Yehova Watutalaña Kulonda Kutukiña
Yehova Watutalaña Kulonda Kutukiña
“Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.”—2 KUSHINDULULA 16:9.
1. Muloñadi Yehova chatutalilañayi?
YEHOVA diyi Tata yetu wawanina. Watwilukisha nawa “welukaña yafuukulaña yitoñojoka [yetu].” (1 Kushindulula 28:9) Hela chochu, hatutalaña kulonda kutwiwana nayiluwaku. (Masamu 11:4; 130:3) Ilaña, wakeñaña kutukiña kuyuma yinateli kuluwañesha wubwambu wetu nayena hela kujimbesha kuchiñeja kwetu kwakuheta wumi wahaya nyaka.—Masamu 25:8-10, 12, 13.
2. Antu amuchidinyi akamenañayi Yehova?
2 Yehova wukweti ñovu yabadika nawa wamonaña yuma yejima. Haniwu muloña, wakwashaña ambuñindi ashinshika neyi amulomba wukwashu, nawa wayikwashaña mukweseka kwawu. Ha 2 Kushindulula 16:9 hahosha nawu: “Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” Ilukenu nenu Yehova wazatishaña ñovu jindi kulonda kukwasha ejima amukalakelaña namuchima wejima, muchima wutooka nawa walala. Hakamenaña akakutwamba hela anfwikijuku.—Yoshuwa 7:1, 20, 21, 25; Yishimu 1:23-33.
Endenuña naNzambi
3, 4. Indi ‘kwenda naNzambi’ chalumbulukadi, nawa yakutalilahwinyi yamuBayibolu yatukwashaña kwiluka ichi chikuma?
3 Antu amavulu, akanaña nawu Nleñi waleñeli yuma yejima hanateli kwiteja kwenda nawantu muchifwikijaku. Ilaña, Yehova wakeñaña nindi twendeña nindi. Kumafuku akunyima, Enoki niNowa ‘endeli naNzambi.’ (Kutachika 5:24; 6:9) Mosi “chadiñi nakumonayi wakamonewaña hakutatakena.” (Aheberu 11:27) Mwanta Davidi wendeleña naTata yidi wamwiwulu. Wahosheli nindi: “Chadiyi [Yehova] kuchikasa chami chachidiilu hijikunkumaku.”—Masamu 16:8.
4 Hela chochu, hitunateli kumukwata Yehova kuchikasa kulonda kwenda ninduku. Ilaña tunateli kwenda nindi muchifwikija. Munjilanyi? Ñimbi yamasamu Asafwi wasonekeli nindi: “Nidi neyi hefuku hefuku, wunankwati kuchikasa chami chachidiilu. Wakanlombolaña, wakanlejaña.” (Masamu 73:23, 24) Dichi, twendaña naNzambi neyi tulondelaña chikupu kufumba kwindi, kutwatambwilaña Mwizu dindi nikuhitila mudi ‘nduñu wamaana nikashinshi.’—Matewu 24:45; 2 Timotewu 3:16.
5. Indi Yehova watalaña ñahi antu jindi ashinshika neyi nvwali wukweti kukeña, nawa twatela kumumona ñahi?
5 Chineli Yehova wakamenaña antu endaña nayena, wayishinshikaña neyi nvwali wukweti kukeña, wayakamenaña, nikuyikiña, nawa wayidizishaña. Nzambi wahosha nindi: “Nukukuleja maana, nukukuleja ninjila yeyi yiwukwenda; nukukulombola nadisu dami.” (Masamu 32:8) Dihulenu nenu: ‘Komana nadifwikijaña nakwenda naYehova, nikutiyilila maanindi nakwiluka nami disu dindi didi hadami? Indi kwiluka nami wantalaña kwalombolaña yitoñojoka yami, nhoshelu yami, ninzatilu? Neyi nivulumuna, komana nelukaña nami Yehova, hiTata wukweti kukeña, wushona, wakeñaña kukwasha antu abalumukaña mumuchima kulonda kwikala cheñi nawubwambu wawuwahi nayena?’—Masamu 51:17.
6. Yehova wabadika ñahi anvwali jetu?
6 Mpinji jikwawu, Yehova nateli kutukwasha henohu kanda tudiñiji munjila yatama. Chakutalilahu, nateli kumona nindi muchima wetu wadimbanaña wunatachiki kufwila yuma yatama. (Yeremiya 17:9) Chamonayi mwenimu, nateli kunyakala kutukwasha kubadika anvwali muloña “nlabu jindi” jikweti ñovu yakutala chikupu munyichima yetu, kulonda kushinshika yitoñojoka yetu. (Masamu 11:4; 139:4; Yeremiya 17:10) Talenu Nzambi chazatiliyi nayuma yamwekeni muchihandilu chaBaruki, nsoneki yakaprofwetu Yeremiya nawa ibwambu dindi.
Yehova Wamukwashili Baruki
7, 8. (a) Indi Baruki wadiñanyi, nawa kufwilanyi kwatama kwatachikili kutoñojokayi? (b) Indi Yehova wamukwashili ñahi Baruki?
7 Baruki wadiña nsoneki wakuluka yitembi wakalakeleña chiwahi naYeremiya mudimu wekalili wakala chikupu, wakushimuna wunsompeshi waYehova kudi aYuda. (Yeremiya 1:18, 19) Baruki watela wafumini kuchisaka chatiyakana, mpinji yimu, watachikili ‘kukeña yuma yamaneni.’ Hadaha watachikili kufwila yuma yakumujimba hela maheta. Hela chochu, Yehova wamweni nindi iyi yitoñojoka yatama yatachikili kwikala mumuchima waBaruki. Kuhitila mudi Yeremiya, Yehova wanyakeli kuleja Baruki nindi: “Eyi wahosheli neyi, Iyayi lelu ami! Hayikatu yami Yehova nalunjikuhu yihuñu; nazeya dehi nakwaba, hinamoni kunookaku.” Nzambi wahosheli cheñi nindi: “Wudi nakukeñakeña yuma yeyi yamaneni tahindi? Bayi wuyikeñakeñaku.”—Yeremiya 45:1-5.
8 Hela chakwila Yehova wamukonkomweneni Baruki, hamuzuwililuku, ilaña wamulejeli munjila yayiwahi. Chakadi nikujina, Nzambi wamweni nindi hela chakwila Baruki wafwilileña yuma yadi kumuluwañesha, hadiña namuchima watama hela wakutwambaku. Cheñi Yehova welukili nindi Yerusalema niYuda adiña kwakwihi nakuyijilumuna, nawa hakeñeli nindi Baruki yaputoli haniyi mpinji yakalaku. Dichi, hakwila nawu yamwanukishi kambuñindi, Nzambi wamulejeli nindi “nakaleta katama hadi antu ejima,” nawa wahosheli nindi neyi Baruki yakoña chuma chachiwahi wakahanda. (Yeremiya 45:5) Munjila yikwawu, Nzambi wahosheli nindi: ‘Baruki ikalaku wasoñama. Ilukaku yuma yikukeña kumwekena Yuda niYerusalema akwakuputola. Ikalaku washinshika kulonda wukahandi! Nakakukiña.’ Chakadi nikujina mazu ahosheliyi Yehova atela amushikili Baruki hamuchima, muloña wahimpili nawa wapulukili hampinji yajilumwinuwu Yerusalema, chimwahitili yaaka 17.
9. Munateli kwakula ñahi malwihu anehuluwu muparagalafu?
9 Chimukutoñojokaña hansañu yaBaruki, toñojokenu hamalwihu analondeluhu nijinsona: Indi njila yamukwashililumu Baruki kudi Nzambi yamwekeshaña chumanyi hadi Yehova nichakamenañayi ambuñindi? (Tañenu Aheberu 12:9.) Chineli tunakushakama mumafuku akala, chumanyi chitwatela kudizila kukufumba kwaNzambi kwamufumbiliyi Baruki nichuma chakoñeliyi Baruki? (Tañenu Luka 21:34-36.) Kuhitila mukumwimbujola Yeremiya, indi akwaKristu aeluda atela kumwekesha ñahi ochu Yehova chakamenañayi ambuñindi?—Tañenu Aŋalija 6:1.
Mwana Wembujolileña Kukeña kwaTata Yindi
10. Muloñadi Yesu chekalilayi nawuswa wakukalakala hamu neyi Mutu wachipompelu chawakwaKristu?
10 Henohu kanda kwikala akwaKristu, kukeña kwaYehova hadi antu jindi akwimwekesheleli mudi atuprofwetu indi niambuñindi amakwawu ashinshika. Makonu, kukeña kwindi kwamwekenaña mudi Mutu wachipompelu chawakwaKristu, Yesu Kristu. (Aefwesesa 1:22, 23) Dichi, mumukanda waChimwekeshu, Yesu amulumbulula neyi himwana kamukoku wukweti “nseñu jitanu najiyedi, nimesu atanu nayedi, diwu aspiritu aNzambi atanu nayedi anatemeshuwu mwahita iseki dejima.” (Chimwekeshu 5:6) Eñañi, chineli wukweti spiritu yaNzambi yajila, dikwila nawu Yesu wukweti kashinshi kawanina. Niyena wamonaña munyichima yetu, nawa weluka yuma yejima yamwekanaña.
11. Mudimwinyi wazatañayi Kristu, nawa yililu yatumwekeshelañayi yamwekeshaña ñahi yililu yaTata yindi?
11 Dichi kufwana Yehova, Yesu hekala kapokola walondaña antu kufuma mwiwuluku. Watushinshikaña neyi nvwali wukweti kukeña. Nkumbu yaYesu yakwila nawu, “Tata wahaya nyaka,” yatwanukishaña mudimu wakazatayi hakwinka muchidi wamuntu wamukuhwelela wumi wahaya nyaka. (Isaya 9:6) Kubombelahu, hakwikala Mutu wachipompelu chawakwaKristu, Kristu nateli kusañumuna akwaKristu apama, sweje aeluda, kulonda kukundeja nikufumba ejima adi mukukala.—1 Atesalonika 5:14; 2 Timotewu 4:1, 2.
12. (a) Indi nyikanda yasonekeleluwu yipompelu yitanu nayiyedi yakuAsia Minor yamwekeshaña yumanyi hadi Yesu? (b) Indi aeluda amwekeshaña ñahi yililu yaKristu kudi nyikoku yaNzambi?
12 Kukeña kwaKristu kwaswejeliyi kukeña anyikoku akwimwekesha munyikanda yasonekeleluwu aeluda amuyipompelu yitanu nayiyedi yamuAsia Minor. (Chimwekeshu 2:1–3:22) Muniyi nyikanda, Yesu walumbulwili nindi welukili yuma yamwekeneña muchipompelu chidi chejima nichaswejeliyi kwakamenayi atumbanji twindi. Chumichi chinakumwekana chikupu nimakonu, chineli chimwenu chaChimwekeshu chinakushikijewa ‘Mwifuku daMwanta.’ * (Chimwekeshu 1:10) Kukeña kwaKristu kakavulu kwamwekenaña kuhitila mudi aeluda, akalakalaña neyi atubiña muchipompelu. Nateli kusañumuna awa ‘enkawu yamukunkulu’ kulonda kukundeja antu nikuyikolesha, hela kuyifumba neyi kunakukeñeka. (Aefwesesa 4:8; Yililu 20:28; tañenu Isaya 32:1, 2.) Komana mwamonaña nyidimu yawu nenu hikukeña kwaKristu kwayimwekeshelañayi?
Wukwashu Hampinji Yatelela
13-15. Nzambi nateli kwakula ñahi kulomba kwetu? Hanenu yakutalilahu.
13 Komana mwalombahu dehi chikupu wukwashu nawa kulomba kwenu akwakwili kuhitila mukuyihempula nikuyikolesha kudi mukwaKristu wapama? (Yakoba 5:14-16) Indi kwiji ayikwashili kuhitila mumpanji hakupompa kwawakwaKristu hela munsañu yimwatañili munyikanda yetu. Kakavulu Yehova wakulaña kulomba munjila jeniji. Chakutalilahu, hanyima yakuhana mpanji, eluda amusolomokeli kudi muhela, wakoñeluwu yuma yatama chikupu hanyilungu yahituluhu henohu mpanji kanda ayihani. Chatela yatachiki kuhosha hakukala kwindi, wahamekeli chikupu hayikuma yamunsona yahosheluwu mumpanji. Yikuma yeniyi yesekeni nakukala kwadiñayi naku nawa yamukolesheli chikupu. Wenowu muzañalu watiyiliyi hakuwanika kuniku kupompa!
14 Kutalisha hawukwashu wutwatambwilaña kuhitila mukulomba, shinshikenu chakutalilahu chawamayala asatu adizili chalala chamuBayibolu henohu adi mukaleya nawa ekalili akwakushimwina abula kupapatishewa. Hamuloña wachuma chatama chamwekeneña, atuyili ejima ayinkeli nshimbi jikwawu jakulondela. Chumichi chaleñeleli atuyili kutachika kudikaña. Atuyili atiyañeni nawu kumadiki hanyima yakudyawula, akadikaña kuhitila mukubula kufuntisha yeña. Akwakushimwina asatu abula kupapatishewa, adiña mukukala. Neyi adibomba muniku kudikaña, dikwila nawu akufumpa lushimbi lwaYehova lwekala haAroma 13:1. Neyi abula kudibombamu, akwawu atuyili akuyimwesha kalula.
15 Hamuloña wakukañanya kubulakana hamu, awa amayala asatu alombeli maana. Chikwachili, awa amayala asatu enjili nakwiluka nawu afuukwili chuma chochimu, afuukwiluhu nawu hiyakadyawula nantetemenaku. Hampinji yenjiluwu atulama nakusenda yeña, awa amayala asatu hiyadiña nayeñaku. Wenowu muzañalu watiyiluwu hakwiluka nawu ‘Mukwakutiya mwalombañawu antu’ watiyili!—Masamu 65:2.
Kutalila Yuma Yidi Kumbidi naChikuhwelelu
16. Indi mudimu wakushimwina wamwekeshaña ñahi nawu Yehova wakamenaña antu adi neyi anyikoku?
16 Mudimu wakushimwina mukaayi kejima hichinjikijilu chikwawu chamwekeshaña nawu Yehova wakamenaña antu anyichima yayiwahi, kudi kwejima kwashakamañawu. (Kutachika 18:25) Kakavulu, Yehova wazatishaña añelu kulonda kulombola ambuñindi kuwana antu adi neyi anyikoku, hela chakwila ashakamaña kumaluña kuyabulaña kushimwina nsañu yayiwahi. (Chimwekeshu 14:6, 7) Chakutalilahu, kuhitila mudi kañelu, Nzambi wamulombweli Fwilipu, mukwakushimwina wamuyaaka nkulakaji yatachi kuya kudi kalama wakuEtiyopiya nakumulumbulwila nsañu yamuNsona. Chumanyi chafuminumu? Iwu iyala watambwilili nsañu yayiwahi nawa wapapatisheweli nakwikala kambanji kaYesu. *—Yowanu 10:14; Yililu 8:26-39.
17. Muloñadi wutwatela kubula kusweja kwakama hayuma yikamwekana kumbidi?
17 Chineli kaayi kamakonu kadi kwakwihi nakukuma, “yihuñu” yashimwineñahu dehi yikutwalekahu. (Matewu 24:8) Chakutalilahu, wuseya wayakudya wunateli kuyilaku hambidi hamuloña wakuvula kwawantu, kuhimpika kwampepela, hela kukala kwachihandilu. Chinateli kwikala chakala kuwana nyidimu, nawa akwanyidimu anateli kuyikanjikijaña kuzata mawola amavulu. Hichidi namuloña nayuma yinateli kumwekanaku, antu atwamijañaku mudimu waYehova hambidi ‘nikwikala nadisu datala mumu ho-o’ hiyatela kusweja kwakamaku. Eluka nawu Nzambi wayikeña nawa wayakamenaña. (Matewu 6:22-34) Chakutalilahu, talenu Yehova chamukwashiliyi Yeremiya hampinji yakujilumuka kwaYerusalema mu 607 B.C.E.
18. Indi Yehova wamwekesheli ñahi kukeña kudi Yeremiya hampinji yakuchikiluwu Yerusalema?
18 Hampinji yakuchikiluwu Yerusalema kudi akwaBabiloni kamuchiyedi, Yeremiya amukasilili muChipañu chawaTulama. Indi yakudya wadi kuyiwana kudihi? Neyi abulili kumukasa, wadi kuya nakukeña yakudya. Ilaña, washindameneni chikupu hadi antu adiñayi nawu, amuheleli! Hela chochu, Yeremiya hakuhweleleli mudi antuku, ilaña wakuhweleleli mudi Nzambi, wamukanini nindi wakamwakamena. Komana Yehova wamwakameneni? Eña! Yehova wamukwashili Yeremiya kuhitila mukutambwila hefuku hefuku “dinkendi dimu . . . nichimwamanini mankendi ejima mumukala.” (Yeremiya 37:21) Yeremiya, Baruki, Ebedi Meleki, niamakwawu, apulukili kuyina nzala yakapwelendendi, kunyisoñu, nikukufwa.—Yeremiya 38:2; 39:15-18.
19. Hampinji yitunakutalila yuma yidi kumbidi, chumanyi chitwatela kufwila kwila?
19 Eñañi, “mesu aYehova atalaña antu aloña, nimatu indi atiyililaña chakulembelelawu.” (1 Petulu 3:12) Komana mwatiyaña kuwaha chayitalañawu kudi Tata yenu wamwiwulu? Komana kwiluka nenu wayitalaña kulonda kuyikwasha kwayileñelaña kwiluka nenu mwakiñewa? Dichi fwilenu, kutwalekahu kwenda naNzambi, hichikweti muloña nayuma yakamwekana kumbiduku. Tunakuhweleli netu mpinji yejima Yehova wukwakamenaña chikupu ambuñidi ashinshika.—Masamu 32:8; tañenu Isaya 41:13.
[Tumazu twaheshina]
^ Hela chakwila iyi nyikanda yahoshaña chikupu hadi atumbanji twaKristu awayishewa, chochimu yahosha nihadi ambuña Nzambi ejima.
^ Chakutalilahu chikwawu chamwekeshaña nawu Nzambi walombolaña antu jindi chekala haYililu 16:6-10. Twatañañahu nawu Pawulu nialunda nindi ‘ayilekesheli kudi spiritu yajila’ kushimwina muAsiya nimuBitiniya. Ilaña, ayilejeli kuya nakushimwina muMasidoniya, mwadiña antu amavulu ashinshika atambwilili nsañu yayiwahi.
Munateli Kulumbulula?
• Tunateli kumwekesha ñahi netu ‘tunakwenda naNzambi’?
• Indi Yehova wamwekesheli ñahi kukeña kwindi kudi Baruki?
• Hakwikala Mutu wachipompelu chawakwaKristu, Yesu wamwekeshaña ñahi yililu yaTata yindi?
• Munjilanyi mutunateli kumwekeshela netu twamukuhwelela Nzambi muyinu mpinji yakala?
[Malwihu aKuzatisha haKudiza]
[Nyevulu yidi hefu 13]
Kufwana Yeremiya naBaruki, makonu aeluda akwaKristu amwekeshaña kwakamena kwaYehova
[Mwevulu wudi hefu 15]
Indi Yehova nateli kutukwasha ñahi hampinji yatelela?