Twalekenuhu ‘naKukeña Kwenu Kwatachi’
Twalekenuhu ‘naKukeña Kwenu Kwatachi’
“Kwataku chiwudi nachu mbe.”—CHIMWEKESHU 3:11.
1, 2. Mwatiyili ñahi chimwelukili nenu yuma yimwadizileña hadi Yehova yadiña yalala?
MUNAKWANUKA mpinji yatachi yimwadizili hakuchiñeja kwakuwahi kwenkayi Yehova antu ovwahila? Neyi mwadiña munsakililu yacheñi, mwatiyili ñahi chelili ayilumbulwili nkeñelu yaNzambi kuhitila mukuzatisha Bayibolu hela hantañishilu yimwabulileña kutiyishisha? Hadaha mwelukili nenu hiyayidizishili chalala hadi Nzambuku. Ilaña chayinu mpinji mudi amuzañalu muloña muneluki chalala! Neyi ayikulisha kudi anvwali akwaKristu, munakwanuka chimwatiyili hampinji yimwetejeli nenu yuma yimwadizileña hadi Yehova yadiña yalala nawa mwafukwiluhu kulondela yuma yimwadizileña?—Aroma 12:2.
2 Amana kwenu amavulu muchipompelu akuyileja nawu niwena atiyili kuwaha nankashi, akundamini kwakwihi naYehova nawa azañaleli hamuloña wakuyikoka kudi yena. (Yowanu 6:44) Muzañalu wayileñeleli kukalakala nyidimu yawakwaKristu. Azañaleli chikupu nawa akeñeleña kulumbulwila wudi wejima chiyatiyileña. Komana ninenu dichimwatiyili?
3. Kukalanyi kwadiña muchipompelu chamuEfwesesa hampinji yayitemesheleli Yesu mazu?
3 Hampinji yahosheleñayi kudi akwaKristu amunkulakaji yakusambila amuchipompelu chamuEfwesesa, Yesu wahosheli ‘hakukeña kwawu kwatachi.’ Aefwesesa adiña nayililu yayiwahi yayivulu, ilaña kukeña kuyamwekesheleñawu kudi Yehova kwakeheli. Dichi, Yesu wayilejeli nindi: “Neluki nyidimu yeyi, nichiwakabakanaña, nichiwatatakenaña, nichiwabulaña kusha antu atama kumuchima, nichiwesekeli antu aditenaña nawu tuyapostolu, komana hiyapostoluku, wunayishinshiki neyi hiyantwambi. Wunatatakeni, wunakooli ijina dami, hiwunazeyuku. Hela chochu, nakumoni namuloña, nami wunaleki kukeña kweyi kwatachi.”—Chimwekeshu 2:2-4.
4. Muloñadi mazu ahosheliyi Yesu kudi aEfwesesa chiyalemena makonu?
4 Kufumba kwaYesu kwafumbiliyi aEfwesesa niyipompelu yikwawu yashimunayi mumukanda waChimwekeshu, kwateleleli kwesekeja nayuma yamwekeneña hampinji yayilehi hakachi kwawakwaKristu awayishewa kufuma mu 1914 nakutwalekahu. (Chimwekeshu 1:10) Hela chochu, akwaKristu amakwawu makonu anateli kujimbesha ‘kukeña [kwawu] kwatachi’ kwamukeñeluwu Yehova nichalala chawakwaKristu. Chituneluki chumichi, tushinshikenu hachitwatela kutwalekahu kumwekesha, kusañumuna, kuswejesha kukeña nimuzañalu wumwatiyili hadi Nzambi nihachalala kuhitila mukwanuka nikutoñojoka chikupu chimwatiyili hampinji yimwadizili chalala.
Chumanyi Chayileñeleli Kwiluka Nenu Munadizi Chalala?
5, 6. (a) Indi mukwaKristu wudi wejima watela kwiluka chumanyi? (b) Chumanyi chayileñeleli kwiluka nenu aYinsahu jaYehova atañishaña chalala? (c) Chumanyi chinateli kumukwasha muntu kusañumuna kukeña kwindi kwatachi?
5 Muntu wejima wukudihana kudi Yehova watela kusambila ‘kushinshika mwaya muchima waNzambi, diwu wawuwahi, watiyishaña kuwaha, walala chikupu.’ (Aroma 12:1, 2) Chumichi chabombelamu kudiza chuma chatañishaña Bayibolu. Chuma chikuleñela muntu kwiluka nindi aYinsahu jaYehova atañishaña chalala chinateli kwambukaku nachikuleñela muntu mukwawu. Amakwawu ahoshaña nawu chuma chayiletesheli kuhimpa chafumini hakutaña ijina daNzambi muBayibolu hela chatiyishishiluwu mwekalilawu afu. (Masamu 83:18; Mukwakutañisha 9:5, 10) Amakwawu chafumini hakumona kukeña kwamwekeshañawu antu jaYehova. (Yowanu 13:34, 35) Amakwawu niwena chafumini hakwiluka chalumbuluka kubula kwikala wampata yamunu mwishina. Elukili nawu akwaKristu alala hiyatela kudiñija munsañu jamatuña nachiyulu hela munjita jamunza wudi wejimaku.—Isaya 2:4; Yowanu 6:15; 17:14-16.
6 Antu amavulu, hamuloña wakudiza hayuma yinashimunuwu hewulu nihayuma yikwawu yalala, diyayisañumwini kutachika kumukeña Nzambi. Wanenu mpinji yakwanuka chuma chayileñeleli kwiluka chalala. Muntu wejima wadiña nachihandilu chashiyashana niyililu, dichi chuma chayileñeleli kumukeña Yehova nikukuhwelela yikaninu yindi chinateli kwambuka nawantu amakwawu. Dichi, yuma yayileñeleli kudiza chalala yichidi yalema nimakonu neyi chochiyadiña hampinji yimwadizili chalala. Chalala hichinahimpuku. Dichi, kutoñojokaña hayuma yeniyi nichimwatiyili kunateli kusañumuna kukeña kwenu kwatachi kumwakeñeli chalala.—Tañenu Masamu 119:151, 152; 143:5.
Swejeshenu ‘Kukeña Kwenu Kwatachi’
7. Muloñadi wutwatela kuswejesha kukeña kwetu kwatachi kwachalala, nawa tunateli kwila ñahi mwenimu?
7 Hadaha kudi yuma yayivulu yinahimpiki muchihandilu chenu kufuma himwadihanini kudi Yehova. Kukeña kwenu kwatachi kumwakeñeli chalala kwadiña kwalema, ilaña mukuhita kwampinji, mwakeñekeleña kuswejesha kukeña kwenu kulonda kushinda yuma yinateli kweseka chikuhwelelu chenu. Hela chochu, Yehova wayikwashili. (1 Akorinda 10:13) Dichi, yuma yimunamoni hayaaka yinahituhu yalema chikupu. Yinayikwashi kuswejesha kukeña kwenu kwatachi, nawa yuma yimunahitumu hinjila yikwawu yinateli kuyileñela kushinshika mwaya muchima waNzambi, watiyishaña kuwaha.—Yoshuwa 23:14; Masamu 34:8.
8. Indi Yehova wadilumbulwili nindidi kudi Mosi, nawa aIsarela amwilukili ñahi Nzambi chikupu?
8 Chakutalilahu, shinshikenu hakukala kwadiña nawaIsarela hampinji yahosheliyi Yehova hankeñelu yindi yakuyipulwisha kufuma muwuduñu muEjipitu. Nzambi wadilumbulwili kudi Mosi nindi: “Ami yami mwomunekalila kwami.” (Kwidika 3:7, 8, 13, 14) Chumichi chadiña nakulumbulula nawu, Yehova wakekala mwomwakekalilayi kulonda kupulwisha antu jindi. Kufumahu kwesekeja nanshakaminu yawu, aIsarela amweni Yehova chamwekesheliyi yililu yindi yashiyashana, hamu neyi Mukwakubadika, Nsompeshi, Nlomboli, Mukwakupulwisha, Mukwanjita, nawa neyi Mukwakuloñesha.—Kwidika 12:12; 13:21; 14:24-31; 16:4; Nehemiya 9:9-15.
9, 10. Chumanyi chinateli kumuleñela muntu kumwiluka Nzambi, nawa muloñadi chichawahila kwanukaña yuma yimwamweni?
9 Nshakaminu yenu yinambukiku nayawaIsarela akushankulu. Hela chakwila yinambukiku, mwatela mwamonahu yuma yayileñeleli kwiluka nenu Nzambi wayakamenaña, yakolesheli chikuhwelelu chenu. Hadaha kudi chuma chakoñeliyi Yehova chamwekesheli nawu hiMukwakuloñesha, Mukwakukundeja, nawa Ntañishi. (Tañenu Isaya 30:20b, 21.) Hela kudi chuma chayileñeleli kwiluka nenu kulomba kwenu anakwakuli. Hadaha mwadiña nakukala kweneni, dichi mana kwetu mukwaKristu hela muhela wayikwashili. Indi kwiji hampinji yakudiza kwahalwenu mwawanini nsona yahosheleña hakukala kumwadiña naku.
10 Neyi chakwila mulejaku amakwawu yuma yimwamweni, hiyanateli kutiya kuwaha neyi chimwatiyaña enuku. Muloña, yuma yimwamweni hiyadiñi yachihayamishaku. Ilaña mwayimonaña nenu yalema. Mwalala, Yehova wadimwekesheli kwikala neyi chochakeñeleñayi kwikalayi kudenu. Toñojokenu hayaaka yimunashakami muchalala. Munateli kwanuka mpinji yimwatiyili nenu Yehova wayakameneni muchihandilu chenu? Neyi dimu, kwanuka mpinji yamuchidiwu nichimwatiyili chikusañumuna kukeña kwaYehova kumwatiyili hampinji yimwamweni nenu Yehova nayakameni. Dichi, mwatela kulemesha yuma yamuchidiwu yimwamweni. Mwatela kutoñojokañahu chikupu. Yamwekeshaña nawu Yehova wayakamenaña, nawa kwosi muntu wunateli kuyileñela mubuli kukuhwelela nawu wayakamenaña.
Dishinshikenu Enu Aweni
11, 12. Neyi kukeña kwamukwaKristu kutalisha hachalala kunafunti hanyima, chumanyi chinaleñeli, nawa kufumbanyi kwahaniniyi Yesu?
11 Neyi chayinu mpinji himwamukeña Nzambi nichalala neyi chimwachikeñeli hatachiku, hichinayi mukwila nawu Nzambi nabalumukiku. Yehova habalumukañaku. (Malaki 3:6; Yakoba 1:17) Yehova nakuyakamena neyi chochadiña nakuyakamenayi kunyima. Neyi wubwambu wenu naYehova wunahimpi, chumanyi chinaleñeli? Indi kwiji mudi nayuma yayivulu yakwila, nawa munakwakama hachihandilu chenu? Hadaha kumafuku akunyima mwalombeleña chikupu, nikudiza chikupu nawa mwavulileña kutoñojokahu chikupu. Komana mwakalakeleña chikupu mumudimu wakushimwina nikuwanika kukupompa mpinji yejima kubadika chayinu mpinji?—2 Akorinda 13:5.
12 Hanyima yakudishinshika himunateli kwiluka chaleñeleli kuhimpaku, ilaña neyi mwiluka, chumanyi chayileñeleli kuhimpa muniyi yuma? Komana yuma yidi neyi kwakamena chisaka chenu, kudakamena muyikatu, hela yuma yikwawu, yinayileñeli kubula kwikala nayitoñojoka yakunyakashana chineli ifuku daYehova dinakuswila kwakwihi? Yesu wayilejeli apostolu indi nindi: “Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu. Muloña dichi chidakashikena antu ejima ashakama heseki dejima. Tonenuña kwenu hayilaaka yejima nakulembelela, kulonda mwakemiki mushindu, mwakapuluki kuyuma yejimiyi.”—Luka 21:34-36.
13. Indi Yakoba wafwanishili Izu daNzambi kuchumanyi?
13 Yakoba nsoneki waBayibolu wonenenuwu walejeli akwawu akakwitiya kudishinshika aweni chikupu kuhitila mukuzatisha Izu daNzambi. Yakoba wasonekeli nindi: “Ikalenu akwakwila mwaya mazu, bayi akwakukumina dakutiya hohu nakudidimba enu awenuku. Muloña muntu wakuminaña dakutiya mazu, kwilamu nehi, wudi neyi muntu namoni mesu asemukayi nachu muchibanjilu; chadimonayi hakufumahu, navulameni dehi chekalayi. Ilaña muntu wukutala mulushimbi lwawaana walala chikupu hakukakelamu, hanekali mukwakutiya wavulamenañaku, neli mukwakwilamu, yenowu muntu wakakooleka mwakwililayi.”—Yakoba 1:22-25.
14, 15. (a) Indi Bayibolu yinateli kuyikwasha ñahi kuyilaku hambidi lwakuspiritu? (b) Malwihwinyi yitwatela kudihula?
14 Muntu nateli kuditala muchibanjilu kulonda yeluki nindi nakumwekana chiwahi. Chakutalilahu, neyi muntu namoni nindi ntaayi yindi yinaheñi, nateli kuyolola. Neyi mumbanda namoni nindi nsuki jindi jinakumwekana chiwahi wanyi, wukujisakula cheñi. Chochimu, Nsona yatukwashaña kwiluka chitwekala. Neyi twilaña kwesekeja nachahosha Bayibolu nawu twileña, dikwila nawu tunakuyizatisha neyi chibanjilu. Hanu dinu muloñadi wakutalila muchibanjilu neyi tukañanya kuwahisha hitunamoni netu hanatami? Chikuwaha neyi tukwilaña yuma yitwamonaña ‘mulushimbi lwalala chikupu’ lwaNzambi, nakwikala ‘akwakwilamu.’ Dichi ejima akwiluka nawu kukeña kwawu kwatachi kwamukeñeluwu Yehova kunafunti mwishina, atela kudihula awa malwihu: ‘Kukalanyi kwinakumona muchihandilu, nawa chumanyi chinakwilahu? Indi kunyima nelileña ñahi? Kudihu yuma yinahimpiki? Neyi hanyima yakudishinshika muniyi njila muwana kuzeya kumukweti, bayi mukwidiwulaku. Neyi kudi munakukeñeka kuhimpa chikupu, himpenu mukunyakashana.—Aheberu 12:12, 13.
15 Neyi mudihulaña malwihu amuchidiwu anateli kuyikwasha kwimika yikonkwanyi yayiwahi kulonda kuyilaku hambidi lwakuspiritu. Kapostolu Pawulu wahanini kufumba kwonenewa kudi Timotewu mukwawu yakalakeleña nindi kulonda kuyilaku hambidi mumudimu windi wakushimwina. Pawulu wamusoñamishili kansi weyala nindi: “Dikwatishi muyumiyi, wudinkumu chikupu, kulonda chiwukuyaña kumbidi chimwekanaña kudi antu ejima.” Ninetu twatela kudikwatisha kuhitila mukuzatisha Izu daNzambi kulonda tutweshi kuyilaku hambidi.—1 Timotewu 4:15.
16. Hampinji yimunakudishinshika kuhitila mukuzatisha Nsona chumanyi chimwatela kwiluka?
16 Neyi mudishinshika chikupu, munateli kwiluka mumwazeyazeyaña. Chumichi chinateli kuyileñela kutiya kutama, ilaña bayi mutiya kutamaku. Muloña munakudishinshika kulonda kwiluka yuma yimwatela kuzatilahu. Hela chochu, Satana wakeñaña mukwaKristu kudimona neyi wamukunkulwayi muloña wakubula kuwanina. Dichi, antu ahoshaña nawu Nzambi wadiwulaña nyidimu yejima yitwamukalakelaña. (Yoba 15:15, 16; 22:3) Yesu wakaanini kutwamba kwamuchidiwu; Nzambi wamonaña muntu wejima nindi walema. (Tañenu Matewu 10:29-31.) Kwiluka nenu himwawaninaku kwatela kuyileñela kufwila kuyilaku hambidi kuhitila muwukwashu waYehova. (2 Akorinda 12:7-10) Neyi yikatu hela wushinakaji diyi yuma yinakuyifuntisha hanyima, imikenu yikonkwanyi yayiwahi, nawa bayi muzeyaku hela kuleka kukeña kwenu kumanuku.
Yuma Yayivulu Yatuleñelaña Kuhameka
17, 18. Nkiswinyi yafumaña mukuswejesha kukeña kwenu kwatachi?
17 Munateli kuhetelamu chikupu neyi mutwalekahu kuswejesha kukeña kwenu kwatachi. Munateli kumwiluka chikupu Nzambi nikusweja kuhameka wunlomboli windi wawuwahi. (Tañenu Yishimu 2:1-9; 3:5, 6.) Ñimbi yamasamu wahosheli nindi: ‘Kuhemba [wuñaji waYehova] mwekala wuloku weneni.’ “Yuma yashimunañayi Yehova yakashinshi, yalejaña wakadi maana.” Kubombelahu, “anakooleki ashinshika munjila, endaña munshimbi jaYehova.”—Masamu 19:7, 11; 119:1.
18 Mukwiteja nenu mukweti yuma yayivulu yayiwahi yayileñelaña kuhameka. Muneluki chinakuleñela yuma yinakumwekana mukaayi makonu. Mwahetelañamu muyuma yejima yaloñeshelañayi Nzambi antu jindi makonu. Cheñi, chakubula nikujinooka mudi amuzañalu, muloña Yehova nayileti muchipompelu chindi chamukaayi kejima nawa nayinki kukooleka kwakwikala aYinsahu jindi. Mwatela kuhameka yuma yayiwahi yinayililuwu muchihandilu chenu! Neyi muyichinda, yayivulu chikupu. Chakadi nikujina neyi muchindaña yuma yinayililuwu muchihandilu chikuyikwasha kuzatisha iku kufumba kwakwila nawu: “Kwataku chiwudi nachu mbe.”—Chimwekeshu 3:11.
19. Kubombela hakutoñojoka chikupu hawubwambu wenu naNzambi, yumanyi yalema yinateli kuyikwasha kutwalekahu nawubwambu wawuwahi naNzambi?
19 Kutoñojokaña chikupu hanochu chikuhwelelu chenu chichinakoleluku hayaaka yinahituhu, hinjila yimu yinateli kuyikwasha kukwata chimudi nachu mbe. Ayinu magazini yinahoshi hayuma yikwawu yalema yinateli kutwikwasha kutwalekahu nawubwambu wawuwahi naNzambi. Hakachi kayuma yeniyi hadi, kulomba, kuwanika kukupompa kwawakwaKristu nikuhoshahu, nikukalakala chikupu mumudimu wakushimwina. Iyi yuma yikuyikwasha kutwalekahu, kusañumuna, nikuswejesha kukeña kwenu kwatachi.—Aefwesesa 5:10; 1 Petulu 3:15; Yuda 20, 21.
Mukwakula Ñenudi?
• Indi yuma yayileñeleli kumukeña Yehova yinateli kuyikolesha ñahi hayinu mpinji?
• Kutoñojoka hayuma yimunamoni hayaaka yinahituhu yikuyileñela kwiluka chumanyi?
• Muloñadi chimwatela kushinshika hakukeña kwenu kumwamukeña Nzambi?
[Malwihu aKuzatisha haKudiza]
[Mwevulu wudi hefu 29]
Chumanyi chayikokweli nikwiluka nenu munadizi chalala?
[Mwevulu wudi hefu 31]
Kudihu himunamoni himwatela kuwahisha?