Yikuma Yamaneni Kufuma muNyikanda yawaKorinda
Izu daYehova daDumi
Yikuma Yamaneni Kufuma muNyikanda yawaKorinda
KAPOSTOLU Pawulu nakwakamena chikupu kutalisha hachipompelu chamuKorinda. Watiyili nindi mukachi kawamana kwetu mwadiñi ntadi yeneni chikupu. Nawa etejeli yililu yatama mukachi kawu. Chipompelu nichena chamusonekeleli Pawulu mukanda wakumwihula hayuma yimu. Hamuloña wayumiyi kukamwihi na 55 C.E., henohu wudi muEfwesesa halwendu lwindi lwawumishonali lwamuchisatu, Pawulu wayisonekeleli mukanda windi wamuchimu wahanyikanda yiyedi yasonekeleliyi aKorinda.
Hekwawu hahitili hohu tukweji twanti kufuma hasonekeliyi mukanda watachi, wasonekeli mukanda wamuchiyedi kulonda kutwalekahu. Chineli yuma yamwekeneña muchipompelu chamuKorinda nikudi antu abula kwikala muchipompelu munkulakanji yamwaka wakusambila yinadifwani nayuma yinakumwekana makonu muyuma yayivulu, nsañu yayisonekeleliyi Pawulu aKorinda yinateli kutukwasha ninetu.—Aheberu 4:12.
‘TONENU, IMANENU CHAKOLA, IKALENU NAÑOVU’
Pawulu wakonkomweneni nindi “hoshenu mazu wowamu wejima wenu.” (1 Akorinda 1:10) ‘Kwosi chikuku chatuñawu dehi, chiña Yesu Kristu,’ dihu hashindamena yililu yawakwaKristu. (1 Akorinda 3:11-13) Pawulu wahosheli kutalisha hadi chivumbi wudi muchipompelu nindi: “Fumishenu owu muntu watama mukachi kenu.” (1 Akorinda 5:13) Wahosheli cheñi nindi: “Mujimba hiwakwila nachu wuvumbuku, wambala waMwanta.”—1 Akorinda 6:13.
Hakwakula ‘nsañu yasonekeliwu,’ Pawulu waheni kufumba kwakuwahi kutalisha hamaluwi nihawujiki. (1 Akorinda 7:1) Hanyima yakuhosha hansañu yawuntu wawakwaKristu, kwila yuma munjila yatelela hakupompa kwawakwaKristu, nihakwikala nachikuhwelelu chakusañuka, Pawulu wakonkomweneni nindi: “Tonenu, imanenu chakola muchikuhwelelu, dikwatishenuku jawuyala, ikalenu nañovu.”—1 Akorinda 16:13.
Maluwi amuNsona Anayakuli:
1:21—Komana Nzambi wazatishaña ‘wusupi’ hakupulwisha antu amukuhwelela? Inehi. Ilaña, chineli “antu amumpata yamunu mwishina abulili kumwiluka Nzambi,” yuma yazatishañayi hakupulwisha nachu antu kudi wena yamwekanaña neyi yawusupi.—Yowanu 17:25.
5:5—Indi ‘kuhana muntu [watama] wudi ochu kudi Satana kulonda akisañani mujimba windi, kulonda spiritu yindi yakahandi’ kwatalisha mudihi? Neyi muntu wunabuli kubalumuka mumuchima yakoña nshidi yeneni amuhaña muchipompelu, wekalaña kukabadi ketuña daSatana. (1 Yowanu 5:19) Dichi, muntu yeniwu ahoshaña nawu anamuhani kudi Satana. Neyi muntu amuhaña muchipompelu chafumañamu hikujilumuka, hela kufumisha yililu yamuntu watama muchipompelu, nikukiña spiritu yachipompelu kuyililu yatama.—2 Timotewu 4:22.
7:33, 34—Indi nhoshelu yakwila nawu “yuma yamunu mwishina” yakamenaña amayala asumbula hela ambanda asumbuka yatalisha mudihi? Pawulu wateneneña yuma yakoñañawu antu muchihandilu yakamenañawu akwaKristu ekala mumaluwi. Yuma yeniyi yabombelamu yakudya, yakuvwala, nihakukama, kufumishaku yuma yatama yamukanu kaayi, yatondolwelaña akwaKristu.—1 Yowanu 2:15-17.
11:26—Indi kufwa kwaYesu atela kukwanuka kapampa kañahi, nawa kushika mpinjinyi? Pawulu hahosheli nindi kufwa kwaYesu atela kukwanakanaña kakavuluku. Izu dachiGreek dazatishawu dakwila nawu “chimukudyaña” daya mukwila nawu “kala mpinji” hela “mpinji yidi yejima.” Dichi, Pawulu wahosheli nindi mpinji yidi yejima yikudyawu akwaKristu awahishewa yifwikija yachanukishu, kamu hachaaka, haNisani 14, “[ana]kutiyakesha kufwa kwaMwanta.” Elaña mwenimu “nichakenzayi,” dikwila nawu, kushika tuhu nichakayitambwilayi mwiwulu kuhitila mukusañuka.—1 Atesalonika 4:14-17.
13:13—Munjilanyi kukeña mukwabadikila chikuhwelelu nikuchiñeja? Neyi “yuma yitwachiñejaña” yimwekana niyuma ‘yitwakuhwelela netu yalala’ yinamwekani, chikuhwelelu nikuchiñeja kwamanaña. (Aheberu 11:1) Kukeña kwabadika chikuhwelelu nikuchiñeja muloña kwatwalekañahu.
15:29—Indi ‘kupapatisha hamuloña wawafu’ chalumbulukadi? Pawulu hahosheleña nindi antu amomi ayipapatishi kulonda kwimenaku antu afwili chakadi kuyipapatishaku. Pawulu wahosheleña hakujimika kwawakwaKristu awayishewa lwakuspiritu kwakutwalekahu kuhemba kashinshi kawu kushika tuhu nikukufwa kufumahu ayisañulaña nakwikala nawumi wakuspiritu.
Yuma Yitukudizilaku:
1:26-31; 3:3-9; 4:7. Kudisambila mudi Yehova, bayi mudi etwaweniku, kwaleñelaña antu kunuñañana muchipompelu.
2:3-5. Hampinji yashimwinineñayi muKorinda, mukala muyadizishileñawu maana awaGriki, Pawulu wakameneni chikupu neyi chakwila wukutwesha kushinjila antu amutiyilileña. Hela chochu, hetejeli kuzeyazeya hela woma kukañesha mudimu windi wakushimwina wamwinkeliwu kudi Nzambuku. Hohamu, bayi twiteja kukala kudi kwejima kutwikañesha kukalakala mudimu wetu wakushimwina nsañu yayiwahi yaWanta waNzambuku. Tunateli kushindamena chikupu hawukwashu waYehova neyi cheliliyi Pawulu.
2:16. Kwikala “[na]yitoñojoka yaKristu” hikwiluka chatoñojokañayi nimuloña watoñojokelañayi muniyi njila, kutoñojoka neyi chatoñojokañayi, kwilukisha wuntu windi, nawa nikwimbujola chakutalilahu chindi. (1 Petulu 2:21; 4:1) Dichi twatela kudiza hachihandilu chaYesu nimudimu windi.
3:10-15; 4:17. Twatela kutoñojoka chikupu nikwiluka mwakutañishila nikwilisha atumbanji. (Matewu 28:19, 20) Neyi tubula kwiluka chakudizisha chiwahi, atudizi etu hiyanateli kushinda neyi chikuhwelelu chawu achesekaku, nawa tunateli kutiya kutama chikupu chakwila kupuluka kwetu kwakekala “neyi chakuhita mukesi.”
6:18. “Kutemuka wuvumbi” hikwatalisha mukwila nawu tutondolweleña yililu yapor·neiʹa hohuku ilaña nikuleka kutala nyevulu yanzekesi, yililu yawuzondu, kutoñojoka yuma yatama, kukenkama, niyililu yejima yaleñelaña muntu kwila wuvumbi.—Matewu 5:28; Yakoba 3:17.
7:29. Adisumbula atela kubabala kuchina akenda kasha muchima kumaluwi awu nakusha mudimu waWanta hanyima muchihandilu chawu.
10:8-11. Yehova wahilili chikupu chelili aIsarela ayitobeshi aMosi naAroni. Chikuwaha neyi tubula kwikala nachaaku chakutoba.
16:2. Tunateli kutwalekahu kuhana mali akutwala mudimu wakushimwina hambidi neyi chakwila tufuukulañahu dehi nawa neyi tuhanaña kwesekeja nachitwafuukula.
“IKALENU ALALA”
Pawulu walejeli aKorinda nindi atela ‘kumwanakena nikumukundeja’ mukwanshidi wunabalumuki mumuchima wunahosholuwu. Hela chakwila mukanda windi watachi wayineñesheli, Pawulu watiyili kuwaha muloña ‘aneñeli chakubalumuka mumuchima.’—2 Akorinda 2:6, 7; 7:8, 9.
‘Chineli anabadiki dehi muyuma yejima,’ Pawulu wakonkomweneni aKorinda ‘kubadika nimukuhana.’ Hanyima yakwakula akwankunyi, Pawulu waheni kufumba kwakukumishaku kudi antu ejima nindi: “Shakamenu chachiwahi. Ikalenu alala; dikundejenuña; ikalenu nayitoñojoka yoyimu; shakamenu nakuwunda.”—2 Akorinda 8:7; 13:11.
Malwihu amuNsona Anayakuli:
2:15, 16—Munjilanyi mutwekalila “ivumba daKristu dadiwahi”? Twepukaña ivumba daKristu dadiwahi muloña wakwovwahila yuma yahosha Bayibolu nawa twashimwinaña nsañu yekalamu. Hela chakwila idi “ivumba” adihela kudi antu atama, ilaña Yehova niantu jindi ashinshika aditiyaña kuwaha.
5:16—Munjilanyi akwaKristu awayishewa mwabulilawu ‘kwiluka muntu chadiyi mumujimba’? Hiyamwenaña antu kumesuku, dikwila nawu, kumwekesha chaambu kuyuma yidi neyi maheta, ikowa hela ituña kwafumawu. Chuma chalema kudi wena yowu wubwambu wakuspiritu wukwetiwu nawakwawu akwakwitiya.
11:1, 16; 12:11—Komana Pawulu wadiñi chisupi kudi aKorinda? Inehi. Hela chochu, kudi antu amakwawu amumweneña neyi wadisambileña nawa wadiñi chisupi hamuloña wayuma yahosheleñayi kulonda kuhakwilaku wupostolu windi.
12:1-4—Hinyi ‘ahukwiluwu lwe-e muparadisa’? Chineli Bayibolu hiyahosha hadi muntu wudi wejima wamweni chimwenu chamuchidiwuku nawa nsañu yamuBayibolu yahosha hakudihakwila kwaPawulu nawupostolu windi, watela wahosheleña hayuma yamweniyi. Chimwenu chamweniyi Pawulu hekwawu chadiñi chaparadisa yakuspiritu yinakudiluñisha chipompelu chawakwaKristu ‘mumpinji yakukuminina.’—Danyeli 12:4.
Yuma Yitukudizilaku:
3:5. Kwesekeja nanshimbi, iyi vasi yinakutuleja nawu Yehova wadizishaña chikupu akwaKristu mudimu wakushimwina kuhitila Mwizu dindi, spiritu yindi yajila, nikuloñesha kwindi kwaheseki. (Yowanu 16:7; 2 Timotewu 3:16, 17) Dichi twatela kudiza Bayibolu ninyikanda yashindamena haBayibolu chikupu, kulomba spiritu yajila chakadi kuleka, kuwanika kukupompa nikuhoshahu hakupompa kwawakwaKristu.—Masamu 1:1-3; Luka 11:10-13; Aheberu 10:24, 25.
4:16. Chineli Yehova wabalumunaña ‘wuntu wetu wamukachi ifuku nifuku,’ mpinji yejima twatela kuzatisha yuma yahanañayi Yehova, bayi kuhumisha ifuku chakadi kukoña yuma yinateli kukolesha wubwambu wetu naYehovaku.
4:17, 18. Neyi twanukaña netu “lukadi lwetu lwakatataka lwapepela” chikutukwashaku kwikala ashinshika kudi Yehova hampinji yamakabi.
5:1-5. Pawulu nalumbululi chiwahi mazu awakwaKristu awayishewa hakuchiñeja kwawumi wawu wamwiwulu!
10:13. Kwesekeja nanshimbi, twatela kuzatila hohu mwiluña dakushimwina dachipompelu chetu, chiña hohu neyi anatwinki mudimu wakuya nakuzatila kudi kukankila kweneni.
13:5. Hakwila nawu ‘tudeseki, nakutala neyi tudi mukwitiya kwakukuhwelela’ twatela kwesekeja yililu yetu nayuma yitwadizaña muBayibolu. Hakwila nawu ‘tudishinshiki chitwekala,’ twatela kwiluka neyi wubwambu wetu naNzambi wakola chikupu, nikwikala nawuswa wakuzatisha “yitoñojoka” yetu, nikushiyashana nikuvula kwanyidimu yachikuhwelelu chetu. (Aheberu 5:14; Yakoba 1:22-25) Neyi tuzatisha kufumba kwakuwahi kwaPawulu, tukatwalekahu kwenda munjila yalala.
[Mwevulu wudi hefu 30, 31]
Indi mazu akwila nawu “chimukudyaña dinkendi idi, nichimukunwaña lupasilu” atalisha mudihi?—1 Akorinda 11:26