‘Dikañenu naDiyabolu’ Neyi Cheliliyi Yesu

“Diyabolu dikañenu nindi, niyena wukuyitemuka.”—YAKOBA 4:7.

1. Yesu welukili nindi wakamona ikañesha damuchidinyi heseki?

 YESU KRISTU welukili nindi wakamona ikañesha kufuma kudi Diyabolu. Chumichi chadiña chalala kwesekeja namazu ahosheliyi Nzambi kudi kapela nikudi spiritu watama wadikañili wadiña nakuhoshela mudi kapela, Nzambi wahosheli nindi: “Nukusha nkunyi mukachi keyeyi namumbanda [mbadi yakwiwulu yakuloñesha kwaYehova yidi neyi mumbanda], nimukachi kawanyaneyi nawanyanindi; [Yesu Kristu] [w]akakuchika kumutu, nineyi wakamuchika kukatutu.” (Kutachika 3:14, 15; Chimwekeshu 12:9) Kumuchika Yesu kukatutu chatalishili mukwila nawu wakakabakana hadi mpinji yantesha kuhitila mukumujaha iku wuchidi hamaseki, kuhiñahu Yehova wakamusañula nakumwinka kulema kwamwiwulu. Ilaña kumuchika kapela kumutu chatalisha mukwila nawu Diyabolu akamujilumuna haya nyaka.—Tañenu Yililu 2:31, 32; Aheberu 2:14.

2. Muloñadi Yehova chelukiliyi nindi Yesu wakamushinda chikupu Diyabolu?

² Yehova welukili chikupu nindi Yesu wakakalakala mudimu windi chachiwahi nikumushinda Diyabolu heseki. Muloñadi Yehova chelukiliyi chikupu nindi wukatwesha? Muloña wamuleñeli dehi Yesu mwiwulu kumashiita, wadiña nakumutala chazatileñayi, nawa welukili nindi iwu “mukalawenu” nawa “wedi wayuma yaleñawu yejima” wadiña wovwahila nawa wakashinshi. (Yishimu 8:22-31; Akolose 1:15) Dichi chamutemesheluwu Yesu heseki, Diyabolu amwitejeli kumweseka Yesu kushika nikukufwa,  nawa Nzambi welukili chikupu nindi Mwanindi wumu hohu wakeñayi wakamushinda chikupu Diyabolu.—Yowanu 3:16.

Yehova Wakiñaña Ambuñidi

3. Diyabolu wafwilaña kuyila ñahi ambuña aYehova?

³ Yesu wamuteneni Diyabolu nindi diyi “mwanta wayulaña mpata yamunu mwishina” nawa wasoñamishili atumbanji Twindi nindi akayimwesha ihuñu, neyi chamumwesheluwu yena. (Yowanu 12:31; 15:20) Mpata yamunu mwishina, yashakama muñovu yaSatana Diyabolu, yahela akwaKristu alala muloña amukalakelaña Yehova, nawa hiyakwakushimuna kuloña. (Matewu 24:9; 1 Yowanu 5:19) Diyabolu walulakenaña sweje-e ashalahu awayishewa akayula naKristu muWanta windi wamwiwulu. Cheñi Satana walulakenaña aYinsahu jaYehova amavulu akweti kuchiñeja kwakushakama haya nyaka muparadisa heseki. Izu daNzambi datusoñamishaña nawu: “Mukwankunyi nenu [D]iyabolu wudi nakuya nakutambatamba nakukeñakeña akudyayi neyi mutupa wabulumaña.”—1 Petulu 5:8.

4. Chumanyi chinakumwekesha nawu antu jaNzambi anadikañi naDiyabolu chikupu makonu?

⁴ Twadikañaña chikupu naDiyabolu, muloña twekala mukuloñesha kwakiñewaña naYehova Nzambi. Shinshikenu haniwu wunsahu: Hayaaka 100 yinahituhu, alomboli amakwawu atama nyichima amunsañu yanyaka aneseki nawu ajilumuni aYinsahu jaYehova. Ilaña aYinsahu anatwalekuhu nakuvulilaku nawa chayinu mpinji adi kwakwihi na 7,000,000 muyipompelu yakubadika ha 100,000 mukaayi kejima. Anlomboli awukatu akabishileña antu jaYehova diwu anajiyishiwu chikupu!

5. Indi Isaya 54:17 yinakushikijewa ñahi hadi ambuña aYehova?

⁵ Hakuhosha kuchipompelu chawaIsarela akushankulu Nzambi wakanini nindi: “Hikwakekala chitwa, chakachilawu nawu akukatishi nachu, chakakolaku. Madimi ejima akakunyamukila nawu akusompeshi, wakayitanyisha. Weniwu diwu wuswana wawambuña Yehova, nikuloña kwawu kunafumi kudami.” (Isaya 54:11, 17) Ichi chikaninu chinashikijewi kudi antu jaYehova mwahita iseki dejima munanu ‘mafuku akukuminina.’ (2 Timotewu 3:1-5, 13) Tunakutwalekahu kudikaña naDiyabolu, nawa kwosi chitwa chikweseka kuzatishayi kulonda kumanisha antu jaNzambi chikutweshaku, muloña Yehova wudi kukabadi ketu.—Masamu 118:6, 7.

6. Indi wuprofwetu waDanyeli watuleja chumanyi kutalisha hayuma yakamwekena chiyulu chaDiyabolu?

⁶ Chineli kukuma kwakanu kaayi katama kejima kunakuswila kwakwihi mukunyakashana, njila jejima jakuyula kwaSatana akajifumishahu chikupu. Kaprofwetu Danyeli wuyoneneni hasonekeleñayi, washimwineñahu dehi nindi: ‘Hamafuku amba kekala anyantowu [amakonu] Nzambi wamwiwulu wamba kaloñesha wanta [mwiwulu] wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta ejima awa [amakonu], wena nkawawu wakemana mbe haya nyaka.’ (Danyeli 2:44) Hampinji yakamwekana chumichi, chiyulu chaSatana nichawantu abula kuwanina chakajiya. Yuma yamukaayi kaDiyabolu yejima yakajiya chikupu, nawa Wanta waNzambi wakayula iseki dejima chakadi ikañesha.—Tañenu 2 Petulu 3:7, 13.

7. Tweluka ñahi netu ambuña aYehova anateli kudikaña chikupu naDiyabolu hamuntu hamuntu?

⁷ Chakadi nikujina, kuloñesha kwaYehova kwakakiñewa nawa kukatwalekahu kwikala nawuselewa waNzambi. (Tañenu Masamu 125:1, 2.) Indi etu? Bayibolu yatulejaña nawu tunateli kudikaña naDiyabolu, neyi cheliliyi Yesu. Eñañi, wuprofwetu washimwiniyi Kristu kuhitila mudi kapostolu Yowanu wamwekeshaña nawu hela chakwila Satana nakukañesha, “izaza deneni” dawantu akweti kuchiñeja kwakushakama heseki akapuluka hakukuma kwakanu kaayi. Kwesekeja nachahosha Nsona, abidikaña nawu: “Wamwinu wikali waNzambi yetu washakama hetanda dawanta, niwaKana kamukoku [Yesu Kristu].” (Chimwekeshu 7:9-14) Awayishewa ayishimuna nawu ashindaña Satana, nawa alunda nawu “anyikoku acheñi,” adikañaña  nindi chikupu. (Yowanu 10:16; Chimwekeshu 12:10, 11) Hakwila nawu tudikañi naDiyabolu, chakeñekaña kuzata nañovu nikulomba chikupu kulonda ‘kutwamwina kudi watama.’—Matewu 6:13.

Chakutalilahu chaChiwahi hakuDikaña naDiyabolu

8. Kwesekanyi kwatachi kwasonekawu kwazatishiliyi Diyabolu hakumweseka Yesu mwisaña nawa Kristu wakwili nindidi?

⁸ Diyabolu wesekeli nindi yafumpi kashinshi kaYesu. Mwisaña mwamutwaliliyi, Satana wamwesekeli Yesu kulonda yaleki kumwovwahila Yehova. Ilaña, Yesu wemikili chakutalilahu chachiwahi chakudikaña naSatana. Hanyima yakujiña nanzala hadi mafuku 40, mwana niwufuku, chakadi nikujina Yesu watiyili nzala chikupu. Satana wahosheli nindi: “Neyi wuMwana kaNzambi, hoshaku neyi malolawa abalumuki mankendi.” Ilaña Yesu wakaanini kuzatisha ñovu jindi jamwenkeluwu kudi Nzambi kulonda kuditiyisha yomweni kuwaha. Dichi, Yesu wahosheli nindi: “Anasoneki nawu, Muntu hakuhanda namankendi hohuku, chiña namazu ejima akufuma mukanwa kaNzambi.”—Matewu 4:1-4; Kuhituluka 8:3.

9. Muloñadi wutwatela kukaanina kweseka kwaDiyabolu kwakukeña kuzatisha kufwila kwetu kwakumujimba?

⁹ Makonu, Diyabolu wazatishaña kufwila kwakumujimba kwawambuña aYehova. Dichi, twatela kukaana chikupu kweseka kwakufwila kwila wuvumbi, kunatandi mukanu kaayi katama. Izu daNzambi dakonkomwenaña nawu: “Enu kwiluka nenu abula kuloña hiyamba kaswana wanta waNzambuku, nehi? Bayi ayidimbaku; hela ayivumbi, hela akwakupesha, hela akwawusenji, hela amayala adilisha neyi ambanda, hela aditamishaña nawakwawu amayala, . . . hiyamba kaswana wanta waNzambuku.” (1 Akorinda 6:9, 10) Chakadi nikujina, antu akweti yililu yatama nawa akanaña kuhimpa hiyakayiteja kushakama mwituña daNzambi dadihaku.

10. Kwesekeja naMatewu 4:5, 6, kwesekanyi kukwawu kwazatishiliyi Satana kulonda kufumpa kashinshi kaYesu?

¹⁰ Kutalisha hakweseka kumu kwamwesekeluwu Yesu mwisaña, Nsona yahosha nawu: “Diyabolu hakumutwala muñanda yajila; hakumusha hewulu dambañu yatembeli, hakumwila nindi, Neyi eyi wuMwana kaNzambi dinati mwishina, muloña anasoneki nawu, Wakakulejela añelu jindi; wena akakwaka namakasawu wakenza kahuma mwendu weyi kwilola.” (Matewu 4:5, 6) Satana watalishili mukwila nindi chumichi chadi kumwekesha nawu Yesu hiMesiya. Hela chochu, chumichi chadi kwikala chaluwa, nawa iyi yililu yakudivwimba Nzambi hadi kuyiteja hela kumukwashaku. Cheñi nawa, Yesu watwalekeluhu kwikala washinshika kudi Yehova nawa wakwili kuhitila mukuzatisha nsona.  Wahosheli nindi: “Anasoneki cheñi nawu, Bayi wakamweseka Yehova Nzambi yeyuku.”—Matewu 4:7; Kuhituluka 6:16.

11. Satana nateli kutweseka ñahi, nawa chumanyi chinateli kufumamu?

¹¹ Satana nateli kutweseka kulonda kukeña kulema munjila jamboka-mboka. Cheñi nateli kutuleñela kwimbujola yuma yedikaña mukaayi kutalisha hanvwalilu nikudiwahisha hela kudiñija muyisela yatama. Neyi tudiwula nshimbi jamuBayibolu nikwimbujola yuma yamukaayi, komana tunateli kukuhwelela añelu kutukiña kuyuma yatama yinateli kufumamu? Hela chakwila Mwanta Davidi wabalumukili mumuchima kutalisha hanshidi yakoñeliyi naBatisheba, hiyamukiñili kuyuma yatama yafuminimuku. (2 Samweli 12:9-12) Dichi bayi tumweseka Yehova munjila yatamaku, hadaha kuhitila mukukwata wubwambu nakaayi.—Tañenu Yakoba 4:4; 1 Yowanu 2:15-17.

12. Kwesekanyi kwashimunawu haMatewu 4:8, 9, nawa Mwana kaNzambi wakwili nindidi?

¹² Kweseka kukwawu kwazatishiliyi Diyabolu mwisaña, kwadiña kwakumwinka Yesu ñovu jakuyula mawanta. Satana wamulejeli Yesu mawanta ejima amukaayi nikulema kwawu nawa wamwilili nindi: “Neyi wukudinata heseki nakudifukula kudami, nukukwinka yuma yejimiyi.” (Matewu 4:8, 9) Iku kwadiña kweseka kwatama kwakukeña kutambula kudifukula kwamutelela Yehova nikumuleñela Yesu yafumpi kashinshi kindi kudi Nzambi. Hamuloña wakukeña nindi antu adifukuleña kudi yena, iwu kañelu wadiña washinshika wavulumwini muloña walwisu nawa wekalili mukwakweseka watama chikupu, Satana Diyabolu. (Yakoba 1:14, 15) Kwambukaku, Yesu wafukwiluhu kwikala washinshika kudi Tata yindi wamwiwulu nawa wahosheli nindi: “Fumaku eyi Satana, muloña anasoneki nawu, Kadifukulaña kudi Yehova Nzambi yeyi, wakakalakelaña yena hohu kanka windi.” Dichi Yesu wadikañili cheñi naDiyabolu chakadi nikuhita mumbadi nawa chatiyakana. Mwana kaNzambi hakeñeleña kwikala wampata yamunu mwishina yaSatanaku nawa hakadifukulahu kudi watamaku.—Matewu 4:10; Kuhituluka 6:13; 10:20.

“Diyabolu Dikañenu Nindi, niYena Wukuyitemuka”

13, 14. (a) Kuhitila mukumuleja Yesu mawanta ejima amukaayi, chumanyi Diyabolu chamwinkeleñayi? (b) Indi Satana wesekaña kutuhuñumuna ñahi?

¹³ Kuhitila mukumuleja Yesu mawanta ejima amukaayi, Diyabolu wadiña nakumwinka ñovu jabadika. Satana wakuhweleleli nindi yuma yamweniyi Yesu yadi kumukokola nikumuleñela kwiteja kwikala nlomboli wabadika wachiyulu. Makonu, Diyabolu hatwinkaña mawantaku, ilaña wafwilaña kuhuñumuna nyichima yetu nayuma yitwamonaña, yitwatiyaña, niyitwatoñojokaña.

¹⁴ Diyabolu diyi wunakuyula kanu kaayi. Dichi, diyi wunakulombola nsañu jayikunzulemba niakwakusoneka yipapilu yansañu. Komana, hichatuhayamishañaku, hakumona yuma yahanaña kaayi nawu tutaleña, tutiyilileñaku nikutaña, yenzala nayuma yatama nimadombu. Yuma yamwekeshaña kaayi yekalaña yakutukokola kulonda kwikala nampwila yakulanda yuma yayivulu yitunakubula kukeña. Kuhitila muyuma yeniyi, Diyabolu watwesekaña kutukokola nayuma yakumujimba yitwamona, yitwatiyaña, nawa yitwatoñojokaña. Ilaña neyi tukaana kutala, kutiyililaku nikutaña, kunsañu yabula kwesekana nanshimbi jamuBayibolu, dikwila nawu tunakuhosha netu: “Fumaku eyi Satana!” Dichi twamwimbujolaña Yesu kuhitila mukwikala akola nikukaana chikupu kaayi kaSatana katama. Twamwekeshaña netu hitwekala amukaayi kaSatanaku, kuhitila mukudilumbulula chakadi woma netu tudi aYinsahu jaYehova nawa atumbanji twaKristu, kunyidimu, hashikola, muchituñilu, nikudi antaña jetu.—Tañenu Maku 8:38.

15. Hanyima yakudikaña naSatana muloñadi chichalemena kutwalekahu kwikala asoñama?

¹⁵ Chelili Diyabolu nakañanyi dehi kumweseka Yesu kamuchisatu kulonda kufumpa kashinshi kindi kudi Nzambi, ‘Diyabolu wamushili.’ (Matewu 4:11) Hela chochu, Satana halekeli chikupu kumweseka Yesuku, muloña twatañaña nawu: “Diyabolu chanamanishiyi kweseka kwejima [mwisaña], hakufuma kudi yena, nindi  amoni hekwawu hakamwesekelayi.” (Luka 4:13) Neyi tutwesha kudikaña naDiyabolu, twatela kumusakilila Yehova. Ilaña twatela kutwalekahu kulomba wukwashu kudi Nzambi, muloña Diyabolu nateli kumona cheñi hekwawu hakutwesekela, bayi neyi hampinji yitunateli kukuhwelela kutwesekaku. Dichi, twatela kwikala asoñama mpinji yejima, nikutwalekahu kukalakala mudimu waYehova wajila hela chakwila tukutalañana nakweseka.

16. Yehova watwinkaña ñovwinyi yabadika, nawa muloñadi wutwatela kuyilombela?

¹⁶ Hakwila nawu tutweshi kudikaña naDiyabolu, twatela kulomba ñovu yabadika yuma yejima, spiritu yaNzambi yajila, nakukuhwelela netu akutwinka. Spiritu yajila yikutukwasha kwila yuma yitunateli kukañanya kuzata muñovu jetu. Yesu walejeli atumbanji twindi nindi akayinka spiritu yaNzambi, hakuhosha nindi: ‘Neyi enu [abula kuwanina nawa] atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’ (Luka 11:13) Twatela kutwalekahu kulomba spiritu yajila yaYehova. Tunateli kumushinda chikupu, muloña wakwikala naspiritu yajila yatukwashaña hakufwila kudikaña naDiyabolu. Kubombela hakulombaña mpinji yejima nawa kwakufuma hamuchima, twatela kumanyeka yitwa yaNzambi yejima yakuspiritu kulonda “tutweshi kudikaña namaana a[D]iyabolu akudimbana.”—Aefwesesa 6:11-18.

17. Chumanyi chamukwashili Yesu kudikaña naDiyabolu?

¹⁷ Kudi chuma chikwawu chamukwashili Yesu kudikaña naDiyabolu, nawa chinateli kutukwasha ninetu. Bayibolu yahoshaña nawu: ‘Yena hansañu yamuzañalu wamushililuwu kumesu indi [Yesu] hakuumikila hamutondu wakuyandishila, hakudiwula nsonyi, nashakami kuchikasa chachidiilu chetanda daNzambi dawanta tenta-a.’ (Aheberu 12:2) Twatela kwikala namuzañalu wowumu kuhitila mukuhakwilaku wanta waYehova, kulemesha ijina dindi dajila, nikutoñojokaña hankisu yakwikala nawumi wahaya nyaka. Wenowu muzañalu wutukatiya hampinji yakamufumishahu Satana ninyidimu yindi yejima nawa “akwakudizoza akaswana ituña, akatiya kuwaha nankashi nakushakama chachiwahi chamwena”! (Masamu 37:11) Dichi, twalekenuhu kudikaña naDiyabolu, neyi cheliliyi Yesu.—Tañenu Yakoba 4:7, 8.

Mukwakula Nenudi?

• Chumanyi chamwekeshaña nawu Yehova wakiñaña antu jindi?

• Indi Yesu wemikili ñahi chakutalilahu hakudikaña naSatana?

• Munjilanyi mumunateli kudikaña naDiyabolu?

[Malwihu aKuzatisha haKudiza]

[Mwevulu wudi hefu 30]

Kukwata wubwambu nakaayi kwatuleñelaña kwikala nawulumbu naNzambi

[Mwevulu wudi hefu 32]

Yesu wakaanini mawanta amukaayi ejima amwinkeliyi Satana