Kupuluka Kuhitila muWanta waNzambi Kudi Mukamwihi!
Kupuluka Kuhitila muWanta waNzambi Kudi Mukamwihi!
‘Wanta weyi winzi. Nkeñelu yeyi ayili hamaseki neyi chayilañawu mwiwulu.’—MATEWU 6:10.
1. Indi ntañishilu yaYesu yashindameneni hachumanyi?
HAMPINJI yahaniniyi Yesu Kristu Mpanji yindi yahaMpidi, wahosheli nihakulomba kwachitalilu kwalumbulwili mukwihihisha chuma chacheni chatañishileñayi. Wadizishili atumbanji twindi kulombaña kudi Nzambi nawu: ‘Wanta weyi winzi. Nkeñelu yeyi ayili hamaseki neyi chayilañawu mwiwulu.’ (Matewu 6:9-13) Yesu ‘wayili nakuhitahita nimunyikala yamaneni nimunyikala yanyanya, nakuyishimwina nikuyitwela nsañu yawanta waNzambi yayiwahi.’ (Luka 8:1) Kristu wayikonkomweneni atumbanji twindi nindi: ‘Sambilenu kukeña wanta nikuloña kwaNzambi.’ (Matewu 6:33) Chimunakudiza chinu chibaba, ilukenu jinjila mumwatela kuzatishila nsañu mumudimu wenu wakushimwina. Chakutalilahu, toñojokenu chimwatela kwakula awa malwihu: Indi nsañu yaWanta yalema ñahi? Indi antu anakukeñeka kuyipulwisha kuchumanyi? Nawa Wanta waNzambi wakapulwisha ñahi antu?
2. Indi nsañu yaWanta yalema ñahi?
2 Yesu washimwineñahu dehi nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Matewu 24:14) Nsañu yayiwahi yaWanta waNzambi yalema chikupu. Eñañi, muloña diyi nsañu yasweja kulema mukaayi! Muyipompelu yawaYinsahu jaYehova kubadika ha 100,000 mukaayi kejima, ambuña aNzambi kwakwihi nayihita 7 anakukalakala iwu mudimu weneni wakushimwina, nakuleja antu nawu Wanta wunakuyula. Kutachika kuyula kwaniwu Wanta hinsañu yayiwahi muloña chinayi mukwila nawu Nzambi naloñeshi nfulumendi mwiwulu kulonda yikalomboli yuma yejima heseki. Muchiyuulu chaWanta, nkeñelu yaYehova akayila hamaseki neyi chayilañawu mwiwulu.
3, 4. Chumanyi chikamwekana neyi nkeñelu yaNzambi anayili dehi hamaseki?
3 Chumanyi chikayimwekena antu neyi nkeñelu yaNzambi anayili dehi hamaseki? Yehova “wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.” (Chimwekeshu 21:4) Antu hiyakakataña hela kufwa hamuloña wanshidi yaswanawu nikubula kuwaninaku. Afu ekala muyitoñojoka Nzambi akekala nakukooleka kwakushakama haya nyaka, muloña Bayibolu yakana nawu: “Kwamba kekala kusañuka kwawaloña nikwawabula kuloña.” (Yililu 24:15) Hikwakekala njita, yikatu, hela nzalaku, nawa iseki akadibalumuna kwikala paradisa. Niatunyama afwana akashakama chawunda nawantu ninawakwawu atunyama.—Masamu 46:9; 72:16; Isaya 11:6-9; 33:24; Luka 23:43.
4 Hamuloña waniyi nkisu yayiwahi yikaleta chiyulu chaWanta, dichahoshela wuprofwetu wamuBayibolu hachihandilu chakumbidi namazu akukundeja nawu: “Akwakudizoza akaswana ituña, akatiya kuwaha nankashi nakushakama chachiwahi chamwena.” Hanu dinu antu atama chumanyi chikayimwekena? Nsona yashimuna nawu: “Hakuleha chanti muntu watama hakekala nawa mwokuku.” Ilaña, “akumuchiñeja Yehova akaswana ituña.”—Masamu 37:9-11.
5. Chumanyi chakamwekena kanu kaayi kamakonu?
5 Hakwila yuma yejimiyi yikamwekani, kaayi kamakonu hamu nijinfulumendi jinakuzuña, jinsakililu, ninyitayi yajakulanda nakulandulula akayifumishahu. Dichuma chakela nfulumendi yamwiwulu. Kaprofwetu Danyeli amoneneni kushimunañahu dehi nawu: ‘Hamafuku amba kekala anyantowu [anyanta amakonu] Nzambi wamwiwulu wamba kaloñesha wanta [mwiwulu] wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta [amakonu] ejima awa, wena nkawawu wakemana mbe haya nyaka.’ (Danyeli 2:44) Wanta waNzambi, nfulumendi yayiha yamwiwulu, yakayula munza wawuha waheseki. Kwakekala “mawulu amaha niiseki dadiha, mwakekala kuloña.”—2 Petulu 3:13.
Makonu Kupuluka Kunakukeñeka Chikupu
6. Indi Bayibolu yalumbulula nawudi hakutama kudi mukanu kaayi katama?
6 Hampinji Satana, Adama niEvu yadikañiluwu naNzambi, nakukeña kudifukwila aweni yayiwahi nayatama, dihatachikili chihandilu chatama chamuchidi wamuntu. Henohu Dibaji dakaayi kejima kanda, mwahitili yaaka kubadika ha 1,600, ‘kutama kwawantu kwaswejeli hamaseki, nimwafuukwiluwu mwejima nakutoñojoka munyichima yawu mwatamini hohu bweñi mafuku ejima.’ (Kutachika 6:5) Chimwahitili yaaka kwakwihi na 1,300, Solomoni wamweni nindi yuma yatamini chikupu, wasonekeli nindi: “Hinukuhameka afu afwili dehi, nami anabadiki amomi achidi kuhanda; ilaña ntahi anayibadiki wejima wawu wowu abulili kuvwalika, abulili kumona nyidimu yatama yakoñañawu mwishina detañwa.” (Mukwakutaŋisha 4:2, 3) Kufuma mumpinji yaSolomoni nakushika mumafuku etu munahiti yaaka 3,000 ilaña yuma yinakutaminaku hohu.
7. Muloñadi makonu chitunakukeñela kutupulwisha chikupu kudi Nzambi?
7 Hela chakwila kutama kunatwalekuhu hadi mpinji yayilehi, makonu kupuluka kuhitila muWanta waNzambi kunakukeñeka chikupu. Yuma yinakutaminaku hohu kubadika chiyadiña yaaka 100 yinahituhu, nawa yinakutwalekahu nakutaminaku. Chakutalilahu, mutayi watalaña nsañu jamuKaayi washimuna nawu: “Antu anafwi muyaaka nkulakaji yamu 20 anabadiki namapampa kasatu kuvula kwawantu afwili mumajita ejima amunkulakaji yamwaka wakusambila AD nakushika mu 1899.” Kufuma tuhu mu 1914 antu anafwi munjita anabadiki hayihita 100! Mukanda wumu wesekeja nawu antu akushika kuyihita 60 diwafwili muNjita yamuKaayi yamuchiyedi. Hamuloña wakwila matuña amakwawu makonu anakudisokela namata anyitenda nzumbu, antu anateli kujilumuna mazanvu awantu mukaayi. Hela chakwila kudi kuyilaku hambidi mujaSayansi nimujachipatela, chaaka nichaaka nzala yinakujilumuna mawumi awanyana akushika kuyihita yitanu.—Talenu kapetulu 9 kamukanda waChumanyi Chacheni Chatañishaña Bayibolu?
8. Indi kuyula kwawantu hadi yaaka yayivulu kunamwekeshidi?
8 Antu anakañanyi kumanisha kutama. Nyitayi yakanu kaayi yatalaña hansañu yetuña nachiyulu, kulanda nakulandulula, ninsakililu anakañanyi kushikija yuma yakeñaña antu yidi neyi kuwunda, maheta, nikubula kukata. Chatela yimanishi kukala kweneni kunakumona antu, iyi nyitayi yinawejeluku kukala. Mwalala, yaaka yayivulu yinahitihu yachiyulu chawantu yinashikiji mazu akwila nawu: “Njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yeremiya 10:23) Eña, ‘muntu wayulaña mukwawu muntu kulonda yamukatishi.’ (Mukwakutaŋisha 8:9) Hela chochu, “kuleña kwejima kwaabaña nakufunyisha hamu.”—Aroma 8:22.
9. Yumanyi yakuhwelelañawu kumona akwaKristu alala munanu ‘mafuku akukuminina’?
9 Kutalisha hayinu mpinji yitudimu, Bayibolu yashimwineñahu dehi nawu: “Kumafuku akukuminina kwakenza nyaka yakala.” Hanyima yakulumbulula yuma yikamwekanaña mumafuku akukuminina muchiyulu chawantu, wuprofwetu wahosha nawu: “Antu atama niakwakutwamba akuya nakusweja.” (Tañenu 2 Timotewu 3:1-5, 13.) Iyi diyuma yakuhwelelañawu kumona akwaKristu, muloña “mpata yamunu mwishina yashakamaña mudi owu watama,” Satana. (1 Yowanu 5:19) Hela chochu, nsañu yayiwahi yidi yakwila nawu katataka Nzambi yopulwishi antu amukeña. Akayipulwisha kufuma mukanu kaayi, kanakunyakala kutaminaku chikupu.
Muntu Watela Hohu Kutupulwisha
10. Muloñadi Yehova chinekaliliyi watelela kupulwisha antu?
10 Chimukushimwinaña nsañu yayiwahi, yilumbulwilenu antu anakuyitiyilila nenu Yehova hohu Diwatela kutupulwisha. Kankawindi hohu diwukweti ñovu nawa wakeñaña kupulwisha ambuñindi kukutama kwejima. (Yililu 4:24, 31; Chimwekeshu 4:11) Tunateli kukuhwelela netu Yehova wukapulwisha antu jindi nikushikija nkeñelu yindi, muloña wasanyika nindi: “Chalala, munatoñojoki dimu muchakamwekena.” Izu dindi “hidakafunta [kudi yena] makasakasaku.”—Tañenu Isaya 14:24, 25; 55:10, 11.
11, 12. Chumanyi chayikanayi Nzambi ambuñindi?
11 Yehova wakana nindi wukapulwisha ambuñindi hampinji yakasompeshayi antu atama. Hampinji yamutemesheliyi kaprofwetu Yeremiya kulonda kuhosha nawakwanshidi chakadi woma, Nzambi wahosheli nindi: “Bayi wakayitiyaña womaku.” Muloñadi? “Ami nidi neyi nakakupulwishaña.” (Yeremiya 1:8) Munjila yoyimu, henohu Yehova wudi kwakwihi nakujilumuna musumba watama waSodoma naGomora, watemesheli añelu ayedi kulonda amupulwishi Loti nichisaka chindi mumusumba. “Hohenohu Yehova hakunokesha haSodoma naGomora nimakala akesi.”—Kutachika 19:15, 24, 25.
12 Cheñi nawa Yehova nateli kupulwisha antu elaña nkeñelu yindi mukaayi kejima. Hampinji yajilumwiniyi mpata yamunu mwishina yatama yahashankulu naDibaji, ‘wahembeli Nowa mukwakushimuna kuloña, nawakwawu atanu nayedi.’ (2 Petulu 2:5) Cheñi Yehova wukapulwisha antu aloña hakajilumunayi kaayi kamakonu katama. Izu dindi dahosha nawu: “Enu antu ahanu heseki mwadizoza . . . Keñakeñenu kuloña, keñakeñenu kudizoza, wamba kela akayibatamisha mwifuku dakazuwayi Yehova.” (Zefwaniya 2:3) Chuma chikafuma muniku kujilumuka kwakaayi kejima, ‘akwakwoloka diwu akashakama mwituña, hakwila antu atama akayifumisha mwituña.’—Yishimu 2:21, 22.
13. Indi ambuña aYehova afwa akayipulwisha ñahi?
13 Hela chochu, ambuña Nzambi amavulu anafwi hamuloña wayikatu, yihuñu, niyuma yikwawu. (Matewu 24:9) Hanu dinu, ejimawa akayipulwisha ñahi? Neyi chitwahosha dehi hakusambila, “kwamba kekala kusañuka kwawaloña.” (Yililu 24:15) Chatuzañaleshaña chikupu hakwiluka netu kwosi chuma chatela kumukañesha Yehova kupulwisha ambuñinduku!
Nfulumendi Yaloña
14. Muloñadi chitunakuhweleli netu Wanta waNzambi hinfulumendi yaloña?
14 Mumudimu wenu wakushimwina, munateli kulumbulula nenu Wanta waYehova wamwiwulu hinfulumendi yaloña. Wunsahu weniwu walala muloña wamwekeshaña yililu yaNzambi yasweja kuwaha, chidi neyi wuñaji, kuloña nikukeña. (Kuhituluka 32:4; 1 Yowanu 4:8) Nzambi wamwinka Yesu Kristu Wanta, muloña diyi watela chikupu kuyula iseki. Yehova watoñola cheñi nindi akwaKristu awayishewa 144,000 ayifumishi heseki nakuyitwala kuwumi wamwiwulu neyi answana aKristu akayula iseki hamu nayena.—Chimwekeshu 14:1-5.
15. Shimunenu chaambu chidi hachiyulu chaWanta waNzambi nachiyulu chawantu.
15 Chiyulu chaYesu nawa 144,000 chakambuka chikupu nachiyulu chawantu abula kuwanina. Kakavulu anyuli akanu kaayi ayulaña antu jawu nawukatu nawa analeñeli antu jawu kudiñija munjita, chumichi chinaleñeli antu amavulu kuyijilumuna. Dimuloña watukonkomwenaña Nsona kubula kukuhwelela muntu, muloña ‘hanateli kutupulwishaku’! (Masamu 146:3) Ilaña Kristu wakayula kwesekeja nayililu yindi yayiwahi! Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.”—Matewu 11:28-30.
Mafuku Akukuminina Keña Akumi!
16. Indi anu mafuku akukuminina akamana ñahi?
16 Kufuma tuhu mu 1914, akanu kaayi kadi mumafuku akukuminina, hela ‘kukuma kwanyaka yamakonu.’ (Matewu 24:3) Katataka, chuma chateneniyi Yesu nindi “lukadi lwasweja” lumwekani. (Tañenu Matewu 24:21.) Ilu lukadi lwasweja kutoha lukanoñesha kaayi kaSatana kejima. Hanu dinu lukadi lwasweja lukatachika ñahi? Nawa lukamana ñahi?
17. Indi Bayibolu yashimuna nawudi kutalisha hakutachika kwalukadi lwasweja?
17 Lukadi lwasweja lukatachika mujila yakukasumwisha. Eña, ‘ifuku daYehova’ dakenza chakubula kwiluka “chakwilawu nawu, Kwamwena, kwazo-o.” (Tañenu 1 Atesalonika 5:2, 3.) Lukadi luyashimwineñahu dehi lukatachika hampinji yakamona nyuza nawu adi kwakwihi nakumanisha kukala kweneni kunakumonawu. Kujilumuka kwakadi kwiluka ‘kwaBabiloni Muneni,’ wanta wakaayi wansakililu yakutwamba, kwakakasumwisha kaayi. Anyanta niayilolu akahayama chakamonawu Babiloni Muneni anamusompeshi dehi.—Chimwekeshu 17:1-6, 18; 18:9, 10, 15, 16, 19.
18. Chumanyi chakelayi Yehova hakalukukayi Satana antu Jindi?
18 Hampinji yakala, “mwitañwa mwakekala yinjikijilu, nimukakweji, nimututumbwa,” nawa “mwiwulu mwakamwekana chinjikijilu chaMwana kamuntu.” Dichi tunateli ‘kwimana chakola muloña kukuulika kwetu hikukushika kwakwihi.’ (Luka 21:25-28; Matewu 24:29, 30) Satana hela Gogi, wakabalumuna nyikanka yindi nakulukuka antu jaNzambi. Kutalisha kudi antu anakupuupa ambuñindi ashinshika, Yehova wahosha nindi: ‘Muntu wukukunkeyi, nakunki hakantu kadisu dami.’ (Zekariya 2:8) Dichi, ñovu yaSatana yakufwila kujilumuna ambuña Yehova hiyakazatikaku. Muloñadi? Muloña Mwanta Yehova wakanyakala kuzuwa kulonda yakapulwishi ambuñindi.—Ezekeli 38:9, 18.
19. Muloñadi wutukukuhwelela netu añelu jaNzambi akwakujilumuna akakisañana nfulumendi yaSatana?
19 Nzambi chakanyamukilayi nyuza, ‘yikeluka nawu diyi Yehova.’ (Ezekeli 36:23) Wakatemesha akwakujilumuna indi—yileñaleña yayivulu yakuspiritu yakalombolawu kudi Kristu Yesu—kulonda akajilumuni nfulumendi yejima yaSatana heseki. (Chimwekeshu 19:11-19) Neyi twanuka netu mpinji yimu kañelu wumu hohu hawufuku wumu ‘watapili antu makombakaji nkulakaji, namakombakaji makumi atanu nasatu, namakombakaji atanu’ ayilumbu jaNzambi, tunateli kukuhwelela netu añelu akajilumuna chakubula kumba mpinji nfulumendi yaSatana yaheseki yejima chikamana lukadi lweneni haAmagedoni. (2 Anyanta 19:35; Chimwekeshu 16:14, 16) Satana niandemoni jindi akayumbila mwikela hadi ikombakaji dayaaka. Nkumininaku, akayijilumuna.—Chimwekeshu 20:1-3.
20. Chumanyi chakakoñayi Yehova kuhitila muWanta windi?
20 Heseki akafumishahu kutama, nawa antu aloña akashakama haya nyaka hamaseki. Yehova wukadimwekesha nawu hiMukwakupulwisha Wabadika. (Masamu 145:20) Kuhitila muWanta windi, wakajilika chiyulu chindi, nikulemesha ijina dindi dajila, nawa wakashikija nkeñelu yindi yalema heseki. Zañalalenu namudimu wenu chimukushimwinaña nsañu yayiwahi nikukwasha antu “afuukwilawu dehi kumona wumi wahaya nyaka” kulonda eluki nawu kupuluka kuhitila muWanta waNzambi kudi mukamwihi!—Yililu 13:48.
Munakwanuka?
• Indi Yesu wamwekesheli ñahi kulema kwaWanta?
• Muloñadi makonu chitunakukeñela kutupulwisha chikupu?
• Yumanyi yitwatela kukuhwelela netu yikamwekana hampinji yalukadi lwasweja?
• Indi Yehova wakadimwekesha ñahi nawu hiMukwakupulwisha Wabadika?
[Malwihu aKuzatisha haKudiza]
[Nyevulu yidi hefu 16, 17]
Izu daNzambi dashimwineñahu dehi mudimu weneni wakushimwina mukaayi kejima makonu
[Mwevulu wudi hefu 18]
Neyi chapulwishiliyi Yehova Nowa nichisaka chindi, ninetu wakatupulwisha
[Mwevulu wudi hefu 20]
Yehova “wakayikombola madilu ejima . . . , hikwakekala nawa cheñi kufwaku.”—Chimwekeshu 21:4