Nsañu yaNowa niDibaji Yalala, Bayi Neyi hiKaanuku

KOMANA mwakeñaña kushakama mwituña dadiwahi, mwakwila antu ashakama mukuwunda wumu namukwawu? mwituña mwakadi njita, wubanji, nimakabi? Neyi mwakeñaña, nsañu yakunyaka yimweluka chachiwahi yinateli kuyikolesha. Iyi hinsañu yaNowa, muntu wamuwahi watuñili watu mwapulukililiyi hamu nichisaka chindi hadibaji damukaayi kejima dajilumwini antu atama.

Nsañu yantesha hohu diyi yelukewa chikupu mukaayi kejima. Nsañu yahosha hayuma yamumwekeneni Nowa yawanikaña mumukanda wamuBayibolu waKutachika, kapetulu 6 nakushika kukapetulu 9, nawa ayishimuna cheñi mumukanda waKoran nimutwanu twawantu amavulu mwahita iseki dejima. Komana mwalala Dibaji dadiñakoku, tahindi hikaanu kakulumbisha hohu kaanañawu kulonda kukolesha antu kukoña yuma yayiwahi? Akwakusandujola hadi Nzambi niasayatinsiti ahanjekahu hanilu lwihu hadi yaaka yayivulu. Ilaña, Bayibolu, Izu daNzambi dalumbulula chikupu nawu iyi nsañu yalala, bayi neyi hikaanuku. Shinshikenu haniyi nsañu:

Nsañu yamumukanda waKutachika yatulejaña chaaka, kakweji, niifuku datachikili Dibaji, mpinji niluña kwashikeneni watu, nimpinji yomini menji hamaseki. Nsañu yahosha hawatu, hachikuku, jikotwelu, niyuma yazatishiluwu hakuwituña niyena yalala chikupu. Kwambukaku natwaanu, kakavulu hakutwilumbulula twekalaña twakutwamba.

Nsañu yamuBayibolu yiyedi yahoshaña hayikota yayisaka yamwekeshaña nawu Nowa wadiña kwoku. (1 Kushindulula 1:4; Luka 3:36) Ezera niLuka asonekeli haniyi yikota, adiña akwakusandujola ashinshika. Luka walumbulwili chikota chaYesu Kristu kushika nikudi Nowa.

Kaprofwetu Isaya niEzekeli asonekeli hansañu yaNowa hela haDibaji, nawa apostolu akwaKristu aPawulu niPetulu niwena asonekeli haDibaji.—Isaya 54:9; Ezekeli 14:14, 20; Aheberu 11:7; 1 Petulu 3:19, 20; 2 Petulu 2:5.

Yesu Kristu wateneneña haDibaji, hampinji yahosheliyi nindi: “Cheliluwu hamafuku aNowa, dichi chakelawu nihamafuku aMwana kamuntu. Adiilaña, anwinaña, asumbwilaña, asumbwishilaña, ndo nikwifuku deñililiyi Nowa muwatu; dibaji dinza nikwinza, diyijilumuna niwejima wawu.” (Luka 17:26, 27) Neyi hikwadiña Dibajiku, mutenowu mazu ahosheliyi Yesu akwila nawu “nihamafuku aMwana kamuntu” hiyadi kulumbulukaku.

Kapostolu Petulu washimwineñahu dehi nindi kwakenza “akwakuseha” akadiwula mwahosha Bayibolu. Petulu wasonekeli nindi, “kwonti kwawu kwanuka nawu . . . mpata yamunu mwishina yadiñuku [mumafuku aNowa] yajiminini mumenji.” Komana ninetu kwonti kwetu kwanuka ‘iwu wunsahu’? Chinjila! Petulu watwalekeluhu nindi: “Mawulu niiseki aduku katataka, anayiswekeli kesi nezu dodimu, anayiswekeli ifuku dakusompesha nikujilumuka kwawantu asekeshaña Nzambi.”—2 Petulu 3:3-7.

Cheñi nawa, Nzambi wakajilumuna antu atama, nawa kwakekala akapuluka. Kuhitila mukwimbujola chakutalilahu chaNowa, tunateli kwikala hadi akwakuloña akapulwishawu nakwiñila mwituña dadiwahi.