Malwihu Ehulaña Antañi

Komana Nzambi Wazatishaña Wubanji Wadimwekenaña Kubabesha Nachu Antu?

Nzambi hazatishaña wubanji wadimwekenaña kulonda kubabesha nachu antu abula muloñaku. Kanda yeleñahu dehi chuma chamuchidiwu, nawa hamba kachikoñaku. Muloñadi? Muloña Bayibolu ha 1 Yowanu 4:8 yahosha nawu “Nzambi diyi kukeña.”

Kukeña dikaseloki kayuma yejima yakoñañayi Nzambi. Muntu wukweti kukeña hakatishaña muntu wabula muloñaku, muloña Bayibolu yahosha nawu “kukeña hikwakoñaña mukwawu chatamaku.” (Aroma 13:10) Hamukanda waYoba 34:12, Bayibolu yahoshaña nawu: ‘Mwalala Nzambi helaña mwatamaku.’

Eña, Bayibolu yashimwineñahu dehi wubanji wunakumwekana makonu, chidi neyi “nyitentanshi yayeni.” (Luka 21:11) Hela chochu, Yehova hidiyi wakojejaña wubanji wunakumwekanaku. Yehova wudi neyi mukwakushimuna jampepela. Mukwakushimuna yeniwu wukushimuna nindi kwakanoka nvula yampepela, dichi neyi yuma yinakisiki nanvula yashimunayi, hakwikala namuloñaku. Dichi neyi Nzambi hidiyi wakojejaña makabi anakumonawu antu kuhitila muwubanji wadimwekenañaku, hanu dinu chumanyi chakojejaña makabi?

Bayibolu yashimunaña nawu, “Mpata yamunu mwishina yashakamaña mudi owu watama,” Satana Diyabolu. (1 Yowanu 5:19) Yena wadiñi mbanji kufuma tuhu hadikañiliyi hampinji yaleñeluwu antu atachi nikulelu. (Yowanu 8:44) Satana wamonaña wumi wawantu nindi wamukunkulwayi hohu. Yililu yindi yashindamena halwisu, dimuloña wunatandishiliyi kaayi kejima nalwisu. Kaayi kamakonu kakojejaña antu abula nyiloña kushakama mumaluña mwamwekanaña wubanji, chili wadinjilaña waweni hela wakuleta kudi antu. (Aefwesesa 2:2; 1 Yowanu 2:16) Dichi akwalwisu adi namuloña kutalisha hamakabi amakwawu anakumonawu antu. (Mukwakutañisha 8:9) Munjilanyi?

Wubanji wawuvulu wakukasumwisha awukojejaña kudi antu. Chakutalilahu, talenu hayihuñu yayimwekeneni antu ashakamaña mumusumba wenzeli namenji waNew Orleans, U.S.A., hela matala ahumokeli namalowa afumineña kujimpidi jakuchikumu chakaluñalwiji kakuVenezuela. Hakukala kwamuchidiwu nikukala kukwawu, wubanji wadimwekenaña, chidi neyi mpepela ninvula, jaleteli kukala kweneni muloña wakubula kwiluka chidi mpepela, kubula kukola kwamatala, kubula kwiluka mwakwilila yuma chiwahi, kubula kutiyilila mazu akusoñamisha, nikuluwañesha kawanlomboli amunfulumendi.

Shinshikenu cheñi hawubanji wamwekeni kumashiita. Henohu Yesu wuchidi hamaseki, kaposhi kahumukili chakukasumwisha kajahili antu 18. (Luka 13:4) Iwu wubanji hekwawu wamwekeni muloña wakuluwañesha kwawantu, “mpinji nakululakana,” hela yuma yejima yiyedi, bayi neyi kwadiña kusompesha kwaNzambuku.—Mukwakutañisha 9:11.

Komana Nzambi waletahu dehi wubanji? Eña, kwambukaku nawubanji wadimwekenaña hela wakwilisha kudi antu, Yehova wasakwileña antu akuhanda niakujilumunawu nawubanji waleteleñayi. Iwu wubanji wadiñi nankeñelu, nawa hiwamwekeneña mpinji yejimaku. Dibaji daKaayi Kejima dadiñaku hamafuku ankakulula Nowa nikujilumuka kwamusumba waSodoma naGomora mumafuku aLoti, hiyakutalilahu yiyedi yawubanji waleteliyi Nzambi. (Kutachika 6:7-9, 13; 18:20-32; 19:24) Iwu wubanji waleteliyi Nzambi wajilumwini antu atama ji-i ilaña antu adiña aloña kumesu aNzambi ayipulwishili.

Dichi, Yehova Nzambi wukweti ñovu nimpwila, yakumanisha makabi ejima to-o nikuyamwina antu kuyihuñu yinakufuma muwubanji wadimwekenaña. Masamu 72:12 yashimwineñahu dehi hadi Mwanta atondawu kudi Nzambi, Yesu Kristu nawu: “Wakamupulwisha wabula yuma hakadilayi, wakapulwisha nikazweñi wabula wakumukwashaku.”