Yikwashenu Kulonda Anyakali Kufunta!
Yikwashenu Kulonda Anyakali Kufunta!
“Tukuya kudinyi? Eyi yeyi wukweti mazu awumi wahaya nyaka.”—YOWANU 6:68.
1. Indi Petulu wahosheli nindidi chelili atumbanji amavulu anamushiyi dehi Yesu?
MPINJI yimu, atumbanji amavulu amushili Yesu Kristu muloña akaanini ntañishilu yindi yimu. Wayihwili apostolu indi nindi: “Ninenu nawa keña muyi kwenu, tahindi?” Petulu wakwili nindi: “Tukuya kudinyi? Eyi yeyi wukweti mazu awumi wahaya nyaka.” (Yowanu 6:51-69) Hiyadiña nakwakuyaku. Muloña nsakililu yawaYudeya hiyatañishileña “mazu awumi wahaya nyaka[ku],” nikulelu muBabiloni Muneni, wanta wakaayi kansakililu yakutwamba, mwosi mazu amuchidiwu. Antu anapwapuki hamukanka wanyikoku yaNzambi ilaña anakukeña kumuzañalesha Yehova, “mpinji yakuhinduka . . . hiyikuya nakupandakana” kulonda afunti mwiyinda.—Aroma 13:11.
2. Yumanyi yitwatela kwiluka kutalisha hansañu yakujinda hela yawunsompeshi?
2 Yehova wakameneni chikupu anyikoku aIsarela ajimbeli. (Tañenu Ezekeli 34:15, 16.) Munjila yoyimu, aeluda akwaKristu akweti mudimu nimpwila yakukwasha muntu wudi neyi mukoku wunapwapuki hamukanka wanyikoku. Neyi amuleja mukwakushimwina kulonda kudizaña namuntu wazeya wunakukeña wukwashu, mukwakudizisha nateli kwila ñahi neyi yeluka nindi muntu yeniwu nakoñi nshidi yeneni? Chatela yatachiki kumufumba hanyiloña yawunsompeshi hela nsañu yakujinda, mukwakushimwina watela kumuleja kulonda yayi nakushimuna kudi aeluda. Neyi yakañanya kushimuna, mukwakushimwina watela kulejamu aeluda.—Alevi 5:1; Aŋalija 6:1.
3. Indi iyala wadiñi nanyikoku 100 watiyili ñahi chelili mukoku wajimbeli yamwekani?
3 Muchibaaba chinafumihu, ahosha hachishimu chaYesu kutalisha hadi muntu wadiña nanyikoku 100. Mukoku wumu chajimbeliyi mwiyinda, washili nyikoku 99 nakuya nakukeña mukoku wajimbeli. Iyala yeniwu watiyili kuwaha chikupu chamuwaniniyi mukoku yeniwu. (Luka 15:4-7) Chochimu, twazañalalaña neyi muntu wazeya yafunta hamukanka wawanyikoku. Hamuloña wakukeña, aeluda niantu amakwawu muchipompelu ahempulaña muntu wazeya. Niwena akeñaña nawu muntu yeniwu yafunti kwiyinda kulonda kudiluñisha wukwashu waNzambi, kukiñewa ninkisu jindi. (Kuhituluka 33:27; Masamu 91:14; Yishimu 10:22) Chumanyi chatela kwilawu kulonda kukwasha muntu yafunti kuchipompelu?
4. Chumanyi chitwatela kudizilaku haAŋalija 6:2, 5?
4 Hadaha atela kumukolesha muntu yeniwu kulonda kufunta kuchipompelu kuhitila mukumuleja nawu Yehova wakeña anyikoku Indi nawa wakeñaña nindi tukoñi yuma yitunatweshi kwila. Yumiyi yabombelamu kudiza Nsona, kuwanika kukupompa kwawakwaKristu, nikushimwina nsañu yayiwahi yaWanta. Chikuwaha neyi mutaña Aŋalija 6:2, 5 nakumuleja nenu akwaKristu asendañanaña yisenda yawumu namukwawu, ilaña “antu ejima akadisendela yiteli yawu, iwu nachindi, iwu nachindi” kumesu aYehova. Kwosi muntu wunateli kutwimenaku ashinshika kudi Nzambi.
Komana “Kwakama Yuma Yawumi Wunu” Dikunayileñeli Kupwapuka?
5, 6. (a) Muloñadi chichekalila chalema kutiyilila chikupu chinakuhoshayi mukwetu mukwakwitiya wazeya? (b) Munateli kukwasha ñahi antu azeya kwiluka nawu kubula kuwanika kukupompa kwatama?
5 Hakwila nawu aeluda niakwakushimwina apama eluki mwakukwashila akwawu akakwitiya azeya, atela kutiyilila chikupu neyi antu wenawa hiyakushimuna yuma yinakutoñojokawu. Chumanyi chimwatela kwila neyi mudi eluda wunakuhempula adisumbula ajiña kuchipompelu hamuloña wakwila “kwakama yuma yawumi wunu” kunayileñeli kuzeya? (Luka 21:34) Kukala kwamali hela nyidimu yayivulu muchisaka yinateli kuyileñela kuleka kukalakala nyidimu yawakwaKristu. Hadaha anateli kuhosha nawu anakukeña kunookahu, ilaña mwatela kuyileja nenu kudambula kwakankawawu hikunateli kuyikwashaku. (Tañenu Yishimu 18:1.) Mwatela kuyihula munjila yayiwahi nenu: “Kufuma mpinji yimwalekeli kupompa muchidi amuzañalu? Indi chihandilu chenu muchisaka chidi chiwahi? Komana muchidi namuzañalu wafumaña mukukuhwelela Yehova?”—Nehemiya 8:10.
6 Kutoñojoka hamalwihu wenawa kunateli kukwasha antu azeya kwiluka nawu hamuloña wakuleka kupompa hiyanakumona kukala kwawu neyi chakwimonañayi Yehovaku, chuma chinafumimu hiyadi amuzañalu neyi chiyadiñawuku. (Matewu 5:3; Aheberu 10:24, 25) Cheñi, chikuwaha neyi mukuyikwasha kulonda eluki nawu hiyakweti muzañalu wafumaña mumudimu wakushimwina nsañu yayiwahuku. (Matewu 28:19, 20) Hanu dinu, chumanyi chachiwahi chatela kwilawu?
7. Antu anapwapuki hamukanka wanyikoku twatela kuyikolesha kwila yumanyi?
7 Yesu wahosheli nindi: “Ilaña babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu . . . Tonenuña kwenu hayilaaka yejima nakulembelela, kulonda mwakemiki mushindu, mwakapuluki kuyuma yejimiyi.” (Luka 21:34-36) Owu anapwapuki hamukanka wanyikoku ilaña anakukeña kudiluñisha neyi chiyadiluñishileña hatachi atela kuyikolesha kulonda kulomba spiritu yajila niwukwashu waNzambi nawa atela kuzata kwesekeja nakulomba kwawu.—Luka 11:13.
Komana Kudi Muntu Wayidimbwishili?
8, 9. Indi eluda nateli kuhanjeka ñahi namuntu watuntwishiliwu?
8 Hamuloña wakwila muchidi wamuntu hiwawaninaku, nawa kwekalaña kubula kutiyashana, chumichi chinateli kutuntwisha muntu. Amakwawu ayituntwishaña neyi chakwila muntu yakuhwelelawu muchipompelu yakoña yuma yabula kwesekana nanshimbi jamuBayibolu. Neyi dichuma chinamutuntwishi wazeya, eluda wunakumuhempula watela kumuleja nindi Yehova hatuntwishaña muntuku. Muloñadi muntu chatelelayi kumanishila wubwambu windi naNzambi ninawantu Jindi? Dichi, muntu yeniwu watela kutwalekahu kumukalakela Nzambi nakukuhwelela nindi “Mukwakusompesha iseki dejima” weluka yuma yazatikaña nawa wakahakula yuma munjila yaloña. (Kutachika 18:25; Akolose 3:23-25) Neyi muntu yadituntula nawa yadimbuka, hanateli kutwalekahu kukaama hamaseki chakadi kweseka kuhindukaku.
9 Hamuloña wakuzata nañovu kulonda kuyikwasha, eluda nateli kumuleja nindi mukuhita kwampinji, amakwawu elukaña nawu chuma chayituntwishili chamukunkulwayi. Hekwawu, chuma chayituntwishili chahita dehi. Neyi muntu wazeya yaneña hamuloña wakumufumba, kulomba nikutoñojokahu kunateli kumuleñela kwiluka nindi waluwañesheli, dichi kufumba kwamufumbiliwu hikwatela kumutuntwishaku.—Masamu 119:165; Aheberu 12:5-13.
Komana Kubula Kutiyisha Ntañishilu yamuNsona Dikwamuleñeleli Kuzeya?
10, 11. Yikumanyi yayiwahi yimwatela kuzatisha hakukwasha muntu wabulili kutiyisha ntañishilu yimu yamuBayibolu?
10 Antu amakwawu anateli kufuma hamukanka wanyikoku yaNzambi hamuloña wakukaana ntañishilu yikwawu yamuNsona. A Isarela alubwiluwu muwuduñu muEjipitu “avulameneni . . . nyidimu [yaNzambi]” yayikoñeleliyi nawa “hiyamuchiñililili yena ayileji maanaku.” (Masamu 106:13) Chikuwaha kumwanukisha muntu wunazeyi nenu ‘nduñu wamaana nikashinshi’ wahanaña yakudya yayiwahi yakuspiritu. (Matewu 24:45) Muloña dichamuleñeleli kudiza chalala. Dichi muloñadi wukubulilayi kutwalekelahu kwenda muchalala cheñi?—2 Yowanu 4.
11 Hakufwila kukwasha antu anapwapuki hamukanka wanyikoku yaNzambi, eluda watela kuhosha hadi atumbanji amushili Yesu hamuloña wakukaana ntañishilu yindi yimu. (Yowanu 6:53, 66) Hamuloña wakuleka wubwambu wawu naYesu ninawatumbanji twindi ashinshika, alekeli kuhameka yuma yakuspiritu nawa hiyadiña namuzañaluku. Komana antu alekeli kudikunda nachipompelu chawakwaKristu anawani kwacheñi kudi yakudya yayiwahi yakuspiritu? Inehi, muloña kwosi kwakuyiwana!
Komana Kuvulumuna Chikupu Dikwamuleñeleli Kuzeya?
12, 13. Neyi muntu wunapwapuki hamukanka wanyikoku yeteja nindi navulumuni chikupu, mwatela kumukwasha ñahi?
12 Antu amakwawu alekaña kushimwina nikuwanika kukupompa hamuloña wakuvulumuna chikupu. Anateli kutoñojoka nawu neyi ashimuna yiluwa yawu kudi aeluda, anateli kuyihaña muchipompelu. Ilaña neyi aleka yililu yatama nikubalumuka mumuchima chikupu hiyanateli kuyihaña muchipompeluku. (2 Akorinda 7:10, 11) Ilaña, akuyitambwila nawa aeluda akuyinka wukwashu wakuspiritu wunakukeñawu.
13 Neyi wudi mukwakushimwina wapama anenkuwu mudimu wakukwasha muntu wazeya, chumanyi chimukwila neyi yayileja nindi wavulumwini chikupu? Neyi chiyahosha hakusambila, chatela mumukwashi, mwatela kumukolesha kulonda yayilejimu aeluda. Neyi hakushimunaku, mwatela kulondela nshimbi yaNzambi kutalisha hansañu yeniyi kulonda kumwekesha kalemesha hejina daYehova nichipompelu. (Tañenu Alevi 5:1.) Aeluda akwiluka mwakukwashila muntu wunakukeña kufunta nichatela kwilañayi nkeñelu yaNzambi. Anateli kumufumba munjila yayiwahi. (Aheberu 12:7-11) Neyi muntu yeniwu yeteja nindi navulumuni kumesu aNzambi, naleki kwila yuma yatama, nawa nabalumuki mumuchima chikupu, aeluda akumukwasha, nawa Yehova wukumwanakena.—Isaya 1:18; 55:7; Yakoba 5:13-16.
Chafuntiliyi Mwana Chaleteli Muzañalu
14. Mumazwenu shimunenu chishimu chaYesu kutalisha hadi mwana wajimbeli.
14 Neyi munakukeña kukwasha mukoku wunapwapuki, muntu anenkuwu mudimu wakumukwasha nateli kuhosha hachishimu chaYesu chasonekawu haLuka 15:11-24. Munichi chishimu, kansi weyala wakisañeni mahetindi mwamukunkulwayi. Nkumininaku waheleli chihandilu chatama chahadileñayi. Watiyili nzala, wanukileña kumukala nawa wafuukwiluhu kufunta kumukala! Henohu wuchidi maaya, tata yindi wamumweni, wayili lufuchi nakumukumbata kunshiñu, wamupwepujoleli nawa wazañaleli chikupu. Kutoñojoka hanichi chishimu kunateli kumukwasha muntu wunapwapuki kufunta kwiyinda. Chineli kaayi kamakonu keña akijilumuni, watela “kufunta kuchipompelu” chakadi kulaba.
15. Muloñadi antu amakwawu chiyafuminañawu muchipompelu?
15 Antu amavulu apwapukaña muchipompelu hiyadi neyi mwana weyala wajimbeluku. Amakwawu, afumaña muchipompelu chovu-chovu, neyi chochakuñumukaña watu chovu-chovu kufuma kuchikumu. Antu amakwawu adakamenaña chikupu chakwila adiwula niwubwambu wawu naYehova. Amakwawu niwena etejaña kuyidimbwisha kudi muntu wamuchipompelu, hela afumañamu hamuloña wakukaana ntañishilu yimu yamuNsona. Nawa antesha hohu adiñijaña muyililu yatama. Hela chochu, iku kufumba kunahanuwu haniyi nsañu kunateli kuyikwasha kulonda kukwashaku antu anafumi mwiyinda hamuloña wayuma yinatenuwu hela hansañu jikwawu kulonda afunti henohu meji achidi mukapokosu.
“Wufuntaña Mwanami!”
16-18. (a) Indi eluda wumu wakwashili ñahi mana kwetu wadiñi wazeya hayaaka yayivulu? (b) Chumanyi chamuleñeleli iwu mana kwetu kuzeya, amukwashili ñahi, nawa chipompelu chamutambwilili ñahi?
16 Eluda mukwaKristu wahosheli nindi: “Izaza dawaeluda amwiluña detu azataña nañovu kulonda kuhempula azeya. Nanukili mana kwetu nadizileña nindi nikumukwashaku kulonda kwiluka chalala. Wazeyeli hadi yaaka 25 nawa wadiñi mukukala kweneni, dichi namulejeli nami kuzatisha nshimbi jamuBayibolu kwatela kumukwasha. Mukuhita kwampinji, watachikili kwinza Kwitala daWanta nawa wetejeli kutachika kudiza kwaBayibolu kwahalwindi kulonda kukolesha kufuukulahu kwindi kwakufunta kumukanka wanyikoku.”
17 Chumanyi chamuleñeleli mana kwetu kuzeya? Wahoshaña nindi: “Natachikili kusha muchima kuyuma yamukaayi kubadika kuyuma yakuspiritu. Kufumahu, nalekeli kudiza Bayibolu, kuya mumudimu wakushimwina, nikuwanika kukupompa. Chakadi kwiluka, nalekeli kudikunda nachipompelu. Ilaña kukeña kwamwekesheli eluda dikwankwashili kufunta.” Kukala kwamweneñayi iwu mana kwetu kwatachikili kumana chatachikiliyi kudiza Bayibolu halwindi. Wahosheli nindi, “Nelukili nami kukeña, wulomboli waYehova nikuloñesha kwindi diyuma yabulili muwumi wami.”
18 Indi iwu mana kwetu amutambwilili ñahi muchipompelu? Wahosheli nindi: “Natiyili neyi mwana wajimbeli washimwiniyi Yesu Kristu. Dichi, muheletu wumu wadiñi muchipompelu chenichi hadi yaaka 30 yinahitihu nawa wuchidi kumukalakela Yehova nakashinshi wahosheli nindi, “Wufuntaña Mwanami!” Chumichi chanzañalesheli chikupu. Mwalala nelukili nami kufunta muchipompelu dichuma chachiwahi nankashi. Nawa nakuhameka chikupu hakukeña, nimuzañalu, nikuwunda kwamwekesheleluwu kudi eluda niantu ejima amuchipompelu. Hamuloña wakumukeña Yehova niatuñi nawu ankwashili chikupu kufunta kumukanka wanyikoku.”
Yikoleshenu Kulonda Anyakali Kufunta!
19, 20. Munatweshi kukwasha ñahi azeya kufunta kumukanka wanyikoku chakadi kulaba, nawa munateli kuyileja ñahi nenu Nzambi wakeñaña nindi tuzati yuma yitunateli kwila?
19 Tunakushakama mumafuku akukuminina nawa kukuma kwakanu kaayi keña kushiki. Dichi, koleshenu antu azeya kuwanikaña kukupompa kwawakwaKristu. Yikoleshenu atachiki kuwanika kukupompa chakadi kulaba. Yanukishenu nenu Satana nakukeña kukisañana wubwambu wawu naNzambi nikuyileñela kutoñojoka nawu neyi aleka kudifukula kwalala kukala kwamuchihandilu kukumana. Yilejenu chikupu nenu kuhitila mukwikala atumbanji twaYesu ashinshika dichuma chinateli kuyizañalesha chikupu.—Tañenu Matewu 11:28-30.
20 Yanukishenu azeya nenu Nzambi wakeñaña nindi tukalakali yuma yitunateli kwila. Hampinji Mariya muhela Lazaru hamuhosholeliwu hamuloña wakumuwayisha Yesu malasha abadika kulema wuseya kukamwihi nakufwa kwindi, Yesu wahosheli nindi: “Mulekenu kwindi, . . . Yena kwindi neli mwashika ñovu jindi.” (Maku 14:6-8) Yesu wahamekeli mumbanda wanfwila kazweñi wahanini tumali twanyanya mutembeli. Neyena welili kwesekeja nahakumina ñovu jindi. (Luka 21:1-4) Etu amavulu tunatweshi kuwanika kukupompa kwawakwaKristu nikuya mumudimu wakushimwina Wanta. Kuhitila muñovu jaYehova, antu amavulu azeya anateli kwila momumu.
21, 22. Yumanyi yimwatela kuyileja antu anakufunta kudi Yehova?
21 Neyi muntu wazeya nakuchina kufunta kudi amana kwindi cheñi, munateli kumwanukisha hamuzañalu watiyiluwu hampinji yafuntili mwana wajimbeli kwitala. Antu afuntaña kuchipompelu niwena aletaña muzañalu. Yikoleshenu yoyinu mpinji kudikaña naDiyabolu nikukundama kwakwihi naNzambi.—Yakoba 4:7, 8.
22 Tunakutalila kushikija chikupu antu anakufunta kudi Yehova. (Mukeŋa 3:40) Hampinji yadiña nakumukalakelawu Nzambi kunyima chayizañalesheleña chikupu. Antu anakufunta kumukanka wanyikoku chakadi kulaba, akatambwila nkisu jajivulu kumbidi!
Mukwakula Nenudi?
• Munateli kukwasha ñahi mukwaKristu wuyatuntwishili nawa wunazeyi?
• Yikumanyi yinateli kukwasha muntu wapwapukili hadi anyikoku yaNzambi hamuloña wantañishilu yabulili kutiyishayi?
• Munateli kukwasha ñahi muntu wunakujinoka kufunta kuchipompelu?
[Malwihu aKuzatisha haKudiza]
[Mwevulu wudi hefu 23]
Kutoñojoka hachishimu chaYesu chamwana wajimbeli kunateli kuleñela amakwawu kufunta kudi anyikoku