Lekenu ‘Yuma Yamukunkulwayi’

‘Muntu walondelaña yuma yamukunkulwayi hakweti muchimaku.’—YISHIMU 12:11.

1. Yumanyi yalema yitwaheta, nawa njilanyi yayiwahi mutwatela kuyizatishila?

 HAMU neyi akwaKristu, wejima wetu twaheta yuma yalema yamboka-mboka. Yuma yeniyi yabombelamu kukola kwakumujimba, ñovu, maana akusemuka nawu, hela maheta. Muloña wakwila twamukeña Yehova, twatiyaña kuwaha hakuzatisha iyi yuma mumudimu windi nakwovwahila kufumba kwajila kwakwila nawu: “Mulemeshi Yehova nayuma yeyi.”—Yishimu 3:9.

2. Indi Bayibolu yasoñamishaña nawudi kutalisha hayuma yamukunkulwayi, nawa iku kusoñamisha kwatalisha mudihi?

² Cheñi nawa, Bayibolu yahosha hayuma yamukunkulwayi nawa yatusoñamishaña hakubula kuzatisha maheta etu hakukeña iyi yuma. Muniyi njila, shinshikenu mazu ekala haYishimu 12:11 akwila nawu: “Muntu wadimaña iseki dindi wakamona kudya kwakuvulu; ilaña muntu walondelaña mukuya antu amukunkulwayi hakweti muchimaku.” Chaswayi muntu kwiluka mwatalisha ichi chishimu. Neyi iyala yazatisha mpinji yindi nawa yazata nañovu kulonda kukwasha chisaka chindi, nateli kwikala namali akukiña nachu chisaka chindi. (1 Timotewu 5:8) Ilaña, neyi yakisañanaña maheta indi muyuma yamukunkulwayi, nakumwekesha nawu “hakweti muchimaku,” dikwila nawu kubula kwiluka mwakukumina nikutoñojoka mwaluwa. Chakadi nikujina, muntu wamuchidiwu wadiletelaña wuzweñi.

3. Indi kufumba kwamuBayibolu hayuma yamukunkulwayi kwahoshaña nawudi kutalisha kukudifukula kwetu?

³ Chumanyi chatela kufumamu neyi, tuzatisha ilu lushimbi lwanichi chishimu kukudifukula kwetu? Tukumona netu mukwaKristu wamukalakelaña Yehova chikupu nawa washinshika nakuhanda chiwahi. Nateli kutambwila nkisu yaNzambi makonu nawa wukwikala nakuchiñeja kwalala kwayuma yidi kumbidi. (Matewu 6:33; 1 Timotewu 4:10) Ilaña, mukwaKristu wadiñijaña muyuma yamukunkulwayi washaña wubwambu windi naYehova nikuchiñeja kwindi kwawumi wahaya nyaka hakatoña. Tunateli kukañesha ñahi kusha wubwambu wetu naYehova hakatoña? Twatela kwiluka ‘yuma yamukunkulwayi’ muchihandilu chetu nikufwila kuyitondolwela.—Tañenu Titusa 2:11, 12.

4. Indi yuma yamukunkulwayi hiyumanyi?

⁴ Hanu dinu, yuma yamukunkulwayi hiyumanyi? Yinatela kwikala yuma yidi yejima yatwikañeshaña kumukalakela Yehova nawumi wetu wejima. Chakutalilahu, yinateli kubombelamu yisela yamboka-mboka yakunooka. Hela chochu, yisela yakunooka yayiwahi neyi yikala namwakukumina. Ilaña neyi tumanishilaña mpinji yeneni “kuyisela” nakudiwula nyidimu yakundama kukudifukula kwetu, yisela yakuzañalesha yikwikala yamukunkulwayi, nawa ichi chinateli kuluwañesha wubwambu wetu naNzambi. (Mukwakutaŋisha 2:24; 4:6) Hakwila nawu yaleki kutwamijaku yisela yakuzañalesha, mukwaKristu watela kwesekeja, nawa watela kushinshika chachiwahi chazatishañayi mpinji yindi yalema. (Tañenu Akolose 4:5.) Hanu dinu, kudi yuma yamukunkulwayi yafwana chikupu kubadika yisela yakuzañalesha. Yuma yeniyi yabombelamu nianzambi akutwamba.

Kanenu Anzambi Akutwamba

5. Indi kakavulu Bayibolu yatalishaña mudihi izu dakwila nawu ‘yamukunkulwayi’?

⁵ Mumavasi amavulu amuBayibolu mwawanikaña izu dakwila nawu ‘yamukunkulwayi,’ aditalishaña kudi tunzambi twakutwamba. Chakutalilahu, Yehova wayilejeli aIsarela nindi: “Kutuña mukishi, hela kwimika mukishi wakusoña indi kwiji kaposhi kakupeshela, hela kusha mwituña denu ilola dakusoña chifwikija, [kulonda kudifukulañaku] chinjila.” (Alevi 26:1) Mwanta Davidi  wasonekeli nindi: “Yehova himuneni watelela kumuhameka nankashi; watelela kumutiya woma wakubadika woma watiyañawu akishi ejima. Muloña akishi ejima awantu hiyuma yamukunkulwayi; ilaña Yehova diyi waleñeli mawulu.”—1 Kushindulula 16:25, 26.

6. Muloñadi anzambi akutwamba chiyekalilawu amukunkulwayi?

⁶ Kwesekeja nachahosheli Davidi, tukweti wunsahu wamwekeshaña kulema kwaYehova. (Masamu 139:14; 148:1-10) A Isarela adiña nakukoleka kweneni hakwikala nachitiyañenu naYehova! Chadiña chawusupi chikupu hakumukana Yehova nakutachika kudifukula kudi akishi akusoña ninyiyombu! Hampinji yamweneñawu kukala, anzambi jawu akutwamba ekalili amukunkulwayi, nawa hiyatwesheli kudipulwisha aweni hela kupulwisha antu jawuku.—Ansompeshi 10:14, 15; Isaya 46:5-7.

7, 8. Indi “Maheta” anateli kwikala ñahi neyi nzambi?

⁷ Makonu mumatuña amavulu, antu achidi kudifukula kuyifwikija yakusoña kumakasa awantu, nawa akishi amuchidiwu amukunkulwayi neyi chiyadiña hampinji yakunyima. (1 Yowanu 5:21) Hela chochu, Bayibolu yatena yuma yikwawu kubadika hakutena hohu yifwikija nawu hiyanzambi. Chakutalilahu, talenu mazu aYesu akwila nawu: “Kwosi muntu natweshi kukalakela anyanta ayeduku; chiña yohelahu wumu, akeñahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.”—Matewu 6:24.

⁸ Indi “Maheta” anateli kwikala ñahi neyi nzambi? Chakutalilahu, toñojokenu helola dadiña mwiha muIsarela wakushankulu. Ilola damuchidiwu atela kudizatisha hakutuña itala hela mbañu. Munjila yikwawu, neyi chakwila emikili “kaposhi kakupeshela” hela “chifwikija,” chekalileña chuma chakutuntwisha antu jaYehova. (Alevi  26:1) Munjila yoyimu, mali amawahi nawa kwekala njila yayiwahi mwakuyizatishila. Twakeñaña mali kulonda kudihemba nachu, nawa tunateli kuyizatisha chachiwahi mumudimu waYehova. (Mukwakutaŋisha 7:12; Luka 16:9) Ilaña neyi tufwilaña mali kubadika mudimu wetu wawakwaKristu, mali akwikala neyi nzambi yetu. (Tañenu 1 Timotewu 6:9, 10.) Mukanu kaayi mudi antu alemesha kufwila mali, chiña tushaku kanshinshi chikupu hakwila nawu twikali nammwenu yayiwahi yamali.—1 Timotewu 6:17-19.

9, 10. (a) Indi mukwaKristu wamonaña ñahi shikola? (b) Wubanjinyi wekala mukutaña shikola yahewulu?

⁹ Chakutalilahu chikwawu chachuma chalema chinateli kwikala chamukunkulu, hishikola yakumujimba. Twakeñaña anyanetu kutaña chikupu kulonda akekala nachihandilu chachiwahi. Nawa chuma chasweja kulema, mukwaKristu wataña chikupu watañaña Bayibolu nakutiyishisha, nateli kushinshika hakukala nikufuukulahu chachiwahi, nikutañisha chalala chamuBayibolu munjila yatiyakana nawa yakushika hamuchima. Kutaña chikupu shikola kwasendaña mpinji, ilaña mpinji yitwazatishaña hakutaña shikola twayizatishaña chachiwahi.

¹⁰ Indi kutaña shikola yahewulu, chidi neyi kudiza shikola yamuñoñi hela yamusukula? Iyi shikola ayimonaña mukaayi kejima nawu yalema chikupu hakwikala nachihandilu chachiwahi. Hela chochu, antu amavulu atañaña shikola yeniyi ekalaña namaana atama amukaayi. Shikola yamuchidiwu yamanishaña yaaka yawukwenzi yalema yatela kwikala yakukalakelamu chachiwahi mudimu waYehova. (Mukwakutaŋisha 12:1) Nawa hichakuhayamaku, mumatuña mwatañañawu amavulu iyi shikola, antu antesha hohu diwakuhwelela mudi Nzambi. Chatela yakeñeña kutaña shikola yahewulu yamukanu kaayi kulonda kwikala namaheta, mukwaKristu wakuhwelelaña mudi Yehova.—Yishimu 3:5.

Bayi Mwiteja Kufwila kwaChisemwa Kwikali Nzambi Yenuku

11, 12. Muloñadi Pawulu chahosheleliyi nindi amakwawu: ‘nzambi yawu dodivumu dawu’?

¹¹ Mumukanda wasonekeleliyi eniKorinda, kapostolu Pawulu watena chuma chikwawu chinateli kwikala nzambi. Wahosha hadi antu adiña ana kwindi akwakudifukula nindi: ‘Muloña nayileja kakavulu, nukuyilejamu cheñi namadilu, nami antu amavulu endaña neyi ayilumbu jamutondu wakuyandishilahu Kristu. Kukuminina kwawu yowu kujilumuka; nzambi yawu dodivumu dawu; . . . atoñojokaña yuma yahanu hamaseki.’ (Afwilipi 3:18, 19) Indi ivumu damuntu, dinateli kwikala ñahi nzambi?

 ¹² Chidi neyi amabwambu jaPawulu, chipepa chakudiñija mukufwila kwachisemwa chekalili chalema chikupu kubadika kumukalakela Yehova hamu naPawulu. Amakwawu atela aswejeli kudiñija mukudya hela kunwa nakushika hakwikala afwa hakudya hela akwakusheta. (Yishimu 23:20, 21; esekejenu Kuhituluka 21:18-21.) Amakwawu niwena atela afukwiluhu kuzatisha kukooleka kuyadiña naku mukaayi muyaaka nkulakaji yatachi nawa chumichi chayiluwañesheli kumukalakela Yehova. Bayi tuleka kukeña kwakwikala nachihandilu chachiwahi kutwifuntishi hanyima mumudimu wetu wakumukalakela Yehova namuchima wejimaku.—Akolose 3:23, 24.

13. (a) Lwisu hichumanyi, nawa Pawulu walwilumbulwili ñahi? (b) Tunateli kuleka ñahi lwisu?

¹³ Pawulu wateneni cheñi kudifukula kwakutwamba munjila yikwawu. Wasonekeli nindi: “Dichi jahenu yidi yenu yidi hamaseki, wuvumbi, wuzondu wamumuchima, kufwila kwila yuma yatama, kusweja kukeña yatama, nilwisu himana kwawu nakupesha.” (Akolose 3:5) Lwisu hikufwila chuma chitwabula kuheta. Tunateli kwikala nalwisu lwayuma yakumujimba. Lwisu lunateli kubombelamu kufwila kwila wuvumbi wuyakanishawu. (Kwidika 20:17) Kutoñojoka netu kufwila kwamuchidiwu kudi hohamu nakupesha hela kudifukula kudi nzambi wakutwamba hikwatuhayamishañaku. Yesu wazatishili chakutalilahu chatiyakana chikupu hakumwekesha kulema kwakuzata nañovu kulonda kukañesha iku kufwila kwatama.—Tañenu Maku 9:47; 1 Yowanu 2:16.

Babalenu naMazu Amukunkulwayi

14, 15. (a) ‘Chumanyi chamukunkulwayi’ chadimbwishili antu amavulu mumpinji yadiñaku Yeremiya? (b) Muloñadi mazu ahosheli Mosi chiyadiña alema?

¹⁴ Yuma yamukunkulwayi yinateli kubombelamu nimazu. Chakutalilahu, Yehova wamulejeli Yeremiya nindi: “Atuprofwetu adi nakuprofweta yakutwamba mwijina dami. Hinayitemesheli kwamuku, hela kuyileja hinayilejeli kwamuku, hela kuhosha hinahosheli nawuku. Adi nakuyiprofwetela chimwenu chakutwamba, chakuhoña, chuma chamukunkulwayi, kudimbana kwamunyichima yawu awenawu.” (Yeremiya 14:14) Ana atuprofwetu akutwamba aditeneneña nawu ahosheleleña mwijina daYehova, ilaña ahosheleña jakufuma hanyichima yawu, maanawu aweni. Dichi, mazwawu adiña “chuma chamukunkulwayi.” Adiña amukunkulwayi nawa aleteleña kukala hadi antu jaNzambi. Mu 607 B.C.E., antu amavulu atiyilili mazu amukunkulwayi afwili chakadi kwiluka, ayijilumwini kudi amashidika aweniBabiloni.

¹⁵ Kwambukaku nanawa antu, Mosi wayilejeli aIsarela nindi: “Shenu muchima kumazu awa ejima inukuyileja lelu, . . . Muloña kudenu hichuma chamukunkulwayuku, hiwumi wenu, kwokwena kuchumichi diku kumwakavulishila mafuku enu mwituña didi kumukuya nakuzambuka Yodana mwakadiheti.” (Kuhituluka 32:46, 47) Mwalala, mazu ahosheli Mosi ayoneneni kudi Nzambi. Dichi, adiña alema, alema chikupu, hakwila muza wuhandi. Antu atiyilili awa mazu ahandili yaaka yayivulu nawa ekalili namaheta. Mpinji yejima twatela tukaneña mazu amukunkulwayi nikukakela kumazu alala.

16. Twamonaña ñahi mazu ahoshaña asayantisiti akutadikisha Izu daNzambi?

¹⁶ Indi makonu antu twatiyaña anakuhosha  yuma yamukunkulwayi? Eña twayitiyaña. Chakutalilahu, asayantisiti amakwawu ahoshaña nawu yitoñojoka yakwila nawu yuma yabalumukili niyuma yawanañawu asayantisiti mumaluña amakwawu yamwekeshaña nawu hichinakukeñeka kukuhwelela Nzambuku, nawa yuma yejima atela kuyilumbulula neyi chochiyekala. Komana mazu amuchidiwu akudivwimba atela kutwitapa kumuchima? Inehi! Maana awantu ambuka namaana aNzambi. (1 Akorinda 2:6, 7) Hela chochu, tweluka netu neyi ntañishilu yawantu yitadikisha ntañishilu yinamwekeshiyi Nzambi, mpinji yejima ntañishilu yawantu yekalaña yakutwamba. (Tañenu Aroma 3:4.) Hela chakwila sayansi yinakuyilaku hambidi muyuma yikwawu, chuma chahosha Bayibolu kutalisha hamaana awantu hichahimpañaku, yahosha nawu: “Muloña Nzambi wamonaña maana amakonu nindi hiwusupi.” Yitoñojoka yawantu yamukunkulwayi, neyi kuyesekeja namaana aNzambi abadika.—1 Akorinda 3:18-20.

17. Indi mazu ahoshaña akulumpi jaKristendomu niakwakusekesha twatela kuyimona ñahi?

¹⁷ Chakutalilahu chikwawu chamazu amukunkulwayi chawanikaña hadi akulumpi jansakililu yaKristendomu. Aditenaña nawu ahoshelaña mwijina daNzambi, ilaña yuma yavula kuhoshawu hiyashindamena haNsonaku, nawa kakavulu jahoshañawu jamukunkulwayi. Akwakusekesha niwena ahoshaña mazu amukunkulwayi, aditwambilaña nawu akweti maana chikupu kubadika ‘nduñu wamaana nikashinshi’ watondewa. (Matewu 24:45-47) Hela chochu, akwakusekesha ahoshaña nakushindamena hamaanawu, nawa jahoshañawu jamukunkulwayi, nawa adimbwishaña muntu wukuyitiyilila. (Luka 17:1, 2) Hanu dinu tunateli kutondolwela ñahi kutwihuñumuna kudawa antu?

Chitwatela Kukaana Mazu Amukunkulwayi

18. Indi kufumba kwekala ha 1 Yowanu 4:1 twatela kukwizatisha ñahi?

¹⁸ Kapostolu wakashinakaji Yowanu wahanini kufumba kwakuwahi haniyi nsañu. (Tañenu 1 Yowanu 4:1.) Kwesekeja nakufumba kwaYowanu, mpinji yejima twakoleshaña antu yitwawanaña mumudimu wakushimwina kutompa nsañu yayidizishawu kuhitila mukuyesekeja nantañishilu yamuBayibolu. Iyi hinjila yayiwahi nikudetu. Neyi tutiya nsañu yabula kutelela yakusawula chipompelu, aeluda, hela amana kwetu, hitwashikenaña dakwiteja chakadi kushinshika hanoyu nsañuku. Ilaña twatela kudihula netu: “Indi iwu muntu wunakutandisha iyi nsañu nakulondela chahoshaña Bayibolu? Komana iyi nsañu hela mazu akwila nawu kanaña neli chiluwa atwalaña nkeñelu yaYehova hambidi? Komana mazu wenawa aletaña kuwunda muchipompelu?” Nsañu yidi yejima yitukutiya, yakudiwula amana kwetu chatela yikali yakuyikolesha hichuma chamukunkulu.—2 Akorinda 13:10, 11.

19. Chumanyi chelañawu aeluda hakwila nawu mazu ahoshañawu abuli kwikala amukunkulu?

¹⁹ Kutalisha hamazu amukunkulwayi, aeluda niwena adizilañaku chuma chalema. Neyi ayitambika kulonda afumbi, anukaña kuzeya kwawu nawa kufumba kwawu hikwashindamenaña hamaanawuku. Mpinji yejima atela kuzatisha mazu amuBayibolu. Lushimbi lwalema lwakulondela lwawanikaña mumazu akapostolu Pawulu akwila nawu: “mubuli kupandakana yuma yasonekawu dehi.” (1 Akorinda 4:6) Aeluda hiyapandakanaña yuma yasonekawu muBayiboluku. Kubombelahu, hiyapandakanaña kufumba kwamuBayibolu kuyasonekawu munyikanda yanduñu wamaana nikashinshiku.

20. Munjilanyi munatukwashiluwu kuleka yuma yamukunkulwayi?

²⁰ Yuma yamukunkulwayi chili ekali “anzambi,” mazu, hela chuma chidi chejima, afwana chikupu. Hamuloña waniku kufwana, twalombaña mpinji yejima wukwashu waYehova hakwila twiluki iyi yuma yamukunkulwayi yejima,  nawa twakeñaña wunlomboli windi kulonda tuyileki. Neyi twila mwenimu, twalondelaña mazu añimbi yamasamu akwila nawu: “Mbalumwini mesu ami abuli kutala yuma yamukunkulwayi, wunhizumwishi munjila jeyi.” (Masamu 119:37) Muchibaaba chinalondeluhu, twakatwalekahu kuhanjeka hakulema kwakulondela wunlomboli waYehova.

Munateli Kulumbulula?

• “Yumanyi yamukunkulwayi,” yitwatela kuleka?

• Tunateli kukañesha ñahi mali abuli kwikala neyi nzambi yetu?

• Indi kufwila kwachisemwa kunateli kwikala ñahi kupesha?

• Tunateli kuleka ñahi mazu amukunkulwayi?

[Malwihu aKuzatisha haKudiza]

[Mwevulu wudi hefu 13]

Bayi mwiteja kufwila maheta kuyifuntishi hanyima mumudimu waYehovaku