Chitwatela Kumika naChineñi

‘Anyana kaYakoba ejima niamayala nawambanda anyamukili, nawu amukundeji, ilaña yena kwindi kwonti kwindi kumukundeja. Nindi, ami kwami nakakunkumuka mukaluña mudi mwanami nakudila hohu. Tata yindi hakumudila.’—KUTACHIKA 37:35.

NKAKULULA Yakoba wamudilili chikupu mwanindi watoñojokeliyi nindi najimbali. Welili nindi wakadilaña hohu kushika tuhu nifuku dakufwa kwindi. Kufwana Yakoba, hadaha munateli kutoñojoka nenu kufwisha muntu yimwakeña chakataña kumuchima chikupu chakwila chineñi chenichi hichinateli kumanaku. Komana chineñi chamuchidiwu chasweja chamwekeshaña nawu himwamukuhwelela Nzambuku? Inehi!

Bayibolu yamulumbulula Yakoba nawu hiiyala wachikuhwelelu. Kufwana nkaka yindi Abarahama nitata yindi Isaka, Yakoba amuhameka hama hamuloña wachikuhwelelu chindi chakola. (Aheberu 11:8, 9, 13) Amuhameka hamuloña wakwila, hampinji yimu walwishili wufuku wejima nakañelu kulonda kumukiswila kudi Nzambi. (Kutachika 32:24-30) Chakadi kujina, Yakoba wadiñi nawubwambu wakola chikupu naYehova. Hanu dinu, chumanyi chitwatela kudizila kuchineñi chatiyiliyi Yakoba? Muntu nateli kwikala nachikuhwelelu chakola mudi Nzambi ilaña nateli kwikala nachineñi cheneni chikupu. Muntu wejima watiyaña chineñi neyi nafwishi muntu wakeñayi.

 Indi Chineñi hiChumanyi?

Twaneñaña munjila yashiyashana, dichi kusweja kutoñojoka dikwaleñelaña antu amavulu kusweja kuneña. Shinshikenu hachakutalilahu chaLeonardo, wadiñi nayaaka yakusemuka 14 hampinji yafwili tata yindi nachikatu chamuchima chakañeshaña kwona. Leonardo hamba kajimbala ifuku damulejeli mama yindi wakansi kufwa kwatata yindiku. Hatachi, wakaanini nindi tata yindi hafwiluku. Wamweni mujimba watata yindi hachipenji, ilaña hohamu wamweni neyi himakudi. Hadi tukweji tutanu nakamu, Leonardo hatwesheli kudilaku. Kakavulu, wadiña nakuhembelela nindi tata yindi nakwinza kwitala kufuma kunyidimu. Mwahitili kwakwihi nachaaka chimu hakwila yeluki chikupu nindi tata yindi wafwa dehi. Chelukiliyi, watiyili wudi chikupu hamuloña wakushala nkawindi. Yuma yidi neyi kufunta kwitala kwakadi muntu, yamwanukishileña nindi tata yindi wafwa. Haniyi mpinji, watumpileña chikupu. Wamutoñeleña tata yindi chikupu!

Neyi chinamwekeshi chakutalilahu chaLeonardo, chineñi chinateli kusweja chikupu. Chuma chachiwahi chidi chakwila nawu chineñi chamanaña. Hela chochu, chasendaña mpinji. Neyi chochashimbulaña chilonda kukusuka, hohamu chasendaña mpinji hakwila nawu chineñi chimani. Hakwila nawu chineñi chimani mwahitaña tukweji, yaaka yantesha, hela kubadikahu. Ilaña kukata kwasweja kumwatiyaña hakutachika kwayaña nakukeha, nawa chihandilu chatachikaña kumwekana kuwaha.

Haniyi mpinji, chineñi achishimuna nawu chaleñelaña kukola nawa chaleñelaña kwinjilila nachihandilu chachiha. Hadiñi muntu hashalaña ipwata deneni. Dichi twatela kwinjilila kushakama chakadi muntu yeniwu. Chineñi chinateli kuyileñela kuhosha yuma yimunakutoñojoka. Hela chochu, bayi neyi muntu wejima wadilaña munjila yoyimuku. Dichi, kwekala hohu chuma chimu chalala: Kukañesha chineñi kwaletaña wubanji muyitoñojoka nikumujimba. Hanu dinu, munateli kumwekesha ñahi chineñi munjila yayiwahi? MuBayibolu mwekala kufumba kwakuwahi.

Chitwatela Kumika naChineñi

Antu amavulu afwishahu dehi eluka nawu kuhosha kwakwashaña kumanisha chineñi. Chakutalilahu, toñojokenu hamazu amuBayibolu aYoba, wayandili kuhitila mukufwisha anyanindi ejima ikumi nikumika makabi amakwawu. Wahosheli nindi: “Natiyi dehi wumi wami kumuchima bwi-i, nukukumina dakuditatokela tuhu kwami, nukuhosha munamoni muchima wami kulula.” (Yoba 1:2, 18, 19; 10:1) Ilukenu nenu Yoba wakeñeleña ‘kuditatokela’ kutalisha hayuma yamuholokeleli. Watwesheli kwila ñahi mwenimu? Washimwini nindi “nikuhosha.”

Paulo, wafwishili amama yindi wahosheli nindi: “Chuma chinankwashi chikupu hikuhosha hadi amama.” Dichi kuhosha yuma yimunakutoñojoka kudi ibwambu denu yimwakuhwelela kwawundishaña muchima. (Yishimu 17:17) Yone chafwishiliyi amama yindi walejeli amana kwindi akwaKristu kumuhempulaña kakavulu. Wahosheli nindi: “Kuhosha kwamukwashili kukeheshaku chineñi.” Ninenu mukumona nenu kuhosha yuma yimunakutoñojoka nikuleja muntu wukuyakamena chikuyikwashaku kumika nakukala.

 Kusoneka yuma yimunakutoñojoka nikwena kwakwashaña kukeheshaku chineñi. Amakwawu amonaña kukala kuhosha yuma yinakutoñojokawu kusoneka kunateli kuyipelela. Hanyima yakufwa kwaSawulu niJonatani, Davidi iyala washinshika wasonekeli kamina kawushona mwamwekesheliyi chineñi chindi. Nkumininaku aka kamina kawushona akisonekeli mumukanda wamuBayibolu waSamweli wamuchiyedi.—2 Samweli 1:17-27.

Kudila nikwena kwakeheshañaku chineñi. Bayibolu yahosha nawu: “Yuma yejima yikweti yilaaka yayu, . . . mpinji yakudila.” (Mukwakutaŋisha 3:1, 4) Dichi, kufwa kwamuntu yitwakeña diyi “mpinji yakudila.” Dichi neyi tunaneñi hitwatela kutiya nsonyi hakudilaku. MuBayibolu mwekala yakutalilahu yayivulu yawamayala niambanda ashinshika amwekesheli chineñi chawu hatooka kuhitila mukudila. (Kutachika 23:2; 2 Samweli 1:11, 12) Yesu Kristu ‘wadilili’ chashikiliyi kukamwihi nejamu debwambu dindi Lazaru, wafwili hanyima yamafuku antesha.—Yowanu 11:33, 35.

Hakwila nawu chineñi chimani chakeñekaña kuwunda, muloña yitoñojoka yenu yinateli kuhimpika mukunyakashana. Ilukenu nenu himwatela kutiya nsonyi hakudilaku. Antu amavulu ashinshika eluka nawu muntu wejima wadilaña nawa hinjila yakumanishilamu chineñi.

Kundamenu Kwakwihi naNzambi

Bayibolu yatulejaña nawu: “Kundamenu kwakwihi naNzambi, niyena wukukundama kwakwihi nanenu.” (Yakoba 4:8) Njila yimu yalema yakukundama kwakwihi naNzambi yekala yakuhitila mukulomba. Bayi mudiwula kulema kwakulombaku. Bayibolu yakundejaña chiwahi nawu: “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.” (Masamu 34:18) Cheñi yatukana nawu: “Umbilaku chiteli cheyi hadi Yehova, yena wukukukwashaku.” (Masamu 55:22) Toñojokenu hanichi. Neyi chitwahosha hakusambila, antu amavulu eluka nawu kuhosha yuma yatoñojokañawu nawakwawu akuhwelelawu chayikwashaña. Komana chikuyikwasha chikupu neyi mukumuleja Nzambi  yitoñojoka yenu wakana kukundeja nyichima yetu.—2 Atesalonika 2:16, 17.

Paulo, yitwatena hakusambila wahosheli nindi: “Chinakañenyi kumika nachineñi nichinelukili nami hinukutwesha kuumikaku, nafukamineña nakulomba kudi Nzambi. Namulembeleli nami yankwashi.” Paulo welukili chikupu nindi kulomba kwamukwashili. Ninenu mukwiluka nenu hamuloña wakulomba chakadi kuleka akuyakula kudi “Nzambi wakukundeja kwejima” wukayinka wulobu niñovu yakumika.—2 Akorinda 1:3,  4; Aroma 12:12.

Kuchiñeja kwaKusañuka

Yesu wahosheli nindi: “Yami kusañuka; Yami kuhanda. Muntu wankuhwelelami, hela wukufwa wakahanda.” (Yowanu 11:25) Bayibolu yadizishaña nawu afu akasañuka. * Hampinji yadiñayi hamaseki Yesu wamwekesheli nindi natweshi kusañula afu. Hampinji yimu wasañwili kansi wamumbanda wadiñi nayaaka 12. Indi anvwali jindi atiyili ñahi? Hohenohu “ahayama nikuhayama kwasweja.” (Maku 5:42) Muchiyuulu chaWanta windi, Mwanta wamwiwulu Yesu Kristu wakasañula antu akadi kutwesha kuchinda kuwumi wahanu hamaseki, ilaña akashakama chawunda nawa chaloña. (Yililu 24:15; 2 Petulu 3:13) Toñojokenu hamuzañalu wakekalaku hampinji yakasañuka afu nikudinuña nawantu akeñawu!

Claudete wafwishili mwanindi weyala mundeki yaholokeli, walamika mwevulu wamwanindi Renato, hafuliji. Kakavulu washinshikaña hamwevulu wamwanindi nakudihoshesha nindi ‘Twakadimona cheñi, hakusañuka.’ Leonardo wafwikijaña tata yindi nasañuki mwituña dadiha dakanayi Nzambi. Mwalala, kuchiñeja kwakusañuka diyi nsulu yalala yayikundejaña niantu amavulu afwisha awu akeñawu. Ninenu kunateli kuyikundeja.

[Tumazu twaheshina]

 [Chikasha chidi hefu 7]

Kukundeja Akwetu

“[Nzambi] watukundejaña mulukadi lwetu lwejima, kulonda tutweshi kukundeja akwetu adi mulukadi nakukundeja kwanatukundejuwu nachu kudi Nzambi.”—2 Akorinda 1:4.

AkwaKristu alala amavulu eluka chalumbulula, awa mazu. Chineli ayikundejahu dehi hamuloña wakufwisha muntu wakeñawu, dichi niwena atweshaña kukolesha nikukundeja amakwawu.

Shinshikenu hachakutalilahu chaClaudete, wahempulaña antu mpinji yejima kulonda kuhanjeka nawu nsañu yamuBayibolu hayuma yakuhwelelayi. Henohu mwanindi weyala kanda yofwi, wahempwileña mumbanda wafwishili mwanindi weyala nachikatu chakuvula mashi mumujimba. Mumbanda yeniwu watiyileña kuwaha kumuhempula, ilaña watoñojokeleña nindi Claudete hanateli kwiluka chikupu chadiña nakutiyayiku. Hela chochu, Chelili mwana kaClaudete yafwi, mumbanda yeniwu wamuhempwili Claudete nakumuleja nindi nenzeña kulonda niluki neyi wuchidi wamukuhwelela Nzambi chineli mwaneyi weyala nafwi. Chikuhwelelu chakola chaClaudete chamukolesheli, nawa iwu mumbanda nakudiza Bayibolu mpinji yejima naClaudete nawa Izu daNzambi dinakumukundeja chikupu.

Hanyima yakufwa kwatata yindi, Leonardo wafuukwilihu kudiza muchidi wawatumama kulonda kushimwina atumama nsañu yamuBayibolu yakukundeja. Dichi namoni nindi kuzata kwindi nañovu kulonda kukwashaku atumama kunamukwashi chikupu. Wahoshaña nindi: “Chuma chinankwashi kumika nachineñi, chidi chakukeña chikupu kukwasha atumama kudiza hadi Nzambi. Nekalaña nampinji yeneni nikuzata nañovu kulonda kuyikwasha. Chineñi chinatiyileña chamanini nawa nazañaleli chikupu hakumona kadizi wami waBayibolu watachi nakupapatishewa. Mwalala, iyi diyadiña mpinji yatachi kuzañalala chikupu kufuma tuhu hafwili atata.”—Yililu 20:35.

[Mwevulu wudi hefu 4]

Kuhosha hayuma yimunakutoñojoka kunateli kuwundisha muchima

[Mwevulu wudi hefu 5]

Kusoneka kunateli kuyikwasha kukehesha chineñi

[Mwevulu wudi hefu 5]

Kutaña nsañu yakuchiñeja kwakusañuka kunateli kwikala nsulu yalala yakukundeja

[Mwevulu wudi hefu 6, 7]

Yesu wakanini kusañula antu amukuhwelela