Yuma Yitwadizilaña Kudi Yesu

Kutalisha haKwakamena Antu

Muloñadi chitwatela kutiyila antu luwi?

Komana mwatiyilaña antu luwi hela chakwila antu hiyayitiyilaña luwiku? Neyi tunakukeña kumwimbujola Yesu, twatela kutiyila niantu atuhela luwi. Yesu wahosheli nindi: “Neyi mukukeña ayikeñenu hohu, akuyihamekela hadihi? Hela akwanshidi akeñaña ayikeña nawa. . . . Ilaña keñenu ayilumbu jenu, . . . mwakekala nianyana kaMukwakubadika; muloña yena watiyilaña luwi niantu abulaña kusakilila, niatama.”—Luka 6:32-36; 10:25-37.

Muloñadi wutwatela kwanakena antu?

Neyi tunaluwañeshi, twakeñaña netu Nzambi yatwanakeni. Yesu wadizishili nindi chachiwahi kulomba kulonda Nzambi yatwanakeni. (Matewu 6:12) Hela chochu, Yesu wahosheli cheñi nindi Nzambi wukutwanakena chiña hohu neyi twaanakenaña amakwawu. Wahosheli nindi: “Neyi mukwanakena antu nyiloña yawu, niTata yenu wamwiwulu wakayanakena ninenu nawa. Neyi mukubula kwanakena antu nyiloña yawu, Tata yenu niyena hakayanakena nyiloña yenuku.”—Matewu 6:14, 15.

 Indi Yisaka yinateli kuzañalala ñahi?

Hela chakwila Yesu hasumbwiluku, tunateli kudizilaku yuma yayivulu kudi yena kutalisha hakuzañalesha chisaka. Watwimikila chakutalilahu chitwatela kwimbujola, kuhitila mumazu nimuyililu. Shinshikenu haniyi yikuma yisatu:

1. Iyala watela kukeña ñodindi neyi chakeñayi mujimba windi. Yesu wayimikila amayala chakutalilahu. Wayilejeli atumbanji twindi nindi: “Tiyenu, nukuyileja lushimbi lwalwiha nami, Mukeñañani.” Kukeñañana nakushika hadi? Wahosheli nindi: “Chinayikeñami, ninenu nawa keñañanenu.” (Yowanu 13:34) Hakutalisha ilu lunshimbi kudi amayala, Bayibolu yahoshaña nawu: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola . . . Mwomumu niamayala niwena akeñi añodi jawu aweni neyi chakeñawu nyijimba yawu. Muntu wakeña iñodindi wadikeña yomweni. Muloña hikwekala muntu wakwatahu dehi nkunyi namujimba windi yomwenuku, wawudiishaña nikuwuhemba, chochelañayi Kristu nachipompelu nawa.”—Aefwesesa 5:25, 28, 29.

2. Adisumbula atela kwikala ashinshika kudi wumu namukwawu. Kwila wuvumbi namuntu wabula kwikala mwini kweyi hinshidi kumensu aNzambi nawa kwakisañanaña yisaka. Yesu wahosheli nindi: “Himunatañi nsañu yakwila nawu, . . . Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu. Hiyadi cheñi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku. . . . Nukuyileja nami, muntu wukuseña iñodindi, chiña namuloña wawuvumbi hohu; neyi wukumuseña chakadi muloña wawuvumbi hakusumbula wacheñi, neli wuvumbi.”—Matewu 19:4-9.

3. Anyana atela kwovwahila anvwali jawu. Hela chakwila Yesu wadiña wawanina ilaña anvwali jindi hiyadiña awaninaku, hakwikala mwana wayovwahilileña. Bayibolu yashimuna hadi Yesu hadiñayi nayaaka 12 nawu: “Hakukunkumuka nawu, hakushika nawu kuNazareta; hakuyovwahilaña.”—Luka 2:51; Aefwesesa 6:1-3.

Muloñadi wutwatela kuzatishila iyi nshimbi?

Yesu wahosheli kutalisha hayuma yadizishiliyi atumbanji twindi nindi: “Neyi muneluki yumiyi himukuyila, munakooleki.” (Yowanu 13:17) Hakwila nawu twikali akwaKristu alala, twatela kuzatisha kufumba kwatulejeliyi Yesu kutalisha hakwakamena antu. Wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.”—Yowanu 13:35.

Neyi munakukeña kwilukilahu nsañu yikwawu, talenu kapetulu 14 kamukanda waChumanyi Chacheni Chatañishaña Bayibolu? *

[Tumazu twaheshina]

[Mwevulu wudi hefu 18, 19]

Chishimu chaYesu chamwana walukisa chatudizishaña nawu twatela kutiyila antu luwi nikuyanakena.—Luka 15:11-32

[Mwevulu wudi hefu 19]

Adisumbula atela kwikala ashinshika kudi wumu namukwawu