Dizishenu Anyanenu

Komana Mwekala Nechima? Yosefu Amutiyilileña Ichima Kudi Amana Kwindi

TUSHINSHIKENU chalumbuluka kwikala nechima. Komana mwahelaña muntu wahamekañawu amakwawu nawu wekala chiwahi, wamuwahi, hela nawu wekala nawunyonji? *— Eñañi, neyi mwamutiyilaña ichima, chumichi chinateli kumwekana.

Ichima dinateli kwikala muchisaka neyi anvwali akeña mwana wumu amakwawu ayihela. Bayibolu yashimuna chisaka chimu mwadiña kukala kweneni hamuloña wechima. Tushinshikenu hakukala kwamwekeni nichuma chitwatela kudizilaku.

Yosefu wadiña mwana kaYakoba wanaambala 11, nawa amana kwindi amutiyilileña ichima. Muloñadi?— Muloña tata yawu Yakoba, wamukeñeli Yosefu chikupu. Chakutalilahu, Yakoba wamuchiminini Yosefu chikovwelu chachiwahi chamahina eñi naeñi. Yakoba waswejeli kumukeña Yosefu “muloña wadiña mwana wahawushinakaji windi” nawa diwadiña mwana watachi wavweliyi nañodindi Racheli waswejeli kukeñayi.

Bayibolu yahoshaña nawu ‘ana kwaYosefu chamwenuwu tata yawu namukeñi yena chakubadika ana kwindi ejima, amuhela nikumuhela.’ Dichi ifuku dimu Yosefu walejeli chisaka chindi nindi, waloteli ejima wawu anakumufukamina kushilahu nitata yindi. Bayibolu yahoshaña nawu “ana kwindi amutiyilili ichima,” nawa tata yaYosefu wamuzuwilili hakushimuna chilota chamuchidiwu.—Kutachika 37:1-11.

Chimwahitili yaaka, chelili Yosefu nashikiji dehi yaaka 17 yakusemuka, amana kwindi ayili kwakulehi nakuhemba nyikoku niampembi achisaka. Dichi Yakoba wamutemesheli Yosefu kuya nakutala ana kwindi. Wuneluki chakeñeleña kwilawu ana  kwindi amakwawu chamumwenuwu nakwinza?— Akeñeleña kumujaha! Ilaña, Rubeni niYuda hiyakeñeleña nawu amujahiku.

Hampinji yahitileñawu akwakulandisha yuma ayileña kuEjipitu, Yuda wahosheli nindi: ‘Tuyenu tumulandishenu.’ Dichi amulandishili. Kufumahu, ajahili mpembi nakuputa mashi kuchikovwelu chaYosefu. Chiyatwaliluwu chikovwelu kudi tata yawu, wadilili nindi: “Chisumi namudyi! Yosefu chalala amutabola dehi!”—Kutachika 37:12-36.

Chihaleheli, Yosefu amukeñeli kudi Fwaro, nyuli wamuEjipitu. Chuma chaleñeleli kumukeña, muloña Nzambi wamukwashili Yosefu kulumbulula mwatalishili yilota yiyedi yaFwaro. Chilota chatachi chadiña chawañombi atoha atanu nayedi niañombi atanu nayedi akosa. Chilota chamuchiyedi chadiña chanyitu yatidiku yitanu nayiyedi yayiwahi ninyitu yitanu nayiyedi yominina. Yosefu wahosheli nindi, iyi yilota, yalumbulwileña nawu kwakekala kwañula yakudya yayivulu hadi yaaka yitanu nayiyedi, kuhiñahu kwakekala nzala yakapwelendendi hadi yaaka yitanu nayiyedi. Dichi, Fwaro wamwinkeli Yosefu mudimu wakuhemba yakudya muyina yaaka mwadiña yakudya yayivulu kulonda chikaholoka nzala yakapwelendendi akekali nayakudya.

Chikwaholokeli nzala yakapwelendendi, chisaka chaYosefu chadiña kwakulehi, chakankilili yakudya. Yakoba watemesheli amana kwaYosefu ikumi kuEjipitu kuya nakulanda yakudya. Amuwanini Yosefu, ilaña hiyamwilukiluku. Chakubula kudilumbulula kudi ana kwindi, Yosefu wayesekeli ana kwindi kulonda kumona neyi anahimpi, nawa welukili nindi ana kwindi atiyili kutama chikupu hachuma chamukoñeluwu. Kufumahu Yosefu wadilumbulwili kudi ana kwindi. Azañaleli chikupu hakudimona cheñi namana kwawu!—Kutachika, kapetulu 40 nakushika ku 45.

Chumanyi chimwatela kudizila kuniyi nsañu yamuBayibolu kutalisha hechima?— Ichima dinateli kuleta kukala kweneni, nawa dinateli kuleñela muntu kukatisha mana kwindi! Tutañenu mukanda waYililu 5:17, 18 niYililu 7:54-59 kulonda twiluki ichima chidaleñeleli antu kwila katama kudi atumbanji twaYesu.— Hanyima yakutaña iyi nsañu, munamoni muloña wutwatelela kutondolwela ichima?—

Yosefu wahandili yaaka 110. Wavwalili nyana, nawa wadiña nawezukulu, nianyana kawezukulwindi. Tuneluki chikupu netu Yosefu wadizishili anyanindi kukeñañana nikutondolwela ichima.—Kutachika 50:22, 23, 26.

[Tumazu twaheshina]

Malwihu:

○ Indi kwikala nechima chalumbulukadi?

○ Ichima daleñeleli amana kwaYosefu kwiladi?

○ Muloñadi Yosefu chayanakeneniyi ana kwindi?

○ Chumanyi chitwatela kudizila kuniyi nsañu?