Ayinu Diyi Nyaka Yakala

BAYIBOLU yashimwineñahu dehi nawu muchidi wamuntu wakamona “nyaka yakala.” Yalumbulula iyi mpinji nawu ‘mafuku akukuminina.’ (2 Timotewu 3:1-5; 2 Petulu 3:3-7) Yesu Kristu wahosheli hachilaaka chochimu hakwakula lwihu lwehwiluwu atumbanji twindi kutalisha ‘hamba kakuma nyaka yamakonu.’ (Matewu 24:3) Komana tunakushakama mumafuku akukuminina? Esekejenu yuma yashimwineñahu dehi Bayibolu nayileji yakatataka yinasonekuwu heshina, nawa kunkulululenu enu aweni.

Yuma yashimwineñahu dehi Bayibolu: njita yamukaayi kejima—Luka 21:10; Chimwekeshu 6:4.

Yileji yakatataka yahosha nawu: “Muyaaka 100 yinahituhu antu anafwi kunjita anabadiki kuvula namapampa kasatu antu afwili muyaaka yamuma 1900, nakufunta kumpinji yavwalikiliyi Kristu.”—dichahosha mukanda waWorldwatch Institute.

Yuma yashimwineñahu dehi Bayibolu: nzala niyipupu—Luka 21:11; Chimwekeshu 6:5-8.

 Yileji yamakonu yahosha nawu: Muchaaka cha 2004 yihita yawantu yakushika ku 863 akatili hamuloña wanzala, avulililuku nayihita 7 kubadika mu 2003.—Dichahosheli mutayi waUnited Nations Food and Agriculture Organization.

Mutayi waWorldwatch Institute wahosheli nawu, antu kukamwihi nabiliyoni yimu ashakamaña mumatala atama; 2.6 biliyoni hiyakweti kwakunatila swaduku; 1.1 biliyoni hiyanwaña menji amawahuku.

Chikatu chamashika chinakukabisha antu akushika kuyihita 500; yihita yawantu 40 akweti musoñu waHIV-AIDS; chikatu cha TB chajahili yihita yawantu 1.6 mu 2005.—Dichahosha mutayi waWorld Health Organization.

Yuma yashimwineñahu dehi Bayibolu: kukisañana iseki—Chimwekeshu 11:18.

Yileji yamakonu yahosha nawu: “Yuma yinakoñi muchidi wamuntu yinakumwekesha nawu nyichidi yayivulu yawatunyama ninyitondu keña yijiyi.” “Kukamwihi nachibalu chayuma yekala heseki yakwashaña chihandilu yinakujiyilaku mukaayi kejima.”—Dichahosha mutayi waMillennium Ecosystem Assessment.

Mutayi waNASA, Goddard Institute for Space Studies, wahosha nawu, “Mpepela yafumaña mumatala amagilasi mwatumbañawu nyitondu, yinaleñeli mpepela yaheseki kuleta wubanji nawa yatela yikakisañana iseki chikupu.”

Yuma yashimwineñahu dehi Bayibolu: nsañu yayiwahi yaWanta waNzambi akayishimwañena mwahita matuña—Matewu 24:14; Chimwekeshu 14:6, 7.

Yileji yamakonu yahoshaña nawu: Muchaaka cha 2007 aYinsahu jaYehova akushika ku 6,957,854 azatili mawola akubadika ha 1.4 biliyoni mukushimwina nsañu yayiwahi kutalisha haWanta waNzambi mumatuña 236.—Dichahosha 2008 Yearbook of Jehovah’s Witnesses.

Neyi chinashimuniwu hewulu, Bayibolu yashimwineñahu dehi nawu hela chakwila kudi yuma yatama, kudi chuma chatwileñelaña kukuhwelela yuma yidi kumbidi. Yesu wahosheli ‘hansañu yayiwahi’ yaWanta waNzambi. Indi Wanta waNzambi hichumanyi? Muloñadi chiwakoleshelaña muchidi wamuntu kukuhwelela yuma yayiwahi yidi kumbidi? Indi Wanta waNzambi wakayikoñela chumanyi?

[Mazu ekoku adi hefu 5]

Bayibolu yashimwineñahu dehi yuma yinakumwekana mukaayi makonu