Hinyi Watela Kwiluka Yuma Yikamwekana Kumbidi?

“Ami yami Nzambi, . . .  kufumisha kutachi nashimunaña jakunsa, kufumisha kushankulu nashimunaña yichidi kanda ayikoñi.”—Isaya 46:9, 10.

MUNANU mafuku akala, akwakutala hachihandilu, hansañu jamatuña nachiyulu, nihamali, adizaña nsañu yanyaka niyaaku yamakonu kulonda kushimunañahu dehi yuma yikamwekana kumbidi. Amakwawu niwena, hakufwila kwiluka yuma yakayimwekena kumbidi, ayaña nakwihula kudi akwakuhoña natutumbwa hela akwakupesha kulonda eluki. Kakavulu antu wenawa aneñaña nayuma yafumañamu. Komana chakala chikupu kwiluka yuma yikamwekena kanu kaayi, yisaka yetu, ninetu aweni? Komana, mwalala kudi muntu wunateli kushimunañahu dehi yuma yikamwekana kumbidi?

Nzambi Watwesha yejima, Yehova, walumbulwili ñovu yindi yakushimunañahu dehi yuma yakumbidi, mumazu amulejeliyi kaprofwetu Isaya, itunasoneki hewulu. Kuhitila mudi Isaya, Nzambi washimwineñahu dehi kusubuka kwawaIsarela akushankulu kufuma muwunkoli wamuBabiloni nichafuntiluwu nakutuñulula Yerusalema nitembeli. Indi iwu wuprofwetu wadiña ñahi walala? Henohu kuchidi yaaka kwakwihi na 200, Isaya washimwineñahu dehi ijina damuntu wakashinda Babiloni, Kirusi. Kubombelahu, Isaya walumbulwili chachiwahi kafuta kazatishiliyi Kirusi, kakuteñulula menji aKaloña Yufurati, wakiñileña musumba. Isaya wamweneñahu dehi nindi Kirusi wakawana yisu yiyedi yakola yashiluwu yawashi mumushikila, yaleñeleli Kirusi kunyakala kushinda.—Isaya 44:24–45:7.

Muntu hakweti wuswa wakwiluka yuma yakamwekana kumbidi neyi chelukañayi Nzambuku. Mwanta wamaana Solomoni wasonekeli nindi: “Bayi wudisama yakumadikuku muloña hiwuneluki yakasoña mwifukuku.” (Yishimu 27:1) Ichi chikuma chichidi chalala. Kwosi muntu watela kwilukilañahu dehi yuma yakamumwekena kumbidi. Chumanyi chaleñelaña Nzambi kwikala wambukaku? Muloña weluka chikupu yuma yejima yaleñayi, kubombelahu yililu niyaaku yamuntu. Neyi yafuukulahu kwiluka yuma yakumbidi, Nzambi nateli kwilukañahu dehi yuma yakakoña antu ninyuza yejima. Cheñi nawa, wukweti ñovu yabadika yakuyula yuma yakamwekana. Neyi yashimunañahu dehi kuhitila mudi atuprofwetu twindi nindi kudi chuma chikamwekana, “wakoleshaña izu dakambuñindi, welaña mwaya mpuña yawatuñanda twindi.” (Isaya 44:26) Yehova Nzambi hohu diwatela kuhosha mwenimu.

Isaya washakamini yaaka kubadika ha 700 henohu Yesu, Mesiya, kanda yenzi. Hela chochu, Isaya waprofweteli kutalisha hakwinza kwaMesiya. Sweje-e, kutachika muyaaka nkulakaji 18 nakutwalekahu, akwakuhisha Bayibolu  namuloña atadikishaña walala wamukanda waIsaya. Ahoshaña nawu wuprofwetu waIsaya hiyawushimwineñahu dehiku, ilaña awusonekeli hanyima yayuma yamwekeni, nsoneki wasonekeleña hohu yuma yamwekeni dehi. Komana dimu? Mu 1947 awanini chipapilu chamumukanda waIsaya, hamu nanyivuñilu yikwawu yakushankulu, mwiyeñu kwakwihi nakaluñalwiji katenañawu nawu Dead Sea. Akwakudiza hajakusandujola akunkulwili nawu ichi chipapilu achituñili dehi nawa mwahitili yaaka 100 henohu Mesiya hela Kristu wuyashimwineñahu dehi kanda yovwaliki. Mwalala, Bayibolu yashimwineñahu dehi yuma yakamwekana kumbidi!

Isaya niansoneki aBayibolu amakwawu hiyashimwineñahu dehi yuma yikamwekana kumbidi kushindamena hamaanawuku. Ilaña, “ahosheli chakufuma kudi Nzambi, chakuyihoshesha kudi [s]piritu [y]ajila.” (2 Petulu 1:21) Muyibaba yinalondeluhu, tukushinshika hayuma yamwekeni muchihandilu chaYesu yashimwineñahu dehi kuhitila mudi Isaya. Kuhiñahu, tukuhanjeka hayuma yashimwineñahu dehi Yesu niatumbanji twindi yinakumwekana makonu niyakamwekana kumbidi.