Katataka Iseki Dikali Paradisa!

“Tata yetu wekala mwiwulu, ijina deyi dijili Wanta weyi winzi. Muchima weyi awili hamaseki neyi chawilañawu mwiwulu.” —Matewu 6:9, 10.

IKU KULOMBA kwatenañawu nawu Kulomba kwaMwanta, kwaleñelaña muchidi wamuntu kwikala nachikuhwelelu. Munjilanyi?

Neyi chinamwekeshi Kulomba kwaMwanta, Wanta waNzambi wakaleñela nkeñelu yaNzambi kuyila hanu hamaseki neyi chinakuyilawu mwiwulu. Nawa nkeñelu yaNzambi yakabalumuna iseki kwikala Paradisa. (Chimwekeshu 21:1-5) Indi Wanta waNzambi hichumanyi, nawa wakabalumuna ñahi iseki kwikala Paradisa?

Nfulumendi Yalala

Wanta waNzambi hinfulumendi yalala. Hakwila nawu nfulumendi yitwalekuhu nakuyula, chiña kwikala anyuli, nshimbi niayilolu. Komana Wanta waNzambi wukweti yuma yeniyi? Talenu Bayibolu chiyakula awa malwihu asatu:

Indi anyuli amuWanta waNzambi hiyanyi? (Isaya 33:22) Yehova Nzambi watonda Mwanindi, Yesu Kristu kwikala nlomboli muniwu Wanta. (Matewu 28:18) Kuhitila muwunlomboli waYehova, Yesu natondi antu “akunyichidi yejima, akumadimi ejima, akumatuña ejima, akunyuza yejima” akayula nindi neyi “[anyanta] hamaseki.”—Chimwekeshu 5:9, 10.

Indi Wanta waNzambi wukweti nshimbinyi yatela kwovwahilawu antu? Nshimbi jikwawu jakeñekaña antu kukoñahu chuma chimu. Yesu wateneni nshimbi jasweja kulema hakachi kanshimbi jeniji, nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.”—Matewu 22:37-39.

Nshimbi jikwawu jalejaña antu akayulewa naWanta waNzambi nawu atela kutondolwela yililu yikwawu. Chakutalilahu Bayibolu yashimuna hatooka nawu: “Bayi ayidimbaku; hela ayivumbi, hela akwakupesha, hela akwawusenji, hela amayala adilisha neyi ambanda, hela aditamishaña nawakwawu amayala, hela amakombi, hela akwalwisu, hela akwakusheta walwa, hela akwakutukana, hela akwanyilami, hiyamba kaswana wanta waNzambuku.”—1 Akorinda 6:9, 10.

Indi antu amuWanta waNzambi hiyanyi? Yesu wesekejeli antu amuWanta waNzambi kudi anyikoku. Wahosheli nindi: “Akatiya izu dami; akekali mukanka wumu nikabiña wumu.” (Yowanu 10:16) Hakwila nawu muntu yakekali muWanta waNzambi, hatela kuhosha hohu nindi wamulondelaña Kambiña Walala Yesuku, ilaña watela kukoña yuma yahoshañayi. Yesu wahosheli nindi: “Antu ejima akuntenatena  nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu.”—Matewu 7:21.

Dichi antu akayulañawu kudi Wanta waNzambi azatishaña nikulemesha ijina daNzambi, Yehova, neyi chochelileñayi Yesu. (Yowanu 17:26) Ovwahilaña lushimbi lwaYesu lwakudizisha antu ‘nsañu yawanta yayiwahi.’ (Matewu 24:14; 28:19, 20) Nawa amwekeshaña kukeña kwakweni kudi wumu namukwawu.—Yowanu 13:35.

Mpinji ‘yaKujilumuna Antu Anakukisañana Iseki’

Yuma yinakumwekana mukaayi yinakumwekesha nawu Wanta waNzambi keña winzi kulonda kuleta kuhimpa kweneni heseki. Tweluka ñahi? Hamakombakaji ayaaka yiyedi yinahituhu, Yesu walumbulwili hachinjikijilu chimu chikamwekesha nawu “Wanta waNzambi keña wushiki.” (Luka 21:31) Neyi chinahoshi chibaba chinafumihu, yinjikijilu yeniyi yinakumwekana hatooka mukaayi kejima.

Chumanyi chikalondelahu? Yesu wakwili nindi: “Henohu hamba kekala lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku.” (Matewu 24:21) Ihuñu denidi hiyakadileta kudi muntuku. Ilaña Nzambi diyi ‘wakajilumuna akisañanaña iseki.’ (Chimwekeshu 11:18) Antu atama, akweti yililu yalwisu anakukisañana kaayi, “akayifumisha mwituña.” Hakwila akwakuloña amukalakelaña Nzambi namuchima wumu, “diwu akashalamu.”—Yishimu 2:21, 22.

Yehova Nzambi wukweti muloña wawuwahi wakakoñelayi mwenimu. Muloñadi? Talenu hanichi chakutalilahu: Neyi chakwila mukweti itala denu. Antu amakwawu asonkelaña mutupeka ekala chiwahi nawa atoñojokelañaku akwawu; afwetaña mali nikuwahisha mwashakamañawu. Hela chochu, amakwawu akalisha nawa ekala nalwisu; akanaña kufweta mali nawa hiyahembaña itala chiwahuku. Hela chakwila mukuyisoñamisha ñahi, atwalekañahu kuhemba itala chatama. Chumanyi chimwatela kwila? Hamu neyi mwiniitala, munateli kuyihañamu.

Hohamu, Yehova Nzambi hakwikala Nleñi yeseki niyuma yejima yekalahu, wukweti wuswa wakusakula antu akaswana ituña. (Chimwekeshu 4:11) Yehova wahosha nindi nkeñelu yindi yidi yakufumisha antu atama heseki adiwulaña nkeñelu yindi nawa aluwañeshaña akwawu.—Masamu 37:9-11.

Paradisa Akayifuntisha

Katataka Wanta waNzambi wunakuyulewa naYesu Kristu wutachiki kuyula iseki. Yesu wateneni ichi chiyulu chachiha nindi ‘hikuleña kwakwiha.’ (Matewu 19:28) Indi nshakaminu yakekala ñahi? Tiyenu chakana Bayibolu:

Masamu 46:9. “Diyi wakumishaña majita mwakumina iseki dejima.”

Isaya 35:1. “Niisaña nimpata yakadi antu yakatiya kuwaha; ikuna dakazañalala dakakenuka neyi wuluya walubanji.”

Isaya 65:21-23. “Antu ami inatonda akaluña luñe-e nanyidimu yamakasawu. Hiyakakabakana chamukunkulwayuku, hiyakasemena muuduku, muloña aneli dehi anyana kawakoolekeshawu dehi kudi Yehova, hamu nawanyanawu akasemawu.”

Yowanu 5:28, 29. “Mpinji yakenza henohu antu ejima adi mumajamu akatiya izu [daYesu] akedikamu.”

Chimwekeshu 21:4. “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneñaku hela kudila hela kukataku.”

Yuma Yatwileñelaña Kukuhwelela

Komana mwakuhwelela yikaninu yamuBayibolu? Bayibolu yashimwineñahu dehi nawu antu amavulu hiyakakuhwelelaku. Yahosha nawu: “Hamafuku akukuminina kwakenza akwakuseha . . . nakwila mwaya kufwila kwawu  aweni kwatama; nawu, Indi kwinza kwindi kwakaniniyi kwokudihi? Muloñadi chochakaminuwu ankakulula tulu, yuma yejima chochiyekala, neyi chiyadiñi hatachi haleñeluwu yuma.” (2 Petulu 3:3, 4) Ilaña awa akwakusekesha atoñojokaña mwaluwa chikupu. Shinshikenu hayikuma yiwana yatela kuyileñela kukuhwelela chahosha Bayibolu:

(1) Nzambi wajilumwini antu atama kunyuma. Dibaji damumafuku aNowa hichakutalilahu chachiwahi.—2 Petulu 3:5-7.

(2) Izu daNzambi dashimwineñahu dehi chikupu yuma yinakumwekana mukaayi makonu.

(3) Yuma yejima hiyidi neyi “chochiyekala, neyi chiyadiñi hatachi haleñeluwu yuma[ku].” Iseki dinasweji kutaminaku muyuma yinakumwekana munyuza, yililu, nikutamisha mpata.

(4) “Ninsañu iyi yawanta yayiwahi” anakuyishimwañena mwahita iseki, yinakumwekesha nawu ‘kukumisha keña kushiki.’—Matewu 24:14.

A Yinsahu jaYehova anayitambiki kulonda kutachika kudiza nawu Izu daNzambi, Bayibolu, kulonda kudizilaku yuma yayivulu kutalisha hakuchiñeja kwawumi wahaya nyaka muchiyulu chaWanta waNzambi. (Yowanu 17:3) Eñañi, muchidi wamuntu wunakuchiñeja mpinji yayiwahi yakumbidi. Mpinji yayiwahi chikupu keña yishiki! Komana mwakekalaku muniyi mpinji yayiwahi?

[Mazu ekoku adi hefu 7]

Antu ahoshaña nawu yuma yikatwalekahu kwikala neyi chochiyekala adidimbaña chikupu

[Mwevulu wudi hefu 8]

Komana mwakekalamu munidi ituña dadiha?