Himuneluki jaKalumbulukaku!

“Habudidi tumbaña mbutu jeyi, nihamelela bayi wulekesha chikasa cheyuku, muloña hiwuneluki jakalumbulukaku.”—MUKWAKUTAÑISHA 11:6.

1. Muloñadi chitunateli kuhayama nikudizoza hakumona mbutu chiyinakukula?

 NDIMI watela kudiwunjika. (Yakoba 5:7) Chakuwayi mbutu, watela kuhembelela hakwila yibaluki nikukula. Mukuhita kwamafuku, neyi kutuuta, nyiseli yatachikaña kumwekana, nakututuka. Dichi yakulaña nakusakumwina. Nkumininaku, ndimi wekalaña namudimu wakwañula mbutu. Ndimi wahayamaña chikupu hakumona chakulaña mbutu. Cheñi neyi twiluka Muntu wakulishaña iyi mbutu, chikutwileñelaña kudizoza. Nawa twatela kuyakamena mbutu. Tunateli kuyitukumwina. Ilaña Nzambi diyi wayikulishaña hohu.—Esekejenu 1 Akorinda 3:6.

2. Yumanyi yatañishiliyi Yesu kutalisha hakukula kwakuspiritu muyishimu yitwadizili muchibaba chinafumihu?

² Neyi chiyashimunawu muchibaba chinafumuhu, Yesu wesekejeli mudimu wetu wakushimwina Wanta nandimi wunakukuwa mbutu. Muchishimu chamaseki ashiyashana, Yesu wakonkomweneni nindi hela chakwila ndimi wukukuwa mbutu yayiwahi, muchima wamuntu diwamwekeshaña neyi mbutu yikakula chiwahi hela nehi. (Maku 4:3-9) Muchishimu chamukwakukuwa wakamini tulu, Yesu washimwini nindi ndimi helukaña chakulaña mbutuku. Muloña Nzambi diyi wukweti ñovu yakukulisha mbutu, bayi muntuku. (Maku 4:26-29) Ichi dinu tushinshikenu hayishimu yikwawu yisatu yatiliyi Yesu, chishimu chakalubutu kamostadi, cheluñi, nichawanda. *

Chishimu chaKalubutu kaMostadi

3, 4. Indi chishimu chakalubutu kamostadi chamwekeshañadi kutalisha hansañu yaWanta?

³ Chishimu chakalubutu kamostadi, chasonekawu cheñi muMaku kapetulu 4, chahoshaña hayuma yiyedi: chatachi, antu amavulu anakutiyilila kunsañu yaWanta; chamuchiyedi, chiyakiñewaña antu atambwilaña nsañu yaWanta. Yesu wahosheli nindi: “Wanta waNzambi tukuwufwikija neyi chumanyi? Indi tukuwushimuna nachishimwinyi? Wudi neyi kalubutu kamostadi, kelaña chakukitumbawu heseki, hela kabadika kukeha hambutu jamunu mwishina jejima, chakukitumbawu, hikakukula, hikakutoha chakubadika yisakola yejima, hikakwila ninyitayi yamaneni yakwila atujila ahaluzwizu hiyakushakama muwulelu wayu.”—Maku 4:30-32.

⁴ Munichi chishimu tunamoni kukula kwachifwikija ‘kwawanta waNzambi’ neyi chitunamoni nsañu yaWanta chiyinatandi nikukula kwachipompelu chawakwaKristu kutachika haPentekosta 33 C.E. nakutwalekahu. Kalubutu kamostadi hikalubutu kanyanya  kanakwimenaku kachuma kanyanya chikupu. (Esekejenuku Luka 17:6.) Mukuhita kwamafuku, mutondu wakamostadi walehaña jimita 3 nakushika ku 5 nawa wekala nanyitayi yakola, dichi anateli kuwimona neyi himutondu chikupu.—Matewu 13:31, 32.

5. Indi antu avulili ñahi muchipompelu chawakwaKristu amuyaaka nkulakaji yakusambila?

⁵ Kutoha kwachipompelu chawakwaKristu kwatachikili munjila yanyanya mu 33 C.E. hampinji yelili atumbanji 120 ayiwayishi naspiritu yajila. Ilaña, chimwahitili mafuku antesha, ichi chipompelu chanyanya chawatumbanji chekalili namakombakaji awakwakwitiya. (Tañenu Yililu 2:41; 4:4; 5:28; 6:7; 12:24; 19:20.) Chimwahitili yaaka makumi asatu, akwakwañula avulili nankashi chakwila kapostolu Pawulu wahosheli hadi chipompelu chamuKolose nindi nsañu yayiwahi ‘ayishimuna dehi mwahita kuleña kwejima kwekala mwishina dewulu.’ (Akolose 1:23) Mwalala, antu adiñi nakututika chikupu.

6, 7. (a) Kuvula kwamuchidinyi kunamwekani kufuma mu 1914? (b) Kuvulanyi kukwawu kukamwekana kumbidi?

⁶ Kufuma tuhu hiyemikili Wanta waNzambi mwiwulu mu 1914, nyitayi ‘yakamutondu’ kamostadi yinakuli chikupu. Antu jaNzambi anamoni kushikijewa kwawuprofwetu wasonekeluwu kudi Isaya wakwila nawu: “Kakehelamu kakabalumuka ikombakaji, wadiñi wanyanya wakekala muza wañovu.” (Isaya 60:22) Kamukanka kanyanya kwawakwaKristu awayishewa adiña nakuzata mudimu wakushimwina kunyima muyaaka nkulakaji yamu 20 hiyelukili nawu muchaaka cha 2008, aYinsahu akushika kukamwihi nayihita yitanu nayiyedi mumatuña akubadika ha 230 akazataña muniwu mudimuku. Kwesekeja nakukula kwakalubutu kamostadi kamuchishimu chaYesu, mwalala iku kuvula kwakuhayamisha chikupu!

⁷ Hanu dinu iku kuvula kwakuminaña hohenaha? Inehi. Kumbidi muntu wejima hamaseki wakekala muchiyulu chaWanta waNzambi. Akwakudikaña ejima akekala ayifumishahu dehi. Chumichi hichakazatika nañovu jawantuku ilaña muloña wakwila Mwanta Wakuleña kwejima Yehova wakadiñija munsañu jahamaseki. (Tañenu Danyeli 2:34, 35.) Dihu twakamona kushikijewa kwawuprofwetu wukwawu wakukumishaku wasonekeli Isaya nindi: “Iseki dejima dakawanina kumwiluka Yehova, neyi chabutaña meji hakaluñalwiji.”—Isaya 11:9.

8. (a) Indi atujila amuchishimu chaYesu anakwimenaku anyi? (b) Twakiñewaña kuyumanyi makonu?

⁸ Yesu wahosheli nindi atujila amwiwulu awanaña hakukama muwulelu waniwu Wanta. Awa atujila hiyemenañaku ayilumbu jaWanta afwilaña kudya mbutu yayiwahiku, neyi chadyiluwu mbutu atujila amuchishimu chamuntu wakuwili mbutu hamaseki ashiyashana. (Maku 4:4) Ilaña, munichi chishimu atujila anakwimenaku antu akweti nyichima yayiwahi anakukeña kukiñewa muchipompelu chawakwaKristu. Nikulelu, awa antu anakukiñewa kuyililu yatela kuluwañesha  wubwambu wawu wawuwahi naNzambi nikuyaaku yatama yamukanu kaayi katama. (Esekejenuku Isaya 32:1, 2.) Munjila yoyimu Yehova wafwanishili Wanta wawuMesiya namutondu nawa wahosheli muwuprofwetu nindi: “Nakakatumba hampidi yamuIsarela yanyuña. Wakasema nyitayi, wakasoña nyikabu, wakekala musida wawuwahi. Mwishina dawu mwakashakama atujila ejima anyitundu yejima. Akashakama muwulelu wanyitayi yawu.”—Ezekeli 17:23.

Chishimu Cheluñi

9, 10. (a) Chikumanyi chakonkomweneniyi Yesu muchishimu cheluñi? (b) MuBayibolu, kakavulu iluñi demenañaku chumanyi, nawa lwihwinyi lutukuhanjekahu kutalisha hakuhosha kwaYesu kwakutena iluñi?

⁹ Antu hiyamonaña chavulañawu antu mpinji yejimaku. Muchishimu chidi chikwawu, Yesu wakonkomweneni hanichi chikuma. Wahosheli nindi: “Wanta wamwiwulu wudi neyi iluñi danoneni mumbanda, hakusha mumabañu awuña asatu, wuña wejima wiñila niiluñi.” (Matewu 13:33) Indi iluñi dinakwimenaku chumanyi, nawa dinakundami ñahi kukutoha kwaWanta?

¹⁰ MuBayibolu, iluñi kakavulu demenañaku nshidi. Kapostolu Pawulu wahosheli heluñi muniyi njila hampinji yahosheleñayi hayililu yatama yamukwanshidi wadiña muchipompelu chamuKorinda wakushankulu. (1 Korinda 5:6-8) Komana Yesu wateneni iluñi kulonda kwimenaku kuvula kwayuma yatama?

11. Indi iluñi adizatishelaña ñahi muIsarela wakushankulu?

¹¹ Henohu kanda twakuli ilu lwihu, twatela twiluki yuma yisatu yalema. Chatachi, hela chakwila Yehova hetejeli iluñi hampinji yachawija chaPasekaku, mpinji jikwawu wetejeleña nyilambu mwadiñi iluñi. Iluñi adizatisheleña hakuhana mulambu wakuwunda wakusakilila, mukwakuhana wahanineña mulambu windi mukudikeñela kulonda yamwekeshi kusakilila hakumukiswila kudi Yehova chikupu. Ichi chawija chazañalesheleña antu awanikileñaku.—Alevi 7:11-15.

12. Chumanyi chitukudizilaku kutalisha hayinjikijilu yazatishawu muBayibolu?

¹² Chamuchiyedi, hela chakwila chinjikijilu chochimu mpinji yikwawu muNsona chemenañaku chuma chatama, chinjikijilu chochimu cheñi anateli kuchizatisha kulonda kwimenaku chuma chachiwahi. Chakutalilahu, ha 1 Petulu 5:8, Satana anamufwanishi kumutupa, hakumwekesha nawu wafwaana, nawa wazuwa. Ilaña haChimwekeshu 5:5, Yesu niyena anamufwanishi kumutupa, “Mutupa wakumuchidi waYuda.” Muchinjikijilu chakukumishaku, mutupa anamufwanishi neyi chinjikijilu chawuñaji wakadi woma.

13. Indi chishimu chaYesu cheluñi chamwekeshaña ñahi muntu chakulañayi lwakuspiritu?

¹³ Chamuchisatu, muchishimu chindi, Yesu hahosheli nindi iluñi deñilili muwuña wejima, nakuwitamishaku. Wahosheli hohu hanjila yazatishañawu dikalu hakutuña dinkendi. Mumushikila mumbanda washiluku iluñi, nawa mwafumini yuma yayiwahi. Nawa iluñi deñilili muwuña wawuvulu. Dichi, mumbanda hatwesheli kumona kututumuka kweluñuku. Chumichi chinatwanukishi muntu wakuwili mbutu nawa wakamini nawufuku. Yesu wahosheli nindi “mbutu hijikubaluka, hijikukula, yena [iyala] kwiluka mujinakulili nehi.”  (Maku 4:27) Iyi njila okupela yakulumbulwilamu chakulañayi muntu lwakuspiritu chakadi kumona! Hakutachika hitukutwesha kumona chinakukulayiku, ilaña mukuhita kwampinji twakwimonaña.

14. Mbadinyi yamudimu wakushimwina yamwekeshaña nawu iluñi datutumunaña wuña wejima?

¹⁴ Iku kukula hiyakwimonaña namesu awuntu hohuku ilaña kunakumwekana mukaayi kejima. Ichi dichuma chikwawu chinakonkomwenuwu muchishimu cheluñi. Iluñi datutumunaña wuña wejima, “mabañu awuña asatu,” ejima. (Luka 13:21) Kufwana iluñi, mudimu wakushimwina Wanta wunakuleñela atumbanji kuvulilaku chakwila Wanta makonu anakuwishimwañena “nikwakumina maseki.” (Yililu 1:8; Matewu 24:14) Oku kukooleka kutukweti kwakuzataku iwu mudimu waWanta wunakutohelaku chikupu!

Wanda

15, 16. (a) Mukwihihisha shimunenu chishimu chawanda. (b) Indi wanda wemenañaku chumanyi, nawa kutoha kwamuchidinyi kwaWanta kunahoshiwu munichi chishimu?

¹⁵ Chuma chalema chinabadiki hakuvula kwawantu aditenaña nawu hiyatumbanji twaYesu Kristu hiyililu yekalaña nanawa atumbanji. Yesu wahosheli haniku kutoha kwaWanta hampinji yatiliyi chishimu chikwawu, chahoshaña hawanda. Wahosheli nindi: “Cheñi nawa, wanta wamwiwulu wudi neyi wanda walalumwinuwu mukaluñalwiji, hiyakupompeshelamu [inshi] yanyichidi yejima.”—Matewu 13:47.

¹⁶ Wanda, wemenañaku mudimu wakushimwina Wanta, mwafwaña inshi yanyichidi yejima. Yesu watwalekeluhu nindi: “Chiwunenzali [wanda] mbe, hiyakuwukokela kuchikumu; hiyakushakama, hiyakupompeshela yayiwahi mumabañu, yatama hiyakuyinata. Dichi chichakela nihamba kakuma nyaka yinu; añelu amba kenza nakwambula atama kudi aloña. Amba kayinatila muluteñi lwakesi, mwamba kekala kudila nakudisumona kumaji.”—Matewu 13:48-50.

17. Indi kwambula kwatenawu muchishimu chawanda kunatalishi kumpinji yimu yidihi?

¹⁷ Komana iku kwambula kunakushimuna wunsompeshi wakukumishaku wakusompesha anyikoku nawampembi wateneniyi Yesu nindi wukamwekana hakenzayi mukulema kwindi? (Matewu 25:31-33) Inehi. Wunsompeshi wakukumishaku wakekalaku hakenzayi Yesu hampinji yalukadi lwasweja. Kwambukaku, kwambula kwatenawu muchishimu chawanda kunakumwekana mpinji ‘yakukuma kwanyaka yinu.’ * Diyi mpinji yitudimu, mafuku akashika nikulukadi lwasweja. Hanu dinu mudimu wakwambula anakuwuzata ñahi makonu?

18, 19. (a) Indi mudimu wakwambula wunakuzatika ñahi makonu? (b) Chumanyi chatela kwilawu antu akweti nyichima yayiwahi? (Talenu tumazu twaheshina hefu 21.)

¹⁸ Mwalala yihita yanshi yachifwikija kufuma mukaluñalwiji kawantu anayikokeli muchipompelu chaYehova chamunanu mafuku.  Amakwawu enzaña kuChanukishu, amakwawu enzaña kukupompa kwetu, amakwawu niwena anakudiza Bayibolu. Komana awa antu ejima adimwekeshaña kwikala akwaKristu alala? Anateli ‘kuyikokela kuchikumu,’ ilaña Yesu natuleji nindi antu ‘amawahi’ hohu diwu apompeshelañawu mumabañu, anakwimenaku chipompelu chawakwaKristu. Hakwila inshi yachifwikija yatama ayinataña, nkumininaku akayinatila muluteñi lwakesi kachifwikija, chinakwimenaku kujilumuka kwakumbidi.

¹⁹ Ilaña inshi yatama, antu amavulu adizileña Bayibolu nawantu jaYehova aleka dehi kudiza. Amakwawu akweti anvwali jawu akwaKristu hiyakeñaña kwikala atumbanji alondelaña mumahanji aYesuku. Hiyakeñaña kufuukulahu kumukalakela Yehovaku hela akumukalakela hohu hakampinji kantesha adishakamina kwawu. * (Ezekeli 33:32, 33) Hela chochu, chikuwaha neyi antu ejima akweti nyichima yayiwahi akwiteja kuyipompeshela muyipompelu yidi neyi mabañu henohu ifuku dakukumishaku dakusompesha kanda dishiki nakwikala muchiswamu.

20, 21. (a) Yumanyi yitunadizi hakuhituluka muyishimu yaYesu yahosha hakuvula? (b) Chumanyi chimunakufwila kwila?

²⁰ Hanu dinu, yumanyi yitunadizi muyishimu yaYesu yahosha hakuvula yitunahanjekuhu mukwihihisha? Chatachi, neyi chakulaña kalubutu kamostadi, antu anakutiyilila nsañu yaWanta hanu hamaseki anakuvulilaku chikupu. Nawa kwosi chuma chinateli kukañesha kutandisha mudimu waYehova! (Isaya 54:17) Kubombelahu, antu anakukeña “kushakama muwulelu [wamutondu]” anakuyikiña kudi Satana niituña dindi datama. Chamuchiyedi, Nzambi diyi wayikulishaña. Kufwana iluñi deñilaña muwuña wejima, iku kuvulilaku hitwakwilukaña hela kukwimona mpinji yejimaku, ilaña kunakuzatika! Chamuchisatu, bayi neyi antu ejima etiya anadimwekeshi kwikala antu amawahiku. Amakwawu adi neyi inshi yatama yamuchishimu chaYesu.

²¹ Hela chochu, tunakuzañalala hakumona antu amavulu amawahi anakuyikwoka kudi Yehova! (Yowanu 6:44) Chumichi chinaleñeli antu kuvulilaku mwituña niituña. Hamuloña waniku kuvulilaku, Yehova Nzambi diyi watela kutambwila mpuhu yejima. Chineli tunakumona antu chinakuvulawu, wejima wetu twatela kwovwahila iku kufumba kwasonekeleluwu nkulakaji yanyaka yinahituhu nawu: “Habudidi tumbaña mbutu jeyi, . . . , muloña hiwuneluki jakalumbulukaku, hela iji, hela iji, indi kwiji jejima jakawahila hamu.”—Mukwakutañisha 11:6.

[Tumazu twaheshina]

Mukwakula Nenudi?

• Indi chishimu chaYesu chakalubutu kamostadi chatwidizishañadi kutalisha hakutoha kwaWanta nihakukiñewa kwakuspiritu?

• Indi iluñi damuchishimu chaYesu demenañaku chumanyi, nawa wunsahwinyi walala washimwiniyi Yesu kutalisha hakutoha kwaWanta?

• Mbadinyi yakutoha kwaWanta yashimunawu muchishimu chawanda?

• Tunateli kwila ñahi kulonda tutwalekuhu kwikala hamu nawantu ‘anakuñwiluwu mumabañu’?

[Malwihu aKuzatisha haKudiza]

[Nyevulu yidi hefu 26]

Chumanyi chitwadizilaña kuchishimu chakalubutu kamostadi chahosha hakutoha kwaWanta?

[Mwevulu wudi hefu 27]

Chumanyi chitwadizilaña kuchishimu cheluñi?

[Mwevulu wudi hefu 29]

Indi kwambula kwanshi yayiwahi nayatama kwemenañaku kwodi?