Maana aNzambi Amweknaña Muyileñaleña
Maana aNzambi Amweknaña Muyileñaleña
“Watulejaña mwakubadika mwalejañayi anyama ahamaseki, watwinkaña maana akubadika awatujila twahaluzwizu.”—YOBA 35:11.
ATUJILA akweti maana akuhayamisha. Antu atuñaña jindeki ahayamaña hakumona atujila chatukañawu chachiwahi. Atujila amakwawu atuukaña makilomita amavulu nakuketwankesha kaluñalwiji, hela chakwila mukaluñalwiji mwosi yinjikijilu yakwiluka nachu maluña ilaña ashikaña heluña datoñolawu.
Chuma chikwawu chasweja kubadika chekala nawatujila, chaswejaña kumwekesha maana aNleñi yawu, hiwuswa wawu wakutiyañana kuhitila mukutambeka nimutumina. Talenu iyi yakutalilahu.
Neyi Tujila Hitukutiyañana
Tujila tukwawu twatachikaña kutiyañana henohu kanda tutetuki. Chakutalilahu, kaleñami kasemaña mateta akushika kuatanu nasatu, iteta dimu hefuku. Dichi neyi mateta ejima akulila hampinji yimu, akatetuka mumafuku akubadika haatanu nasatu. Dichi mama yawu wukwikala namudimu weneni wakuhemba tunyana twatetuka dehi, tudi namulungu wumu iku wuchidi kukumbila iteta dichidi kanda ditetuki. Ilaña, nyana kakaleñami yejima yitanu nayisatu yatetukaña mumaora atanu nadimu. Yatetukaña ñahi? Muloña wumu weneni, washimunañawu akwakusandujola, wudi nawu anyana katuleñami achidi mumateta atiyañanaña henohu kanda atetuki hekwawu kulonda akatetuki hampinji yimu.
Neyi nyana katujila yinakuli dehi, tumakombu twanowu muchidi watujila ditwavulaña kwimba. Twembaña sweje-e neyi tudi dehi hachilaaka chakusema kulonda kuhaña akwawu amakombu hela kukokola chaadi. Muchidi nimuchidi watujila wukweti nimuwahoshelaña, chumichi chakwashaña ayaadi kwiluka makombu amuchidi wawu.
Atujila avula kwimba kumalombi nihakuhuma kwetañwa, nawa kudi chuma chaleñelaña kwimba haniyi mpinji. Muloña hikwekalaña mpepela yeneni niipumba dinateli kukañesha kajila kwimbaku. Akwakusandujola awana nawu atujila embaña chiwahi nankashi kumalombi ninamelela mapampa 20 kubadika chitwembaña namwaana.
Hela chakwila amakombu diwu avula kwimba, atujila ejima ayaadi niamakombu atambikaña munjila yamboka-mboka, hela akweti mazu amehi, alumbulukila mwashiyashana. Chakutalilahu, atujila atenañawu nawu Chaffinch akweti nyichidi yitanu nayiwana yakuhoshelamu. Muchidi wumu wahoshañawu atujila wakusoñamisha hawubanji wudi mwiwulu, chidi neyi kakoji nakuhita mwiwulu nakukeña yakudya, ilaña ahoshaña cheñi muchidi wacheñi wakusoñamishilamu wubanji wudi hamaseki.
Chawaana Chasweja Kubadika
Maana ayinkawu atujila kudi Yehova akuhayamisha. Ilaña antu eluka chikupu mwakutiyañena kubadika atujila. Yoba 35:11 yahoshaña nawu Nzambi wayinkaña antu “maana akubadika awatujila twahaluzwizu.” Antu ambukaku chikupu muloña ahoshaña nyichidi nimazu akala nankashi kuhitila mwizu datiyakenaña hamudiwu hela kuhosha nayiidi yamujimba.
Kwambukaku nayileñaleña yikwawu, anyikeki avwalikaña nawuswa wakudiza nyichidi yakala. Mukanda wahaintaneti waAmerican Scientist wahosha nawu: “Anyana adizaña muchidi wabulañawu anvwali jawu kuyihoshesha; anyana anjika matu adizaña aweni muchidi wawu neyi kwosi wunakuyidizisha muchidi wawatumama hetala.”
Wuswa wutukweti wakuhosha nsañu nikumwekesha chitunakutiya kuhitila munhoshelu hela mukuzatisha yidi yamujimba, mwalala hichamukunkulu chakufuma kudi Nzambi. Ilaña, kuhosha naNzambi mukulomba dichamukunkulu chabadika chayinkawu antu. Nawa, Yehova Nzambi watutambikaña nindi tuhosheña nindi. Izu daNzambi, Bayibolu, dahoshaña nawu: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.”—Afwilipi 4:6.
Neyi hitukufuukula hayuma yakala, Yehova wakeñaña nindi tuzatisheña nsañu yayivulu yasonekawu muBayibolu. Watukwashañaku cheñi kwiluka chitwatela kuzatisha kufumba kutwawanaña muBayibolu. Nsoneki yaBayibolu Yakoba nindi: “Mwinenu nabuli maana, alombi kudi Nzambi, wahanaña kudi antu ejima makasa ayedi, hahosholañaku; akumwinkawu.”—Yakoba 1:5.
Indi Iyi Nsañu Yinayikwashi Ñahi?
Mwatiyaña ñahi neyi mutiya chembañawu atujila chiwahi hela neyi mwana hakutachika kuhosha? Komana mwamonaña maana aNzambi muyuma yaleñayi?
Chelili natoñojoki dehi hanochu chamuleñawu, Davidi ñimbi yamasamu wahosheli nindi: “Nakusakilili; chanantuñuwu chakala chakuhayama hohu; Nyidimu yeyi yakuhayama hohu; muchima wami wunachiluki nankashi.” (Masamu 139:14) Chimukuzañajalaña hakumona maana aNzambi amwekenaña muyileñaleña, mukusweja kumukuhwelela nenu wukweti wuswa wakuyilombola chiwahi.
[Mwevulu wudi hefu 5]
Wuswa wakuhosha hichawaana chakufuma kudi Nzambi
[Mazu aKusakilila eniMwevulu wudi hefu 4]
© Dayton Wild/Visuals Unlimited