Komana Mwatachikilañahu Kumwekesha Kalemesha?

‘[Hakumwekesha kalemesha kudi wumu namukwawu]; “itejenu mukwenu abadiki kulema.”’—AROMA 12:10.

1. Chumanyi chinakubula kumwekana nankashi mumatuña amavulu amukaayi?

 MUMATUÑA amakwawu amukaayi, anyana akweti kashidikilu kakulemesha akulumpi neyi adinawu hamu kuhitila mukuyifukamina nakalemesha. Dichi, hiyemenaña akulumpi munyituku. Munawa matuña, kufutalela mukulumpi akwimonaña nawu hikumwekesha kasawuntu. Hela chakwila kalemesha akimwekeshelaña munjila jashiyashana muyisemwa yambokamboka, kumwekesha kalemesha muniyi njila kwatwanukishaña Lushimbi lwamwinkeluwu Mosi. Lwabombelelumu lushimbi lwakwila nawu: “Neyi kukwinza muntu wukweti mutu wanvu wakanyamukaña, wakalemeshaña ipala kumesu indi.” (Alevi 19:32) Chawushona, mumatuña amavulu antu hiyavula kulemesha akwawuku. Nawa, makonu kasawuntu kanatandi chikupu.

2. Izu daNzambi datwilejaña kulemeshanyi?

² Izu daNzambi dakonkomwenaña chikupu hakumwekesha kalemesha. Datukonkomwenaña kumulemesha Yehova niYesu. (Yowanu 5:23) Cheñi datulejaña kulemesha chisaka chetu, akwetu akwakwitiya niantu amakwawu abula kwikala muchipompelu atwilejawu kulemesha. (Aroma 12:10; Aefwesesa 6:1, 2; 1 Petulu 2:17) Njilanyi jitwamulemeshelañamu Yehova? Twalemeshaña ñahi, ana kwetu niahela akwaKristu? Tushinshikenu hanawa malwihu nimalwihu amakwawu adifwanaku.

Mulemeshenu Yehova niJina Dindi

3. Njilanyi yalema yitwatela kumulemeshelamu Yehova?

³ Njila yalema yakumulemeshelamu Yehova yekala yakulemesha chikupu ijina dindi. Muloña, tudi “antu ambala ejina dindi.” (Yililu 15:14) Hikukooleka kweneni hakwimenaku ijina daNzambi watwesha yejima, Yehova. Kaprofwetu Mika wahosheli nindi: “Nyuza yawantu yejima yakenda, iwu mwijina damukishi wawu, iwu mwijina damukishi wawu, hakwila etu twakendaña mwijina daYehova Nzambi yetu chahaya nyaka nanyaka.” (Mika 4:5) ‘Twendaña mwijina daYehova’ kuhitila mukufwila kumwekesha yililu yayiwahi ifuku nifuku kulonda kuleta ivumba dadiwahi hejina ditwemenañaku. Neyi chayanukishiliyi Pawulu akwaKristu muRoma, neyi tubulaña kukalakala kwesekana nansañu yayiwahi yitwashimwinaña, ijina daNzambi ‘dikushiñewa’ nawa akudisawula.—Aroma 2:21-24.

4. Mwamonaña ñahi kukooleka kwakushimuna wunsahu waYehova?

⁴ Cheñi twamulemeshaña Yehova kuhitila mumudimu wetu wakushimwina. Kumpinji yakunyima, Yehova watambikili antu amumuza waIsarela kwikala ayinsahu jindi, ilaña akañenyi kukalakala iwu mudimu. (Isaya 43:1-12) Mapampa kakavulu adikañili naYehova nawa “amukañesheli wambala waIsarela Wajila.” (Masamu 78:40, 41) Nkumininaku, muza weniwu wajimbesheli wuselewa waYehova chikupu. Makonu, tukweti muzañalu hakwikala nakukooleka kwakushimwina wunsahu hadi Yehova nikutiyakesha ijina dindi. Twelaña mwenimu muloña twamukeña nawa twatalilaña mpinji yakajilikawu ijina dindi. Kwiluka chalala hadi Tata yetu wamwiwulu ninkeñelu yindi kwatwileñelaña kushimwina. Twatiyaña neyi chatiyili kapostolu Pawulu hahosheliyi nindi: “Anankunjiki mudimu wakushimuna, chiña nishimuni hohu. O yihuñu yinukumonami neyi nukubula kushimuna nsañu yayiwahi!”—1 Korinda 9:16.

5. Indi kumukuhwelela Yehova kwendelaña ñahi hamu nakumulemesha?

⁵ Davidi ñimbi yamasamu wahosheli nindi: “Awa eluka ijina deyi akakukuhweleleyi;  muloña akukeñakeñañeyi, eyi Yehova, hiwunayumbuku.” (Masamu 9:10) Neyi twamwiluka Yehova chikupu nikulemesha ijina dindi, tukumukuhwelelaña neyi chiyamukuhweleleluwu ambuñindi ashinshika akushankulu. Kumukuhwelela Yehova hinjila yikwawu yakumulemeshelamu. Talenu Izu daNzambi chidazatisha mazu akwila nawu kumukuhwelela Yehova nikumulemesha. Hampinji yakañenyi muza waIsarela kuMukuhwelela, Yehova wamwihwili Mosi nindi: “Awa antu saña andiwilawu tahindi? Yinjikijilu yinakoñi mukachi kawu yejimiyi saña alekelawu kuñitiya tahindi?” (Kuchinda 14:11) Ichi chikuma chikwawu chalala. Twamwekeshaña netu twamulemesha Yehova kuhitila mukumukuhwelela netu watukiñaña nikutukwasha kumika kweseka.

6. Chumanyi chatwileñelaña kumulemesha Yehova chikupu?

⁶ Yesu wamwekesheli nindi kumulemesha Yehova chiña kufumaña mumuchima. Hakuleja antu abulileña kudifukula muchalala, Yesu wazatishili mazu aYehova akwila nawu: “Antu awa anlemeshaña nanyivumbu yawu, hakwila nyichima yawu yidi kwakulehi nanami.” (Matewu 15:8) Kumulemesha Yehova chikupu kwafumaña hakumukeña chikupu. (1 Yowanu 5:3) Cheñi nawa twanukaña kukana kwaYehova kwakwila nawu: “Akunlemesha diwu nukulemesha.”−1 Samweli 2:30.

Ankoñi muChipompelu Alemeshaña Akwawu

7. (a) Muloñadi amana kwetu adi hayifulu yanyidimu chiyatela kulemeshawu antu alombolañawu? (b) Indi Pawulu walemesheleña ñahi akwawu akwakwitiya?

⁷ Kapostolu Pawulu wakonkomweneni ana kwindi nindi: ‘[Hakumwekesha kalemesha kudi wumu namukwawu]; “itejenu mukwenu abadiki kulema.”’ (Aroma 12:10) Ana kwetu atalaña akwawu muchipompelu atela kwimika chakutalilahu chachiwahi, ‘kwikala atachi,’ hakumwekesha kalemesha kudi antu alombolañawu. Muniyi njila, muntu wukweti nyidimu yalema watela kulondela chakutalilahu chemikiliyi Pawulu. (Tañenu 1 Atesalonika 2:7, 8.) Ana kwetu amuyipompelu yahempwileñayi Pawulu elukili nawu hateleli kuyileja kwila yuma yabulileñayi kutwesha kwilaku. Pawulu walemesheleña ana kwindi, nawa niwena amulemesheleña. Pawulu chahosheliyi nindi: “Dichi nayilembeli nami ikalenu akwakuñimbujola,” tunateli kwiluka netu antu amavulu amwimbujoleli Pawulu namuchima wumu muloña wachakutalilahu chindi chachiwahi.—1 Akorinda 4:16.

8. (a) Njilanyi yalema Yesu yalemeshelelumu atumbanji twindi? (b) Makonu ankoñi atela kwimbujola ñahi chakutalilahu chaYesu?

⁸ Njila yikwawu mana kwetu wunakulombola akwawu mwalemeshelañayi antu anakulombolayi yekala kuhitila mukuyileja chuma chinakuyilejelayi hela chinakuyilombwelayi munoyu njila. Neyi yelaña mwenimu, dikwila nawu nakumwimbujola Yesu. Chakutalilahu, hampinji yalejeleñayi atumbanji twindi kulomba akwakukalakala amavulu kulonda kuya nakumuna, Yesu wayilejeli muloña wateleleluwu kulomba. Wahosheli nindi: “Mbutu jajivulu jinahi dehi, ilaña akwakukalakala anakehi. Dichi, lombenu kudi Mwanta wakumuna atemeshi akwakukalakala kukumuna kwindi.” (Matewu 9:37, 38) Chochimu, chayilejeliyi atumbanji twindi nindi “tonenu,” wayilejeli chaleñeleli yahoshi mwenimu. Wahosheli nindi: “Muloña himuneluki ifuku dakenzayi Mwanta wenuku.” (Matewu 24:42) Kakavulu, Yesu hakuminineña dakuyileja atumbanji twindi yuma yateleluwu kwilawuku, ilaña nimuloña wuyatelela kuyilila. Muniyi njila, wadiña nakuyilemesha. Ichi hichakutalilahu chachiwahi chikupu chatela kwimbujola ankoñi akwaKristu.

Lemeshenu Chipompelu chaYehova niWunlomboli Wachu

9. Hinyi yitwalemeshaña neyi tulemeshaña chipompelu chawakwaKristu chamukaayi kejima nianlomboli amuchipompelu? Lumbululenu.

⁹ Hakwila nawu tumulemeshi Yehova, twatela cheñi kulemesha chipompelu chawakwaKristu chamukaayi kejima, hamu niañimenu amuchipompelu. Neyi tutiyililaña kufumba kwamuNsona kwezanvu danduñu wakashinshi, dikwila nawu tunakulemesha kuloñesha kwaYehova niwunlomboli windi. Muchipompelu chawakwaKristu amuyaaka nkulakaji yatachi, kapostolu Yowanu  wamweni nindi chakeñekeleña kuhoshola antu abulileña kulemesha anlomboli. (Tañenu 3 Yowanu 9-11.) Mazu aYowanu amwekeshaña nawu hiyadiwileña hohu ankoñiku, ilaña adiwileña nintañishilu niwunlomboli wawu. Chamuzañalu, akwaKristu amavulu hiyadiña nakwila mwenimuku. Henohu apostolu kanda afwi, amana kwetu ejima alemesheleña chikupu antu adiña nakuyilombola.—Afwilipi 2:12.

10, 11. Lumbululenu kufuma muNsona muloña amakwawu chayitondelañawu kwikala anlomboli muchipompelu chawakwaKristu.

¹⁰ Antu amakwawu atoñojokaña nawu chineli Yesu walejeli atumbanji twindi nindi, “wejima wenu ivumu denu dimu,” muchipompelu chawakwaKristu himwatela kwikala anlomboluku. (Matewu 23:8) Hela chochu, muNsona yachiHeberu niyachiGriki mwekala yakutalilahu yayivulu yawamayala enkeluwu wunlomboli kudi Nzambi. Nsañu yanyaka yawankakulula, ansompeshi, nianyanta jawaHeberu akushankulu yamwekeshaña wunsahu wakwila nawu Yehova wahanaña wunlomboli kuhitila mudi antu amwimenañaku. Antu abulileña kwovwahila chikupu antu atondeleñawu kudi Nzambi, Yehova wayibabesheleña.—2 Anyanta 1:2-17; 2:19, 23, 24.

¹¹ Chochimu, akwaKristu amuyaaka nkulakaji yatachi alemesheleña wunlomboli wawapostolu. (Yililu 2:42) Chakutalilahu, Pawulu, walejeli ana kwindi mwakwilila. (1 Akorinda 16:1; 1 Atesalonika 4:2) Ilaña, niyena wovwahilili chikupu amubadikili. (Yililu 15:22; Aŋalija 2:9, 10) Mwalala, Pawulu wadiña nakulemesha wunlomboli wamuchipompelu chawakwaKristu.

12. Yumanyi yiyedi kutalisha hawunlomboli yitwatela kudizila kuyakutalilahu yamuBayibolu?

¹² Kudi yuma yiyedi yitwadizilañaku. Chatachi, chasonekewa muNsona nawu ‘Nduñu wamaana niKashinshi’ kuhitila Mwizaza Dalombolaña watondaña amayala akutala akwawu, nawa amayala amakwawu ayitondaña kwikala akwakulombola awa amayala atondawu. (Matewu 24:45-47; 1 Petulu 5:1-3) Chamuchiyedi, wejima wetu, kushilahu niamayala atondawu, twatela kwovwahila atulombolaña. Hanu dinu, njilanyi yayiwahi mutwatela kulemeshela antu atulombolaña muchipompelu chawakwaKristu chamukaayi kejima?

Kulemesha Ankoñi Endaña

13. Tunateli kulemesha ñahi ankoñi amuchipompelu chawakwaKristu makonu?

¹³ Pawulu wahosheli nindi: “Enu ana kwetu, tunayilembeleli netu yilukenu akalakalaña [nañovu] mukachi kenu, ayilombolaña mudi Mwanta nakuyifumba. Yifuukulenu kulema nankashi mukukeña, hansañu yanyidimu yawu. Shakamenu chawunda mukachi kenu.” (1 Atesalonika 5:12, 13) Mwalala ankoñi endaña ekala hakachi kawantu “akalakalaña [nañovu.]” Dichi, ‘tuyifuukulenu kulema nankashi.’ Njila yimu yakuyilemeshelamu yidi yakulondela chikupu wunlomboli watulejañawu. Neyi nkoñi nakutuleja wunlomboli kufuma kudi izanvu danduñu wakashinshi, “maana afumaña mwiwulu” akutusañumuna kwikala “anyakala kutiya.”—Yakoba 3:17.

14. Chipompelu chamwekeshaña ñahi nawu chalemeshaña chikupu ankoñi endaña, nawa chumanyi chafumañamu?

¹⁴ Indi neyi chakwila atuleja kwila yuma munjila yinambukiku namutwelukila? Kumwekesha kalemesha mpinji yikwawu kwakeñekaña  kutondolwela yitoñojoka yakudikaña nawunlomboli kuhitila mukuhosha nenu, “Hitwelilaña yuma muniyi njilaku” hela, “Iwu wunlomboli watela kuzatika kumaluña acheñi bayi neyi muchipompelu chetuku.” Ilaña, twatela kwovwahila. Kwanukaña netu chipompelu chambala chaYehova nawa netu Yesu diyi Mutu kukutukwashaku kwovwahila. Neyi wunlomboli wakufuma kudi nkoñi wendaña awutambwila namuzañalu nikuwovwahila muchipompelu, chumichi chamwekeshaña kalemesha chikupu. Kapostolu Pawulu wahamekeli ana kwetu muKorinda hamuloña wakwovwahila kwamwekesheluwu kuwunlomboli wahanini Titusa, eluda wayihempwili. (2 Akorinda 7:13-16) Makonu, ninetu tunateli kwiluka netu wunlomboli wutwovwahilaña namuchima wejima wahanaña ankoñi endaña watwileñelaña kwikala namuzañalu chikupu mumudimu wetu wakushimwina.—Tañenu 2 Akorinda 13:11.

“Lemeshenu Antu Ejima”

15. Njilanyi jitwalemeshelañamu akwetu akakwitiya?

¹⁵ Pawulu wasonekeli nindi: “Bayi wuhoshola mukulumpuku, kumina dakumulembelela neyi tata yeyi; nianyikwenzi amayala neyi hiyana kweyi; niakulumpi awambanda neyi hiyamama jeyi; niansanda awambanda neyi hiyaheleyi, nakubula kubajama hela hanti. Lemeshaku ambanda anekali anfwila chikupu.” (1 Timotewu 5:1-3) Eñañi, Izu daNzambi datukoleshaña kulemesha antu ejima muchipompelu chawakwaKristu. Indi neyi, himwatiyañanaña namana kwenu hela namuheleyi muchipompeluku? Komana ichi chikuyileñela kuleka kumulemesha mukwenu mukwaKristu? Komana kwila muhimpa yitoñojoka yenu nakushinshika hohu hayililu yayiwahi yawakwaKristu yanowu kambuña Nzambi nehi? Sweje-e ankoñi atela kulemesha chikupu yitoñojoka yawana kwawu—bayi ‘ekala anyanta . . . hadi anyikokuku.’ (1 Petulu 5:3) Mwalala, chipompelu chawakwaKristu, achilukilaña kukukeña kwalala kwekala hakachi kawantu ekalamu, nawa tukweti njila jajivulu jakudilemeshelamu wumu namukwawu.—Tañenu Yowanu 13:34, 35.

16, 17. (a) Muloñadi chichalemena kulemesha antu yitwashimwinaña niakwakutudimbulula? (b) Munjilanyi mutwalemeshelaña “antu ejima”?

¹⁶ Ilaña, hitwalemeshaña hohu antu amuchipompelu chawakwaKristuku. Pawulu wayisonekeleli akwaKristu amumafuku indi nindi: “Neyi tukumona hakwilila, twilenuña antu ejima chachiwahi.” (Aŋalija 6:10) Mwalala, kuzatishaña ilu lushimbi kunateli kwikala kwakala neyi muntu  yimwazataña nindi kumudimu hela mukwenu mukashikola yayila katama. Neyi ichi chimwekana, twatela kwanuka mazu akwila nawu: “Muchima weyi bayi wubimbaña hansañu yawakwakwila chatamaku.” (Masamu 37:1) Kuzatisha iku kufumba kukutukwasha kutwalekahu kulemesha akwakutudimbulula. Chochimu, hakushimwina, kudikehesha kunateli kutukwasha kwakula antu ejima “nakudizoza nawoma.” (1 Petulu 3:15) Mmwekenu yetu ninvwalilu yinateli kumwekesha nawu twalemesha antu yitwashimwinaña.

¹⁷ Mwalala, chili tudi hamu nawakwetu akakwitiya hela nawantu abula kwitiya, twatela kuzatisha kufumba kwakwila nawu: “Lemeshenu antu ejima. Keñenu ana kwenu. Mutiyenu Nzambi woma. Lemeshenu mwanta wetuña.”—1 Petulu 2:17.

Mukwakula Nenudi?

Munateli kumwekesha ñahi kalemesha kakeni kudi:

• Yehova?

• Aeluda amuchipompelu niankoñi endaña?

• Muntu wejima wamuchipompelu?

• Antu yimwashimwinaña?

[Malwihu aKuzatisha haKudiza]

[Mwevulu wudi hefu 23]

AkwaKristu amuyaaka nkulakaji yatachi alemesheleña wunlomboli wezanvu dalombolaña

[Mwevulu wudi hefu 24]

Aeluda amumatuña ejima alemeshaña ankoñi endaña, atondañawu kudi Izanvu Dalombolaña