‘Nzambi Diyi Wakulishaña’!
‘Nzambi Diyi Wakulishaña’!
“Watumbaña hela watukumwinaña hiyalemaku; walema diyi Nzambi wakulishaña.”—1 AKORINDA 3:7.
1. Mudimwinyi wutwekala ‘akwakukalakala ambala aNzambi’?
“TUYAKWAKUKALAKALA ambala aNzambi.” Ichi dichalumbulwiliyi kapostolu Pawulu mudimu wadimena wutwatela kukalakala wejima wetu. (Tañenu 1 Akorinda 3:5-9.) Mudimu wateneneñayi Pawulu himudimu wakwilisha atumbanji. Wawesekejeli nakukuwa mbutu nikuyitukumwina. Hakwila nawu tutweshi iwu mudimu walema, twatela kulomba wukwashu waYehova. Pawulu watwanukishaña nindi “Nzambi [diyi] wakulishaña.”
2. Muloñadi kwiluka netu ‘Nzambi diyi wakulishaña’ chikwatukwashaña kwikala nammwenu yayiwahi hamudimu wetu wakushimwina?
2 Iwu wunsahu walala watuleñelaña kwikala nammwenu yayiwahi hamudimu wetu wakushimwina. Tunateli kuzata nañovu mumudimu wetu wakushimwina nikudizisha, ilaña Yehova diyi watela kuhamekewa neyi chakwila muntu yekala kambanji wamuha. Muloñadi? Muloña hela chakwila tuzata nañovu chikupu, hitunateli kwiluka muntu chekalañayi kambanjiku, nawa hitukweti ñovu yakwilukaku. Mwanta Solomoni wahosheli chachiwahi hasonekeliyi nindi: “Hiweluka nimudimu waNzambi welaña yuma yejimaku.”—Mukwakutaŋisha 11:5.
3. Kudifwananyi kwekala hamudimu wakukuwa mbutu, nikwilisha atumbanji?
3 Komana kubula kwiluka muntu chekalañayi kambanji kunateli kutwileñela kutiya kutama namudimu wetu? Inehi. Ilaña, kwatwileñelaña kwikala amuzañalu. Mwanta Solomoni wahosheli nindi: “Habudidi tumbaña mbutu jeyi, nihamelela bayi wulekesha chikasa cheyuku, muloña hiwuneluki jakalumbulukaku, hela iji, hela iji, indi kwiji jejima jakawahila hamu.” (Mukwakutaŋisha 11:6) Mwalala, kutalisha kukutumba mbutu, hitwelukaña jakabalukaku. Kudi yuma yayivulu yitwabulaña kwiluka. Hohamu nimudimu wetu wakwilisha atumbanji. Yesu walumbulwili ichi chikuma muyishimu yiyedi yatwisonekeleluwu mukapetulu kamuchiwana kaNsañu Yayiwahi yaMaku. Tushinshikenu hayuma yitwatela kudizila kuniyi yishimu yiyedi.
Maseki Ashiyashana
4, 5. Mukwihihisha, lumbululenu chishimu chaYesu chamukwakukuwa wakuwaña mbutu.
4 Neyi chasonekawu haMaku 4:1-9, Yesu walumbulwili hadi mukwakukuwa mbutu wakuwili mbutu, jaholokeleli hamaseki ashiyashana: “Tiyililenu. Talenu, mukwakuwa wayili nakukuwa. Chakuwiliyi, jikwawu jaholokeleli kunsa yanjila, atujila hiyakwinza nakujidya. Jikwawu jaholokeleli hamalola habulili maseki amavulu, jibaluka nihohenohu, muloña habulili maseki amavulu kwishina; itañwa chidinashiki mwiwulu hijikubabika, hijikuuma, muloña jabulili nyiji. Jikwawu jaholokeleli mukachi kanyiña, oyu nyiña hiyikukula, hiyikujika mbutu, hijasoñeluku. Jikwawu jaholokeleli hamaseki amawahi, hijikusoña nakukula nakusemunwina; jasoñeli jikwawu makumi asatu, jikwawu makumi atanu nadimu, jikwawu nkulakaji.”
5 Mumaluña amakwawu kakavulu mbutu akuwaña jakukuwa. Mukwakukuwa mbutu wavuñilaña mbutu jindi hehina hela mukadibañu nakujikuwa chovu-chovu. Dichi munichi chishimu, mukwakukuwa mbutu hajikuwaña mumushikila hamaseki ashiyashanaku. Ilaña, mbutu jakuwañayi jashikenaña hamaluña ashiyashana.
6. Indi Yesu walumbulwili ñahi chishimu chamukwakukuwa?
6 Hitwatela kuboka mwatalisha ichi chishimuku. Yesu walumbulwili, neyi chasonekawu haMaku 4:14-20 nawu: “Mukwakukuwa wakuwaña mazu. Awa adi kunsa yanjila kwanakuwuwu mazu, wowu akwila chanatiyuwu, hohenohu Satana hakwinza nakufumisha mazu anakuwuwu mudi wena. Chochimu ninawa anakuwuwu hadi malola, wowu akwila chanatiyuwu mazu, hiyakuyitambula namuzañalu hohenohu. Mudi aweni muji mwosi, ilaña akukakelamu chantesha; nkumininaku chikukwinza yihuñu, hela kuyikabishila nsañu yamazu, hiyakudimbuka hohenohu. Amakwawu anakuwuwu munyiña, wowu akutiya mazu; kwakama kwamakonu, nikudimbana kwamaheta, nikufwila yuma yikwawu, hikukwiñilamu, hikukuvumbisha mazu, hiyakubula kusoña. Awa akuwiluwu hamaseki amawahi, wowu akutiya mazu, hiyakuyitambula, hiyakusoña awa makumi asatu, awa makumi atanu nadimu, awa nkulakaji.”
7. Indi mbutu nimaseki ashiyashana emenañaku chumanyi?
7 Ilukenu nenu Yesu hahosheli nindi akuwileña mbutu jashiyashanaku. Ilaña, wahosheli hamuchidi wumu wambutu waholokeleli hamaseki ashiyashana, nawa mbutu yakulili mujila yashiyashana. Muchidi watachi wamaseki akola, hela ominina; amuchiyedi hadi malola; amuchisatu hadi nyiña; nawa amuchiwana amawahi, asoñaña chachiwahi. (Luka 8:8) Indi mbutu hichumanyi? Hinsañu yaWanta yekala Mwizu daNzambi. (Matewu 13:19) Indi maseki ashiyashana emenañaku chumanyi? Emenañaku antu akweti nyichima yashiyashana.—Tañenu Luka 8:12, 15.
8. (a) Indi mukwakukuwa mbutu nakwimenakwinyi? (b) Muloñadi antu chatiyililañawu kumudimu wakushimwina Wanta munjila yashiyashana?
8 Indi mukwakukuwa mbutu nakwimenakwinyi? Nakwimenaku antu jaNzambi, anakushimwina nsañu yayiwahi yaWanta. Kufwana Pawulu niApolosi, atumbaña nikutukumwina. Ilaña hela chakwila azataña nañovu, yuma yafumañamu yekalaña yashiyashana. Muloñadi? Muloña wakwambuka kwanyichima yawantu atiyaña mazu. Munichi chishimu, mukwakukuwa mbutu helukaña yuma yafumañamuku. Awa himazu akuzañalesha chikupu, sweje-e kudi amana kwetu niahela ashinshika anakalakali hayaaka yayivulu, ilaña himwafumaña yuma yayivuluku! * Muloñadi mazu wenawa chiyanekalili akuzañalesha?
9. Mazwinyi alala akukolesha akonkomweneniyi kapostolu Pawulu niYesu?
9 Kashinshi kamukwakukuwa mbutu hitwakilukilaña kuyuma yafumañamuku. Pawulu wakunkiluku kunichi chikuma hampinji yahosheliyi nindi: “Wejima wawu akatambula wufwetu wawu weseka nanyidimu yawu aweni.” (1 Akorinda 3:8) Akatambula wufwetu kwesekeja nanyidimu yawu, bayi kwesekeja nayuma yafumaña munyidimu yawuku. Yesu niyena wakonkomweneni hanichi chikuma hampinji yelili atumbanji twindi afunti halwendu lwakushimwina. Atiyili kuwaha muloña andemoni ayovwahilili hamuloña wakuzatisha ijina daYesu. Chelili azañalali chikupu, Yesu wayilejeli nindi: “Hela chochu, bayi muzañalala nanochu chanayovwahiluwu kudi ademonuku; ilaña zañalalenu nanochu chanasonekuwu majinenu mwiwulu.” (Luka 10:17-20) Hela chakwila mukwakukuwa mbutu hanelishi atumbanji amavuluku, hichinayi mukwila nawu hazataña nañovu hela anamubadiki kudi akwawu kushinshikaku. Kakavulu, yuma yafumañamu yashindamena hamuchima wamukwakutiya. Ilaña chabadika kulema, Nzambi diyi wakulishaña!
Mudimu Wukweti Akwakutiya Izu
10. Chumanyi chamwekeshaña neyi muntu watiyaña izu wudi neyi maseki amawahi hela atama?
10 Indi antu atiyaña izu? Komana kwekala kwilukila chadimu yuma yakafumamu? Inehi. Atela kufuukulahu aweni kwikala neyi iseki dadiwahi hela nehi. Chakadi nikujina, muchima wamuntu wunateli kuhimpa munjila yayiwahi hela munjila yatama. (Aroma 6:17) Muchishimu chindi Yesu wahosheli nindi, “wowu akwila chanatiyuwu” izu, Satana hakwinza nakufumisha mazu anakuwuwu mudi wena. Ilaña chumichi hichatela kuyimwekenaku. HaYakoba 4:7, akwaKristu ayikonkomwena ‘kudikaña naDiyabolu,’ niyena wukuyitemuka. Yesu walumbulwili nindi hakutachika amakwawu akwiteja izu namuzañalu kutwala muna akudimbuka muloña mudi wena “muji mwosi.” Hakwila ambuña aNzambi anayikonkomweni ‘kushimata kunyiji, nikukola mukukeña’ kulonda atweshi ‘kushinshika mwaya kutoha, nikuleha, nikuleha kwiwulu, nikukunama, mwiluki kukeña kwaKristu kwakañanya kwilukewa.’—Aefwesesa 3:17-19; Akolose 2:6, 7.
11. Indi muntu watiyaña nsañu yaWanta nateli ñahi kutondolwela kwiteja kwakama kwamakonu nimaheta kuvumbisha mazu?
11 Antu amakwawu atiyili izu anayilumbululi neyi etejeli “kwakama kwamakonu, nikudimbana kwamaheta,” kwiñilamu nakuvumbisha mazu. (1 Timotewu 6:9, 10) Anateli kutondolwela ñahi yumiyi? Kapostolu Pawulu wakwili nindi: “Ikalenu nanyichima yakadi kufwila mali; toñojokenu yuma yimudi nayu nenu yinawani dehi; muloña yomweni nahoshi nindi, Hinamba kakulekaku, hela kukushiya hinakakushiyaku.”—Aheberu 13:5.
12. Muloñadi antu anakwimenaku maseki amawahi chiyasoñaña nyikambu munjila jashiyashana?
12 Nkumininaku, Yesu wahosheli nindi mbutu yakuwiluwu hamaseki amawahi “hiyakusoña awa makumi asatu, awa makumi atanu nadimu, awa nkulakaji.” Hela chakwila antu amakwawu atiyaña mazu akweti nyichima yayiwahi nawa asoñaña nyikambu, kukalakala kwawu mumudimu wakushimwina nsañu yayiwahi kwashiyashana kwesekeja nanshakaminu yawu. Chakutalilahu, wushinakaji hela yikatu yatwalekañahu yinateli kufuntisha hanyima mudimu wawu wakushimwina. (Esekejenuku Maku 12:43, 44.) Cheñi, mukwakukuwa mbutu hanateli kwikala nañovu yakumanisha iku kukalaku, ilaña wazañalalaña chelukayi nindi Yehova nayikulishi.—Tañenu Masamu 126:5, 6.
Mukwakukuwa Mbutu Wakamaña Tulu
13, 14. (a) Mukwihihisha lumbululenu chishimu chaYesu chamuntu wakuwili mbutu. (b) Indi mukwakukuwa nakwimenakwinyi, nawa mbutu hichumanyi?
13 Hamukanda waMaku 4:26-29, twawanañahu chishimu chikwawu chamukwakukuwa mbutu: “Wanta waNzambi wudi neyi muntu wukukuwa mbutu heseki; hakukama, hakuhinduka, niwufuku nimwaana, mbutu hijikubaluka, hijikukula, yena kwiluka mujinakulili nehi. Maseki adisoñeshelaña awenawu; kusambila mbali, kulondelamu nyitu, kukuminina hitidiku yayeni munyitu. Ilaña mbutu chijikwiha, hakutwalamu chikwakwa, muloña chilaaka chakwañula chinashiki dehi.”
14 Indi mukwakukuwa mbutu hinyi? Antu amakwawu muKristendomu atoñojokaña nawu mukwakukuwa mbutu diyi Yesu. Hanu dinu akuhosha ñahi nawu Yesu wakamaña tulu nawa helukaña chakulaña mbutuku? Chakadi nikujina, Yesu welukaña chakulaña mbutu! Ilaña, kufwana mukwakukuwa mbutu atenawu hatachi, iwu mukwakukuwa mbutu nakwimenaku antu atiyakeshaña Wanta, akuwaña mbutu jaWanta kuhitila mukudikita chikupu mudimu wakushimwina. Mbutu jakuwañawu hamaseki hiizu dashimwinañawu. *
15, 16. Chikumanyi chalala chahosheliyi Yesu muchishimu chindi chamukwakukuwa mbutu kutalisha hakukula kwambutu nikwakuspiritu?
15 Yesu wahosheli nindi mukwakukuwa mbutu ‘wakamini wufuku, hakuhinduka namwaana.’ Ichi hichinayi mukwila nawu mukwakukuwa mbutu wadiwiluku. Chinakumwekesha hohu chahandaña muntu wejima. Mazu anazatishiwu muniyi vasi anakumwekesha nawu nampinji yamwaana twazataña nyidimu hakwila nawufuku twakamaaña tulu hampinji yayilehi. Yesu walumbulwili chuma chamwekeni hampinji yakaaminiyi mukwakukuwa. Wahosheli nindi: “Mbutu hijikubaluka, hijikukula.” Nawa Yesu watwalekeluhu nindi: “Yena kwiluka mujinakulili nehi.” Chikuma chinakonkomwenuwu chidi chakwila nawu ‘yadisoñelaña yayeni.’ *
16 Chikumanyi chalumbulwileñayi Yesu? Ilukenu nenu wadiña nakonkomwena hakukula ninjila muyakulilaña chovu-chovu. “Maseki adisoñeshelaña awenawu; kusambila mbali, kulondelamu nyitu, kukuminina hitidiku yayeni munyitu.” (Maku 4:28) Kukula kweniku kwazatikaña chovu-chovu nawa mundonda. Hiyanateli kuyikanjikija hela kuyikulisha swayuku. Chochimu nikudi antu ekalaña atumbanji. Kukula kweniku kwazatikaña mundonda hampinji yakulishañayi Yehova chalala mumuchima wamuntu wunakukeña kudiza.—Yililu 13:48; Aheberu 6:1.
17. Anyi azañalalaña neyi mbutu yachalala yisoña nyikambu?
17 Indi mukwakukuwa mbutu wañulaña ñahi “mbutu chijikwiha”? Yehova chakulishayi chalala chaWanta munyichima yawatumbanji amaha, nkumininaku ayilañaku hambidi chakwila kumukeña Nzambi kwayisañumunaña kudihana kudi yena. Amwekeshaña kudihana kwawu kuhitila muchipapatishu. Amana kwetu ayilañaku hambidi nakupama mukuhita kwampinji ekalaña nanyidimu yayivulu muchipompelu. Nyikambu yaWanta ayañulaña kudi wakuwili nikudi akwakutiyakesha Wanta amakwawu abulili kukuwaku mbutu yaleñeleli muntu kwikala kambanji. (Tañenu Yowanu 4:36-38.) Mwalala, ‘niwakuwaña niwamunaña azañalelaña hamu.’
Yuma Yakudizilaku Makonu
18, 19. (a) Indi kuhituluka muniyi yishimu yaYesu kunayikoleshi ñahi? (b) Yumanyi yitukahanjekahu muchibaba chinalondelihu?
18 Yumanyi yitunadizi mukuhituluka muyishimu yiyedi yasonekawu mumukanda waMaku kapetulu 4? Tunadizi chikupu netu tukweti mudimu weneni, wakukuwa mbutu. Bayi twiteja kujinooka nikukala kutukañesha kukalakala muniwu mudimuku. (Mukwakutaŋisha 11:4) Nawa hampinji yoyimu, tuneluki netu tukweti kukooleka kwakututena nawu akwakukalakala ambala aNzambi. Yehova diyi waleñelaña antu kwikala atumbanji, nawa wakiswilaña ñovu jetu niñovu jawantu atambwilaña nsañu. Tweluka netu hitunateli kukanjikija muntu kwikala kambanjiku. Cheñi twatela kwiluka netu bayi tuneña hela kutiya kumuchima kutama neyi antu hiyanakukula swayi hela anakukanaku. Chinatuzañaleshi chikupu hakwiluka netu kutwesha iwu mudimu kwashindamena hakwikala akashinshi kudi Yehova nikumudimu watwinkayi wakushimwina ‘nsañu iyi yawanta yayiwahi . . . kulonda kuyilila nyuza yejima wunsahu.’—Matewu 24:14.
19 Chumanyi chikwawu chatudizishili Yesu kutalisha hakuvula kwawatumbanji amaha nihamudimu waWanta? Ilu lwihu analwakuli muyishimu yikwawu yasonekawu muNsañu Yayiwahi. Twakahanjeka haniyi yishimu muchibaba chinalondelihu.
[Tumazu twaheshina]
^ Shinshikenu hachakutalilahu chamana kwetu Georg Fjölnir Lindal’s chamumudimu wakushimwina mwituña daIceland, neyi chashimunawu muYearbook of Jehovah’s Witnesses yamu 2005 ifu 210-211, niyakuhumañana yawambuña aNzambi ashinshika azatili nañovu mwituña daIreland hayaaka yayivulu chakadi niyuma yayiwahi yafuminimu, neyi chinashimunuwu muYearbook of Jehovah’s Witnesses, 1988 ifu 82-99.
^ Hakusambila muniyi magazini alumbulula nawu mbutu yinakwimenaku yililu yawantu yakeñekaña kukulilaku nakupama, ilaña ayiluwañeshaña nayuma yamwekanaña mwiluña. Hela chochu, muchishimu chaYesu twatela kwiluka netu mbutu hijahimpaña nakwikala jatama hela jatokaku. Jakuminaña dakukula nakupama.—Talenu Kaposhi Kakutalila kachizungu, kaJune 15, 1980, ifu 17-19.
^ Hamukanda waYililu 12:10 dihu hazatishawu hohu cheñi nhoshelu yakwila nawu chenzelu chachikuñu hichikudenzulukila, “chacheni.”
Munakwanuka?
• Kudifwananyi kwekala hamudimu wakukuwa mbutu, nikushimwina nsañu yaWanta?
• Indi Yehova welukilaña kuchumanyi kashinshi kamukwakushimwina Wanta?
• Kudifwananyi kwakonkomweneniyi Yesu kutalisha hakukula kwambutu nikwakuspiritu?
• Indi ‘mukwakukuwa nimukwakumuna azañalelaña ñahi hamu’?
[Malwihu aKuzatisha haKudiza]
[Nyevulu yidi hefu 21]
Muloñadi Yesu chesekejeliyi mukwakushimwina Wanta waNzambi namukwakukuwa mbutu?
[Nyevulu yidi hefu 23]
Antu anakwimenaku maseki amawahi ashimwinaña haWanta namuchima wejima kwesekeja nanshakaminu yawu
[Nyevulu yidi hefu 24]
Nzambi diyi wakulishaña