Yehova Wadiña “Mukwakupulwisha” kuMpinji yaKunyima

“Nyakalaku winzi kudami, eyi Nzambi. Yeyi nkwashi yami, yeyi mukwakumpulwisha.”—MASAMU 70:5.

1, 2. (a) Mpinjinyi yalombañawu akwakudifukula aNzambi wukwashu kudi yena? (b) Lwihwinyi lutwatela kudihula nawa kudihi kutwatela kuwana ñakwilu?

 HAMPINJI yayiluwu nakunooka, anvwali jamumbanda wasumbuka wayaaka 23 atiyili nawu munayi mwanawu mwakushiita. Atoñojokeli nawu anamujahi. Hohenohu aloñejeli yuma yawu nakufunta kwitala, njila yejima alombeleña kudi Yehova kulonda yayikwashi. Chinsahu wayaaka 20 anamuwani nachikatu chikamuleñela kwikala nakalepa. Chakadi nikumba mpinji hakulomba kudi Yehova. Mumbanda wamujiki nakufwila chikupu kuwana mudimu hakweti mali ashikilaku akulanda yakudya yindi nimwanindi wamumbanda wudi nayaaka 12. Hakulomba chikupu kudi Yehova. Eñañi, neyi atalañana nakweseka kwasweja nikukala, akwakudifukula aNzambi alombaña kudi yena kulonda yayikwashi. Komana mwalombahu dehi kudi Yehova kulonda yayikwashi neyi mwikala mukukala kwasweja?

² Lwihu lwalema lutwatela kudihula ludi nawu: Komana tunateli kukuhwelela chikupu Yehova kwakula kulomba kwetu kwakukeña wukwashu? Ñakwilu yakukolesha chikuhwelelu chetu yawanikaña muMasamu 70. Idi isamu donenewa adisonekeli kudi Davidi, mukwakudifukula waYehova washinshika watalañeni nakweseka kwakuvulu nikukala muchihandilu chindi. Iwu ñimbi yamasamu wonenenuwu wahosheli kudi Yehova nindi: “Eyi Nzambi. Yeyi nkwashi yami, yeyi mukwakumpulwisha.” (Masamu 70:5) Kutoñojoka chikupu haMasamu 70 kunateli kutukwasha kwiluka muloña wutwatelela kulomba kudi Yehova neyi tumona kukala nikukuhwelela chikupu netu diyi ‘mukwakupulwisha.’

“Yeyi Mukwakumpulwisha”

3. (a) Indi muMasamu 70 mwekala kunyakalanyi kwakulomba wukwashu? (b) Chikuhwelelwinyi chamwekesheliyi Davidi muMasamu 70?

³ Masamu 70 yatachika nikumana namazu akunyakala kulomba wukwashu kudi Nzambi. (Tañenu Masamu 70:1-5.) Davidi wamulombeli Yehova nindi “nyakala wumpulwishi” nawa “bayi wulabajalaku.” Mumavasi 2-4, Davidi wahosheli hayuma yitanu yikamwekana chikupu.  Kasatu wahosheli hadi antu akeñeleña kumujaha. Davidi walombeli kudi Yehova nindi yatweshi kuyishinda awa ayilumbu nikuyitiyisha nsonyi hakutama kwawu. Kulomba kuyedi kunahiñihu, muvasi 4, kwahosha hadi antu jaNzambi. Davidi walombeli nindi antu amukeña Yehova atela kuzañalala nikumulemesha. Hakukunkulula isamu dindi, Davidi wahosheli kudi Yehova nindi: “Yeyi nkwashi yami, yeyi mukwakumpulwisha.” Ilukenu nenu Davidi hahosheli nindi, “Mwani ankwashi,” neyi kwiji nakulomba cheñuku. Ilaña wahosheli nindi, “eyi yeyi,” nakumwekesha chikuhwelelu chindi. Davidi wakuhweleli nindi wakatambwila wukwashu waNzambi.

4, 5. Chumanyi chitukudizila kudi Davidi kufuma muMasamu 70, nawa twatela kukuhwelela netudi?

⁴ Indi Masamu 70 yamwekeshaña nawudi hadi Davidi? Hampinji yatalañeniyi nawayilumbu afwilileña kumujaha, Davidi hafukwiluhu kumanisha kukala yomwenuku. Ilaña, wakuhweleleli nindi Yehova wakayijilumuna akwankunyi hampinji yindi nawa munjila yatelela. (1 Samweli 26:10) Davidi watwalekeluhu kwiluka chikupu nindi Yehova wakwashaña nawa wapulwishaña ejima amukeñakeñaña. (Aheberu 11:6) Davidi welukili nindi awa akwakudifukula alala eluka chuma chayileñelaña kuzañalala nikumulemesha Yehova kuhitila mukulejaku amakwawu hakulema kwindi.—Masamu 5:11; 35:27.

⁵ Kufwana Davidi, tunateli kukuhwelela chikupu netu Yehova diyi Nkwashi yetu nawa diyi ‘Mukwakutupulwisha.’ Dichi, neyi tumona kweseka kwasweja hela neyi tunakukeña chikupu wukwashu, twatela kulomba kudi Yehova kulonda yanyakali kutukwasha. (Masamu 71:12) Indi Yehova nateli kwakula ñahi kulomba kwetu kwakukeña wukwashu? Henohu kanda tuhanjeki hanochu Yehova chatela kutukwashayi, tusambilenu kushinshika hajinjila jisatu mwamupulwishililiyi Davidi, nakumukwasha hampinji yadiñayi mukukankila chikupu.

Amupulwishili Kudi Akwankunyi

6. Chumanyi chamukwashili Davidi kwiluka nindi Yehova wapulwishaña antu aloña?

⁶ Kufuma munyikanda yamuBayibolu yadiñayi nayu hayina mpinji, Davidi welukili nindi antu aloña atela kushindamena hadi Yehova kulonda yayikwashi. Hampinji yaleteliyi Yehova Dibaji hakaayi katama, wapulwishili Nowa nichisaka chindi chamwakamineña Nzambi. (Kutachika 7:23) Chanokesheliyi Yehova kesi nimakala akesi hadi antu atama adiña muSodoma naGomora, wamupulwishili Loti muntu waloña nianyanindi awambanda ayedi. (Kutachika 19:12-26) Hampinji Yehova yajilumwiniyi Fwaro wadiña wadinka wanta niamashidika indi haKaluñalwiji Kachinana, Wapulwishili antu jindi nawa wayikiñili kulonda kubula kujilumuka. (Kwidika 14:19-28) Komana chidi chakuhayamisha hakwiluka nawu Davidi wamuhamekeli cheñi Yehova mwisamu dikwawu hamu neyi “Nzambi yetu watupulwisha dehi hahavulu”?—Masamu 68:20.

7-9. (a) Chumanyi chamuleñeleli Davidi kukuhwelela muñovu jaNzambi jakupulwisha? (b) Hinyi wahamekeliyi Davidi hakumupulwisha?

⁷ Cheñi kudi chuma chamuleñeleli Davidi kukuhwelela chikupu ñovu yaYehova yakumupulwisha. Davidi wadimweneneni yomweni nindi “makasa ahaya nyaka” aYehova anateli kupulwisha antu Amukalakelaña. (Kuhituluka 33:27) Yehova wamupulwishili Davidi kapampa kakavulu kudi “ayilumbu.” (Masamu 18:17-19, 48) Toñojokenu hanichi chakutalilahu.

⁸ Hampinji ambanda amuIsarela hamuhamekeleñawu Davidi hamuloña wakukuluka yitembi mukwasa njita, Mwanta Sawulu wamutiyilili Davidi ichima chikupu chakwila wamwasali iyoña kapampa kayedi. (1 Samweli 18:6-9) Kapampa kejima kayedi Davidi waleyeli iyoña. Komana Davidi wapulukili hamuloña wakukuluka yitembi nihakwikala mushidika welukisha kuleya? Inehi. Nsañu yamuBayibolu yalumbulula nawu “Yehova wadiña nayena.” (Tañenu 1 Samweli 18:11-14.) Nkumininaku, chelili kafuta kaSawulu kakukeña kujaha Davidi kudi aFwilistinu kafuñunuki, “Sawulu wamweni, welukili nindi, Yehova wudi naDavidi.”—1 Samweli 18:17-28.

⁹ Indi Davidi wahamekelinyi hakumupulwisha? Tumazu twahewulu twaMasamu 18 twahosha nawu Davidi “wahosheli naYehova mazu  akamina kanu, mwifuku dina deliliyi Yehova namupulwishi dehi . . . nikudi Sawulu.” Davidi wamwekesheli muzañalu windi mukamina, nindi: “Yehova diyi ilola dami, diyi mpwembu yami, diyi wampulwishaña, diyi Nzambi yami, diyi ilola dami dakola ngu, dimu nukubatamina.” (Masamu 18:2) Kwiluka netu Yehova wapulwishaña antu jindi kwakoleshaña chikuhwelelu chetu.—Masamu 35:10.

Amukwashili Hampinji Yakatiliyi

10, 11. Chumanyi chatuleñelaña kwiluka mpinji yadiña nakuyekelayi Davidi nayikatu yashimunawu muMasamu 41?

¹⁰ Mpinji yimu Mwanta Davidi wakatili kankati keneni, kiyashimuna muMasamu 41. Hampinji yadiñayi mumbalu, Davidi wakatili chikupu chakwila ayilumbu jindi amakwawu atoñojokeleña nawu “hakuhindukamu nawa cheñuku.” (Vasi 7, 8) Mpinjinyi Davidi yakatiliyi chikupu? Yuma yashimunawu munidi isamu yinadifwanuku nampinji yadiñayi Davidi mukukala chelili mwanindi Abisalomi yakeñi kumutambula wanta.—2 Samweli 15:6, 13, 14.

¹¹ Chakutalilahu, Davidi wahosheli hadi ibwambu dindi wakuhweleleliyi, wadileñayi nindi cheña chimu, nindi wamufukejeleli. (Vasi 9) Ichi chinateli kutwanukisha chuma chamwekeni muchihandilu chaDavidi. Hampinji yadikañiliyi Abisalomi, Ahitofweli mukwakumuleja Davidi maana wakuhweleleliyi wamufukejeleli, nawa wadibombeli naAbisalomi mukudikaña namwanta. (2 Samweli 15:31; 16:15) Toñojokenu haniyi mpinji mwanta nakuyekela nakankati mumbalu, hakweti ñovu yakunyamukaku, dichi hakwiluka nindi antu amukwatilili kafuta anakumukombelela nawu yafwi hohu kulonda atwalekuhu nakufuukula kwawu kwatama.—Vasi 5.

12, 13. (a) Davidi wakuhweleleli nindidi? (b) Indi Nzambi wamukolesheli ñahi Davidi?

¹² Davidi watwalekeluhu kumukuhwelela ‘mukwakupulwisha.’ Kutalisha kudi kambuña Yehova waloña wudi muyikatu, Davidi wahosheli nindi: “Yehova wakamupulwisha mwifuku datama. Chakakamujokayi hakadidi nakuzeya Yehova wakamukwashaku; chakukatayi eyi wamuloñeshelaña kadidi kindi kejima.” (Masamu 41:1, 3) Talenu cheñi chikuhwelelu chadiña naDavidi, neyi chahosheliyi munawa mazu akwila nawu “Yehova wakamukwasha.” Davidi welukili chikupu nindi Yehova wakamupulwisha. Munjilanyi?

¹³ Davidi hakuhweleleli nindi Yehova wukukoña chihayamisha kulonda kuuka yikatu yinduku. Ilaña, wakuhweleleli chikupu nindi Yehova “wakamukwashaku” dikwila nawu, kumukwasha nikumukolesha hampinji yayikatu. Chakadi nikujina Davidi wakeñeleña wukwashu wamuchidiwu. Kubombela hayikatu yamuzeyesheli, Davidi amunyeñumukili kudi ayilumbu amuhosheleña yuma yatama. (Vasi 5, 6) Hadaha Yehova wamukolesheli Davidi kuhitila mukumukwasha kwanuka yuma yakumukundeja. Davidi wahosheli nindi: “Hakwila ami wankwataña chachiwahi nanichi chinashinshika.” (Vasi 12) Cheñi Davidi watela wakolesheweli kuhitila mukutoñojoka nindi hela chakwila wazeyeli nayikatu nawa ayilumbu jindi amuhosheleña yuma yatama, Yehova wamumweneña nindi himuntu wukweti kashinshi. Nkumininaku Davidi wakoleli. Komana hichinatukoleshi hakwiluka netu Yehova wakwashaña antu akataku?—2 Akorinda 1:3.

Amwinkeli Yakudya

14, 15. Mpinjinyi Davidi niantu jindi yekaliluwu mukukankila kwakweni, nawa ayikwashili ñahi?

¹⁴ Chekaliliyi mwanta wamuIsarela, Davidi wadiluñishileña nayakudya yayiwahi nikunwa nawa watambikileña antu amavulu kulonda kudya nawu. (2 Samweli 9:10) Hela chochu, mpinji yimu Davidi wakankilili yakudya niyakunwa. Chelili mwanindi Abisalomi yadikañi nakukeña kumutambula wanta, Davidi niantu amakwawu ashinshika amukwashileñaku atemukili muYerusalema. Atemukilili mwituña daGileyadi, kumusela waKaloña kaYodana. (2 Samweli 17:22, 24) Hamuloña wakwila atemukileña antu ayihañileña, chihashimbwili chanti Davidi niantu jindi akankilili yakudya niyakunwa hamu tuhu nikunooka. Hanu dinu adi kuwana kudihi yakudya niyakunwa muchina chinkalampata mwadiñawu?

 ¹⁵ Nkumininaku, Davidi niantu jindi ashikili mumukala waMahanayimi. Muwuna mukala adibulakeni nawamayala asatu akadi woma Shobi, Makiri, niBazilayi. Adihanini nakusha wumi wawu hakatoña kulonda kukwasha mwanta watondeluwu kudi Yehova, muloña neyi Abisalomi watambwili wanta, chakadi nikujina wadi kumwesha chikupu ikezeñi antu ejima amukwashileñaku Davidi. Chelukiluwu kukala kwadiña naDavidi niantu jindi, awa amayala asatu akashinshi aleteli yuma yakeñeleñawu, kushilahu nitudidi, tidiku, bali, tidiku yakwocha dehi, makundi, nikambolokonyi, niwuchi, nimanteka, ninyikoku. (Tañenu 2 Samweli 17:27-29.) Kashinshi kabadika nichisambu chamwekesheluwu awa amayala asatu chamuzañalesheli Davidi chikupu. Komana Davidi wateleli kujimbala iyi yuma yamukoñeleluwu?

16. Hinyi wamwinkeli Davidi niantu jindi yakudya?

¹⁶ Hela chochu, hinyi wamwinkeli Davidi niantu jindi yakudya? Davidi welukili chikupu nindi Yehova wakamenaña antu jindi. Chakadi nikujina, Yehova nateli kusañumuna ambuñindi amakwawu kulonda kukwasha mukwawu mukwakudifukula wudi mukukankila. Hampinji yadiñayi nakutoñojokayi hayuma yamwekeni mwituña daGileyadi, chakadi nikujina Davidi welukili nindi luwi lwamumwekesheleluwu ana amayala asatu lwamwekesheli kwakamena kwaYehova. Kukamwihi nakufwa, Davidi wasonekeli nindi: “Nadiña kansi, hanu nakula dehi nankashi, kanda nimonañahu dehi hashiyilawu muntu waloña [kubombelahu niyamweni], hela anyanindi nakulomba yakudyaku.” (Masamu 37:25) Ichi hichuma chakukundeja chikupu hakwiluka nawu Yehova wakwashaña ambuñindi anakankili.—Yishimu 10:3.

‘Yehova Weluka Mwakupulwishila Antu’

17. Indi Yehova kakavulu wamwekesha chumanyi?

¹⁷ Davidi wadiña hakachi kawakwakudifukula amavulu apulwishiliyi Yehova mumpinji yakunyima. Kufuma tuhu mumpinji yaDavidi, kakavulu Nzambi wamwekesha walala wamazu akapostolu Petulu wakwila nawu: “Komana Yehova weluka kupulwisha akwakumwakama mukweseka.” (2 Petulu 2:9) Tutalenu hayakutalilahu yikwawu yiyedi.

18. Indi Yehova wapulwishili ñahi antu mumafuku aHezekiya?

¹⁸ Hampinji amashidika akuAshuri halukukiluwu Yuda nikuchinisha Yerusalema muyaaka nkulakaji yitanu nayisatu B.C.E., Mwanta Hezekiya walombeli nindi: “Eyi Yehova Nzambi yetu, atwamwini . . . kulonda mawanta ejima ahamaseki akeluki nawu eyi yeyi Yehova kanka weyi hohu.” (Isaya 37:20) Hezekiya wakameneni nankashi hayuma yatela kutamisha ijina daNzambi. Yehova wakwili kuna kulomba kwakufuma hamuchima. Hawufuku wumu hohu, kañelu wumu wajahili amashidika akuAshuri 185,000,  kulonda kupulwisha ambuña Yehova ashinshika.—Isaya 37:32, 36.

19. Kusoñamishanyi kwatiyililuwu akwaKristu amunkulakaji yakusambila hakwila nawu apuluki mukukala?

¹⁹ Chikwashalili mafuku antesha nakufwa kwindi, Yesu washimwini wuprofwetu wakusoñamisha kulonda kukwasha atumbanji twindi adiña muYuda. (Tañenu Luka 21:20-22.) Mwahitili yaaka yayivulu, ilaña mu 66 C.E., kudikaña kwawaYudeya kwaleñeleli mashidika awaRoma kulukuka Yerusalema. Amashidika aCestius Gallus ahumwini mbañu yatembeli, nkumininaku afuntili. Chiyelukili nawu yadiña mpinji yakupulukilamu kujilumuka kwashimwineñahu dehi Yesu, akwaKristu ashinshika atemukilili kumpidi. Amashidika awaRoma afuntili mu 70 C.E. Haniyi mpinji hiyafuntilimuku, nawa Yerusalema amujilumwini chikupu. AkwaKristu atiyilili kusoñamisha kwaYesu atemukili kuna kukala kweneni.—Luka 19:41-44.

20. Muloñadi wutwatela kumukuhwelela Yehova hamu neyi ‘Mukwakutupulwisha’?

²⁰ Chikuhwelelu chetu chakolelañaku neyi tutoñojokaña hanochu Yehova chakwashiliyi antu jindi kunyima. Yuma yakoñeliyi Yehova kumpinji yakunyima yatuleñelaña kumukuhwelela chikupu. Hichidi namuloña nakukala kutunakumona hayinu mpinji hela kutwakamona kumbiduku, ninetu twatela kumukuhwelela chikupu Yehova hamu neyi ‘Mukwakutupulwisha.’ Indi Yehova nateli kutupulwisha ñahi? Indi Yehova wayikwashili ñahi antu ashimunawu hakutachika kwachinu chibaba? Nawa chumanyi chafuminimu? Tutalenu muchibaba chinalondeluhu.

Munakwanuka?

• Indi Masamu 70 yatwileñelaña kukuhwelela chumanyi?

• Indi Davidi amukwashili nikumukolesha ñahi hampinji yakatiliyi?

• Yakutalilahwinyi yamwekeshaña nawu Yehova nateli kupulwisha antu jindi kudi akwankunyi?

[Malwihu aKuzatisha haKudiza]

[Mwevulu wudi hefu 12]

Yehova wakwili kulomba kwaHezekiya