“Mesu” aYehova Atalaña Antu Ejima

“Mesu [aYehova] atalaña, nlabu jindi jesekaña anyana kawantu.”—MASAMU 11:4.

1. Komana twakeñaña kudiluka nawantu amuchidinyi?

 INDI antu ayimwekeshelaña kukeña mwayimonaña ñahi? Neyi muyihula mwakwilila akuyileja yitoñojoka yayiwahi. Neyi munakukeña wukwashu, ayikwashaña namuchima wumu. Neyi munakukeña kuyifumba, ayifumbaña munjila yakukeña. (Masamu 141:5; Aŋalija 6:1) Komana himwatiyaña kuwaha kudiluka nawantu amuchidiwuku? Hohamu, Yehova niMwanindi ayikeña chikupu. Ayikeña kubadika chayikeñawu kudi antu ejima, nawa kukeña kwawu hikwekala kwalwisuku; anakukeña kuyikwasha kulonda “mwakakwati kuwumi, wowu wumi walala chikupu.”—1 Timotewu 6:19; Chimwekeshu 3:19.

2. Indi Yehova wayikeña ñahi ambuñindi?

² Ñimbi yamasamu Davidi wamwekesheli nindi Yehova watukeña chikupu hahosheliyi nindi: “Mesu [aYehova] atalaña, nlabu jindi jesekaña anyana kawantu.” (Masamu 11:4) Eñañi, Nzambi  hatutalaña hohuku; ilaña watushinshikaña chikupu. Davidi wasonekeli cheñi nindi: “Muchima wami eyi wawutompa dehi; wunenzi nakunhempula nawufuku; . . . hiwunawani chumaku.” (Masamu 17:3) Chakadi nikujina, Davidi welukili nindi Yehova wamukeñeli chikupu. Welukili nindi wukumutiyisha Yehova kutama nikuMuhilisha neyi yabula kuleka yitoñojoka yatama hela kwikala nakafuta mumuchima. Komana mwamukeña Yehova neyi chamukeñeliyi Davidi?

Yehova Wamonaña muMuchima

3. Indi Yehova wamwekeshaña ñahi nawu hashinshikaña hayiluwa yetuku?

³ Yehova washinshikaña chikupu hawuntu wetu wamukachi, dikwila nawu chekala muchima wetu. (Masamu 19:14; 26:2) Hamuloña wakukeña, hashinshikaña hatuyiluwa twanyanyaku. Chakutalilahu, hampinji Sara, ñoda Abarahama habulili kumukuhwelelayi kañelu wadibalumwini mumujimba wawuntu, kañelu welukili nindi Sara watiyili woma nawa watiyili nsonyi, dichi kañelu wamufumbili munjila yayiwahi. (Kutachika 18:12-15) Hampinji yadiyiñishiliyi nkakulula Yoba ‘yomweni nakubula kuyiñisha Nzambi,’ Yehova wamukiswilili, muloña welukili nindi Satana wamumwesheli Yoba ihuñu. (Yoba 32:2; 42:12) Munjila yoyimu, Yehova hahilili namazu ahosheli ntuluwa wakuZarefwati akadi kuhita mumbadi kudi kaprofwetu Elijaku. Nzambi welukili nindi waneñeli hamuloña wakufwisha mwanindi wumu hohu.—1 Anyanta 17:8-24.

4, 5. Indi Yehova wamwekesheli ñahi kukeña kudi Abimeleki?

⁴ Hamuloña wakwila Yehova washinshikaña mumuchima, wamwekeshaña kukeña nikudi antu abula kwitiya. Shinshikenu hansañu yaAbimeleki, mwanta wawaFwilistinu wadiña mumusumba waGerari. Abimeleki hakubula kwiluka nindi Sara wadiñi iñoda Abarahama, wamusendeli Sara kulonda yekali iñodindi. Hela chochu, henohu kanda yakwati hadi mumbanda, Yehova wamulejeli muchilota nindi: “Nachiluki nami chumichi wunachili namuchima weyi wawuwahi; ninami nawa nakulekesha kunvulumuna chinabula kukwitiya kukwata hadi yena. Ichi dinu owu iyala mufuntishili iñodindi; muloña yena hikaprofwetu, wukukulombela, nineyi wukuhanda.”—Kutachika 20:1-7.

⁵ Chakadi nikujina, Yehova chiña wamujilumwini Abimeleki, mukwakudifukula kudi tunzambi twakutwamba. Ilaña, haniyi mpinji Nzambi wamweni nindi iwu iyala wadizozeli. Yehova wamweni kudizoza kwindi nakumuleja mwanta chatela kwilayi hakumwanakena ‘nakutwalekahu kuhanda.’ Iwu diyi Nzambi yimwatela kudifukulaku.

6. Munjilanyi Yesu mwamwimbujoleliyi Tata yindi?

⁶ Yesu wamwimbujoleli chikupu Tata yindi, watalileña hohu hayuma yayiwahi mudi atumbanji twindi nawa wadiña nakuyanakena yiluwa yawu. (Maku 10:35-45; 14:66-72; Luka 22:31, 32; Yowanu 15:15) Yililu yaYesu yesekeni namazwindi ekala haYowanu 3:17 akwila nawu: “Chatemesheliyi Nzambi Mwanindi mumpata yamunu mwishina, halondeli kusompesha antu ampata yamunu mwishinaku, walondeli nindi antu amunu mwishina ahandili mudi yena.” Eñañi, Yehova niYesu atukeña chikupu nawa kukeña kwawu hikwamanañaku. Kukeña kweniku kwamwekenaña munkeñelu yawu yakwila nawu twakahandi. (Yoba 14:15) Kukeña kwamuchidiwu kwamwekeshaña muloña watushinshikilañayi Yehova, chashinshikilañayi hayuma yayiwahi yitwelaña, nichatwolwelañayi.—Tañenu 1 Yowanu 4:8, 19.

Watushinshikaña Munjila Yayiwahi

7. Muloñadi Yehova chatutalilañayi?

⁷ Chikwikala chaluwa kutoñojoka netu Yehova wudi neyi kapokola watushinshikilaña mwiwulu kulonda kwiluka yiluwa yetu. Satana diyi watutwambilaña nawa wahoshaña nindi twekala nalwisu. (Chimwekeshu 12:10) Watutwikaña muloña nihanabuli kutelela! (Yoba 1:9-11; 2:4, 5) Ñimbi yamasamu wasonekeli hadi Nzambi nindi: “Neyi eyi Yehova wukushinshika mwaluwañawu antu, hinyi wukwimana, eyi Mwanta?” (Masamu 130:3) Kwosi watela kwimana. (Mukwakutaŋisha 7:20) Ilaña Yehova watutalaña naluwi, neyi chakamenañayi nvwali wunakukeña kukiña mwanindi wakeñayi kulonda yabuli kudikatisha. Kakavulu watusoñamishaña hakubula kuwanina niyiluwa yetu kulonda kutondolwela  kudiñija mukukala.—Masamu 103:10-14; Matewu 26:41.

8. Indi Yehova wadizishaña ñahi nikufumba ambuñindi?

⁸ Nzambi wamwekeshaña kukeña kwindi kuhitila munshimbi nikufumba kwahanañayi muNsona nimunyikanda yashindamena haBayibolu nikupompa kwaloñeshañawu kudi ‘nduñu wamaana nikashinshi.’ (Matewu 24:45; Aheberu 12:5, 6) Cheñi Yehova watukwashaña kuhitila muchipompelu chawakwaKristu nimudi ‘antu enkawu yamukunkulu.’ (Aefwesesa 4:8) Kubombelahu, Yehova watutalaña kulonda kumona chitwovwahilaña kufumba kwindi, nawa wafwilaña kutwalekahu kutukwasha. Masamu 32:8 yahosha nawu: “Nukukuleja maana, nukukuleja ninjila yeyi yiwukwenda; nukukulombola nadisu dami.” Dichi chikuwaha neyi tukumutiyililaña Yehova mpinji yejima. Twatela kudizoza kudi yena, nakwiluka netu hiNtañishi nawa diyi Tata yetu wukweti kukeña.—Tañenu Matewu 18:4.

9. Yililwinyi yitwatela kutondolwela nawa muloñadi?

⁹ Munjila yikwawu, bayi twikala achinchika hamuloña wakudinka wanta, wakubula chikuhwelelu, hela hamuloña ‘wakudimbana kwanshiduku.’ (Aheberu 3:13; Yakoba 4:6) Kakavulu, yililu yamuchidiwu yatachikaña neyi muntu yatachika kutoñojoka yuma yatama. Nkumininaku muntu nateli nikutachika kukaana kufumba kwakuwahi kwamuNsona. Nawa, nateli kudiñija chikupu muyililu yatama hela munjila yikumuleñela kwikala chilumbu naNzambi, chumichi chatama chikupu. (Yishimu 1:22-31) Toñojokenu chakutalilahu chaKena, wedi waAdama naEvu.

Yehova Wamonaña Antu Ejima Nawa Wakoñaña Mwaloña

10. Muloñadi Yehova chaakanininiyi mulambu waKena, nawa chumanyi cheliliyi Kena?

¹⁰ Hampinji Kena niAbeli yatwaliluwu mulambu kudi Yehova, Hashinshikileña hohu hayawaana yawuku ilaña watalileña nimunyichima yawu. Chelili welukili yuma yadiña munyichima yawu, Nzambi wetejeli mulambu waAbeli, wahaniniyi nachikuhwelelu, ilaña wakaanini mulambu waKena, muloña hadiña nachikuhweleluku. (Kutachika 4:4, 5; Aheberu 11:4) Chatela yadizili kuchuma chamwekeni nakuhimpa yililu yindi, Kena wamuhililili chikupu mana kwindi.—Kutachika 4:6.

11. Indi Kena wamwekesheli ñahi muchima wakudimbana, nawa chumanyi chitwatela kudizilaku?

¹¹ Yehova wamweni nindi yililu yaKena yadiña yatama nawa wahosheli naKena munjila yayiwahi, nakumuleja nindi neyi wakoñeli chuma chachiwahi, adi kumuhameka. Chawushona, Kena wakaanini kufumba kwaNleñi yindi nawa wamujahili mana kwindi. Cheñi Kena wamwekesheli muchima windi watama munjila yakasawuntu yakwililumu lwihu lwamwihwiliwu kudi Nzambi nawu: “Mana kweyi wudi kudihi?” Kuchinka Kena nindi: “Kwiji, ami kwiluka nehi. Ochi ami yami namuhembaña mana kwami, tahindi?” (Kutachika 4:7-9) Muchima wunateli kudimbana chikupu chakwila wunateli nikukaana kufumba kwaNzambi. (Yeremiya 17:9) Dichi twatela kudizila kuniyi nsañu kulonda kunyakala kutondolwela yitoñojoka nikufwila kwatama. (Tañenu Yakoba 1:14, 15.) Neyi atuleja kufumba kwamuNsona, twatela kukwitambwila nakukwimona netu kufumba kweniku kunakumwekesha kukeña kwaYehova.

 Kwosi Nshidi Yaswamanyika kuMesu aYehova

12. Indi Yehova wamona ñahi yuma yatama?

¹² Amakwawu atoñojokaña nawu neyi kwosi wunakuyimona hakwila chuma chatama, hiyanateli kuyibabeshaku. (Masamu 19:12) Ilaña hikwekala nshidi yaswamanyikañaku. “Yuma yejima yidi nzekesi, yidi hatooka kumesu ayena itwamba kadimona nindi.” (Aheberu 4:13) Yehova diyi Nsompeshi washinshikaña chikupu yitoñojoka yetu, nawa chamonañayi kutama chamwekeshaña wuñanji windi waloña. Yehova “[hi]Nzambi wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala.” Ilaña kudi abulaña kubalumuka munyichima, “hayiñishaña mukwakutanya nihantuku” neyi muntu ‘yavulumuna chakukeñamu’ hela yamwekeshaña yililu yaheña. (Kwidika 34:6, 7; Aheberu 10:26) Chumichi chamwekeneni munjila yazatiliyi Yehova naAkani niAnaniya, niSafwira.

13. Indi muchima watama nilwisu yamuleñeleli ñahi Akani kwikala nayililu yatama?

¹³ Akani wafumpili nshimbi jaNzambi, kuhitila mukupupa yuma mumusumba waYeriku nakusweka mwitenti dindi, hadaha watiyañeni nachisaka chindi. Chelili nshidi yidi ayimwekeshi hatooka, Akani welukili nindi wakoñeli chuma chatama, wahosheli nindi: “Navulumuni Yehova.” (Yoshuwa 7:20) Kufwana Kena, Akani wekalili namuchima watama. Lwisu dilwamuleñeleli Akani kwiya, nawa lwamuleñeleli kutwamba. Chineli yuma yapupiluwu muYeriku yadiña yaYehova, dikwila nawu Akani wamwiyilili Nzambi, nawa chamuleñeleli kujimbesha wumi windi hamu nichisaka chindi.—Yoshuwa 7:25.

14, 15. Muloñadi Ananiya niSafwira chabulililuwu kwikala nawuselewa waNzambi, nawa chumanyi chitukudizilaku?

¹⁴ Ananiya niñodindi Safwira, adiña antu amuchipompelu chakusambila chawakwaKristu muYerusalema. Kufuma haPentekosta 33 C.E., kwadiña kukuñulula mali akukwasha akwakwitiya amaha adiña mukukankila afumini kumatuña akwakulehi, ashalili muYerusalema. Awa mali ayikuñulwileña kuhitila muyawaana yahanineñawu mukudikeñela. Dichi Ananiya walandishili iha nawa wahaninuku chibalu chamali. Hela chochu, iñodindi welukili chikupu nindi, Ananiya watwambili nindi wahanini mali ejima. Chakadi nikujina, awa adisumbula akeñeleña nawu ayilemeshi chikupu muchipompelu. Ilaña yililu yawu yadiña yakutwamba. Yehova wamwekesheli muchihayamisha makudi awu kudi kapostolu Petulu, wamwihwili Ananiya muloña watwambililiyi. Chatiyiliyi mazu awa, Ananiya wadimbukili heseki nawa wafwili. Chihashimbwili chanti, iñodindi Safwira niyena wafwili.—Yiliu 5:1-11.

¹⁵ Ananiya niSafwira akoñeli yuma mumushikila. Akwatili kafuta nakudiñija mumuhetu wakudimba apostolu. Sweje-e, ‘atwambili kudi spiritu yajila nikudi Nzambi.’ Chuma chakoñeliyi Yehova chamwekeshaña hatooka nawu wakiñaña chipompelu chindi kudi anfwikiji. Mwalala, “hichuma chikweti woma hakuholokela mumakasa aNzambi wamumi”!—Aheberu 10:31.

Ikalenu Ashinshika Mpinji Yejima

16. (a) Indi Satana nakweseka ñahi kuhuñumuna antu jaNzambi? (b) Njilanyi jazatishañayi Diyabolu kulonda kuhuñumuna antu mwiluña denu?

¹⁶ Satana nakuzata nañovu kulonda kutuhuñumuna nikutuleñela kujimbesha wuselewa waYehova. (Chimwekeshu 12:12, 17) Yililu yaDiyabolu yatama yinakumwekana chikupu mukaayi, munenzali yililu yawuvumbi nimadombu. Makonu, chinekali chaswayi kuwana nyivwimbimbi yanzekesi hamakopyuta hela yozelu yikwawu  yazatikaña nakesi kawuneñu. Dichi bayi tudiñija mutukosi twaSatanaku. Ilaña, twatela kuhosha neyi chahosheli Davidi ñimbi yamasamu wasonekeli nindi: “Nukushinshika chachiwahi munjila yalala. . . . Nukwendaña mwitala dami namuchima walala.”—Masamu 101:2.

17. (a) Muloñadi Yehova chasolwelañayi nshidi yaswamanyika mukuhita kwampinji? (b) Chumanyi chitwatela kufwila kwila?

¹⁷ Makonu, Yehova hasololaña nshidi yasweja niyililu yakutwamba muchihayamisha neyi chililiyi kumpinji yakunyimaku. Hela chochu, wamonaña yuma yejima nawa mumpinji yindi yashikila nateli kusolola yuma yaswamanyika. Pawulu wahosheli nindi: “Nyiloña yawantu amakwawu yamwekanaña hatooka, yayañahu dehi kukusompesha; nyiloña yawantu amakwawu yayilondelaña.” (1 Timotewu 5:24) Kukeña dikwamuleñelaña Yehova kusolola yililu yatama hatooka. Wakeña chipompelu nawa wakeñaña kuchikiña kulonda chikali chitooka. Kubombelahu, watiyilaña antu avulumwini luwi nawa anabalumuki chikupu mumuchima. (Yishimu 28:13) Dichi tufwilenu kutwalekahu kwikala namuchima walala chikupu kudi Nzambi nikukaana yuma yejima yinateli kutuluwañesha.

Ikalenu naMuchima Walala

18. Mwanta Davidi wakeñeleña nindi mwanindi yakoñidi kutalisha hadi Nzambi?

¹⁸ Mwanta Davidi wamulejeli mwanindi Solomoni nindi: “Ilukaku Nzambi yatata yeyi, wumukalakeli namuchima walala chikupu, nayitoñojoka yakwovwahilamu; muloña Yehova washinshikaña nyichima yejima, welukaña yafuukulaña yitoñojoka yejima.” (1 Kushindulula 28:9) Davidi wakeñeleña nindi mwanindi yakoñi yuma yabadika hakumukuhwelela hohu Nzambi. Wakeñeleña nindi Solomoni yahameki kukeña kwaYehova kwabadika kwakeñayi ambuñindi. Komana mwamuhamekaña Yehova hakukeña kwindi kwabadika kwakeñayi ambuñindi?

19, 20. Kwesekeja naMasamu 19:7-11, chumanyi chamukwashili Davidi kukundama kwakwihi naNzambi, nawa tunateli ñahi kumwimbujola Davidi?

¹⁹ Yehova weluka nindi antu akeñaña kwikala nawubwambu naNzambi akukundama kudi yena nawa kwiluka yililu yindi yayiwahi kwayileñelaña kukundama kudi yena. Dichi, Yehova wakeñaña nindi tumwiluki nikwiluka yililu yindi yayiwahi. Tunateli kumwiluka ñahi? Kuhitila mukudiza Izu dindi nikudiluñisha nkisu jindi muchihandilu chetu.—Yishimu 10:22; Yowanu 14:9.

²⁰ Komana mwatañaña Bayibolu mpinji yejima nakwiluka nenu yafuma kudi Nzambi, nikulomba wukwashu kulonda kuzatisha yuma yimunakudiza? Komana mwamonaña kulema kwakuzatisha nshimbi jamuBayibolu muchihandilu chenu? (Tañenu Masamu 19:7-11.) Neyi mwilaña mwenimu, mukusweja kumukuhwelela Yehova nikumukeña. Nawa niyena, wukukundama chikupu kwakwihi nanenu, mukwendaña nindi mpinji yejima. (Isaya 42:6; Yakoba 4:8) Eñañi, Yehova wukuyikeña kuhitila mukuyikiswila nikuyikiña lwakuspiritu hampinji yimukwendaña munjila yanyanya yaya kuwumi.—Masamu 91:1, 2; Matewu 7:13, 14.

Mukwakula Nenudi?

• Muloñadi Yehova chatutalilañayi?

• Chumanyi chaleñeleli antu amakwawu kwikala ayilumbu jaNzambi?

• Tunateli kumwekesha ñahi netu twamukeña Yehova?

• Tunateli kumukalakela ñahi Nzambi namuchima walala chikupu?

[Malwihu aKuzatisha haKudiza]

[Mwevulu wudi hefu 9]

Indi Yehova watushinshikaña ñahi neyi nvwali wukweti kukeña?

[Mwevulu wudi hefu 10]

Chumanyi chitwadizilaña kuchakutalilahu chaAnaniya?

[Mwevulu wudi hefu 11]

Chumanyi chatela kutukwasha kutwalekahu kumukalakela Yehova namuchima wejima?