Kushimunañahu Dehi Yuma Yikamwekana Kumbidi

HAKUSHIMUNA mpinji yakumbidi yamuntu niiseki, kapostolu Petulu wasonekeli nindi: “Etu twatalilaña mawulu amaha niiseki dadiha, mwakekala kuloña neyi chakaniniyi [Nzambi].” (2 Petulu 3:13) Wuprofwetu watachi “[wa]mawulu amaha, nimaseki amaha” awusonekeli mumukanda waIsaya. (Isaya 65:17; 66:22) Kuhitila mukutena iwu wuprofwetu, Petulu wamwekesheli nindi mumafuku indi wadiña kanda wushikijewi chikupu.

 Chimwahitili yaaka, kwakwihi na 96 C.E., Chimwekeshu chamumwekesheleluwu kapostolu Yowanu chesekejeli “iseki dadiha” nankisu yamuWanta waNzambi. (Chimwekeshu 21:1-4) Mazu ahosheli Yesu nikapostolu Pawulu kutalisha hayuma yinakumwekana mukaayi henohu Wanta waNzambi kanda winzi anakushikijewa. Dichi, twatela kukuhwelela netu katataka Wanta wuleti ituña dadiha. Indi ituña dadiha dakekala ñahi? Mukanda wamuBayibolu waIsaya watulejaña chakekala ituña dadiha.

Nkisu Yikekala Mwituña Dadiha

Kuwunda Mukaayi Kejima niKunuñañana Mukudifukula. “Nimpoku jawu akajichila matemwa, nimayoñawu akayichila nyipanga; muza hiwakanyamwina muza wukwawu mpokuku, hiyakadiza nawa cheñi njitaku.”—Isaya 2:2-4.

Antu Akashakama Chawunda nawaTunyama. “Kañwidi wakashakamaña hamu namwana kamukoku, chisumpa wakakamaña hamu namwana kampembi; nimwana kañombi nimwenzi wamutupa nichimuna wakudiisha chachiwahi akekalaña hamu; akayilombolaña kudi mwana wanyanya. Nimukaji wañombi nibera akadiilaña hamu; anyanawu akakamaña hamu; mutupa wakadyaña nsaachi jatidiku neyi ñombi. . . . Kumpidi yami yajila yejima hikwake[ka]la kudikatisha hela kudijilumunaku; muloña iseki dejima dakawanina kumwiluka Yehova, neyi chabutaña meji hakaluñalwiji.”—Isaya 11:6-9.

Antu Ejima Akekala naYakudya Yayivulu. “Hampijiyi Yehova wamazaza wakatelekela nyuza yawantu yejima chawija chambiji januna, chawija chakudya najivinyu jajiwahi, chambiji januna jasweja manji mumafwaha, chajivinyu jajiwahi jakutata chachiwahi.”—Isaya 25:6.

Hikwakekala Cheñi Kufwaku. “Naminyi [Nzambi] dehi kufwa chahaya nyaka; Yehova wakakombola madilu mumesu awantu ejima, wakafumisha kusawuka kwawantu indi mwahita iseki dejima; Yehova nachihoshi dehi.”—Isaya 25:8.

Afu Akayisañula. “Afu eyi akahanda; yibimbi yawu yakasañuka. Enu mwashakama mulunkuñu tonenu, mwimbi tumina; . . . niiseki dakatupula afu.”—Isaya 26:19.

Mesiya Diyi Nsompeshi Waloña. “Hakasompesha chakumona kwanamesu hohuku; hakahoshela chakutiya kwanamatu hohuku; wakasompesha atuzweñi mwaloña, adizoza mwituña wakayihoshela mwoloka.”—Isaya 11:3, 4.

Amputamesu niAjika Matu Akayuka. “Dihu hakatoneshawu mesu awamputamesu, dihu hakajikulawu matu awajika matu.”—Isaya 35:5.

Muchinkalampata Mwakamena Yakudya. “Niisaña nimpata yakadi antu yakatiya kuwaha;  ikuna dakazañalala dakakenuka neyi wuluya walubanji. Dakakenuka nankashi, dakazañalala nakutiya kuwaha nakwimba tumina.”—Isaya 35:1, 2.

Iseki Dadiha. “Hinukuleña mawulu amaha, [nfulumendi yayiha yamwiwulu] nimaseki amaha [muza wawuha wawantu aloña], yuma yakusambila hiyakayanuka nawaku, hiyakenza nikumuchimaku. Ilaña tiyenu kuwaha nakuzañalala haya nyaka nayuma yinukuleña, . . . Akatuña [antu akashakama mwituña dadiha dakanayi Nzambi] matala, akashakamamu. Akadima matempa anyivinyu, akadya nyikabu yayu. Hiyakela atuña, mushakama acheñuku; adima, ayidya kudi acheñuku. Muloña mafuku awantu ami akekala neyi mafuku amutondu, antu ami inatondi akaluña luñe-e nanyidimu yamakasawu. Hiyakakabakana chamukunkulwayuku, hiyakasemena muuduku, muloña aneli dehi anyana kawakoolekeshawu dehi kudi Yehova, hamu nawanyanawu akasemawu. Akamona chakwila nikutambika kanda, ami netiya dehi; achidi kuhosha, ami natiya dehi.” “Mwakashakamina kumesu ami mawulu amaha nimaseki amaha inakela, dimu mwakashakamina nianyanenu niijina denu.”—Isaya 65:17-25; 66:22.

Kushimunañahu Dehi Yuma Yayiwahi Yakumbidi

Mukanda wamuBayibolu waIsaya hidiwu hohu washimunañahu dehi nkisu yakumbiduku. MuBayibolu mwenzala wuprofwetu walumbululaña yuma yayiwahi yakakoñayi Nzambi kuhitila muWanta windi wunakuyulewa naKristu. * Komana munakukeña mwakashakami muniyi paradisa? Munatweshi! Fwilenu kwiluka chuma chacheni chatañishaña Bayibolu hankeñelu yaNzambi yayiwahi yakumbidi, nawa dizenu chimwatela kudiluñisha iyi nkisu. A Yinsahu jaYehova akuyikwasha.

[Tumazu twaheshina]

[Mwevulu wudi hefu 8]

Antu akashakama chamwena wumu namukwawu ninawanyama

[Mwevulu wudi hefu 9]

Afu akasañuka

[Mwevulu wudi hefu 10]

Iseki dejima dakekala paradisa