Yililu Yitwatela Kukabila

“Kabilaku nikuloña, nikwakama Nzambi, nikukuhwelela, nikukeña nikutatakena, nikwovwaha.”—1 TIMOTEWU 6:11.

1. Lumbululenu mwaya izu dakwila nawu ‘kukabila.’

 NEYI mutiya izu dakwila nawu ‘kukabila’ chumanyi chimukutoñojoka? Hadaha mukwanuka hamafuku aMosi helili mashidika aweniEjipitu ‘ayihañi’ aIsarela, kutwala muna ajiyili Mukaluñalwiji Kachinana. (Kwidika 14:23) Hela munatweshi kwanuka kukala kwamweneñayi mbanji muIsarela wakunyima neyi chakwila yamona maposu. Wanyakeleña kutemukila kumusumba wumu wahakachi kanyisumba yitanu nawumu yakutemukilamu. Neyi nehi “mukwakutenda mashi wakenza kamuhaña mbanji hachidiyi neyena kumuchima, hakumukwata nanochu chiyinalehi njila, hakumutapa, hakufwa.”—Kuhituluka 19:6.

2. (a) Indi akwaKristu amakwawu ayileja kufwila wufwetwinyi kudi Nzambi? (b) Kuchiñejanyi Yehova kwahembelayi akwaKristu amavulu makonu?

² Kwambukaku nayakutalilahu yamuBayibolu yitunahanjekihu, shinshikenu yililu yayiwahi yadiña nakapostolu Pawulu nindi: “Nadikwatishaña nankashi, nakukabila nami nakashiki kumufunda, akansomoni kutambika kwaNzambi kwamudi Kristu Yesu kwamwiwulu.” (Afwilipi 3:14) Bayibolu yamwekeshaña nawu akwaKristu awahishewa akushika ku 144,000 kubombelahu niPawulu, atambwilaña wufwetu weniwu wawumi wakwiwulu. Akayula naYesu Kristu hadi Ikombakaji daYaaka hanu heseki. Awayishewa anayitambikili kukabila chikonkwanyi chachiwahi kudi  Nzambi! Hela chochu, akwaKristu alala amavulu makonu, akweti kuchiñeja hela chikonkwanyi chambukaku. Mukukeña Yehova wakayinka chuma chajimbesheliyi Adama naEvu, kuchiñeja kwawumi wahaya nyaka ninyijimba yaloña muparadisa hanu heseki.—Chimwekeshu 7:4, 9; 21:1-4.

3. Tunateli kuhameka ñahi luwi lwaNzambi lwasweja?

³ Muchidi wamuntu wabula kuwanina hiwunateli kutambula wumi wahaya nyaka muñovu jawu jabula kuwaninaku. (Isaya 64:6) Twatela kutambwila wumi wahaya nyaka kuhitila hohu mukukuhwelela kuloñesha kwakuwahi kwakupulwisha kwaNzambi kuhitila mudi Yesu Kristu. Chumanyi chitwatela kwila kulonda tuhameki ilu luwi lwaNzambi lwasweja? Twatela kwovwahila ilu lunshimbi lwakwila nawu: “Kabilaku nikuloña, nikwakama Nzambi, nikukuhwelela, nikukeña, nikutatakena, nikwovwaha.” (1 Timotewu 6:11) Kudiza haniyi yililu kukutukwasha wejima wetu kutwalekahu kuyikabila chikupu ‘nakuswejeshamu.’—1 Atesalonika 4:1.

‘Kabilenu Kuloña’

4. Tweluka ñahi netu kukabila ‘kuloña’ kwekala kwalema, nawa chumanyi chatela kwilayi muntu hakwila nawu yakwikabili?

⁴ Munyikanda yindi yejima yiyedi yamusonekeleliyi Timotewu, kapostolu Pawulu wateneni yililu yatela kukabilayi, nawa mpinji yejima wasambilileña kutena ‘kuloña.’ (1 Timotewu 6:11; 2 Timotewu 2:22) Cheñi munsona jikwawu, Bayibolu yatukoleshaña kukabila kuloña. (Yishimu 15:9; 21:21; Isaya 51:1) Njila yakutachikilamu kwila mwenimu yidi ‘yakwiluka . . . Nzambi walala wumu hohu, niYesu Kristu watemesheli.’ (Yowanu 17:3) Kukabila kuloña kwaleñelaña muntu kubalumuka mumuchima kunshidi yakoñeleñayi kunyima ‘nikufunta’ kulonda kwila nkeñelu yaNzambi.—Yililu 3:19.

5. Chumanyi chitwatela kwila kulonda kwikala nikutwalekahu aloña kudi Nzambi?

⁵ Yihita yawantu ashinshika anakukabila kuloña anadihani kudi Yehova nawa anakwimwekeshi kuhitila muchipapatishu chamumenji. Neyi mudi mukwaKristu wapapatishewa, mwatoñojokahu dehi nenu chihandilu chenu chatela hela chamwekeshaña nawu munakutwalekahu kukabila kuloña? Njila yimu yimwatela kwila mwenimu hikwiluka chahosha Bayibolu hayuma “yayiwahi nayatama” neyi himukufuukulahu hachihandilu chenu. (Tañenu Aheberu 5:14.) Chakutalilahu, neyi wudi muhela hela mana kwetu washikilamu dehi kusumbula hela kusumbuka, komana mwafwilaña kutondolwela kumwekesha kukeña kudi muntu wuchidi kanda yekala mukwaKristu wapapatishewa? Eña, munakufwila kutondolwela kumwekesha kukeña kwamuchidiwu neyi chakwila munakukabila kuloña.—1 Akorinda 7:39.

6. Indi kukabila kuloña kwabombelamu yumanyi?

⁶ Kwikala waloña kunambuki nakudimona neyi waloña hela ‘kuswejesha nankashi kuloña.’ (Mukwakutaŋisha 7:16) Yesu wasoñamishili hakudimwekesha kuloña kwamuchidiwu kwakumwekana neyi wabadika akwenu. (Matewu 6:1) Mwalala kukabila kuloña kwabombelamu muchima, kutondolwela yitoñojoka yatama, yililu, nikufwila yuma yatama. Neyi tutwalekahu kwila mwenimu, hitunateli kwila nshidi yenenuku.  (Tañenu Yishimu 4:23, esekejenuku Yakoba 1:14, 15.) Kubombelahu, Yehova wakatukiswila nawa wakatukwasha kukabila yililu yikwawu yalema yawakwaKristu.

‘Kabilenu . . . Kwakama Nzambi’

7. Indi ‘kumwakama Nzambi’ hichumanyi?

⁷ Kwakama Nzambi kwabombelamu kudihana nikwikala washinshika chikupu. Dikishonari yimu yahosha hajaBayibolu yashimuna nawu izu dachiGreek dabalumunawu nawu ‘kwakama Nzambi’ dalumbulula “kubula kwiteja chuma chidi chejima kutwileñela kuleka kumutiya Nzambi woma.” A Isarela akañenyi kumwakama Nzambi mapampa kakavulu, neyi chamwekesheli yililu yawu yakudikaña nihanyima yakwila Nzambi nayilubuli dehi muEjipitu.

8. (a) Nshidi yaAdama yaletesheli lwihwinyi? (b) Indi ñakwilu ‘kunsañu yajindawu’ ayihanini ñahi?

⁸ Munahiti makombakaji ayaaka kufuma havulumwiniyi muntu waloña Adama, ilaña ilu lwihu kanda alwakuli lwakwila nawu, “Komana muntu nateli kumwakama Nzambi mukuloña?” Hayaaka yejima yinahituhu, kwosi muntu wabula kuwanina watwesheli kumwakama Nzambi mukuloña. Ilaña hampinji yindi yatelela, Yehova wahanini ñakwilu kutalisha ‘kunsañu yajindiluwu.’ Watuntulwili wumi waMwanindi wumu hohu wamwiwulu mwivumu daMariya kulonda kuvwalika hamu neyi muntu waloña. Muchihandilu chindi chejima chaheseki kubombelahu nikufwa kwindi kwansonyi, Yesu wamwekesheli chalumbuluka kudihana chikupu nichakwikala washinshika kudi Nzambi walala. Kulomba kwindi kwamwekesheli yililu yindi yakudifukula kudi Tata yindi wamwiwulu wakukeña. (Matewu 11:25; Yowanu 12:27, 28) Dichi, Yehova wamoneneni Pawulu kulonda kushimuna “nsañu yakwakama Nzambi” hakulumbulula chakutalilahu chachiwahi hachihandilu chaYesu.—Tañenu 1 Timotewu 3:16.

9. Tunateli kukabila ñahi kumwakama Nzambi?

⁹ Hamuloña wakubula kuwanina hitunateli kumwakama Nzambi mukuloñaku. Ilaña tunateli kukwikabila. Hakwila mwenimu chakeñekaña kwimbujola chikupu chakutalilahu chaKristu. (1 Petulu 2:21) Neyi twila mwenimu, hitunateli kwikala neyi anfukeji “afwana neyi aakama Nzambi, hakwinza kwiteja ñovu yachu kwonti kwawu.” (2 Timotewu 3:5) Ichi hichinayi mukwila nawu kumwakama Nzambi chikupu hikwabombelamu mmwekenu yetuku. Ilaña kwabombelamu mmwekenu yetu. Chakutalilahu, hela tunakusakula nkanji yakuvwala hachawija hela yuma yitwavwalaña hakuya nakulanda yuma, mmwekenu yetu mpinji yejima yatela kwesekana nanhoshelu yetu yakwila nawu “twaakamaña Nzambi.” (1 Timotewu 2:9, 10) Eñañi, kukabila kumwakama Nzambi kwakeñekaña kulondela nshimbi yaNzambi yaloña nikuyizatisha mukuhanda kwetu kwejima.

‘Kabilenu . . . Kukuhwelela’

10. Hakwila nawu twikali nachikuhwelelu chakola chumanyi chitwatela kwila?

¹⁰ Tañenu Aroma 10:17. Hakwila nawu mukwaKristu yekali nawa yatwalekuhu kwikala nachikuhwelelu chakola, chiña yatoñojokaña chikupu hachalala chachiwahi chekala Mwizu daNzambi. ‘Nduñu wamaana nikashinshi’ waloñesha nyikanda yayiwahi yayivulu. Nyikanda yisatu yayiwahi chikupu hinyikanda yaThe Greatest Man Who Ever Lived, Learn From the Great Teacher ni “Come Be My Follower,” hinyikanda yaloñeshawu kulonda kutukwasha kumwilukisha Kristu nikumwimbujola. (Matewu 24:45-47) Cheñi izaza danduñu daloñeshaña kupompa, kupompa kwanyanya, nikupompa kwamaneni,  kupompa kweniku kwakuvulu kwakonkomwenaña ‘hamazu aKristu.’ Hampinji ‘yitunakusweja kusha muchima’ kuyuma yaloñeshañayi Nzambi, kudihu jinjila jimunateli kuhetelamu chikupu muniku kupompa?—Aheberu 2:1.

11. Kulomba nikwovwahila kwatukwashaña ñahi kukabila chikuhwelelu?

¹¹ Kulomba hinjila yikwawu yatukwashaña kwikala nachikuhwelelu chakola. Hampinji yimu atumbanji twaYesu amulembeleleli nawu: “Tuvulishili kukuhwelela kwetu.” Ninetu twatela kumulembelela Nzambi munjila yakudizoza kulonda yatuvulishili chikuhwelelu. (Luka 17:5) Hakwila nawu twikali nachikuhwelelu chakola, twatela kulomba wukwashu waspiritu yajila yaNzambi; chikuhwelelu hichililu ‘chanyikabu yaspiritu.’ (Aŋalija 5:22) Cheñi, kwovwahila nshimbi yaNzambi kwakoleshaña chikuhwelelu chetu. Chakutalilahu, twatela kuzata nañovu mumudimu wakushimwina. Neyi twila mwenimu tunateli kwikala amuzañalu chikupu. Nawa chitukutoñojokaña hankisu jafumaña ‘mukusambila kukeña wanta [waNzambi] nikuloña kwindi,’ chikuhwelelu chetu chikukolelaku.—Matewu 6:33.

‘Kabilenu . . . Kukeña’

12, 13. (a) Indi lushimbi lwaYesu lwaluha lwahosha nawudi? (b) Njilanyi jalema mutwatela kukabila kukeña neyi cheliliyi Kristu?

¹² Tañenu 1 Timotewu 5:1, 2. Pawulu waheni kufumba kwakuwahi hanochu akwaKristu chiyatela kukeñañanawu. Kumwakama Nzambi kwabombelamu kwovwahila lushimbi lwaYesu lwaluha lwakwila nawu, “Mukeñañani” neyi chochatukeñeliyi. (Yowanu 13:34) Kapostolu Yowanu wahosheli nindi: “Muntu wukweti yuma yampata yamunu mwishina, wukumona mana kwindi nayibuli, hakumuumina muchima windi mwivumu, kukeña kwaNzambi kukutwesha kushakama mudi yena ñahi?” (1 Yowanu 3:17) Munateli kutoñojokahu mpinji yimu yimwamwekesheli kukeña kuhitila mukwila chuma chachiwahi?

¹³ Njila yikwawu mutwakabilaña kukeña yidi yakuhitila mukwanakena, bayi kuhembela amana kwetu nkunyiku. (Tañenu 1 Yowanu 4:20.) Ilaña, tunakufwila kulondela iku kufumba kwonenewa kwakwila nawu: “[Twalekenuhu] nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Mwanta, ninenu nawa ilenu chochimu.” (Akolose 3:13) Komana mwadivulumunahu namana kwetu hela muhela muchipompelu yimunateli kuzatisha iku kufumba? Mukumwanakena?

‘Kabilenu . . . Kutatakena’

14. Chumanyi chitwatela kudizila kuchipompelu chakuFwiladelifwiya?

¹⁴ Tunateli kuzata nañovu kulonda kutwesha chikonkwanyi chakapinji kanti ilaña chakalaña kutwalekahu neyi chikokwanyi chikala kuchishikija hela hitunateli kuchitwesha kwesekeja nachitwatoñojokiluku. Mwalala, kufwila chikonkwanyi chawumi wahaya nyaka chakeñekaña kutatakena. Mwanta Yesu walejeli chipompelu chakuFwiladelifwiya nindi: “Chiwunahembi mazu akutatakena kwami, ami nawa nakakuhemba wakabuli kumona mpinji [yakweseka.]” (Chimwekeshu 3:10) Eñañi, Yesu wahosheli nindi kutatakena kunakukeñeka, chililu chatukwashaña kubula kuzeya neyi tumoni kukala hela kweseka. Amana kwetu amuchipompelu chakuFwiladelifwiya chamunkulakaji yakusambila atela amwekesheli chakutalilahu chachiwahi chakutatakena kweseka kwakuvulu kutalisha hachikuhwelelu chawu. Dichi, Yesu wayikanini kuyikwasha chikupu mukweseka kweneni kwadiñi kumbidi.—Luka 16:10.

15. Indi Yesu watañishili nidindi kutalisha hakutatakena?

¹⁵ Yesu welukili nindi atumbanji twindi akayihela kudi antaña jawu abula kwitiya nikudi kaayi kejima, dichi kapampa kayedi wayikolesheli muniyi njila: “Muntu wakakakela nikunsa diyi wakahanda.” (Matewu 10:22; 24:13) Yesu cheñi  wayikwashili atumbanji twindi chakwikala nañovu yakeñekeleña hakumika. Muchishimu chimu, Yesu wesekejeli iseki damalola kudi antu ‘atambulaña mazu [aNzambi] namuzañalu’ ilaña neyi chikuhwelelu chawu acheseka asenukañamu. Hela chochu, wafwanishili atumbanji twindi ashinshika neseki dadiwahi muloña ‘akwataña nañovu’ mazu aNzambi ‘nakusoña [nyikambu] nikutatakenamu chikupu.’—Luka 8:13, 15.

16. Mukandanyi wawuwahi watuloñeshelawu wunakwashi yihita yawantu kutatakena?

¹⁶ Komana muneluki kajindilu kaleñelaña kutatakena? Twatela ‘kukwata nañovu’ mazu aNzambi, nikuyihemba munyichima yetu nimuyitoñojoka. Hakwikala naBayibolu mumadimi amavulu chinapeleshuku kwila mwenimu. Neyi tutoñojokaña chikupu hayuma yitunakutaña Mwizu daNzambi hefuku hefuku chikutukwashaku kwikala nañovu jakutwalekahu kusoña nyikambu “nikutatakenamu chikupu.”—Masamu 1:1, 2.

‘Kabilenu . . . Kwovwaha’ niKuwunda

17. (a) Muloñadi ‘kwovwaha’ chikwekalila kwalema chikupu? (b) Indi Yesu wamwekesheli ñahi nindi wadiñi wamwovu?

¹⁷ Kwosi muntu watiyaña kuwaha kumutwambila hayuma yinabuli kuhoshayi hela kukoña. Kakavulu antu akanaña nyiloña kuhitila mukuzuwa. Chachiwahi kumwekesha ‘kwovwaha.’ (Tañenu Yishimu 15:1.) Chakeñekaña kwikala wakola hakwila nawu wikala wamwovu neyi akutwambila. Yesu Kristu wahanini chakutalilahu chachiwahi haniyi nsañu. “Yena chamutukiluwu, hafuntishili cheñi matukaku; chamweniyi yihuñu hazuwiluku, ilaña wadikunjikili kudi yena wasompeshaña chaloña.” (1 Petulu 2:23) Hitunateli kwila chikupu neyi cheliliyi Yesuku, ilaña tunateli kuzatila hakumwekesha kwovwaha chikupu.

18. (a) Indi kwovwaha kwatuleñelaña kutondolwela yumanyi? (b) Chililwinyi chikwawu chinatukonkomweniwu kukabila?

¹⁸ Kufwana Yesu, ‘tudiloñesheña mafuku ejima kwakula’ antu akutwihula hakwitiya kwetu, “nakudizoza nawoma.” (1 Petulu 3:15) Dichi kwikala ovwaha kwatwileñelaña kutondolwela kuhila swayi, kuditadikishaña nawantu yitwawanaña mumudimu wakushimwina niakwetu akakwitiya. (2 Timotewu 2:24, 25) Kwovwaha kwatwileñelaña kushakama nawantu mukuwunda. Hamwaha dimuloña wasonekeleliyi Pawulu mumukanda windi wamuchiyedi kudi Timotewu, nindi ‘kuwunda’ hichililu chekala hakachi kayililu yitwatela kukabila. (2 Timotewu 2:22; esekejenuku 1 Timotewu 6:11.) Mwalala, ‘kuwunda’ hichililu chikwawu chatukonkomwenaña Nsona kukabila.—Masamu 34:14; Aheberu 12:14.

19. Hanyima yakudiza hayililu yawakwaKristu yitanu nayiyedi, chumanyi chimunakukabila kwila, nawa muloñadi?

¹⁹ Tunadizi hayililu yawakwaKristu yitanu nayiyedi yinatukonkomwenuwu kukabila, kuloña, kwakama Nzambi, kukuhwelela, kukeña, kutatakena, kwovwaha, nikuwunda. Owu muzañalu wekalaña muyipompelu neyi amana kwetu niahela azata nañovu kulonda kumwekesha chikupu iyi yililu yayiwahi! Neyi twila mwenimu chaletaña kalemesha kudi Yehova nawa wukutolola kulonda kumuhameka?

Yikuma Yakutoñojokahu

• Indi kukabila kuloña nikwakama Nzambi kwabombelamu yumanyi?

• Chumanyi chikutukwasha kukabila kukuhwelela nikutatakena?

• Indi kukeña kunateli kutukwasha ñahi kuzata nawantu?

• Muloñadi wutwatelela kukabila kwovwaha nikuwunda?

[Malwihu aKuzatisha haKudiza]

[Mwevulu wudi hefu 20]

Yesu wasoñamishili hakudimwekesha nawu twaloña kulonda kuzañalesha antu

[Mwevulu wudi hefu 21]

Twatela kukabila kukuhwelela kuhitila mukutoñojokaña chikupu hachalala Chezu daNzambi

[Mwevulu wudi hefu 23]

Twatela kukabila kukeña nikwovwaha