Maluwi niKuvwala Anyana Muyinu Yaaka Yakukuminina
Maluwi niKuvwala Anyana Muyinu Yaaka Yakukuminina
“Mpinji yinakehi dehi.”—1 AKORINDA 7:29.
1. (a) Kuhimpikanyi kunakumwekana makonu kudi hakachi ‘kayuma yakala’? (b) Muloñadi kuhimpika kwayuma muyisaka chikunakutuleñela kwakamena?
IZU daNzambi dashimwineñahu dehi nawu ‘mpinji yakukuminina’ akayilukila kumajita, nyitentanshi, nzala yakapwelendendi, niyipupu. (Danyeli 8:17, 19; Luka 21:10, 11) Bayibolu yasoñamishaña cheñi nawu muniyi mpinji yakala mukuhanda kwawantu, nshakaminu yawantu yakahimpika chikupu. Makabi muyisaka akekala hakachi ‘kayuma yakala’ yinakumwekana munanu ‘mafuku akukuminina.’ (2 Timotewu 3:1-4) Muloñadi yumiyi chiyinakutuleñela kwakamena? Muloña yumiyi yinasweji kutanda nawa yikweti ñovu yakuluwañesha akwaKristu makonu kutalisha hamaluwi nikwikala nanyana. Munjilanyi?
2. Indi antu amavulu mukaayi ayimonaña ñahi maluwi nikudiseña?
2 Makonu, antu anakudiseña nankashi nawa ichi chaaku chinatandi chikupu, mumatuña amavulu chipimu chakudiseña chinakuswejelaku. Hela chochu, twatela kwiluka netu yitoñojoka yaYehova Nzambi kutalisha hamaluwi nikudiseña yambukaku chikupu nayitoñojoka yikwetuwu antu mukaayi mutwashakama. Hanu dinu, Yehova wamonaña ñahi maluwi nikudiseña?
3. Indi Yehova niYesu Kristu amonaña ñahi maluwi?
3 Yehova Nzambi wakeñaña adisumbula kukakela kuchikaninu chamaluwi awu. Hampinji yasumbwishiliyi iyala watachi nimumbanda, Yehova wahosheli nindi ‘iyala . . . wukamukakela iñodindi; niwena akela mujimba wumu.’ Mukuhita kwampinji, Yesu Kristu niyena wahosheluhu cheñi nindi: “Dichi anabombuwu kudi Nzambi, bayi ayambula kudi muntuku.” Yesu watwelekeluhu nindi: ‘Yowu muntu wukuseña iñodindi, chakadi muloña wawuvumbi, hakusumbula wacheñi, neli wuvumbi.’ (Kutachika 2:24; Matewu 19:3-6, 9) Dichi Yehova niYesu amonaña maluwi neyi himpanda yahaya nyaka mukuhanda kwamuntu, kukasunuka sampu wumu nafwi. (1 Akorinda 7:39) Chineli maluwi hintanjikilu yajila, kudiseña himuloña weneni chikupu. Izu daNzambi dahoshaña nawu Yehova wahela kudiseña hamuloña wabula kwitejawu muNsona. *—Tañenu Malaki 2:13-16; 3:6.
Hembenu Maluwi Chachiwahi
4. Muloñadi atwansi akwaKristu chiyaditoñeshelañawu nawu anyakeli kwiñila mumaluwi?
4 Mudinu ituña datama ditunakushakamamu munenzali yililu yawuvumbi. Ifuku nifuku, tunateli kumona nyevulu yayivulu yinakumwekesha nsañu yawuvumbi. Hitukutwesha kudiwula yuma yafumañamuku, sweje-e kudi akwetu atwansi muchipompelu. Indi atwansi akwaKristu atela kwila ñahi naniyi yuma yatama yaluwañeshaña, yinateli kuyiletesha kwila wuvumbi hela chakwila akweseka kuyikañesha? Atwansi amavulu aneseki kukwimanisha kuhitila mukwiñila mumaluwi henohu achidi atwansi. Muniyi njila, atoñojokaña nawu akutondolwela kwila wuvumbi neyi chakwila asumbula swayi. Ilaña chadisumbulawu, antu amakwawu atachikaña kuditoñesha nawu mutenowu kachi asumbwili swayi wanyi. Muloñadi? Dichi neyi anadinjilili dehi mumaluwi, wejima wawu akwiluka nawu yuma yiyakeña kwilawu mukuhanda kwawu hela yakeña mukwawu wamumaluwi yinaambuki chikupu. Neyi chichekala, adisumbula wenawa ekalaña mukukala kweneni.
5. Chumanyi chikuyikwasha adisumbula kukakela kukusanyika kwamaluwi awu? (Talenu cheñi tumazu tudi heshina.)
5 Kwiñila mumaluwi namuntu, hela namukwenu mukwaKristu, wumwakuhweleleña nenu yuma yakekala chiwahi ilaña mukuhita kwampinji yahimpa chaletaña kukala. (1 Akorinda 7:28) Hela chakwila mumaluwi mwekalaña kukala, akwaKristu alala eluka nawu kudiseña kwabula kwitejawu munsona bayi neyi hinjila yayiwahi yakumanishilamu kukala kwamumaluwuku. Dichi, ana azataña nañovu kulonda ahembi maluwi awu hamuloña wakukeña kukakela kukusanyika kwamaluwi awu, chipompelu chawakwaKristu chatela kuyilemesha nikuyikwasha chikupu. *
6. Indi atwansi akwaKristu anateli kumona ñahi chikuhwelelu chakwiñila mumaluwi?
6 Komana wuchidi kansi nawa wuchidi mujiki? Neyi wudi kansi nawa wuchidi mujiki, indi kuchiñeja kwakwiñila mumaluwi mwakwimonaña ñahi? Munateli kuleya kukala kweneni neyi munadiloñeshi dehi lwakumujimba, muyitoñojoka, nilwakuspiritu henohu kanda mumwekeshi kukeña mudi muhela hela mana kwetu mukwaKristu. Hela chochu, Nsona hiyashimuna yaaka yatela kushikijayi muntu hakwila nawu yeñili mumaluwiku. * Ilaña, Bayibolu yashimunaña nawu watela kuhembela sampu wunahiti dehi hayaaka yaswejaña muntu kutiyayi wuvumbi. (1 Akorinda 7:36) Muloñadi? Muloña wuvumbi chiwasweja waleteshaña yitoñojoka kuluwankana nawa waleteshaña kufuukula chatama chakwila mwakafuma kukala kumbidi. Anukenu nenu, kufumba kwakuwahi kwekala muBayibolu kwahanañayi Yehova kutalisha hamaluwi kukuyikwasha nawa kukuyizañalesha.—Tañenu Isaya 48:17, 18.
Mudimu waWanvwali
7. Yumanyi yamonañawu adisumbula achidi atwansi, nawa chumichi chaletaña kukala kwamuchidinyi mumaluwi?
7 Adisumbula amakwawu atachikaña kuvwala anyana henohu achidi atwansi nankashi. Hiyadiñi nampinji yashikila yakudiluka chiwahi namwinikwawu henohu mwana kanda yovwalikuku, nawa wakeñekaña kumwakamena hadi maora 24. Neyi chichekala, mama yawantu diyi waswejaña kwakamena nkemba, dichi tata yawantu wuchidi kansi wukutachika kutiya kutama. Cheñi nawa, neyi anvwali anakuchisha wufuku nakutona muloña wamwana wunakuyikabisha, chaleñelaña anvwali kubobola nikuneña. Nkumininaku, akutachika kutoñojoka nawu hiyadi cheñi akasunukaku. Dichi hiyakutwesha kuya kumaluña acheñi hela kwila yuma kadilili neyi chelileñawu henohu kanda ekali nanyanaku. Chumanyi chikwilawu namaluwi awu anahimpiki?
8. Indi kuvwala anyana tunateli kukwimona ñahi, nawa muloñadi?
8 Neyi chochimwatela kuhemba maluwi munjila yayiwahi, kuvwala anyana nikwena mwatela kukwimona neyi himudimu nawa hikukooleka kwakufuma kudi Nzambi. Hela chakwila mwana wunavwaliki wukukojeja yuma kuhimpika muchihandilu chawakwaKristu adisumbula, atela kuzata nañovu kulonda ahimpi chihandilu chawu munjila yayiwahi. Chineli Yehova wayinkeli antu wuswa wakuvwala anyana, anvwali atela kumona mwana wunavwaliki nawu ‘hiwuswana wakuyinka kudi Yehova.’ (Masamu 127:3) Dichi amama jawantu niatata jawantu akwaKristu atela kushaku ñovu hakuzata nyidimu yawu neyi ‘anvwali mudi Mwanta.’—Aefwesesa 6:1.
9. (a) Yumanyi yekeñekaña hakukulisha mwana? (b) Chumanyi chatela kwilayi iyala kulonda yokwashuku ñodindi kukola lwakuspiritu?
9 Kudihana kwakeñekaña hakwila nawu mwana yakuli. Dichi anvwali atela kwikala nampinji yeneni nikushaku ñovu. Iyala mukwaKristu watela kwiluka nindi neyi mwana navwaliki, hadi yaaka yayivulu ñodindi wukuluwankanaña hakupompa nawa wukwikalaña nakapinji kantesha kakudiza Bayibolu halwindi nikutoñojokahu. Yumiyi yinateli kumuzeyesha lwakuspiritu. Hakwila nawu mwikali anvwali alumbuluka iyala watela kuzata nañovu kulonda yahembi mwanindi. Watela kuhanjeka nañodindi kwitala hayikuma yikwawu yamuprogiramu yabula kutiyayi hakupompa. Watela cheñi kushala namwana kulonda ñodindi yekali nampinji yeneni yakushimwina mumudimu waWanta.—Tañenu Afwilipi 2:3, 4.
10, 11. (a) Munjilanyi anyana mwayilelelañawu ‘nakuyikonkomwena’ mudi Yehova? (b) Muloñadi anvwali akwaKristu amavulu chiyatela kuyihamekelawu?
10 Hakwila mwikali anvwali alumbuluka, kudi yuma yayivulu yakeñekaña yinabadiki hakukeñela mwana yakudya, yakuvwala, hakukama nikumwakamena lwakumujimba. Sweje-e munanu mafuku afwana akukuminina, atwansi atela kudiza nshimbi jajiwahi kufuma kuwansi jikuyikwashaku kushakama chiwahi. Anyana atela kuyikulisha “nakuyibabesha nikuyikonkomwena mudi [Yehova].” (Aefwesesa 6:4) ‘Mukuyikonkomwena’ mwabombela kumuleja mwana yitoñojoka yaYehova kufuma kuwansi windi sampu nichikuhitayi muyaaka yawunkaña hela yawukwenzi.—2 Timotewu 3:14, 15.
11 Yesu hakuleja atumbanji twindi nindi atela kuya ‘nakwilisha atumbanji akunyuza yejima,’ chakadi nikujina watwalili mukwila nindi, anvwali atela kukwasha anyanawu ekali atumbanji. (Matewu 28:19, 20) Chumichi chakala muloña kanu kaayi kanayishi atwansi muwufwinda weneni. Dichi, anvwali anakulishi anyanawu nakwikala akwaKristu adihana atela kuyihameka chikupu kudi antu ejima muchipompelu. ‘Anafwomoni’ yuma yaluwañeshaña yamudinu ituña nachikuhwelelu nikashinshi kawu neyi anvwali alumbuluka.—1 Yowanu 5:4.
Wujiki hela Kubula Kuvwala Nyana Hamuloña Wawuwahi
12. Muloñadi akwaKristu amakwawu chafuukwilañawu kwikala ajiki sampu munahiti mpinji?
12 Chineli ‘mpinji yinashaluku yinakehi dehi’ nawa ‘yuma yampata yinu yinakubalumwoka,’ Izu daNzambi datulejaña nawu tutali hakuwaha kwekala muwujiki. (1 Akorinda 7:29-31) Dichi akwaKristu amakwawu afuukulañahu kushakama wujiki mukuhanda kwawu hela kwikala ajiki hadi tuyaaka henohu kanda eñili mumaluwi. Chuma chachiwahi chidi chakwila nawu, hiyazatishaña iyi mpinji yawujiki nakukeñelamu maheta akumujimbaku. Amavulu atwalekañahu kwikala ajiki kulonda amukalakeleña Yehova “chakadi kuyiluwañesha.” (Tañenu 1 Akorinda 7:32-35.) AkwaKristu ajiki amakwawu akalakalaña neyi apayiniya hela ankoñi ahaBeteli. Ana kwetu amavulu akeñaña kuloñesha kwaYehova kuyizatishi kuhitila mukuwanisha yuma yakeñekaña kulonda akawaniki kuShikola yaKudiza Mudimu waWunkoñi. Ankoñi ampinji yejima asambilili kukalakala henohu achidi ajiki nkumininaku atoñojokeli kusumbula, atoñojokaña nawu achidi kudiluñisha mumaluwi awu hamuloña wayuma yalema yadiziluwu henohu achidi ajiki.
13. Muloñadi adisumbula amakwawu chafuukwilañawu kubula kwikala nanyana?
13 Mumatuña amakwawu, kudi chuma chikwawu chinahimpiki muyisaka, adisumbula amavulu afuukulahu kubula kukwata kuñoji. Amakwawu dinu hiyakwataña kuñojuku muloña wakukala kwamali; amakwawu niwena hiyakeñaña kwiñila nyidimu yakutambula mali amavuluku. NiakwaKristu hadi adisumbula anafuukuluhu kubula kwikala nanyana. Hela chochu, ashakamaña chakubula nyana kulonda abuleña kuyikañesha hakumukalakela Yehova. Ichi hichinayi mukwila nawu adisumbula amuchidiwu hiyadi nachihandilu chachiwahuku. Akweti chihandilu chachiwahi. Ilaña, ashiyaña wuselewa wekala mumaluwi kulonda atwamijuku Wanta. (1 Akorinda 7:3-5) Adisumbula amakwawu amukalakelaña Yehova niana kwawu mumudimu wañinza niwankambi niwahaBeteli. Amakwawu niwena hiyapayiniya hela amishonali. Yehova hakavulamena mudimu wawu hela kukeña kuyakeñeli ijina dinduku.—Aheberu 6:10.
“Yihuñu muMujimba”
14, 15. (a) Indi anvwali akwaKristu anateli kumona ‘yihuñwinyi mumujimba’?
14 Kapostolu Pawulu wayilejeli akwaKristu adi mumaluwi nindi akamona “yihuñu mumujimba.” (1 Akorinda 7:28) Yihuñu yeniyi yinabombelumu yikatu mumaluwi awu, anyanawu, hela yawanvwali jawu ashinakaja dehi. Munateli kwikala cheñi kukala kwekalaña hakukulisha anyanawu. Neyi chashimunawu kumatachikilu achinu chibaba, Bayibolu yashimwineñahu dehi nawu ‘mpinji yakukuminina’ mwakekala ‘yuma yakala.’ Hakachi kayuma yakala, hadi anyana ‘abulaña kwovwahila anvwali jawu.’—2 Timotewu 3:1-3.
15 Anvwali akwaKristu anakumona kukala kweneni hakukulisha anyana. Yuma yatama yinakumwekana muyinu “nyaka yakala” yinakutwishikena. Dichi, anvwali akwaKristu atela kutwalekahu kwasa njita nayuma yatama yaluwañeshaña yaletaña adinu ‘ituña damakonu’ hadi anyanawu. (Aefwesesa 2:2, 3) Kakavulu anvwali hiyashindañaku. Hekwawu mwana weyala hela wamumbanda wamuchisaka chawakwaKristu naleki kumukalakela Yehova, chumichi chayiletelaña “yihuñu” anvwali aneseki kuhemba anyanawu muchalala chaNzambi.—Yishimu 17:25.
‘Henohu Kwamba Kekala Lukadi Lwasweja’
16. “Yihuñu” yamuchidinyi yaprofweteliyi Yesu?
16 “Yihuñu” yidi yejima yamwekanaña mumaluwi nimukuvwala anyana akayibadika chikupu kulukadi lukwawu lwasweja kutoha. Yesu wahosheli muwuprofwetu windi wahosha hakwinza kwindi nikukuma kwanyaka yamakonu nindi: “Hamba kekala lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku.” (Matewu 24:3, 21) Nkumininaku Yesu washimwini nindi izaza deneni dakapuluka hanilu “lukadi lweneni.” Hela chochu, ituña daSatana dikutwalekahu nakulukuka chikupu aYinsahu jaYehova awunda. Eñañi, iyi mpinji yakatukalila wonsu wetu, akulumpi niatwansi.
17. (a) Muloñadi chitwatela kutalila yuma yakumbidi nachikuhwelelu? (b) Chumanyi chikutukwasha kutoñojoka chiwahi hansañu yamaluwi nikwikala nanyana?
17 Hela chochu, bayi tusweja kufwa mutentu nayuma yikamwekana kumbiduku. Anvwali anakumukalakela Yehova nakashinshi akukuhwelela nawu akayikiña hamu nawanyanawu anyanya. (Tañenu Isaya 26:20, 21; Zefwaniya 2:2, 3; 1 Akorinda 7:14) Chayinu mpinji, lekenu kwiluka netu tudi mumafuku akala kutukwashi kutoñojoka chiwahi hamaluwi nikwiluka chakukulisha anyana muyinu mpinji yakukuminina. (2 Petulu 3:10-13) Muniyi njila, chili tudi ajiki chili twasumbula hela twasumbuka, hela tukweti anyana hela hitukwetuku, tukuleta mpuhu nikulema kudi Yehova nikuchipompelu chawakwaKristu.
[Tumazu twaheshina]
^ Talenu mukanda waLive With Jehovah’s Day in Mind hakamutu kanyanya kanakuhosha nawu “He Has Hated a Divorcing,” hefu 125.
^ Adisumbula anakumona kukala mumaluwi akukoleshewa kuhitila mukuhituluka muyibaba yamuchidiwu yinakuhosha hamaluwi yidi muKaposhi Kakutalila kaCibemba kaSeptember 15, 2003, niAwake! yaJanuary 8, 2001.
^ Talenu kapetulu 30, kamukanda wa Questions Young People Ask—Answers That Work, hamutu wunakwila nawu “Am I Ready for Marriage?”
Kuhitulukamu
• Muloñadi atwansi akwaKristu chiyatelela kubula kutemukila mumaluwi?
• Yumanyi yakeñekaña hakukulisha mwana?
• Muloñadi akwaKristu amavulu chiyatwalekelañahu kwikala ajiki, nawa neyi asumbula hela asumbuka muloñadi chabulilañawu kuvwala anyana?
• “Yihuñu” yamuchidinyi yatela kumonawu anvwali akwaKristu?
[Malwihu aKuzatisha haKudiza]
[Mwevulu wudi hefu 25]
Muloñadi chichawahila akwaKristu achidi atwansi kuhembelela sampu anakuli dinu hiyakwiñila mumaluwi?
[Mwevulu wudi hefu 26]
Iyala watela kuzata nañovu kulonda kukwasha ñodindi kwikala nampinji yeneni yakukalakala mumudimu waNzambi