Kwinza kwaMesiya akuShimwineñahu Dehi

CHELUKILUWU nsañu yasonekeli Isaya niatuprofwetu amakwawu hadi Mesiya, muza wawaYudeya adiña nakutalila kwinza kwaMesiya hadi mpinji yayilehi. Mumafuku aYesu, aYudeya amavulu ‘adiña nakujinooka’ hakwinza kwaMesiya kwadiña kwakwihi. (Luka 3:15) Chidi chachiwahi muloña wuprofwetu wamuBayibolu walumbulula chikupu hachihandilu chaMesiya. Kwosi muntu niwumu wunateli kushimunañahu dehi yuma yakamwekana hela kushimuna yuma yejima yakamumwekena Yesu muchihandilu chindi hanu hamaseki.

Wunsahu Wahosha haKuvwalika kwaMesiya. Isaya washimwineñahu dehi nindi Mesiya, hela Kristu, wakavwalika kudi mujiki. Chalumbulwiliyi nsañu yakuvwalika kwaYesu kwachihayamisha, kapostolu Matewu wasonekeli nindi: “Elili mwejimimu kulonda mwahosheliyi Yehova mudi kaprofwetu mwakalumbuluki, mweliliyi nindi, Tiyenu, mujiki wakabaaba ivumu, wakavwala mwana weyala.” (Matewu 1:22, 23; Isaya 7:14) Cheñi, Isaya washimwineñahu dehi nindi Kristu wakekala nkakulula yaDavidi, nawa wateneni Jesi, tata yaDavidi. Mwalala Yesu wafumini muchisaka chaDavidi. (Matewu 1:6, 16; Luka 3:23, 31, 32) Dichi, henohu Yesu kanda yavwaliki, kañelu Gabireli wamulejeli Mariya mama yaYesu nindi: “Nzambi wakamwinka itanda datata yindi Davidi dawanta.”—Luka 1:32, 33; Isaya 11:1-5, 10; Aroma 15:12.

 Wunsahu Wahosha haChihandilu chaMesiya. MuSinagogi yamuNazareta, chelili Yesu nakuli dehi watañili chatiyakana wuprofwetu waIsaya, kushilahu ninawa mazu akwila nawu: ‘Spiritu yaYehova yidi hadami, muloña wanwayisha dehi manji nishimwini atuzweñi nsañu yayiwahi.’ Hakukunjika iwu wuprofwetu kudi yomweni, Yesu wahosheli nindi: “Nsañu iyi yasonekeluwu yinalumbuluki kumatu enu lelu.” (Luka 4:17-21; Isaya 61:1, 2) Cheñi Isaya washimwineñahu dehi yililu yamwekesheliyi Yesu kudi antu akeñeleña kuyuuka yidi neyi luwi, kwovwaha nikudizoza. Matewu wasonekeli nindi: “Antu amavulu hiyakumulondela, hakuyikolesha wejima wawu. Hakuyileja nañovu nindi bayi muntiyakeshaku; kulonda mwahosheliyi kaprofwetu Isaya mulumbuluki, . . . Hakatadikaña hela kubilelaku . . . Iteti dachikeka hakadikotolaku.”—Matewu 8:16, 17; 12:10-21; Isaya 42:1-4; 53:4, 5.

Wunsahu Wahosha haKukabakana kwaMesiya. Isaya waprofweteli nindi Mesiya akamukaana kudi antu amavulu muIsarela, nawa wakekala neyi “ilola dakuhukana” kudi wena. (1 Petulu 2:6-8; Isaya 8:14, 15) Eñañi, hela chakwila Yesu wazatili yihayamisha yayivulu, antu “alekeli kwawu kumwitiya; kulonda izu dakaprofwetu Isaya dakalumbuluki deliliyi nindi, Eyi Yehova, netiyi mutunashimuni hinyi?” (Yowanu 12:37, 38; Isaya 53:1) Yitoñojoka yaluwa yaswejeli kutanda yakwila nawu katataka Mesiya yafumishuhu chiyulu chamunza wawaRoma nakuswanyikahu wanta wadimena waDavidi heseki, dichaleñeleli aYudeya kubula kumukuhwelela Yesu nawu diyi Mesiya. Hamuloña wakwila Yesu wakabakeni nawa wafwili, aYudeya amavulu amukaanini nawu hidiyi Mesiyaku. Ilaña, Isaya washimwineñahu dehi nindi Mesiya wakakabakana henohu kanda yekali Mwanta.

Mesiya wahosheli mazu awuprofwetu, amumukanda waIsaya nindi: “Akwakwetana nayinkeli nyima yami . . . Hinabutili kumesu ami kuchina nsonyi hela mazeñuku.” Matewu washimuna yuma yamwekeni hampinji yamwesekeleñawu Yesu: “Hiyakumufwijila mazeñi kumesu indi, hiyakumweta mankonyi, amakwawu hiyakumweta makahi.” (Isaya 50:6; Matewu 26:67) Isaya wasonekeli nindi: “Hakudizozelamu, kwasama mukanwa kindi nehi.” Dichi, chelili Pilatu yamwihuli Yesu hayuma yamutwambilileña aYudeya, Yesu “hamwakwili hela izu nidimuku; nguvulu hakuhayama nankashi.”—Isaya 53:7; Matewu 27:12-14; Yililu 8:28, 32-35.

Wunsahu Wahosha haKufwa kwaMesiya. Wuprofwetu waIsaya watwalekeluhu kushikijewa hakufwa kwaYesu nihanyima yakufwa kwindi. Isaya washimwineñahu dehi nindi: “Amufuukwili nawu amujiiki nawantu atama, ilaña hafwiliyi amujiikili namukwakuheta.” (Isaya 53:9) Iwu wuprofwetu wamwekanaña neyi waditadikeshaña washikijeweli ñahi? Hampanji yafwiliyi Yesu, amupopeleli chimu nawatupondu ayedi. (Matewu 27:38) Ilaña, Yosefu muntu waheta wakuAramateya, wakamikili mujimba waYesu mwijamu dindi dadiha dapokweliyi yomweni. (Matewu 27:57-60) Nkumininaku, kufwa kwaYesu kwashikijili wuprofwetu wumu walema nankashi hayuma yayivulu yatenawu muwuprofwetu waIsaya. Isaya wahosheli hadi Mesiya nindi: “Kambuñami waloña wakaloñesha amavulu nakwiluka kwakumwilukawu; wakakoola kuluwa kwawu.” Eña, Yesu chafwiliyi waheni ifutu danyiloña kulonda kufumisha nshidi hadi antu ejima ashinshika.—Isaya 53:8, 11; Aroma 4:25.

 Wuprofwetu Washikijeweli

Hakumwekesha chinjikijilu chamuNsona chakumwilukilaku Mesiya, apostolu niYesu kakavulu azatishileña mazu ekala muwuprofwetu waIsaya kubadika munyikanda yikwawu yamuBayibolu. Hela chochu, mukanda waIsaya hidiwu hohu washimwineñahu dehi yuma yakamwekana kumbiduku. Wuprofwetu wukwawu wawuvulu wamuNyikanda yachiHeberu niwena washikijeweli hadi Yesu, haWanta windi, niyuma yayiwahi yikakoña iwu Wanta kumbidi. * (Yililu 28:23; Chimwekeshu 19:10) Wunsahwinyi wamwekesheleña nawu iwu wuprofwetu wakashikijewa? Yesu walejeli aYudeya adiña nakumutiyilila nindi: “Bayi mutoñojoka nenu ami nenzi nakukisañana nshimbi hela mazu awatuprofwetuku [dikwila nawu Nsona jachiHeberu]; hinenzi nakujikisañanaku, nenzi nakujikolesha. Nukuyileja chalala nami iwulu namaseki amba kahita, ilaña kajotu hela kepaya hikamba kafuma kunshimbuku, chiña yuma yejima yinalumbuluki dehi.”—Matewu 5:17, 18.

Yesu cheñi wahosheli hawuprofwetu wamuBayibolu washikijeweli kutalisha hayuma yamumwekeneni nihayuma yikamwekana kumbidi. (Danyeli 9:27; Matewu 15:7-9; 24:15) Kubombelahu, Yesu niatumbanji twindi ashimwineñahu dehi yuma yikamwekana mpinji yikwawu, niyuma yayivulu yinakumwekana makonu. Chibaaba chinalondeluhu chikuhosha hayuma yinakumwekana makonu, niwuprofwetu wukwawu wamuBayibolu wukashikijewa kumbidi.

[Tumazu twaheshina]

[Mwevulu wudi hefu 4]

“Mujiki . . . wakavwala mwana weyala”

[Mwevulu wudi hefu 5]

“Hinabutili kumesu ami kuchina nsonyu[ku]”