Itejenu wuNlomboli waYehova
Itejenu wuNlomboli waYehova
“Kumukeña Nzambi yowu kwila mwatulejañayi; mwatulejañayi himwakalaku.”—1 YOWANU 5:3.
1, 2. (a) Muloñadi antu amavulu makonu chinakukaaninawu wunlomboli? (b) Komana antu akaanaña wunlomboli ekala adimena? Lumbululenu.
“WUNLOMBOLI” hiyawikeña kudi antu amavuluku. Antu amavulu atoñojokaña nawu kwovwahila muntu mukwawu chatama. Antu abulaña kukeña kwovwahila akwawu akweti yililu yakwila nawu “Kwosi muntu watela kunlejaku.” Komana antu amuchidiwu mwalala ekala adimena? Inehi! Antu amuchidiwu alondelaña hohu yililu yawakwawu amavulu ‘alondejaña mwelañawu antu amakonu.’ (Aroma 12:2) Chineli hiyadimenaku, kwesekeja namazu amukwaKristu kapostolu Petulu “hiyanduñu jakutoka.” (2 Petulu 2:19) Endaña “mwaya nyaka yamakonu, mwakeña mwanta wamuluzwizu wañovu,” Satana Diyabolu.—Aefwesesa 2:2.
2 Nsoneki wumu wadisambili nindi: “Hinetejaña anvwali jami hela kapristu hela nkoñi wamunsakililu hela Bayibolu kunleja chuma chinatela kumona nami chachiwahuku.” Eñañi, amakwawu anateli kuzatisha wunlomboli wawu chatama nawa hitwatela kuyovwahilaku. Komana kukaana wunlomboli wamuntu dichuma chinateli kumanisha kukala? Neyi mutaña hanyitu yansañu yidi hachipapilu chansañu hakampinji kantesha, mukudimwena yuma yatama yinakumwekana. Chawushona hama hakumona antu amavulu anakukaana wunlomboli hayinu mpinji yinakukeñeshawu antu wunlomboli.
Chitwamonaña wuNlomboli
3. Indi akwaKristu amuyaaka nkulakaji yakusambila amwekesheli ñahi nawu akaanini kwovwahila wunlomboli wawantu chakadi kutoñojokahu?
3 Hakwikala akwaKristu, twambukaku nawantu amukaayi. Hitwakuminaña dakwila chuma chejima chakutwilejawu chakadi kutoñojokahu chiwahuku. Kwambukaku, mpinji yikwawu twatela kukaana kwovwahila munatulejuwu antu hela chakwila akweti yifulu yamaneni. Dichamwekeni nikudi akwaKristu amuyaaka nkulakaji yakusambila. Chakutalilahu, hampinji yayilejeluwu apostolu kuleka kushimwina, hiyetejeli mwayilejeluwu kudi kapristu muneni nikudi akwawanta amuchota chaSanihediliniku. Hiyalekeli kwila chuma chachiwahi kulonda kutiyilila wunlomboli wawantuku.—Tañenu Yililu 5:27-29.
4. Yakutalilahwinyi yamuNyikanda yachiHeberu yamwekeshaña nawu antu jaNzambi akaanini kuya munjila yawantu amavulu?
4 Ambuña aNzambi amavulu adiñaku henohu Yesu kanda yenzi niwena adikañili. Chakutalilahu, Mosi “hakuleka kumutena nawu mwana kamwana kaFwaro wamumbanda; hakutonda kumona ihuñu chimu nawantu aNzambi,” hela chakwila chumichi chasañumwini ‘ndombu yamwanta.’ (Aheberu 11:24, 25, 27) Yosefu wamukaanini ñoda Potifwari wamukanjikijeleña nindi akami nindi hela chakwila Yosefu welukili nindi mumbanda yeniwu wukumutwambila nikumwiñija mukukala. (Kutachika 39:7-9) Danyeli “wafuukwili mumuchima windi, nindi, Kwonti kwami kudijilola nakudya kwamwanta,” hela chakwila chamukalilili mukulumpi wachota chawatulala amuBabiloni kwiteja mwafuukwiliyi Danyeli haniyi nsañu. (Danyeli 1:8-14) Yakutalilahu yamuchidiwu yamwekeshaña nawu, kufuma tuhu kushankulu, antu jaNzambi atondahu kwila chuma chachiwahi, hela akumona kukala. Hiyovwahilaña antu kulonda ayikeñuku; anetu nawa dichitwatela kwila.
5. Indi yitoñojoka yetu kutalisha hawunlomboli yambuka ñahi nayawantu amukaayi?
5 Kumika kwetu bayi tukwimona neyi twachinchika nyichimaku; nawa hitudi neyi antu adikañaña nakudimwekesha nawu anakaani kwiteja nsañu jamatuña nachiyuluku. Ilaña, twafwilaña kwiteja wunlomboli waYehova kubadika wunlomboli wawantu. Neyi lushimbi lwawantu luzuñesha lushimbi lwaNzambi, hichatwikalila kuwana mwakwililaku. Kufwana apostolu amuyaaka nkulakaji yakusambila, twovwahilaña Nzambi neyi nyuli bayi antuku.
6. Muloñadi chichawahila kwovwahila nshimbi jaYehova?
6 Chumanyi chinatukwashiku kwiteja wunlomboli waNzambi? Twetejaña mazu asonekawu haYishimu 3:5, 6 akwila nawu: Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” Twakuhwelela netu chuma chejima chakeñañayi Nzambi kudi etu chikutukwasha. (Tañenu Kuhituluka 10:12, 13.) Mwalala, Yehova wadilumbulwili kudi aIsarela nindi diyi ‘wayilejaña mwakukuwahisha, Yami nakulombolaña njila yatela kuya eyi.’ Watwalekeluhu cheñi nindi: “Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.” (Isaya 48:17, 18) Awa mazu twayikuhwelela. Tuneluki chikupu netu neyi tukwovwahila nshimbi jaNzambi tukuhetelañamu.
7. Chumanyi chitwatela kwila neyi hitunatiyishishi lushimbi luyasoneka Mwizu daNzambuku?
7 Twetejaña wunlomboli waYehova nikumwovwahila hela chakwila hitunelukishi muloña waweni wasonekelawu nshimbi jikwawu Mwizu dinduku. Iku bayi neyi hikwitiya hohuku; hikukuhwelela. Kwamwekeshaña chikuhwelelu cheneni chitukweti netu Yehova weluka yuma yatela kutwikwasha. Cheñi kwovwahila hinjila yimu yakumwekeshelamu kukeña, muloña kapostolu Yowanu wasonekeli nindi: “Kumukeña Nzambi yowu kwila mwatulejañayi.” (1 Yowanu 5:3) Ilaña kudi kwovwahila kukwawu kutwatela kutaku maana.
Kufumba Yitoñojoka Yetu
8. Indi ‘kufumba yitoñojoka yetu’ kwesekana ñahi nakutambwila wunlomboli waYehova?
8 Bayibolu yatulejaña nawu twatela ‘kufumba yitoñojoka yetu yakwambula yayiwahi nayatama.’ (Aheberu 5:14) Dichi, chikonkwanyi chetu hichidi chakwovwahila nshimbi yaNzambi chakadi kutoñojokahuku; ilaña twatela “kwambula yayiwahi nayatama” kushindamena hanshimbi jaYehova. Tunakukeña kwiluka maana ekala munjila jaYehova, kulonda tutweshi kuhosha neyi chahosheli ñimbi yamasamu nindi: “Nshimbi jeyi jidi mukachi kamuchima wami.”—Masamu 40:8.
9. Tunateli kwesekeja ñahi chinleji chetu nanshimbi jaYehova, nawa muloñadi chichalema kwila mwenimu?
9 Hakwila nawu twiluki kulema kwanshimbi yaNzambi neyi chelukiliyi ñimbi yamasamu, twatela kutoñojokaña chikupu hayuma yitwatañaña muBayibolu. Chakutalilahu, neyi twiluka yuma yikwawu yakeñañayi Yehova, tunateli kudihula netu: ‘Muloñadi ilu lushimbi hela chishina chichawahila? Nikuhetelamu ñahi neyi novwahila? Yumanyi yatama yayimwekenaña antu adiwulaña kufumba kwaNzambi?’ Neyi chinleji chetu chendelaña hamu nanshimbi jaYehova, tukutachika kufuukula kwesekeja nankeñelu yindi. Nawa tukutweshaña ‘kushinshika mwaya muchima wa[Yehova]’ nikulondelamu kuhitila mukwovwahila. (Aefwesesa 5:17) Mpinji jikwawu kwovwahila kwakalaña.
Satana Wafwilaña Kuluwañesha wuNlomboli waNzambi
10. Njilanyi yimu mwafwilañayi Satana kuluwañesha wunlomboli waNzambi?
10 Satana watachikili dehi kufwila kuluwañesha wunlomboli waNzambi. Yililu yindi yakudimena yamwekenaña munjila jajivulu. Chakutalilahu, shinshikenu antu chinakubula kulemeshawu ntajikilu yaNzambi yamaluwi. Antu amakwawu ashakama hamu chakadi kudisumbula, amakwawu niwena akeñaña kuwana njila yakumanishilamu maluwi awu. Awa mazanvu ayedi anateli kwiteja mwahosheli mumbanda wumu mukwakuhema yisela nindi: “Amayala niambanda chayikalilaña kwikala namwinikwawu wumu hohu.” Watwalekeluhu nindi: “Neluki wanyi neyi kudi muntu washinshika kudi mwinikwindi hela wunakukeña kwikala wakashinshi.” Mukwakuhema yisela mukwawu chanukiliyi hamaluwi indi amanini, wahosheli nindi: “Neluki wanyi neyi mwalala atwileñeli kushakama namumbanda wumu hohu muchihandilu chejima.” Twatela kudihula netu, ‘Komana novwahilaña wunlomboli waYehova munsañu jamaluwi, indi kwiji yililu yamukaayi yakwila nawu maluwi hiyashimbulañaku yineñili dehi muyitoñojoka yami?’
11, 12. (a) Muloñadi chichatela kuyikalila atwansi kwiteja wunlomboli waYehova? (b) Shimunenu chakutalilahu chinakumwekesha wubanji wafumaña mukudiwula nshimbi jaYehova niyidika yindi.
11 Komana wudi kansi wudi mukuloñesha kwaYehova? Neyi dimu, Satana nakukeña wutoñojokeña neyi wunlomboli waYehova hiwatela kukukwashaku. “Kufwila kwatama kwawukwenzi” kubombelahu niikakeja dafumaña kudi amabwambu jeyi dinateli kukuleñela kutoñojoka neyi nshimbi jaNzambi jakala kuhemba. (2 Timotewu 2:22) Bayi witeja chikumwekenuku. Fwilaku kwiluka maana ekala mushimbi jaNzambi. Chakutalilahu, Bayibolu yayilejaña nawu “temukenu wuvumbi.” (1 Akorinda 6:18) Dihuli cheñi neyi: ‘Muloñadi ilu lushimbi chilwawahila? Indi kwovwahila haniyi nsañu kukunkwasha ñahi?’ Hadaha munelukuhu antu adiwili kufumba kwaNzambi, nawa amweni kalula. Komana adi namuzañalu chayinu mpinji? Komana anakuhanda chachiwahi kubadika chahandileñawu hiyadiña mukuloñesha kwaYehova? Komana anawanuhu yuma yaletaña muzañalu yinabuli kwilukawu ambuña aNzambi ejima?—Tañenu Isaya 65:14.
12 Talenu mazu ahosheli mukwaKristu wejina daSharon mpinji yakunyima: “Muloña wakubula kwovwahila lushimbi lwaYehova, natambwili musoñu wafwana waAIDS. Kakavulu nanukaña muzañalu wunadiluñishili hadi yaaka yayivulu nakumukalakela Yehova.” Wanukili nindi waluwañesheli chikupu hakufumpa nshimbi jaYehova nawa nindi mutenowu chiña wajilemesheli chikupu. Nshimbi jaYehova jatwikiñaña. Sharon wafwili chimwahitili nyilungu yitanu nayiyedi hanyima yakusoneka mazu adi hewulu. Kwesekeja nachuma chatama chamumwekeneni, kwosi chuma chachiwahi chayinkañayi Satana antu adiñijaña mukanu kaayi katama. Hakwikala ‘tata yakutwamba,’ wakanaña yuma yayivulu, ilaña hayishikijañaku, neyi chochakañenyiyi kushikija chikaninu chamukaniniyi Evu. (Yowanu 8:44) Eñañi, twatela kwiteja wunlomboli waYehova mpinji yejima.
Tondolwelenu Spiritu yaKudimena
13. Njilanyi yimu mutwatela kutondolwela spiritu yakudimena?
13 Hakwila nawu twiteji wunlomboli waYehova, twatela kutondolwela spiritu yakudimena. Yililu yakudinka wanta yikutwileñela kutoñojoka netu kwosi muntu watela kutulombola. Chakutalilahu, tunateli kukaana kufumba kwafumaña kudi antu anakulombola antu jaNzambi. Nzambi waloñesha ntanjikilu kuhitila mwizanvu danduñu wamaana nikashinshi dinakuhana yakudya yakuspiritu hampinji yatelela. (Matewu 24:45-47) Mukudizoza twatela kwiluka netu iyi diyi njila yinakuhembelamu Yehova antu jindi makonu. Fwanenu apostolu ashinshika. Hampinji yatuntwishiluwu atumbanji, Yesu wayihwili apostolu nindi: “Ninenu nawa keña muyi kwenu, tahindi?” Petulu wakwili nindi: “Tukuya kudinyi? Eyi yeyi wukweti mazu awumi wahaya nyaka.”—Yowanu 6:66-68.
14, 15. Muloñadi wutwatela kutiyilila kufumba kwamuBayibolu?
14 Kwiteja wunlomboli waYehova kwabombelamu kulondela kufumba kwaMwiizu dindi. Chakutalilahu, izanvu danduñu wamaana nikashinshi datusoñamishaña nawu “tutonenu nakubabala.” (1 Atesalonika 5:6) Kufumba kwamuchidiwu kunakukeñeka chikupu munanu mafuku akukuminina chineli antu anekali “akwakudikeña, akwakufwila mali.” (2 Timotewu 3:1, 2) Komana yililu yinatandi makonu yinateli kutuluwañesha? Eña. Kufwila yikonkwanyi yamukaayi kunateli kutuleñela kukaama lwakuspiritu, hela tunateli kwikala nayililu yakukeñesha maheta. (Luka 12:16-21) Dichi twatela kutiyilila kufumba kwamuBayibolu nikutondolwela chihandilu chakufwila maheta chinatandi nankashi mwituña daSatana!—1 Yowanu 2:16.
15 Yakudya yakuspiritu yafumaña kudi izanvu danduñu wamaana nikashinshi ayihanaña muyipompelu kuhitila mudi aeluda atondawu. Bayibolu yatufumbaña nawu: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.” (Aheberu 13:17) Komana ichi chinayi mukwila nawu aeluda amuchipompelu hiyaluwañeshañaku? Inehi! Nzambi wamonaña chikupu yiluwa yawu kubadika chamonañawu antu. Hela chochu, wakeñaña nindi tuyovwahileña. Kuzatila hamu nawaeluda, hela chakwila hiyawaninaku, kwamwekeshaña nawu tunakwiteja wunlomboli waYehova.
Kudizoza Chikwekalila Kwalema
16. Tunateli kumulemesha ñahi Yesu neyi Mutu wachipompelu chawakwaKristu?
16 Mpinji yejima twatela kwanuka netu Yesu diyi Mutu walala wachipompelu. (Akolose ) Iwu dimuloña wumu watuleñelaña kwovwahila wunlomboli wawaeluda atondewa, ‘nikuyifuukwila kulema nankashi.’ ( 1:181 Atesalonika 5:12, 13) Hela chochu, aeluda amuchipompelu niwena atela kumwekesha nawu ovwahila kuhitila mukushaku kashinshi kakuleja chipompelu mazu aNzambi, bayi yitoñojoka yawuku. ‘Hiyapandakanaña yuma yasonekawu dehi munyikanda yajila’ kulonda atiyakeshi yitoñojoka yawuku.—1 Akorinda 4:6.
17. Muloñadi muchima wakudinka wanta chiwekala wafwana?
17 Antu ejima muchipompelu atela kwiluka wubanji wekala mukudikeñela kulema. (Yishimu 25:27) Hekwawu, iwu diwadiña muhetu mwafwiliyi kambanji wumu abulakeniyi kapostolu Yowanu. Wasonekeli nindi: “Diyotefwesi, wakeña kwikala muneni mukachi kawu, hatutambulañaku. Dichi chinakenza nakaanuka mwelañayi, nimazu atama atutavwilañayi.” (3 Yowanu 9, 10) Anetu makonu twatela kudizilaku chuma. Kudi chuma chacheni chikutuleñela tuleki yitoñojoka yakudisamba yinateli kwikala munyichima yetu. Bayibolu yatulejaña nawu: “Kudinka wanta kwasambilaña, kujilumuka kwakumininaña; muchima wakudivuna wasambilaña, kudimbuka kwakumininaña.” Antu etejaña wunlomboli waNzambi atela kutondolwela muhetu wakudinka wanta, muloña neyi abula kwila mwenimu chikuyiletela nsonyi.—Yishimu 11:2; 16:18.
18. Chumanyi chikutukwasha kwiteja wunlomboli waYehova?
18 Eñañi, fwilenu kutondolwela spiritu yetuña yakudimena nikwiteja wunlomboli waYehova. Mpinji yejima, toñojokenuña nakusakilila hakukooleka kweneni kumukweti kwakumukalakela Yehova. Chineli mudi hakachi kawantu jaNzambi hiwunsahu wakwila nawu nayikoki naspiritu yindi yajila. (Yowanu 6:44) Bayi mudiwula wubwambu wenu naNzambuku. Zatenu nañovu muchihandilu chenu chejima kulonda mumwekeshi nenu munakaani spiritu yakudimena nawa muneteji wunlomboli waYehova.
Munakwanuka?
• Chumanyi chabombela mukwiteja wunlomboli waYehova?
• Indi kufumba yitoñojoka yetu kunesekani ñahi nakwiteja wunlomboli waYehova?
• Munjilanyi mwafwilañayi Satana kuluwañesha wunlomboli waNzambi?
• Muloñadi kudizoza chikwalemena hakwiteja wunlomboli waYehova?
[Malwihu aKuzatisha haKudiza]
[Mwevulu wudi hefu 24]
“Chiña twovwahilaña Nzambi, bayi antuku”
[Mwevulu wudi hefu 26]
Chachiwahi kulondela nshimbi jaNzambi mpinji yejima