajikililuwu mumugoti azenzumwininumu mbeketi, dichi ana antu ajikililuwu mumugoti hamuntu hamuntu akandamineña muyina mbeketi. Munjila yoyimu, ana anakukeña kuhetelamu mwifutu danyiloña damulambu waKristu hiyatela kutalilaña hohu nkisu jaNzambuku. Atela kwilahu chuma.

Chumanyi chinakukeñayi Nzambi nindi akoñi? Yowanu 3:36 yatulejaña nawu: “Muntu wukukuhwelela Mwana wukweti wumi wahaya nyaka; hakwila muntu wabulaña kwovwahila Mwana hakamona wumuku, kuzuwa kwaNzambi kwashakama hadi yena.” Nzambi nakukeña nindi tukuhweleli mumulambu waKristu. Cheñi kudi yuma yikwawu yakeñekaña. “Neyi twahembaña mwatulejeliyi, kweniku diku kutukwilukila netu twamwiluka yena [Yesu].” (1 Yowanu 2:3) Ichi tuneluki chikupu netu chuma cheneni chakeñekaña hakwila nawu atwipulwishi kunshidi nikufwa chidi chakwila nawu tukuhweleli  mwifutu damulambu waKristu nikuhemba nshimbi jaKristu.

Njila yimu mutwatela kumwekeshela chikuhwelelu chetu mwifutu daKristu yidi yakumwekesha kusakilila hakufwa kwindi kuhitila mukukwanakana, neyi chahosheliyi. Henohu kanda yofwi, Yesu wadyilili hamu nawapostolu indi ashinshika chawija chachifwikija nakuyileja nindi: “Ilenuña mwenimu muñanakanaña nachu.” (Luka 22:19) A Yinsahu jaYehova alemesha chikupu wubwambu wukwetiwu naMwana kaNzambi, nawa ovwahilaña ilu lushimbi. Chinu chaaka, Chanukishu chakwanakana kufwa kwaYesu Kristu chakekalaku haMposu, March 22, neyi itañwa dinahumi dehi. Mwani tunayitambiki kulonda mwakenzi kuniku kupompa kwadimena kwakumwekesha kwovwahila lushiiku lwaYesu. A Yinsahu jaYehova amwiluña denu anateli kuyileja mpinji niiluña kwakekalila chawija. Neyi mwinza kuChanukishu, mwakadiza yuma yayivulu kutalisha hayuma yimwatela kwila kulonda ifutu danyiloña daKristu diyifumishi muyuma yatama yafuma munshidi yaAdama.

Makonu, antu antesha hohu diwu amwekeshaña kusakilila hamulambu weneni waNleñi yawu niMwanindi kulonda ayipulwishi kukukisika. Antu akuhwelelaña muniwu mulambu ekalaña namuzañalu chikupu. Kapostolu Petulu wasonekeli hadi akwawu akwaKristu nindi: “Chimwamukuhwelelaña [Yesu] mwazañalalaña namuzañalu waweni wa[ku]kañanya kushimunewa, wukweti nilubanji lwakulema. Himukutambula chimwakuhweleleli wowu wamwinu wawumi wenu.” (1 Petulu 1:8, 9) Dichi kuhitila mukumukeña Yesu Kristu nikukuhwelela mumulambu windi wefutu danyiloña, chihandilu chenu chikwinzala mbe-e namuzañalu chakatataka nawa mukutalilaña kumbidi nenu akayipulwishi kunshidi nikukufwa.

[Mwevulu wudi hefu 6]

Yesu waheni wumi windi kulonda kufumishahu kutama kwanshidi yaAdama.

[Mwevulu wudi hefu 7]

Chanukishu chakwanakana kufwa kwaYesu Kristu chakekalaku haMposu, March 22, 2008, neyi itañwa dinahumi dehi