Muloñadi Mudimu waKushimwina Kwitala niKwitala Chiwalemena Makonu?

“Hiyalekeli kuleja antu hefuku hefuku, nimutembeli, nikumatalawuku, nakushimuna [nsañu yayiwahi hadi] Yesu nawu diyi Kristu.”—YILILU 5:42.

1, 2. (a) Njilanyi yakushimwina yayilukilawu aYinsahu jaYehova? (b) Yumanyi yitukuhanjekahu muchinu chibaba?

 ICHI hichuma chamwekana munyuza yayivulu hamaseki. Wukumona antu ayedi anavwali chiwahi anakuya hetala nawa anakukeña kuhosha namwiniitala mukwihihisha hansañu yamuBayibolu kutalisha haWanta waNzambi. Neyi muntu yamwekesha mpwila kunsañu yinakushimwinawu, akwakushimwina anateli kumwinka mukanda washindamena haBayibolu nakutachika kudiza nindi Bayibolu hetala chakadi kumufwetesha. Kufumahu akuya kwitala dikwawu. Neyi mwakalakalaña muniwu mudimu, chakadi nikujina mukumona nenu antu ayilukaña nawu mudi aYinsahu jaYehova henohu kanda mutachiki nikuhosha nawu. Eñañi, aYinsahu jaYehova ayilukilaña kukushimwina kwitala nikwitala.

² Twazatishaña njila jamboka-mboka hakukalakala mudimu waheniyi Yesu wakushimwina nikwilisha atumbanji. (Matewu 28:19, 20) Twashimwinaña hayisankanu, munyikwakwa nimumaluña amakwawu mwekala antu amavulu. (Yililu 17:17) Twahanjekaña nawantu amavulu hanshiña nimunyikanda. Twashimwinaña chalala chamuBayibolu kudi antu yitwabulakanaña munyidimu yitwakoñaña mpinji yejima. Twekala nakeyala yahaIntaneti, yatukwashañaku kuwana nsañu yashindamena haBayibolu mumadimi akubadika ha 300. * Iji njila jejima jasoñaña yuma yayiwahi. Ilaña mumaluña amavulu, njila yalema yakutiyakeshelamu nsañu yayiwahi yidi yakushimwina kwitala nikwitala. Indi njila yakushimwina kwitala nikwitala yashindamena hankahi? Indi antu jaNzambi amunanu mafuku atachikili ñahi kuyizatisha chikupu? Nawa muloñadi chiyalemena makonu?

Njila Yazatishileñawu Apostolu

3. Nshimbinyi yayinkeliyi Yesu apostolu indi kutalisha hakushimwina, nawa chumichi chinakumwekesha nawu ateleleli kushimwina ñahi?

³ Njila yakushimwina kwitala nikwitala yashindamena haNsona. Hampinji yayitemesheliyi Yesu apostolu indi kuya nakushimwina, wayilejeli nindi: “Nimunyikala yejima yimwakeñila, hela yeneni, hela yanyanya, mwakakeñakeñamu yowu wudumu watela.” Indi antu atela adi kuyikeñakeña ñahi? Yesu wayilejeli kuya kumatala awantu, wahosheli nindi: ‘Chimwakeñila mwitala mwakemusha akwetalodu. Neyi akwetalodu atela, kuwunda kwenu kwakekalumu.’ Komana ateleleli kuhembelela sampu antu ayitambika kuya kumatalawu? Talenu mazu amakwawu ahosheliyi Yesu: “Yowu wakabula kuyitambula hela kutiyilila mazu enu, chimwakafuma mwitalodu, hela mumukalowu, mwakadikumuna lunkuñu ludi kunyendu yenu.” (Matewu 10:11-14) Iyi nshimbi yamwekeshaña chikupu nawu apostolu ‘hakuya nakushimwina nsañu yayiwahi mwahita nyikala yejima,’ ateleleli kutachika kuhempula antu hanyikala yawu.—Luka 9:6.

4. Indi mudimu wakushimwina kwitala nikwitala awitena hamukandanyi muBayibolu?

⁴ Bayibolu yashimuna jiika nawu apostolu adiña nakushimwina kwitala nikwitala. Chakutalilahu,  Yililu 5:42 hahosha hadi apostolu nawu: “Hiyalekeli kuleja antu hefuku hefuku, nimutembeli, nikumatalawuku, nakushimuna [nsañu yayiwahi hadi] Yesu nawu diyi Kristu.” Chimwahitili yaaka kwakwihi na 20, kapostolu Pawulu wayanukishili akulumpi amuchipompelu chamuEfwesesa nindi: “Chinabulili kuheñuka nakuleka kushimuna yuma yakuyikwasha nachu yejima; nayilejeli hatooka nikwitala nikwitala.” Komana Pawulu wayihempwili awa aeluda henohu kanda ekali akwakwitiya? Eña wayihempwili, muloña wayilejeli yuma yikwawu kutalisha “[ha]kubalumuka munyichima nakutala kudi Nzambi, nikumukuhwelela Mwanta Yesu Kristu.” (Yililu 20:20, 21) Kuhosha haYililu 20:20 mukanda waRobertson’s Word Pictures Muchitiyañenu Chachiha wahosha nawu: “Chidi chalema kwiluka nawu awa akwakushimwina abadika, ashimwinineña kwitala nikwitala.”

Mukanka wawaTubola Amunanu Mafuku

5. Indi mudimu wakushimwina awulumbulula ñahi muwuprofwetu waYoweli?

⁵ Mudimu wakushimwina wakoñeleñawu muyaaka nkulakaji yakusambila wamwekesheleña mudimu weneni wunakukalakalawu munanu mafuku. Kaprofwetu Yoweli wesekejeli mudimu wawakwaKristu awayishewa wakushimwina nachipupu chatububu twajilumunaña, kubombelahu nitubola. (Yoweli 1:4) Chineli atubola endaña neyi akwanjita, ashindaña kukala, eñilaña mumatala, nawa adyaña yuma yejima yidi munjila yinakuhitawu. (Tañenu Yoweli 2:2, 7-9.) Iku kulumbulula kunakumwekesha kutatakena nikukalakala chikupu kwawantu jaNzambi hampinji yinakuzatawu mudimu wakushimwina makonu! Kushimwina kwitala nikwitala diyi njila yasweja kulema yazatishañawu akwaKristu awayishewa nialunda nawu “anyikoku acheñi” hakukalakala iwu mudimu washimwiniwu muwuprofwetu. (Yowanu 10:16) Indi etu aYinsahu jaYehova twatachikili ñahi kuzatisha iyi njila yazatishileña apostolu yakushimwina kwitala nikwitala?

6. Kukonkomwenanyi kwahenuwu mu 1922, kutalisha hamudimu wakushimwina kwitala nikwitala, nawa amakwawu elili ñahi?

⁶ Kufuma tuhu mu 1919 nakutwalekahu, akwaKristu ejima ayikonkomwena chikupu kukalakala mumudimu wakushimwina. Chakutalilahu, chibaba chidi namutu wunakuhosha nawu, “Mudimu Walema” muKaposhi Kakutalila kawundeli kaAugust 15, 1922, chayanukishili akwaKristu awayishewa hakulema “kwakushimwina antu nsañu yasonekawu nikuhosha nawu hamatalawu, nikuyileja nawu wanta wamwiwulu wudi mukamwihi.”  Njila jakuzatisha hakushimwina ajishileña muBulletin (chayinu mpinji diwu Mudimu Wetu waWanta). Hela chochu, antu adiñi nakushimwina kwitala nikwitala hatachi adiña antesha. Amakwawu alekeli kushimwina. Atachikili kudikaña munjila jashiyashana, ilaña kukala kweneni kwadiña kwakwila nawu adimweneña neyi alema chikupu nawa hiyateleli kushimwina kwitala nikwitalaku. Chiyaswejeli kukonkomwenawu hamudimu wakushimwina, antu amavulu amuchidiwu atachikili kuleka chovu-chovu kudikunda nakuloñesha kwaYehova.

7. Wukwashinyi wakeñekeleña wamwekeni hatooka muyaaka yamu 1950?

⁷ Muyaaka yalondeleluhu, antu amavulu atachikili mudimu wakushimwina. Hela chochu, chamwekeni hatooka nawu antu akeñekeleña kuyidizisha mumudimu wakushimwina kwitala nikwitala. Chakutalilahu, toñojokenu hachuma chamwekeni muUnited States. Kukutachika kwayaaka yamu 1950, mapesenti 28 awaYinsahu munidi ituña afuntili mwishina mumudimu wawu wakushimwina wakuhana mahandibilu hela kwimana hanyikwakwa nakuhana magazini. Mapesenti akubadika ha 40 adiña nakushimpokela mumudimu wakushimwina, mwahitileña tukweji twatuvulu chakadi kushimwina. Chumanyi chateleluwu kukoña hakwila nawu akwashi akwaKristu ejima adihana kushimwina kwitala nikwitala?

8, 9. Progiramwinyi yatachikiluwu mu 1953, nawa chumanyi chafuminimu?

⁸ Hakupompa kwanyuza kwadiña muMusumba waNew York mu 1953, akonkomweneni nankashi hamudimu wakushimwina kwitala nikwitala. Mana kwetu Nathan H. Knorr wadiña nakulombola mudimu wakushimwina mukaayi kejima wahosheli nindi, mudimu walema wawankoñi akwaKristu ejima, wakukwasha aYinsahu ejima kukalakalaña mumudimu wakushimwina kwitala nikwitala mpinji yejima. Wahosheli nindi, “Muntu wejima watela kushimwinaña nsañu yayiwahi kwitala nikwitala.” Atachikili progiramu yakudizisha antu mukaayi kejima kulonda kushikija ichi chikonkwanyi. Ejima adiña kanda atachiki kushimwina kwitala nikwitala, ayidizishili chakuhosha nawantu hamatalawu, kuhanjeka nawu kuhitila mukuzatisha Bayibolu, nichakwakula malwihu ehulañawu.

⁹ Muniyi progiramu yakudizisha mwafumini yuma yayiwahi nankashi. Muyaaka ikumi, naambala yawakwakushimwina mukaayi kejima yavulililuku namapesenti 100, kufuntilaku kwavulililuku namapasenti 126, nawa naambala yawatudizi aBayibolu namapesenti 150. Makonu, akwakushimwina aWanta kwakwihi namamiliyoni atanu nayedi anakushimwina nsañu yayiwahi mukaayi kejima. Iku kuvulilaku kwakuhayamisha kunakumwekesha nawu Yehova nakwashi antu jindi mumudimu wakushimwina kwitala nikwitala.—Isaya 60:22.

Kufunda Antu Mufunda Wakupuluka

10, 11. (a) Hichimwenwinyi chamulejeliwu Ezekeli, neyi chasonekawu haEzekeli kapetulu 9? (b) Indi ichi chimwenu chinakushikijewa ñahi makonu?

¹⁰ Kulema kwamudimu wakushimwina kwitala nikwitala tunateli kukwimwena muchimwenu chamulejeluwu kaprofwetu Ezekeli. Munichi chimwenu, Ezekeli wamweni amayala atanu nawumu anakwati yitwa mumakasawu nawa iyala wamuchitanu nachiyedi navwali mahina amawahi iku namanyiki luseñu lwawulombu lwamukwakusoneka. Iyala wamuchitanu nachiyedi amulejeli ‘kuhita mukachi kamukala’ kulonda ‘kufunda mufunda hamahama awantu ejima adi nakushikoka nakudila nayishimashima yejima yadiña nakukoñakoñawu mukachi kawu.’ Chuma chalondeleli hawuna mudimu wakufunda, amayala atanu nawumu adiña nayitwa yakujilumuna nachu, ayilejeli kujaha ejima abulili mufunda.—Tañenu Ezekeli 9:1-6.

¹¹ Kwesekeja nakushikijewa kwaniwu wuprofwetu tuneluki netu, iyala “wavweli mahina amawahi” nakwimenaku izaza dawakwaKristu awayishewa naspiritu. Kuhitila mumudimu wakushimwina nikwilisha atumbanji, izaza dawayishewa afundaña mufunda wachifwikija hadi antu anakudibombela kudi “anyikoku acheñi” aKristu. (Yowanu 10:16) Indi iwu mufunda hichumanyi? Hiwunsahu, wudi neyi wakufunda  hamahamawu akadi kusweka, wunakumwekesha nawu awa nyikoku adihana, hiyatumbanji aYesu Kristu apapatishewa nawa anavwali wuntu wawuha wudi neyi waKristu. (Aefwesesa 4:20-24) Awa antu adi neyi anyikoku ekalaña iyinda dimu nawakwaKristu awayishewa nawa ayikwashañaku mumudimu walema wakufunda atumbanji amakwawu.—Chimwekeshu 22:17.

12. Indi chimwenu chaEzekeli chakufunda hamahama chinamwekeshi ñahi kulema kwakutwalekahu kukeña antu afwana anyikoku?

¹² Chimwenu chaEzekeli chamwekeshaña chuma chinakuleñela mudimu wetu wakukeña antu “adi nakushikoka nakudila” chiwunekalili wakunyakashana. Muloña mawumi awantu adi muwubanji. Katataka mashidika aYehova amwiwulu akwakujilumuna, anakwimenaku amayala atanu nawumu adi nayitwa, ajilumuni antu anabuli mufunda wachifwikija. Kutalisha hakusompesha kunakwinza, kapostolu Pawulu wasonekeli nindi Mwanta Yesu, hamu “nawañelu jañovu jindi,” akaleta ‘kutenda hadi antu abula kwiluka Nzambi, nihadi antu abula kwovwahila nsañu yaMwanta wetu Yesu yayiwahi.’ (2 Atesalonika 1:7, 8) Ilukenu nenu antu akayisompesha kwesekeja nachatambwilañawu nsañu yayiwahi. Dichi kutiyakesha nsañu yaNzambi kwatela kutwalekahu chakadi kuleka kushika nikunsa. (Chimwekeshu 14:6, 7) Chumichi chinaleñeli ambuña aYehova adihana kwikala namudimu weneni chikupu.—Tañenu Ezekeli 3:17-19.

13. (a) Indi kapostolu Pawulu welukili nindi wadiña namudimwinyi, nawa muloñadi? (b) Mudimwinyi wumukweti kudi antu amwiluña denu dakushimwina?

¹³ Kapostolu Pawulu welukili nindi wadiña namudimu wakushimwina nsañu yayiwahi kudi antu amakwawu. Wasonekeli nindi: “Ami nidi namukudi wakushimwina aHeleni, niantu ampata jacheñi, niakwamaana, niabula maana. Dichi ami nakeñi nankashi, mwashikila ñovu jami jejima, kushimwinenu mwashakama muRoma nsañu yayiwahi nawa.” (Aroma 1:14, 15) Hamuloña wakuhameka hawushona wamumwekesheleluwu, Pawulu wakeñeleña chikupu kukwasha antu amakwawu kulonda aheteli muluwi lwaNzambi lwabadika neyi chahetelelumu yena. (1 Timotewu 1:12-16) Wadiña nakutiya neyi wukweti mukudi namuntu wejima wabulakeneñayi, mukudi wakufweta hohu kuhitila mukushimwina nsañu yayiwahi kudi muntu yeniwu. Komana ninenu mwatiyaña neyi mukweti mukudi kudi antu amwiluña denu dakushimwina?—Tañenu Yililu 20:26, 27.

14. Muloñanyi wasweja kulema watuleñelaña kushimwina hatooka kwitala nikwitala?

¹⁴ Hela chakwila kupulwisha mawumi awantu kwekala kwalema, ilaña kudi muloña wabadika kulema watuleñelaña kushimwina kwitala nikwitala. Muwuprofwetu wasonekawu haMalaki 1:11, Yehova wahosheli nindi: “Kufumisha kwatuntukilaña itañwa nakushikija kudahuminaña, ijina dami datoha hohu mukachi kawaJentili, . . . adilambulaña nimulambu wutooka, muloña ijina dami datoha mukachi kawaJentili.” Hakushikija iwu wuprofwetu, ambuña aYehova adihana anakuhameka ijina daYehova hatooka mwahita iseki dejima hampinji yinakukalakalawu chachiwahi mudimu wawu wakushimwina. (Masamu 109:30; Matewu 24:14) Kulambula “mulambu wakumuhameka” Yehova dimuloña wasweja kulema watuleñelaña kushimwina hatooka kwitala nikwitala.—Aheberu 13:15.

Yuma Yalema Chikupu Yikamwekana Kumbidi

15. (a) Indi mudimu wawaIsarela wayililuku ñahi hambidi hampinji yanyeñumukileñawu Yeriku hefuku damuchitanu nachiyedi? (b) Indi chumichi chinakumwekeshadi kutalisha hamudimu wakushimwina?

¹⁵ Yumanyi yakamwekana kumbidi kutalisha hamudimu wakushimwina? Kukuchika kwaYeriku, neyi chasonekawu mumukanda waYoshuwa, kwamwekeshaña chuma chamwekeni. Anukenu nenu henohu Nzambi kanda yajilumuni Yeriku, aIsarela ayilejeli kunyeñumukaña musumba kamu hefuku hadi mafuku atanu nadimu. Ilaña, mwifuku damuchitanu  nachiyedi, mudimu wawu wayililuku hambidi chikupu. Yehova walejeli Yoshuwa nindi: “Mwakanyeñumuka mukala katanu nakayedi, niatupristu akemba mpuña. Chakembawu nseñu yachizamba chamukoku, . . . antu ejima akabidika kabobobu kakeni. Mpwembu yamukala yakakunduka kwala-a.” (Yoshuwa 6:2-5) Munjila yoyimu mudimu wetu wakushimwina niwena watela wukayilaku hambidi. Chakadi nikujina, hampinji yakajilumunañawu kanu kaayi, ijina daNzambi niWanta windi wakekala anawishimwini dehi chikupu mukanu kaayi.

16, 17. (a) Chumanyi chikashikijewa henohu ‘yihuñu yeneni’ kanda yimani? (b) Yumanyi yitwakahanjekahu muchibaba chinalondeluhu?

¹⁶ Mpinji yatela yakashika hakela nsañu yitunakushimwina yakekala neyi ‘kubidika kabobobu kakeni.’ Mumukanda waChimwekeshu, nsañu yakusompesha kwabadika ayimwekesha neyi ‘nvula yamalola amaneni, ilola dimu desekana nantalenta yimu.’ * Nawa Chimwekeshu 16:21 hahosha nawu: “Chipupu ochu chabadika nankashi kutoha.” Hituneluki chuma chikakoña mudimu wakushimwina kwitala nikwitala hakushimuna wunsompeshi wabadikaku. Ilaña tunateli kwiluka netu henohu ‘yihuñu yeneni’ kanda yimani, ijina daYehova akaditiyakesha chikupu kubadika kunyuma.—Chimwekeshu 7:14; Ezekeli 38:23.

¹⁷ Hampinji yitunakutalila yuma yalema yikamwekana kumbidi, tutwalekenuhu chikupu nakushimwina nsañu yayiwahi yaWanta. Hampinji yitwakalakalaña iwu mudimu, kukalanyi kutwamonaña mumudimu wakushimwina kwitala nikwitala, nawa tunateli kushinda ñahi iku kukala? Tukahanjeka hanawa malwihu muchibaba chinalondeluhu.

[Tumazu twaheshina]

Mukwakula Nenudi?

• Indi mudimu wakushimwina kwitala nikwitala washindamena haNsonanyi?

• Indi mudimu wakushimwina kwitala nikwitala awikonkomwena ñahi makonu?

• Muloñadi ambuña aYehova adihana chiyakwetuwu mudimu wakushimwina?

• Yumanyi yalema yikamwekana kumbidi?

[Malwihu aKuzatisha haKudiza]

[Nyevulu yidi hefu 12]

Kufwana kapostolu Pawulu, komana mwatiyaña nenu mukweti mudimu wakushimwina amakwawu?

[Mwevulu wudi hefu 13]

Mana kwetu Knorr, mu 1953