Yehova Wakamenaña Chikupu Ambuñindi Atushinakaji

“Nzambi waloña, hakavulamena mudimu wenu hela kukeña kumwakeñeli ijina dinduku.”—AHEBERU 6:10.

1, 2. (a) Chumanyi chimwanukaña neyi mumona muntu wudi nanvu? (b) Indi Yehova wayimonaña ñahi akwaKristu atushinakaji?

 NEYI mumona atushinakaji muchipompelu adi nanvu, komana mwanukaña nsañu yamuBayibolu yekala mumukanda waDanyeli? Muchimwenu chamumwekesheleluwu Danyeli, Yehova Nzambi wadimwekesheli neyi wukweti invu. Danyeli wasonekeli nindi: “Chinadiña nakutala, hiyakutenteka matanda awanta; Wakunyaka nanyaka hakutentama. Yuma yindi yavwalayi yitooka to-o neyi mpeza, nsuki jakumutu windi jidi neyi wanda wawuwahi.”—Danyeli 7:9.

² Kakavulu wanda wawuwahi wekalaña wutooka. Dichi invu ninkumbu yakutena nawu “Wakunyaka nanyaka” yamwekeshaña nawu Nzambi diyi wekalaku mpinji yejima nawa wukweti maana abadika, yumiyi yatela kutuleñela kumulemesha chikupu. Indi Yehova, Wakunyaka nanyaka, wamonaña ñahi atushinakaji ashinshika amayala niambanda? Izu  daNzambi dahosha nawu “mutu wanvu hichibañula chalubanji neyi akuwuwana munjila yakuloña.” (Yishimu 16:31) Eñañi, neyi mukwaKristu washinshika yekala nanvu, ichi hichinjikijilu chakukula chachiwahi nankashi kumesu aNzambi. Komana mwayimonaña amana kwenu niahela atushinakaji neyi chayimonañayi Yehova?

Muloñadi Wayilemeshelañawu niKuyakamena Chikupu?

3. Muloñadi wutwayikeñela chikupu amana kwetu atushinakaji?

³ Hakachi kanawa ambuña Nzambi atushinakaji akeñewa hadi amana kwetu aMwizaza Dalombolaña dawaYinsahu jaYehova, ankoñi endaña achidi kukalakala nialeka dehi, apayiniya azataña nañovu, niakwakushimwina aWanta apama dehi, amana kwetu nahela akalakalaña nakashinshi muyipompelu. Hadaha mwelukahu amana kwetu niahela anashimwini neyena nsañu yayiwahi hadi yaaka yayivulu nawa yakutalilahu yawu yinakoleshi atwansi nikuhimpa chihandilu chawu. Amana kwetu atushinakaji amakwawu, anakalakali nyidimu yamaneni chikupu nawa anomiki makabisha hamuloña wansañu yayiwahi. Yehova ‘ninduñu wamaana nikashinshi’ ahamekaña chikupu nyidimu yawu yakunyima niyakatataka yakalakalañawu mumudimu waWanta.—Matewu 24:45.

4. Muloñadi wutwatela kulemeshela atushinakaji akwaKristu nikuyilombelaku?

⁴ Atushinakaji amuchidiwu ashinshika atelela kuyihameka nikuyilemesha kudi ambuña aYehova Nzambi amakwawu. Nawa Nshimbi yaNzambi yenkeluwu Mosi yesekeja kwakamena nikulemesha atushinakaji nakumutiya Yehova woma. (Alevi 19:32) Twatela kuyilombelañaku awa atushinakaji ashinshika nikumuhameka Nzambi hanyidimu yawu yakukeña. Kapostolu Pawulu wadiña nakulombelaku akwawu akalakeleñayi nawu, atwansi niakulumpi.—Tañenu 1 Atesalonika 1:2, 3.

5. Chumanyi chitunateli kuhetelamu neyi tudikundaña nawakwakudifukula aYehova atushinakaji?

⁵ Kubombelahu, antu adi muchipompelu atela kuhetelamu neyi adikundaña nawatushinakaji akwaKristu. Atushinakaji akwakudifukula aYehova ashinshika aheta maana chikupu, kuhitila mukudiza, kushinshika, nimuyakuhumañana. Adiza kwikala awunda nikutoñojokelaku amakwawu nawa neyi hiyakudizisha yuma yadizawu kudi antu akusemuka, ekalaña amuzañalu chikupu. (Masamu 71:18) Atwansi ikalenu ashinshika kulonda muheti maana kufuma kuniyi nsulu yamaana neyi chimwazañalalaña hakutaha menji mwishima dakunama chikupu.—Yishimu 20:5.

6. Munateli kumwekesha ñahi kudi atushinakaji nenu mwayilemesha chikupu?

⁶ Komana mwayilejaña atushinakaji nenu mwayakamenaña neyi chayakamenañayi Yehova? Njila yimu yimwatela kwila mwenimu yidi yakuyileja chimwasweja kuyikeña hamuloña wakashinshi kawu nichimwalemesha yuma yafuukulañawu. Kubombelahu, neyi mulondela kufumba kwawu, munakumwekesha nawu mwayilemesha chikupu. Atushinakaji amavulu akwaKristu anukaña kufumba kwakuwahi kwayifumbiluwu kudi atushinakaji ashinshika nawa kuzatisha kufumba kweniku kunayikwashi chikupu muchihandilu chawu. *

Kuyakamena Munjila yaYiwahi

7. Indi Yehova wenkanyi mudimu weneni wakuhemba atushinakaji?

⁷ Nzambi wenka yisaka yikweti atushinakaji mudimu walema wakuyakamena. (Tañenu 1 Timotewu 5:4, 8.) Yehova watiyaña kuwaha neyi yisaka yihembaña ataña jawu atushinakaji nawa kwila mwenimu amwekeshaña nawu ayakamenaña atushinakaji neyi chayakamenañayi Yehova. Nzambi wakwashaña iyi yisaka nawa wayikiswilaña hamuloña wakuzata nañovu nikudihana kwawu. *

8. Muloñadi yipompelu chiyatela kwakamena akwaKristu atushinakaji?

⁸ Munjila yoyimu, Yehova watiyaña kuwaha neyi yipompelu yamunodu iluña yikwashaña atushinakaji ashinshika adi mukukankila abula  ataña jawu etiya hela abulaña kukeña kuyikwasha. (1 Timotewu 5:3, 5, 9, 10) Dichi yipompelu yamwekeshaña nawu ‘atiyilaña akwawu wushona, akeñañana neyi chamwivumu dawu, nawa ekalaña namuchima waluwi’ kudi atushinakaji. (1 Petulu 3:8) Iku kwakamena atushinakaji amuchipompelu akwilumbulula chiwahi kudi Pawulu hampinji yahosheliyi nindi neyi chidi chimu chamujimba wamuntu chikukaba, “yidi yejima yamwenaña hamu kukaba.” (1 Akorinda 12:26) Kukwasha atushinakaji munjila yayiwahi, kwamwekeshaña lunshimbi lwaheniyi Pawulu lwakwila nawu: “Sendañanenu yisenda yenu; neyi mukwila mwenimu, mukwila lushimbi lwaKristu chikupu.”—Aŋalija 6:2.

9. Indi wushinakaji waletaña kukalanyi hadi muntu?

⁹ Yisendanyi yikwetuwu atushinakaji? Amavulu azeyaña swayi. Atoñojokaña nawu hiyanateli kuzata nyidimu yapela yidi neyi, kuya nakudimona nandotolu, kufweta nyisonku, kutwala melu, kukomba mwitala, nikuteleka yakudyaku. Chineli wushinakaji kakavulu waleñelaña kubula kwikala nachipepa chakudya nikutiya mpwila, anateli kutoñojoka nawu hiyatela kudya chikupu hela kuvula kunwa menjiku. Chuma chochimu chinateli kuzatika nikuchaaku chakudiza Bayibolu nikuwanika kukupompa. Mesu nimatu awushinakaji ayikañeshaña kutaña nikutiyilila kumaprogiramu akuspiritu, nawa azeyaña hakwila nawu adiloñeshi kulonda kuya nakupompa kwawakwaKristu. Indi amakwawu anateli kuyikwasha ñahi awa atushinakaji?

Njila muMwatela Kuyikwashila

10. Chumanyi chatela kwilawu aeluda kulonda kukwasha chikupu atushinakaji?

¹⁰ Muyipompelu yayivulu, atushinakaji ayakamenaña munjila yayiwahi. Amana kwetu nahela akweti kukeña ayikwashañaku kuya nakuyilandila yuma, kuyitelekelaku, nikuyikombelaku. Ayikwashañaku atushinakaji kudiza, kudiloñesha nakuya kukupompa, nikutwalekahu kukalakala mumudimu wakushimwina mpinji yejima. A Yinsahu achidi atwansi ayaña nawu nawa ayiloñeshelaña mwakwendela. Neyi atushinakaji akañanyaña kwenda, anateli kutiyilila kuprogiramu kuhitila hanshiña hela kuyikwatila maprogiramu hamatepu kulonda kutiyililaku. Neyi kudi kukankila, aeluda aloñeshaña chachiwahi  kulonda kukwasha atushinakaji anakankili muchipompelu. *

11. Shimunenu ochu chisaka chimu chichakwashili mana kwetu wakashinakaji.

¹¹ AkwaKristu ejima atela kumwekesha chisambu nikuhana. Mana kwetu wakashinakaji chafwishiliyi ñodindi, hatwesheleña cheñi kufwetela itala chakadi mali añodindi atambulañawu neyi nyidimu yinamanuku. Yena niñodindi adizili Bayibolu nachisaka chimu—eyala namumbanda, nianyanawu awambanda ayedi, adiña netala deneni. Amwinkeli tupeka tuyedi nawu yashakameñamu. Hadi yaaka 15 ashakamini neyi chisaka chimu nawa adiña nakudiluñisha hamu. Atwansi adizili yuma yayivulu hamuloña wachikuhwelelu chindi niyakuhumañana yindi yayiwahi, niyena wahetelelumu mukudikunda kwakuwahi. Iwu mana kwetu wakashinakaji washakamini nawu kushika nimpinji yafwiliyi nayaaka 89. Ichi chisaka chamuhamekaña Nzambi hankisu jajivulu jatambwililuwu kuhitila mukudikunda naniwu mana kwetu. ‘Hiyajimbesha wufwetu wawu’ hakukwasha mukwawu kambanji kaYesu Kristuku.—Matewu 10:42. *

12. Chumanyi chimwatela kwila hakumwekesha kalemesha chikupu kudi amana kwetu niahela atushinakaji?

¹² Himunateli kukwasha mana kwetu hela muhela wakashinakaji neyi chakwashili ichi chisakaku, ilaña munateli kukwasha atushinakaji kuyaña nakupompa nimumudimu wakushimwina. Munateli cheñi kuyitambika kwitala denu hela hampinji yimunakunooka. Munateli kuyihempula, sweje neyi akata hela neyi anakukañanya kwenda. Hela chochu, mpinji yejima mwatela kuyilemesha muloña hiyantu akulumpi. Neyi chakwila achidi nañovu yakutoñojoka, atushinakaji akwaKristu mwatela kuyiteja kuhoshahu hansañu yejima yimunakufuukula yinateli niwena kuhoshahu. Hela anabuli ñovu yakutoñojoka anateli kwiluka neyi chakwila ayilemeshaña kudi amakwawu.

Yehova Hakavulamena Mudimu Wenuku

13. Muloñadi kutoñojokelaku atushinakaji akwaKristu chikwalemena?

¹³ Kutoñojokelaku atushinakaji chekala chalema nankashi. Kakavulu atushinakaji aneñaña hela kuhila hamuloña wakubula ñovu jakukalakala yuma yakoñeleñawu hampinji yadiñawu atwansi nihadiñawu nañovu. Chakutalilahu, muhela wakalakeleli Yehova chikupu hadi yaaka 50 nawa wadiña payiniya wampinji yejima, wakatili yikatu yamuleñeleleña kuzeya nawa chafuminumu, chamukalilileña chikupu kuwanika kukupompa. Neyi yesekeja chakalakeleñayi mumudimu wakushimwina kumafuku akunyima nachinakukalakalayi katataka, wadilaña. Hampinji yadilileñayi wahosheli nindi, “Kwosi nichuma chinakukoña.”

14. Indi ambuña aYehova ashinakaja dehi anateli kuwana ñahi kukolesha mumazu amumasamu?

¹⁴ Neyi mwashinakaja dehi, komana ninenu dichimwatoñojokaña? Indi kwiji mpinji yikwawu mwatoñojokaña nenu Yehova nayishiyi? Ñimbi yamasamu watela niyena dichatiyiliyi muyaaka yindi yawushinakaji, muloña walombeli kudi Yehova nindi: “Bayi wuñumba hawushinakaji wamuku; neyi ñovu jami jinahu bayi wunshiyaku. Eyi Nzambi, bayi wunshiyaku, hela ichi chinakula dehi chinela dehi ninvu kumutuku.” (Masamu 71:9, 18) Mwalala Yehova hadi kumushiya nsoneki yamasamuku, nawa ninenu Hakayishiyaku. Mwisamu dikwawu, Davidi wamwekesheli kukuhwelela muwukwashu waNzambi. (Tañenu Masamu 68:19.) Neyi mudi mukwaKristu wakashinakaji washinshika, kuhwelelenu nenu, Yehova wudi nanenu nawa wukutwalekahu kuyihemba mafuku ejima.

15. Chumanyi chinateli kuyikwasha atushinakaji kutwalekahu kutoñojoka hayuma yayiwahi?

¹⁵ Yuma yejima yimwakoña enu aYinsahu jaYehova atushinakaji niyimunakukoña katataka hamuloña wakumulemesha Nzambi, hayivulamenañaku. Bayibolu yahosha nawu: “Muloña Nzambi waloña, hakavulamena mudimu wenu hela kukeña kumwakeñeli ijina dinduku.” (Aheberu  6:10) Dichi bayi mutachika kutoñojoka mwaluwa nenu hamuloña wawushinakaji, Yehova hanakuyimona nindi mwalemaku. Fwilenu kukañesha chineñi, kwakama, nakwikala nayitoñojoka yayiwahi. Zañalalenu hankisu jimukweti nikuchiñeja kwenu kwakumbidi! Tukweti ‘mbidi nikukuhwelela’ kwakuwahi, nawa yuma yeniyi ayikana kudi Nleñi yetu. (Yeremiya 29:11, 12; Yililu 17:31; 1 Timotewu 6:19) Toñojokenuña hakuchiñeja kumukweti, twalekenuhu kutoñojoka hayuma yayiwahi neyi chatoñojokaña kansi, nawa bayi mudiwula kulema kwenu kwakwikala muchipompeluku! *

16. Muloñadi mana kwetu wumu wakashinakaji chatoñojokeliyi kuleka kukalakala hamu neyi eluda, nawa izaza dawaeluda damukolesheli ñahi?

¹⁶ Toñojokenu hadi Johan, wudi nayaaka 80 wakamenaña mpinji yejima ñodindi Sannie washinshika, nawa wakata. * Ahela adihimpaña kulonda kumuhemba Sannie hakwila nawu Johan yatweshi kuya nakupompa nikukalakala mumudimu wakushimwina. Hela chochu, katataka Johan wazeyeli chikupu nawa watachikili kutoñojoka nindi hatela kukalakala neyi eluda muchipompeluku. Iku nayeñashani madilu mumesu wahosheli nindi: “Hinatela kwikala eludaku. Hinakukalakala chikupu nyidimu yinakalakeleña muchipompeluku.” Akwawu aeluda amulejeli nawu chakutalilahu chindi niyuma yafuukulañayi yalema chikupu. Amukolesheli kutwalekahu kukalakala hamu neyi eluda, hela chakwila hakalakeleña chikupuku. Hamuloña wakumukolesha chikupu, Johan watwalekeluhu kukalakala hamu neyi eluda, nakukwasha chipompelu.

Yehova Wakamenaña Chikupu

17. Indi Bayibolu yayikana nawudi atushinakaji akwaKristu?

¹⁷ Nsona yalumbulula chikupu nawu atushinakaji anateli kutwalekahu kukalakala mumudimu waYehova hela chakwila anakumona kukala kwenzaña nawushinakaji. Ñimbi yamasamu wahosheli nindi: “Awa anatumbuwu mwitala daYehova . . . chakashikawu muwushinakaji saña asoñelawu nyikabu; akenzala nameji to-o, akatuuta ke-kee.” (Masamu 92:13, 14) Kapostolu Pawulu, wamweneña kukala kwakumujimba, ‘hazeyeluku, hela wuntu windi wahanzi wadiña nakuya nakunoña.’—Tañenu 2 Akorinda 4:16-18.

18. Muloñadi atushinakaji akwakwitiya niayihembaña chiyakeñelaña wukwashu wawantu amakwawu?

¹⁸ Yakutalilahu yayivulu yamakonu yinakumwekesha nawu atushinakaji anateli ‘kutwalekahu kusoña nyikabu.’ Ilaña kukala kwayikatu niwushinakaji kunateli kuleñela kudakamena, hela tuhu atushinakaji akweti yisaka yayakamenaña nawa yadihana kuyikwasha. Akwakuyakamena niwena anateli kuzeya. Chipompelu chikweti kukooleka nimudimu wakukwasha atushinakaji ninowu ayihembaña. (Aŋalija 6:10) Wukwashu wamuchidiwu hiwamwekeshaña nawu tunakuleja atushinakaji netu ‘tiyenu iyena, ikutenu’ chakadi kuyikwasha munjila yayiwahiku.—Yakoba 2:15-17.

19. Muloñadi akwaKristu atushinakaji ashinshika chiyatela kutalila mbidi nachikuhwelelu?

¹⁹ Wushinakaji wunateli kuleñela nyidimu yamukwaKristu kufunta mwishina, ilaña yaaka yinahandiwu hiyamanishaña kukeña kwaYehova kudi ambuñindi atushinakaji ashinshikaku. Kwambukaku, awa akwaKristu ashinshika alema kumesu indi, nawa hakayishiyaku. (Masamu 37:28; Isaya 46:4) Yehova wakayihemba nikuyikiña muwushinakaji wawu wejima.—Masamu 48:14.

[Tumazu twaheshina]

Mukwakula Nenudi?

• Muloñadi wumwalemeshelaña atushinakaji akwaKristu ashinshika?

• Tunateli kuyakamena ñahi akwetu akwakudifukula atushinakaji?

• Chumanyi chatela kuyikwasha ambuña aYehova atushinakaji kutoñojoka hayuma yayiwahi?

[Malwihu aKuzatisha haKudiza]

[Nyevulu yidi hefu 23]

Antu amuchipompelu alemesha chikupu atushinakaji