Twalekenuhu Kwikala Ajila naMuchima Wumu

“Nukwenda mwaya nsañu yeyi yalala. Bayi niikala nanyichima yiyeduku, chiña wunyika wumu hohu wakwakama ijina deyi.”—MASAMU 86:11.

1, 2. (a) Kwesekeja naMasamu 86:2, 11, chumanyi chatela kutwikwasha kutwalekahu ashinshika kudi Yehova hampinji yakumona kweseka? (b) Mpinjinyi yitwatela kwikala nakashinshi kakeni?

 MULOÑADI akwaKristu amakwawu ekalaña ashinshika hayaaka yayivulu hela chakwila ayikasaña mukaleya hela kuyiyandisha, nkumininaku chiyadiñijilañawu mukufwila maheta? Ñakwilu yetu yikushindamena hamuchima wetu wachifwikija, wuntu wetu wamukachi. Isamu danaambala 86 desekeja kujila namuchima wumu; dikwila nawu muchima walala chikupu, bayi nyichima yiyeduku. Davidi ñimbi yamasamu walombeli nindi, “Nhembi chachiwahi, muloña ami niwambala waNzambi, eyi Nzambi yami, ñamwini ami kambuñeyi nakukuhwelelañeyi.” Davidi walombeli cheñi nindi: “Eyi Yehova, nleji njila yeyi, nukwenda mwaya nsañu yeyi yalala. Bayi niikala nanyichima yiyeduku, chiña wunyinka wumu hohu wakwakama ijina deyi.”—Masamu 86:2, 11.

² Chiña tumukuhwelela Yehova namuchima wetu wejima, neyi nehi yuma yikwawu nikudikunda nawantu kunateli kuzeyesha kashinshi ketu kudi Nzambi walala. Kufwila yuma yatama kudi neyi tupata tuyavumbika munjila mutwahitaña. Hela chakwila tunashinshiki hampinji yayilehi kudi Yehova hakumona kweseka, tunateli kufwa munyihetu yasatana hela mutukosi. Makonu chalema chikupu kwikala nakashinshi kakeni kudi Yehova, henohu kweseka kanda kutuwani. Bayibolu yahoshaña nawu: “Hembaku muchima weyi chakubadika chiwahembaña yuma yejima.” (Yishimu 4:23) Tunateli kudizilaku chikupu kuchuma chamumwekeneni kaprofwetu wamuYuda watuminuwu kudi Yehova kuya kudi Mwanta Yerobowami wamuIsarela.

“Nikwinkuhu Chamukunkulu Cheyi”

3. Indi Yerobowami welili ñahi chamulejeluwu nsañu yawunsompeshi kudi kaprofwetu waNzambi?

³ Fwikijenu ichi chimwenu. Muntu waNzambi  nashimuni nsañu yalema kudi Mwanta Yerobowami, wunemiki kudifukula kudi mwana kañombi muwanta wanyichidi ikumi wakukabeta kaluwunda muIsarela. Mwanta nazuwi chikupu. Hakuleja antu jindi kulonda amukwati ntemesha. Ilaña Yehova hakukiña kambuñindi. Hohenohu, chikasa chamwanta chololayi mukuzuwa chuma nichawu muchihayamisha, nawa kameña kakudifukula kwakutwamba hikakubaluka hakachi. Kukasumuka, yililu yaYerobowami yinahimpiki. Hakumulembelela muntu waNzambi nindi: “Nlembeleluku mwani kudi Yehova Nzambi yeyi antoñuhu, nlombeli kulonda chikasa chami chikoli cheñi.” Kaprofwetu hakulomba, nawa chikasa chamwanta hichikukola.—1 Anyanta 13:1-6.

4. (a) Muloñadi yuma yakeñeleñayi mwanta kuhana chiyesekeli chikupu kashinshi kakaprofwetu? (b) Indi kaprofwetu wamwakwili nindidi?

⁴ Kuhiñahu Yerobowami hakumwila muntu waNzambi walala nindi: “Tuyi neyi kwitala dami wuhizumukuhu, nikwinkuhu chamukunkulu cheyi.” (1 Anyanta 13:7) Hanu dinu kaprofwetu wukwila ñahi? Komana wukwiteja chisambu chanamumwekesheluwu kudi mwanta hanyima yakumuleja nsañu yakumuhisha namuloña? (Masamu 119:113) Indi kwiji watela kukaana mutambi wamwanta, hela chakwila mwanta namwekani neyi nafutumuki mumuchima? Yerobowami wadiña waheta nawa wateleli kuhana chikupu kudi amabwambu jindi. Neyi chakwila kaprofwetu waNzambi watachikili kwikala namuchima wakufwila maheta, dikwila nawu yuma yikumwinkayi mwanta yikwikala hikweseka kweneni chikupu. Hela chochu, Yehova wamulejeli kaprofwetu nindi: “Eyi kudya yakudya, hela kunwa meji, hela kufunta njila yiwenjili chinjila.” Dichi kaprofwetu wamwakwili nezu dakola nawa datiyakana nindi: “Hela neyi wukunyika chibalu chetala deyi hinukuya kwami naneyuku, kudya yakudya kunu, hela kunwa meji, kwonti kwami.” Nawa hakufuma muBeteli kaprofwetu wafuntilili njila yacheñi. (1 Anyanta 13:8-10) Chumanyi chitwatela kudizila kukufuukula kwakaprofwetu kutalisha hakashinshi kakeni?—Aroma 15:4.

Zañalalenu naYuma Yimukweti

5. Indi kusweja kukeña maheta kwesekaña ñahi kashinshi ketu?

⁵ Kusweja kukeña maheta kunateli kumwekana neyi hikwesekaña kashinshiku, ilaña kwesekaña. Komana twakuhwelela kukana kwaYehova kwakutwinka yuma yitwakeñaña? (Matewu 6:33; Aheberu 13:5) Chatela tufwileña chikupu kuheta “yuma yayiwahi” yakumujimba yatela kuleñela chihandilu kwikala chachiwahi neyi chayinu mpinji hitukutwesha kuyihetaku, komana twatela kushakama chakadi kuyiheta? (Tañenu Afwilipi 4:11-13.) Komana twakeñaña kushiya nyidimu yamuchipompelu kulonda kuheta yuma yitunakukeña katataka? Komana muwumi wetu twatwamijañaku mudimu wajila waYehova? Ñakwilu yetu yikushindamena chikupu hamudimu wetu neyi twakalakalaña namuchima wejima kudi Nzambi hela nehi. Kapostolu Pawulu wasonekeli nindi, “Kwakama Nzambi, nikutiya kuwaha, hikuheta kwakweni. Muloña hitwaleteli chuma munu mwishinaku, nichitwakafumamu hitwakatwesha kusenda chumaku. Dichi neyi tukweti yakudya niyakudivwika, yumiyi yinawani.”—1 Timotewu 6:6-8.

6. “Yawaananyi” yanateli kutwinkawu, nawa chumanyi chikutwikwasha kwiluka neyi twatela kuyiteja?

⁶ Chakutalilahu, muntu watwiñija nyidimu nateli kutwinka chifulu chahewulu nakutwiwejelahu nfwetu niyuma yikwawu yayiwahi. Hadaha twatela kutoñojoka netu tunateli kwikala namali amavulu neyi tukuuka nakuya kwituña dacheñi hela kwiluña dikwawu nakukeña nyidimu. Hatachi, yuma yamuchidiwu yinateli kumwekana neyi hinkisu yaYehova. Ilaña henohu kanda tufuukuluhu, komana kwila tushinshika hayuma yitunakukeña kwila nehi? Lwihu lutwatela kudihula ludi lwakwila nawu, “Indi kufuukula kwami kukusambukila ñahi wubwambu wami naYehova?”

7. Muloñadi chichalemena kukañesha kufwila maheta munyichima yetu?

⁷ Kaayi kaSatana katwalekañahu hohu nakukolesha kufwila maheta. (Tañenu 1 Yowanu 2:15, 16.) Diyabolu wakeñaña hohu kuzeyesha nyichima yetu. Dichi, twatela kwikala asoñama  kulonda kwiluka nikukañesha chikupu kufwila maheta munyichima yetu. (Chimwekeshu 3:15-17) Yesu hichamukalili kukaana mawanta ejima amukaayi amwinkeleñayi Satanaku. (Matewu 4:8-10) Wasoñamishili nindi: “Babalenu, dihembenu muleki lwisu lwejima, muloña wumi wamuntu hiwekalaña kukuvula kwamahetinduku.” (Luka 12:15) Kashinshi kakutwikwasha kushindamena hadi Yehova chatela kushindamena hadi etu aweni.

Kaprofwetu waKashinakaji Wamudimbili

8. Indi kashinshi kakaprofwetu waNzambi akesekeli ñahi?

⁸ Kaprofwetu waNzambi neyi watwalekeluhu nalwendu lwindi lwakufunta kumukala, chiña kwosi chatama chamumwekeneni. Hela chochu, mukapinji kantesha watalañeni nakweseka kukwawu. Bayibolu yahoshaña nawu, “MuBeteli mwashakamini kaprofwetu wakashinakaji. Mwanindi wenjili nakumuleja” yuma yejima yamwekeni hanidi ifuku. Chatiyiliyi iwu mujimbu, kashinakaji hakuyila nindi amulemeni sadi hachimbulu kulonda yamulondeli kaprofwetu waNzambi. Kwendaku tuhu chantesha, hakumuwana kaprofwetu nakunooka mwishina damukula nawa wamwilili nindi: “Tuyi neyi kwitala dami, wakadyi yakudya.” Muntu waNzambi walala chinakaaniyi, kashinakaji hakuhosha nindi: “Ninami nikaprofwetu, neyi chiwudeyi nawa. Kañelu nahoshi nanami nezu dakudi Yehova, nindi, Mufuntishi winzi nindi kwitala deyi, kulonda akadyi yakudya, akanwi meji.” Ilaña Nsona yahoshaña nawu: “Wadiñi nakutwamba kwindi.”—1 Anyanta 13:11-18.

9. Indi Nsona yahoshaña nawudi hadi antu adimbanaña, nawa aluwañeshañanyi?

⁹ Tuneluki wanyi chatoñojokeleñayi kaprofwetu wakashinakaji, ilaña watwambili. Hadaha iwu kashinakaji mpinji yimu wadiña kaprofwetu waYehova washinshika. Ilaña haniyi mpinji, watwambili. Nsona yakaana chikupu yililu yamuchidiwu. (Tañenu Yishimu 3:32.) Antu adimbanaña aluwañeshaña wubwambu wawu naYehova nawa kakavulu aluwañesha niwawantu amakwawu.

“Hakufunta” naKashinakaji

10. Indi kaprofwetu waNzambi welili ñahi chamutambikiliwu kudi kashinakaji, nawa chumanyi chafuminimu?

¹⁰ Kaprofwetu wakuYuda chiña welukili kafuta kakaprofwetu wakashinakaji kazatishileñayi hakudimba antu. Wateleli kudihula nindi, ‘Muloñadi Yehova chatela kutemeshelayi kañelu kudi muntu wacheñi nanshimbi jajiha jakunlejami?’ Kaprofwetu wateleli kumwihula Yehova kulonda yamulumbulwili nshimbi, ilaña Nsona yashimunaña nawu helili mwoku. Ilaña, “Hakufunta [nakashinakaji], hakudya yakudya mwitala dindi, hakunwa nimenji.” Chamuneñesheli Yehova. Chelili kaprofwetu yadimbiluwu hakufunta kuYuda, amulukukili kudi mutupa nawa amujahili. Mudimu windi wawuprofwetu wamanini munjila yatama chikupu!—1 Anyanta 13:19-25. *

11. Chakutalilahwinyi chachiwahi chemikiliyi Ahiya?

¹¹ Ilaña, kaprofwetu Ahiya, watuminiwu kuya nakuwayisha Yerobowami hamu neyi mwanta, watwalekeluhu kwikala washinshika chikupu nichashinakajeliyi. Chelili Ahiya nashinakaji dehi nawa yapuuta nimesu, Yerobowami watumini iñodindi kuya nakwihula mwakamonayi mwanindi wakata. Chakadi woma Ahiya washimwineñahu dehi nindi mwana kaYerobowami weyala hakahandaku. (1 Anyanta 14:1-18) Hankisu yayivulu yatambwilili Ahiya wadiña cheñi nakukoleka kwakusonekaku Izu daNzambi donenawu. Munjilanyi? Mazu asonekeliyi kapristu Ezera wayifumishileña kunsañu yasonekeli Ahiya.—2 Kushindulula 9:29.

12-14. (a) Chumanyi chitukudizilaku kuchuma chamumwekeneni kaprofwetu wakansi? (b) Lumbululenu chichakeñekelaña kutoñojokahu chikupu nikulombelahu hakufumba kwamuBayibolu kwahanaña aeluda.

¹² Bayibolu hiyashimuna chaleñeleli kaprofwetu wakansi kubula kumwihula Yehova henohu kanda yafunti nakudya nikunwa nakashinakajiku. Indi kwiji kashinakaji wamulejeli nsañu yakeñeleñayi kutiya? Chumanyi chitukudizilaku?  Twatela kwiluka chikupu yuma yakeñañayi Yehova. Nawa twatela kufwila kuyilondela chikupu, hela chikali ñahi.

¹³ Amakwawu neyi anakuyifumba akeñaña kutiya hohu mazu anakukeñawu kuyileja. Chakutalilahu, mukwakushimwina anateli kumwiñija mudimu wukumusendelaña mpinji yatela kwikalayi nachisaka chindi nikuzataku nyidimu yamuchipompelu. Nateli kwihula eluda kulonda amuleji mwakwilila. Eluda nateli kutachika kumuleja kuhitila mukuhosha nindi hakweti wuswa wakumuleja mana kwetu mwakukwashila chisaka chindiku. Kuhiñahu eluda nateli kumuleja mana kwetu wubanji wakuspiritu wekala mukwiteja nyidimu yinamwiñijiwu. Komana mana kwetu watela kwanuka hohu mazu atachika kuhoshayi eluda, tahindi wukutoñojoka chikupu hachuma chatela kuzatilahu? Mwalala mana kwetu watela kwiluka chuma chachiwahi chatela kwilayi munjila yakuspiritu.

¹⁴ Talenu kukala kukwawu kunateli kumwekana. Muhela nateli kwihula eluda neyi nateli kwambuka nanfumwindi wabula kwitiya. Chakadi nikujina eluda nateli kumuleja nindi watela kufuukulahu yomweni neyi nakukeña nindi ambuki hela nehi. Kuhiñahu nateli kuhituluka mukufumba kwamuBayibolu kwahosha haniyi nsañu. (1 Akorinda 7:10-16) Komana muhela wukutoñojoka chikupu hayuma yinahoshi eluda? Indi kwiji nafuukuluhu dehi kwambuka nanfumwindi? Mukufuukula kwindi, chikuwaha neyi wukulomba nakushinshika hakufumba kwamuBayibolu.

Ikalenu Adizoza

15. Chumanyi chitukudizila kuchiluwa chakaprofwetu waNzambi?

¹⁵ Chumanyi chikwawu chitwatela kudizila kuchiluwa chakaprofwetu wakuYuda? Yishimu 3:5 yahosha nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.” Chatela yatwalekuhu kushindamena hadi Yehova neyi chelileñayi dikalu, haniyi mpinji kaprofwetu wakuYuda washindameneni hakufuukula kwindi. Chiluwa chindi chamuleñeleli kujimbesha wumi windi nikutamisha ijina dindi dadiwahi naNzambi. Chakutalilahu chindi chamwekeshaña kulema kwakudizoza nikwikala ajila mumudimu wetu kudi Yehova!

16, 17. Chumanyi chikutwikwasha kutwalekahu kwikala ajila kudi Yehova?

 ¹⁶ Yitoñojoka yalwisu yamumuchima wetu yavula kutudimba. “Muchima wasweja kudimbana, wadimbana chakubadika yuma yejima, wasweja nikukata.” (Yeremiya 17:9) Hakwila nawu tutwalekuhu kwikala ashinshika kudi Yehova, twatela kutwalekahu kuzata nañovu kulonda kuvuula wuntu wawukulu nichaaku chakudivwimba nikudishindamena. Nawa twatela kuvwala wuntu wawuha, ‘waleñeluwu mwekalilayi Nzambi mukuloña nakujila kwansañu yalala.’—Tañenu Aefwesesa 4:22-24.

¹⁷ Mukanda waYishimu 11:2 wahosha nawu: “Ilaña kudi akwakudizoza kwokwekala maana.” Kushindamena hadi Yehova nikudizoza kwatwikwashaña kutondolwela kwila yiluwa. Chakutalilahu, mazu akuzeyesha anateli kuluwañesha kufuukula kwetu. (Yishimu 24:10) Tunateli kuzeya nakukañanya kuzata nyidimu yikwawu yajila nikutachika kutoñojoka netu tunazati nyidimu yayivulu hayaaka yinahituhu, nakutoñojoka netu hadaha himpinji yakulekela amakwawu azateña. Hela tunateli kutoñojoka netu twatela kwikala nayuma yamonaña antu nawu dichihandilu chachiwahi. Hela chochu, ‘kukabila chikupu’ nawa ‘nikusweja kukalakala mudimu waMwanta’ kukukiña nyichima yetu.—Luka 13:24; 1 Akorinda 15:58.

18. Chumanyi chitwatela kwila neyi hituneluki mwakwililaku?

¹⁸ Mpinji yikwawu, twakeñekaña kufuukula hayuma yakala, nawa hitunateli kuwana swayi mwakwililaku. Komana twatela kuzatisha yitoñojoka yetu kulonda kumanisha kukala? Neyi tumona kukala kwamuchidiwu, chikuwaha neyi tulomba kudi Yehova kulonda yatukwashi. Yakoba 1:5 yahosha nawu: “Mwinenu nabuli maana, alombi kudi Nzambi, wahanaña kudi antu ejima makasa ayedi.” Tata yetu wamwiwulu wukutwinka spiritu yajila yitwakeñaña hakwila nawu tufuukuluhu chachiwahi.—Tañenu Luka 11:9, 13.

Fwilenu Kwikala Ashinshika

19, 20. Chumanyi chitwatela kufwila kwila?

¹⁹ Yaaka yatama yalondeleluhu kufuma haheñukiliyi Solomoni mukudifukula kwalala kwesekeli chikupu kanshinshi kawambuña aNzambi. Mwalala antu amavulu azeyeli munjila yambokamboka. Ilaña, amakwawu atwalekeluhu kwikala ashinshika kudi Yehova.

²⁰ Mafuku ejima, twatalañanaña nayuma yitwafuukulañahu yesekaña kashinshi ketu. Ninetu tunateli kumwekesha kashinshi. Mpinji yejima tutwalekeñahu kwikala ashinshika kudi Yehova chitukwikalaña namuchima wumu, nakukuhwelela netu wukutwalekahu nakukiswila antu jindi ajila.—2 Samweli 22:26.

[Tumazu twaheshina]

Mukwakula Nenudi?

• Muloñadi wutwatela kukañesha chikupu kufwila maheta munyichima yetu?

• Chumanyi chikutukwasha kutwalekahu kwikala ashinshika kudi Yehova?

• Indi kudizoza kwatela kutwikwasha ñahi kwikala ajila kudi Nzambi?

[Malwihu aKuzatisha haKudiza]

[Nyevulu yidi hefu 15]

Komana mwekala nakukala kwakushinda kweseka?

[Nyevulu yidi hefu 16]

Neyi anayifumbi kufumba kwamuBayibolu komana mwalombaña nikutoñojokahu?