Indi Tata Yetu WaMwiwulu Wekala Ñahi?
Indi Tata Yetu WaMwiwulu Wekala Ñahi?
ANTU amavulu ahembelaña kumutu kulomba kwaTata Yetu, hela Kulomba kwaMwanta, kulomba kwachitalilu kwalejeliyi Yesu atumbanji twindi. (Matewu 6:9-13) Mpinji yejima yalombañawu, amutenaña Nzambi nawu, “Tata Yetu.” Hela chochu, antu añahi atela kuhosha nawu amwiluka chikupu?
Indi enu? Komana mwamwiluka Nzambi chikupu? Komana mukweti wubwambu wakola naNzambi, mwahoshaña nindi, nawa mwamulejañamu yuma yayiwahi niyatama yimwamonaña? Hanu dinu, kumwiluka Nzambi chalumbululadi?
“Ijina Dindi Diyi Yehova”
Mwana wunakutamwañila nateli kwiluka hohu nindi tata yindi amutambikaña nawu Tata. Dichi chikukulañayi, welukaña ijina datata yindi niyililu nawa wamukeñaña chikupu. Indi tata yetu wamwiwulu Watwinka Wumi? Komana mweluka ijina dindi nichidalumbuluka?
Hela chakwila antu amavulu hakulomba Kulomba kwaMwanta afuntilaña hanhoshelu yakwila nawu “ijina deyi dijili,” neyi ayihula “Kutena ijina denidi” hiyanateli kudilukaku. Iwulu denzala tutumbwa, mpidi yalubanji, yumiyi yamwekeshaña nawu Nzambi wekala kwoku. Ilaña hiyatulejaña ijina dinduku. Hakwila nawu twiluki idi ijina, twatela kutaña muBayibolu. Mukwihihisha yahosha nawu: “Ijina dindi diyi Yehova.”—Kwidika 15:3.
Nzambi wakeñaña nindi twiluki ijina dindi, daYehova. Muloñadi? Muloña ijina dindi demenañaku wuntu windi. Mwalala ijina denidi dalumbulula nawu “Wakojejaña Yuma Kwikalaku.” Mumazu amakwawu, wekalaña mudi mwejima munakeñiyi kwikalilayi kulonda kushikija nkeñelu yindi. Chakutalilahu: Hakwila nawu tata yawantu yakameni chisaka chindi chachiwahi, wekalaña mukwakwakamena chisaka, mukwakufumba, nsompeshi, ihaku, mukwakukiña, nawa ntañishi, kwesekeja nayuma yinakumwekana nawa yinakukeña chisaka. Chochimu, ijina daYehova datwileñelaña kwiluka netu Nzambi washikijaña nkeñelu yindi kulonda antu ejima amukalakelaña kuhetelamu, hela chakwila kukamwekana chuma chidi chejima kumpinji yakumbidi.
Tushinshikenu mbadi jashiyashana mwekalilañayi Nzambi yetu wakukeña, kwesekeja nachalumbuluka ijina dindi. Chikuyikwashaku kumwiluka Yehova Nzambi chekalayi, nikudiza chimwatela kwila hakwila nawu mukundami kwakwihi nayena.
‘Nzambi Wela niKukeña niKuwunda’
Kapostolu Pawulu wamuteneni Nleñi yetu nindi, “Nzambi wela nikukeña nikuwunda.” (2 Akorinda 13:11) Muloñadi? Yesu Kristu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Hamuloña wakukeñesha muchidi wamuntu, Nzambi waheni Mwanindi wakeñayi hamu neyi ifutu damuloña, kulonda antu akumukuhwelela akaheti wumi wahaya nyaka, wakadi kutiya kukata nikukabakana kwafumini munshidi. Dimuloña wahosheleli Pawulu nindi: “Wufwetu wanshidi hikufwa, ilaña chamukunkulu chaNzambi hiwumi wahaya nyaka, mudi Kristu Yesu, Mwanta wetu.” (Aroma 6:23) Komana chumichi hichinateli kutuleñela kumukeña Nzambi nikuswila kwakwihi nayena nehi?
Nzambi hamwekeshaña hohu kukeña kwindi kudi antu ejimaku, ilaña nikudi antu ashinshika hamuntu hamuntu. Kutalisha kudi aIsarela abulileña Kuhituluka 32:6) Komana muneluki mwatalisha iyi nhoshelu? Hamu neyi Tata yawantu wukweti kukeña, Yehova wayakameneni antu jindi, hela chakwila welukili kubula kuwanina kwawu. Nawa wayinkeli yuma yejima yakeñeleñawu chikupu, yakumujimba, muyitoñojoka, nilwakuspiritu.
kwovwahila, Mosi wahosheli nindi: “Komana munakeñi kumwila Yehova chochochu enu antu asupa, akadi maana tahindi? Hidiyi tata yeyi wakulandaku? Hidiyi wakutuñili akukoleshaku?” (Wejima wetu twamonaña kukala, hamuloña wanichi chatwileñelaña kwakama, nikuneña. Twakeñaña muntu wakutukwashaku mwakwilili nakukala kwetu. Hinyi watela kutukwasha? Kuhitila Mwizu dindi, Bayibolu, Yehova wamwekeshaña nawu hiMukwakufumba nimukwaKwakamena wamuwahi. Iwu Mukanda Wajila walumbululaña muloña waleñelaña kusweja kukabakana nichitwatela kumika chikupu. Neyi chochakwashaña tata yawantu munjila yakukeña mwana wunadimbuki nakudikatisha, Yehova watumwekeshelaña kukeña kwindi kwabadika kuhitila mukutwinka wukwashu wutwakeñaña. Mwalala, Yehova watweshaña nawa wafwilaña kukwasha antu amukuhwelela.—Isaya 59:1.
Cheñi, Nzambi watumwekeshelaña kukeña kuhitila mukwikala ‘mukwakutiya kulomba.’ (Masamu 65:2) Indi chikuma chakwila nawu watiyaña kulomba kwetu chamwekeshaña ñahi nawu watukeña? Kapostolu Pawulu walumbulwili nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Afwilipi 4:6, 7) Neyi mulombaña namuchima wejima kudi Nzambi nikulondela nshimbi yahanayi Mwizu dindi, ninenu mukwikala “[na]kuwunda kwaNzambi kwabadika maana ejima.”
“HiNzambi Weluka”
Yehova Nzambi amulumbulula muBayibolu nawu “Weluka chalala.” Hakwikala “Nzambi weluka,” chekala muchidi wamuntu, weluka yuma yitwakeñaña kubadika muntu wudi wejima. (Yoba 36:4; 1 Samweli 2:3) Wamulejeli Mosi kambuñindi nindi, “muntu hahandaña nayakudya hohuku, muntu wahandaña chiña nayuma yejima yafumaña mukanwa kaYehova.” (Kuhituluka 8:3; Matewu 4:4) Ichi chinayi mukwila nawu hakwila twikali amuzañalu chikupu, chiña twikala nayuma yabadika yuma yakumujimba.
Nleñi yetu watuloñeshelaña nshimbi nikufumba kwakuwahi kuhitila Mwizu dindi, Bayibolu. Neyi tudizaña Bayibolu nikuzatisha kufumba kwindi muchihandilu chetu, dikwila nawu tunakuhetela “[mu]yuma yejima yafumaña mukanwa kaYehova.” Chakutalilahu, mukwaKristu wamumbanda wejina daZuzanna, wahosheli kutalisha hachihandilu chachisaka chindi nindi: “Maluwi etu akoleli hamuloña wakutañila hamu Bayibolu, kuyila hamu nakupompa kwawakwaKristu, nikulejaku antu yuma yitwakuhwelela. Hamuloña wakuzatisha nshimbi yaNzambi, tukweti yikonkwanyi yoyimu niwubwambu wakola.”
Munateli kuhetela ñahi mukufumba niwunlomboli wahanañayi Nzambi? Kuhitila mukudiza Bayibolu mpinji yejima nikuzatisha nshimbi yamuBayibolu, Nzambi nateli kuyikiswila chikupu.—Aheberu 12:9.
“Nzambi yaWamwinu”
Kaayi makonu kanenzali namadombu. Antu hiyaneluki chuma chakamwekana kumbiduku. Neyi mwashakamaña mwituña mwekala njita, mwatela mwafwilaña kushakama mwituña dawunda. Mumatuña amavulu mukaayi, antu akamaña kutalisha hawubanji, madombu, kukala kwachihandilu, nikujahañana. Hinyi watela kutupulwisha kuyuma yejimiyi? Makonu, antu anakukeñeka chikupu kuyikiña nikuyipulwisha.
Yishimu 18:10) Kwiluka ijina daNzambi nikudikuhwelela kwatwileñelaña kutoñojoka hayuma yakoñayi niyakakoñayi kulonda kupulwisha antu amukuhwelela. Yehova Nzambi wamwekesha chikupu nawu natweshi kupulwisha antu indi. Chakutalilahu, wapulwishili aIsarela kuhitila mukujilumuna makalu anjita yaFwaro niamashidika indi. Yehova wamwekesheli nawu hiNzambi wakashinshi, Nzambi wanukaña kukabakana kwawantu nawa wafwilaña kuyipulwisha.—Kwidika 15:1-4.
Bayibolu yahosha nawu: “Ijina daYehova hikaposhi kakola, mukwakuloña hakutemukilamu, amwenenamu nizo-o.” (Cheñi wumi wetu wahaya nyaka washindamena hakumukuhwelela Yehova Nzambi hamu neyi Chamwinu. Mwanta Davidi wamuIsarela wakushankulu, womikili makabi amavulu, wamwekesheli nindi Nzambi diyi Chamwinu chindi, wasonekeli hadi Yehova nindi: “Eyi yeyi Nzambi yawamwinu wami.” (Masamu 25:5) Kapostolu Petulu wakuhweleli chikupu nindi: “Komana Yehova weluka kupulwisha akwakumwakama mukweseka.”—2 Petulu 2:9.
Kutalisha kudi muntu walombaña wukwashu kudi yena, Nzambi wakana nindi: “Nakamusha hewulu, nanochu chanelukiyi ijina dami.” (Masamu 91:14) Ambuña aNzambi makonu anamoni chikupu kushikijewa kwanichi chikaninu. Henryk washakamaña mwituña daPoland namukalakeli Yehova nakashinshi hadi yaaka 70, hichidi namuloña nakukala nikumukabishaku. Hampinji yadiñayi Henryk nayaaka 16, tata yindi amushili muchilombu chakuyandishila chaAuschwitz. Henryk niyayindi weyala ayishili mukaleya kawatwansi. Hanyima yakuyisha mukaleya, ayishileña muyilombu yakuyandishila yashiyashana. Henryk wanukaña kutalisha kuniyi mpinji nindi: “Mukweseka kwami kwejima, Yehova hashiyili kankawamuku. Mpinji yejima wakwashileña kwikala washinshika, hela chakwila kapampa kakavulu wumi wami wadiñi hakatoña.” Mwalala, Yehova wayinkaña ambuñindi chikuhwelelu niñovu yakumika.
Katataka, Nzambi yapulwishi antu ejima amukuhwelela nawa atalilaña kuyipulwisha. Wahosha nindi: “Yami, Yehova; chamwinu wacheñi kwosi yami hohu.” (Isaya 43:11) ‘Hanjita yefuku odu deneni daNzambi Watwesha yejima,’ wakajilumuna antu atama hanu heseki nakupulwisha antu oloka. (Chimwekeshu 16:14, 16; Yishimu 2:21, 22) Yehova watukana nindi: “Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:11.
Ikalenu “Anyana kaNzambi”
Mumafuku akaprofwetu Malaki, aIsarela ahosheleña nawu Yehova diyi Tata yawu. Ilaña, hampinji yakumulemesha nikumutiya Nzambi woma, alambwileña yakudya yajilola nianyama amputa mesu niayifwayi. Dichi chayihwililiyi Yehova nindi: “Neyi ami nitata, himwanlemeshela hadihi?”—Malaki 1:6.
Bayi mwila chiluwa chochimu neyi chelili aIsarela abula kashinshiku. Ilaña, tunayikoleshi netu mudizi hadi Yehova Nzambi nikukundama kwakwihi nayena. Kambanji Yakoba wakonkomweneni nindi: “Kundamenu kwakwihi naNzambi, niyena wukukundama kwakwihi nanenu.”—Yakoba 4:8.
Chimwekeshu 21:4) Haniyi mpinji yakumbidi, muchidi wamuntu wejima wovwahila “Wakafuma muwuduñu wakutoka kwiñili muwaana wawanyana kaNzambi wowu waana walema.”—Aroma 8:21.
Chineli Yehova diyi Tata yetu tukweti yuma yayivulu yitwatela kwila. Neyi mwafwilaña kumulemesha Nzambi kuhitila mukuhemba nshimbi jindi muchihandilu chenu, hakajimbala nyidimu yenuku. Kubombelahu, wukuyikwasha kwenda munjila yayiwahi yalombolaña kwituña dadiha datukanawu, mwakabula “kwikala nawa cheñi kufwaku; hikwakekala nawa cheñi hela kuneña hela kudila hela kukataku.” ([Mazu ekoku adi hefu 5]
Nzambi wakeñaña nindi twiluki ijina dindi daYehova, dalumbulula nawu “Wakojejaña Yuma Kwikalaku”
[Mazu ekoku adi hefu 6]
HENRYK wahosheli nindi: “Mukweseka kwami kwejima, Yehova hashiyili kankawamuku.”
[Mazu ekoku adi hefu 7]
ZUZANNA wahosheli nindi: “Maluwi etu akoleli hamuloña wakutañila hamu Bayibolu, kuyila hamu nakupompa kwawakwaKristu, nikulejaku antu yuma yitwakuhwelela.”