Yumanyi Yimwatela Kuleka Kulonda Kuheta Wumi Wahaya Nyaka?
Yumanyi Yimwatela Kuleka Kulonda Kuheta Wumi Wahaya Nyaka?
“Chumanyi chakahanayi muntu akahimpi nawumi windi?”—MATEWU 16:26.
1. Muloñadi Yesu chakaaniniyi chikupu mazu ahosheli Petulu?
KAPOSTOLU Petulu wahayamini chikupu hansañu yatiyiliyi. Yesu Kristu, Nkuluñaña yindi wakeñeliyi chikupu, wahosheleña “hatooka” nindi kwashalili kwanti nakumona yihuñu nikufwa! Chakadi nikujina, Petulu wamwakwili Yesu namuchima wumu nakumukanda, nindi: “Chinjila Mwanta. Bayi wakamona yumiyuku!” Yesu wamushetumukilili Petulu nakushinshika kudi atumbanji amakwawu. Hadaha niwena atoñojokeleña mwaheña. Kuhiñahu wamwakwili Petulu nindi: “Eyi Satana hitaku kunyima yami, keña wunlabishi, muloña hiwunati muchima kuyuma yaNzambuku, wunati muchima kuyuma yawantu.”—Maku 8:32, 33; Matewu 16:21-23.
2. Indi Yesu walumbulwili ñahi yuma yakeñekaña kudi kambanji walala?
2 Mazu ahiñishiluhu Yesu atela amukwashili Petulu kwiluka chaleñeleli Yesu yakaneña chikupu mazu amukandiliyi. Yesu ‘watambikili izaza dawantu nawatumbanji twindi,’ nawa wayilili nindi: “Muntu wukukeña kunlondami adibondi, anyamuni [mutondu windi wakuyandisha] anlondaña. Muloña muntu wukukeña kuhemba wumi windi wakawujimbesha; hakwila muntu wukujimbeshela wumi windi hamujimba wamami nihansañu yayiwahi, wakawuhemba.” (Maku 8:34, 35) Mwalala, hadiña hohu kwakwihi nakuhana wumi winduku ilaña welukili nindi antu amulondaña atela kudiloñesha kuhana wumi wawu mumudimu waNzambi. Kudihana kwawu kwadi kuyiletela wuloku weneni.—Tañenu Matewu 16:27.
3. (a) Malwihwinyi enhwiliyi Yesu antiyilili indi? (b) Lwihu lwaYesu lwamuchiyedi lwatela lwayanukishili antiyilili indi chumanyi?
3 Hampinji yoyimu, Yesu wehwili malwihu ayedi amawahi chikupu nindi: “Neyi muntu wukuheta mpata yamunu mwishina yejima, ajimbeshelahu wumi windi, wakadiila kwodi? nawa, “Chumanyi chakahanayi muntu akahimpi nachu wumi windi?” (Maku 8:36, 37) Kwesekeja nayitoñojoka yawuntu, ñakwilu yalwihu lwatachi yikwikala yapela. Kwosi chuma chakadiilamu muntu, neyi yaheta mpata yamunu mwishina yejima, ilaña yajimbeshelahu wumi windi. Wunateli hohu kudiluñisha maheta neyi wudi wamumi. Lwihu lwaYesu lwamuchiyedi lwakwila nawu: “Chumanyi chakahanayi muntu akahimpi nachu wumi windi?” lwatela lwanukishili antiyilili indi mazu ahosheli Satana mumafuku aYoba nindi: “Muntu wukuhana yuma yakwetiyi yejima nawumi windi.” (Yoba 2:4) Kudi antu amakwawu abulaña kudifukula kudi Yehova, awa mazu aSatana anateli kwikala alala. Antu amavulu anateli kwila chuma chidi chejima, nikufumpa nshimbi yayiwahi, kulonda atwalekuhu nakuhanda. Ilaña akwaKristu, hiyakoñaña muniyi njilaku.
4. Muloñadi malwihu enhwiliyi Yesu chiyalemena chikupu kudi akwaKristu?
4 Tweluka netu Yesu henjili hamaseki kulonda kutwinka nyijimba yakola, maheta, nichihandilu chamafuku amavulu mukanu kaayiku. Wenjili nakushinkula njila yakuwumi wahaya nyaka mwituña dadiha, nawa kuchiñeja kwawumi wahaya nyaka dichuma chitwalemesha chikupu. (Yowanu 3:16) MukwaKristu nateli kutiya neyi lwihu lwaYesu lwatachi lwatalisha mukwila nawu, “Neyi muntu wukuheta mpata yamunu mwishina yejima nawa yajimbeshelahu nikuchiñeja kwindi kwawumi wahaya nyaka wakadiila mwodi?” Ñakwilu yidi nawu, Kwosi chakadiilamu. (1 Yowanu 2:15-17) Hakwila nawu twakuli lwihu lwaYesu lwamuchiyedi, twatela kudihula netu, ‘Yumanyi yinatela kuleka kulonda kukwatisha chikupu kukuchiñeja kwami kwawumi wamwituña dadiha?’ Ñakwilu yetu yikushindamena hachihandilu chetu, neyi twakuhwelela chikupu iku kuchiñeja kwawumi wahaya nyaka.—Esekejenu Yowanu 12:25.
5. Tunateli kutambwila ñahi chawaana chawumi wahaya nyaka?
5 Mwalala, Yesu hadiña nakuhosha nindi wumi wahaya nyaka tunateli kuwuzatilaku. Muloña, hela wumi wetu wamakonu wakampinji kantesha, wekala hichawaana. Hitunateli kuwulanda hela kuwuzatila hakwila nawu tuwuhetuku. Njila yitwatela kutambwilamu chawaana chawumi wahaya nyaka yidi ‘yakumwitiya Kristu Yesu’ niYehova, “wasomonaña antu amukeñakeñaña.” (Aŋalija 2:16; Aheberu 11:6) Hela chochu, twatela kumwekesha chikuhwelelu chetu kuhitila munyidimu, muloña “kwitiya kwakadi nyidimu kwafwa.” (Yakoba 2:26) Dichi, neyi tutoñojokahu cheñi halwihu lwaYesu, chikuwaha neyi tukushinshika chikupu hayuma yitwatela kushiya mukanu kaayi niyuma yitunakukeña kwila mumudimu waYehova kulonda kumwekesha netu chikuhwelelu chetu chakola chikupu.
“Kristu Haditiyishili Yomweni Kuwahaku”
6. Chumanyi chalemesheliyi Yesu?
6 Chatela yashindameni hayuma yamwekesheleña kaayi mumpinji yindi, Yesu washili kashinshi hayuma yalema nawa wakanini kweseka kwakukeña maheta kulonda kwikala nachihandilu chachiwahi. Chihandilu chindi chadiña chakudihana nikwovwahila Nzambi. Chatela yadiluñisheña yomweni, wahosheli nindi: “Nelaña yuma yamutiyishaña [Nzambi] kuwaha mafuku ejima.” (Yowanu 8:29) Yumanyi yakoñeliyi Yesu kulonda kumutiyisha Nzambi kuwaha?
7, 8. (a) Chumanyi chahaniniyi Yesu, nawa wulokwinyi watambwililiyi? (b) Lwihwinyi lutwatela kudihula?
7 Mpinji yimu, Yesu wayilejeli atumbanji twindi nindi: “Chenjiliyi Mwana kamuntu halondeli nindi akamukalakeluku, ilaña nindi akakalakeli akwawu, akahani wumi windi wakukuula nachu antu amavulu.” (Matewu 20:28) Yesu chatachikiliyi kuyisoñamisha atumbanji twindi nindi keña ‘yahani wumi windi,’ Petulu wamulejeli nindi chinjila hiwakamona yumiyuku. Hela chochu, Yesu hazeyeluku. Waheni wumi windi namuchima wumu, wumi wakumujimba wawanina, kudi muchidi wamuntu. Chafumini mukudihana kwindi, mpinji yindi yakumbidi yekalili yayiwahi. Amusañwili “nakumusha kuchikasa chaNzambi chachidiilu.” (Yililu 2:32, 33) Dichi watwimikilili chakutalilahu chachiwahi.
8 Kapostolu Pawulu wayifumbili akwaKristu amuRoma nindi ‘bayi kuditiyishaña kuwaha’ enu awenuku nawa wayanukishili nindi, “Kristu haditiyishili yomweni kuwahaku.” (Aroma 15:1-3) Dichi, twatela kuzatisha ñahi chikupu kufumba kwawapostolu nawa yumanyi yitwatela kushiya hakumwimbujola Kristu?
Yehova Wakeñaña Kumukalakela Chikupu
9. Chumanyi chelañayi mukwaKristu chadihanayi kudi Nzambi?
9 Mu Isarela wakushankulu, Lushimbi lwamwinkeluwu Mosi lwahosheleña chikupu nawu anduñu awaHeberu ateleleli kuyumbaku mumwaka wawuduñu wamuchitanu nachiyedi. Hela chochu, adiña nanjila yikwawu. Neyi ñamba wamukeña nkaaka yindi, nateli kufuukulahu kutwaleka kwikala ñamba mwitala dankaaka yindi mukuhanda kwindi kwejima. (Tañenu Kuhituluka 15:12, 16, 17.) Ninetu nawa twafuukulaña momumu chitwadihana kudi Nzambi. Twadihanaña kwila nkeñelu yaNzambi, bayi kulondela kufwila kwetuku. Kuhitila mukudihana, twamwekeshaña kukeña kwakweni kudi Yehova nimpwila yetu yakumukalakela haya nyaka.
10. Munjilanyi mwatuhetelayi Nzambi, nawa ichi chikuma chatela kukwasha ñahi yitoñojoka yetu ninzatilu?
10 Neyi munakudiza Bayibolu nawaYinsahu jaYehova, kushimwina nsañu yayiwahi, nikuwanika kukupompa kwawakwaKristu, tunayihameki. Tunakuhweleli netu katataka mukufuukulahu kudihana kudi Yehova nikwihula lwihu lwamwihwiluwu Fwilipi kudi iyala wakuEtiyopiya nindi: “Chumanyi chikunlekesha kumpapatisha?” (Yililu 8:35, 36) Wubwambu wenu naNzambi wukwikala neyi wawakwaKristu asonekeleliyi Pawulu nindi: “Himwadihetaku, ayilandili dehi nawuseya.” (1 Akorinda 6:19, 20) Chili tukweti kuchiñeja kwakwiwulu hela kwaheseki, neyi twadihana kudi Yehova, dikwila nawu Watuheta. Dichi, chalema kuleka kufwila kwachisemwa ‘nakuleka kwikala anduñu jawantu’! (1 Akorinda 7:23) O kukooleka kwakwikala ambuña aYehova akashinshi kulonda yatuzatisheña munakeñeliyi!
11. Indi akwaKristu ayikonkomwena kulambula chumanyi, nawa ichi chatalisha mudihi, neyi chinamwekeshuwu muNshimbi yamwinkeluwu Mosi?
11 Pawulu wakonkomweneni akwawu akwakwitiya nindi: “Lambulenu nyijimba yenu yili mulambu wawumi, wajila, wakutiyisha nachu Nzambi kuwaha; diwu mudimu wenu waya mumaana.” (Aroma 12:1) Awa mazu atela ayanukishili aYudeya akwaKristu hanyilambu yahanineñawu mukudifukula kwawu henohu kanda ekali atumbanji twaYesu. Atela elukili nawu muLushimbi lwamwinkeluwu Mosi, ayimuna alambwileñawu hakameña kaYehova ateleli kwikala amawahi chikupu. Hiyetejeleña chimuna wachifwayuku. (Malaki 1:8, 13) Twelaña chochimu neyi tuhana nyijimba yetu neyi “mulambu wawumi.” Twasambilaña kumukalakela Yehova chikupu, kubadika kumukalakela hanyima yakwila mutunakukeña. Chitwadihana kudi Nzambi, twamwinkaña chikupu ‘wumi’ wetu, kubombelahu niñovu, maheta, niwuswa wakwila yuma. (Akolose 3:23) Twazatishaña ñahi ichi chikuma muwumi wetu?
Zatishenu Mpinji Yenu Chachiwahi
12, 13. Njilanyi yimu yakumukalakelamu Yehova chikupu?
12 Njila yimu yitwamukalakelañamu Yehova chikupu yidi yakuzatisha mpinji yetu chiwahi. (Tañenu Aefwesesa 5:15, 16.) Kudiyula kwakeñekaña hakwila nawu tuzatisheña mpinji chachiwahi. Yuma yamukaayi nikubula kuwanina kutwaswana kwatuleñelaña kukeña kuzatisha mpinji yetu kulonda tudiluñisheña hela kuhetelamu. Mwalala, “Yuma yejima yikweti yilaaka yayu,” kubombelahu nimpinji yakunooka niyakuzata nyidimu yakumujimba kulonda kutukwashaku kuzata nyidimu yetu yawakwaKristu. (Mukwakutaŋisha 3:1) Hela chochu, mukwaKristu wadihana watela kwila yuma mukwesekeja nikuzatisha mpinji yindi chachiwahi.
13 Pawulu chayiliyi kuAtenisi, wamweni nindi “AkwaAtenisi ejima, hela enyi, hiyelili chuma chacheñuku, akuminini dakushimuna hela kutiya chuma chachiha hohu.” (Yililu 17:21) Nimakonu, antu amavulu akisañanaña mpinji yawu. Makonu yuma yaluwañeshaña yabombelamu kutalaña chisanji chanyivwimbimbi, kuhema yisela yahavidiyo, nikusandujola haIntaneti. Kudi yuma yayivulu yatela kutuluwañesha nikutumanishila mpinji. Neyi tudiñijamu, tunateli kudiwula kudiza kumwiluka Yehova. Tunateli nikutachika kutoñojoka netu hitukweti mpinji yakwakamena “yuma yabadika kuwaha;” yuma yakundama kukumukalakela Yehova.—Afwilipi 1:9, 10.
14. Malwihwinyi yitwatela kutoñojokahu chikupu?
14 Dichi, hamu neyi kambuña aYehova wadihana, dihulenu nenu, ‘Komana ndandanda yami yefuku nifuku yabombelamu mpinji yakutaña Bayibolu, kutoñojokahu chikupu, nikulomba?’ (Masamu 77:12; 119:97; 1 Atesalonika 5:17) ‘Komana nekalaña nampinji yakuloñesha kupompa kwawakwaKristu? Nakoleshaña amakwawu kuhitila mukwakulahu hakupompa?’ (Masamu 122:1; Aheberu 2:12) Izu daNzambi dashimunaña nawu Pawulu niBaranaba “hiyakulabila kwenoku mafuku amavulu nakuhosha mudi Mwanta [Yehova] chakadi woma.” (Yililu 14:3) Komana kwila muhimpa nshakaminu yinu kulonda kwikala nampinji yeneni, hela “mafuku amavulu,” akuzata mumudimu wakushimwina, hela kukalakala neyi payiniya nehi?—Tañenu Aheberu 13:15.
15. Indi aeluda azatishaña ñahi mpinji yawu chachiwahi?
15 Kapostolu Pawulu niBaranaba chiyendeleli chipompelu chawakwaKristu muAntiyoki, “Hiyakushakama nawatumbanji mafuku amavulu” kulonda kuyikolesha. (Yililu 14:28) Chochimu aeluda azatishaña mpinji yawu kulonda kukolesha amakwawu. Kubombelahu hamudimu wawu wamwiha, aeluda azataña nañovu kulonda kubiña anyikoku, kukeñakeña anyikoku ajimbala, kukwasha akata, nikwakamena nyidimu yikwawu yayivulu muchipompelu. Neyi wudi mana kwetu wapapatishewa, komana nshakaminu yeyi yinateli kukuleñela kuzata nañovu kulonda kushikahu hakukooleka kwakukalakala nyidimu yikwawu?
16. Njilanyi jitwatela ‘kwililamu chachiwahi . . . akwetala dakwitiya kwakukuhwelela’?
16 Amavulu ekalaña namuzañalu wakuzataku mudimu wakuhana wukwashu kudi antu anayandi nakukala kwakojejaña antu hela kwenzaña kwakweni. Chakutalilahu, muhela wumu wudi muyaaka yamuma 60 wakalakelaña haBeteli kakavulu wendeleña iluña dadilehi kulonda kudihana nakuzata hamu neyi mukwakuhana wukwashu. Muloñadi wazatishililiyi mafuku indi akunooka muniyi njila? Wahosheli nindi: “Hela chakwila hinadizahu nyidimu yidi yejimaku, iku kwadiña kukooleka kwakuzata mudimu wakeñekeleña. Chinamweni chikuhwelelu chakola chawana kwetu niahela ayandili chikupu hakujimbesha mahetawu chankolesheli chikupu.” Kubombelahu, makombakaji awantu mukaayi kejima anakuzata mudimu wakutuña Matala aWanta niMatala aKupompelamu kupompa kweneni. Kuhitila mukuzataku muniyi nyidimu namuchima wumu, ‘twelilaña chachiwahi . . . akwetala dakwitiya kwakukuhwelela.’—Aŋalija 6:10.
“Ami Nidi Nenu Mafuku Ejima”
17. Chumanyi chimwatela kuhana kulonda kuhimpa nawumi wahaya nyaka?
17 Muza wawantu wadambula kudi Nzambi wudi kwakwihi nakuhita. Hitweluka mpinji yayeni yakamwekana chumichuku. Ilaña, twiluka netu “mpinji yinakehi dehi” nawa “yuma yampata yinu chiyidichi, yahitaña.” (Tañenu 1 Akorinda 7:29-31.) Kwiluka netu “mpinji yinakehi dehi” kunaleteshi lwihu lwehwiliyi Yesu kwikala lwalema chikupu lwakwila nawu: “Chumanyi chakahanayi muntu akahimpi nachu wumi windi?” Chakadi nikujina, twatela kudihana chikupu kwesekeja nachinakukeñayi Yehova kulonda tukaheti “wumi walala chikupu.” (1 Timotewu 6:19) Eña, chachiwahi kutiyilila kufumba kwaYesu ‘kwakutwalekahu kumulonda’ ‘nikusambila kukeña wanta.’—Matewu 6:31-33; 24:13.
18. Chumanyi chitwatela kukuhwelela, nawa muloñadi?
18 Mwalala, kumulonda Yesu hikwapelaku, nawa kwesekeja nakusoñamisha kwaYesu, antu amakwawu ajimbeshelahu niwumi wawu mukanu kaayi. Ilaña, kufwana Yesu, twakanaña kweseka kwakwila nawu ‘tuditiyili luwi.’ Twakuhwelela kukana kwalejeliyi atumbanji twindi awayishewa amuyaaka nkulakaji yatachi nindi: “Ami nidi nenu mafuku ejima nikwakakumina nyaka.” (Matewu 28:20) Komana, tuzatishenu mpinji yetu niwuswa wetu mumudimu wajila nakushika hakumina ñovu jetu. Chitukwilaña mwenimu, tukumwekesha kukuhwelela kwetu kwakwila nawu Yehova wakatupulwisha mulukadi lweneni hela wakatwinka wumi wawuwahi mwituña dadiha. (Aheberu 6:10) Dichi tukamwekesha chitwalemesha chikupu chawaana chawumi.
Mukwakula Nenudi?
• Indi Yesu wamwekesheli ñahi kukeña kwabadika kwakukalakela Nzambi niantu?
• Muloñadi muntu chatelelayi kudibondayi, nawa nateli kudibonda ñahi?
• MuIsarela wakushankulu, nyilambu yamuchidinyi yetejeleñayi Yehova, nawa chumanyi chitwatela kudizilaku makonu?
• Munjilanyi mutwatela kuzatishila mpinji yetu chachiwahi?
[Malwihu aKuzatisha haKudiza]
[Nyevulu yidi hefu 26]
Yesu wakoñeleña yuma yamuzañalesheleña Nzambi
[Mwevulu wudi hefu 28]
Hakukwasha kudifukula kwalala, aIsarela anyichima yayiwahi ahanineña nyilambu yayiwahi
[Nyevulu yidi hefu 29]
Twamuzañaleshaña Nzambi kuhitila mukuzatisha mpinji yetu chiwahi