Chumanyi Chacheni Chazatikaña Neyi Muntu Nafwi?

“Mawumi ejima hiyafwañaku, niwumi wawantu atama . . . Ayibabeshaña nakesi kabulaña kujima, nawa hiyafwañaku, hiyatweshaña [kukumisha] makabi anakumonawuku.”—Clement wakuAlexandria, nsoneki wamunkulakaji yamuchiyedi niyamuchisatu C.E.

KUFWANA Clement, antu atiyakeshaña ntañishilu yakwila nawu helu hiluña dakubabeshelamu atoñojokaña nawu wumi wamuntu hiwafwañaku. Komana Bayibolu yeteja iyi ntañishilu? Talenu chashimuna Izu daNzambi hakwakula malwihu analondeluhu.

Komana iyala watachi, Adama, wadiñi nawumi wakabulaña kufwa? Bayibolu yabalumunawu kudi aProtesitanti yatenañawu nawu King James Version, hela Authorized Version, yahosha chamuleñeluwu Adama nawu: “MWANTA Nzambi wawumbili muntu nalunkuñu lwahamaseki, woneni mumazulu indi muuya wawumi; muntu hakwikala mumi.” (Kutachika 2:7) Iyi nsona hiyinakushimuna nawu Adama amwinkeli wumuku.

Chumanyi chamumwekeneni Adama chelili navulumuni dehi? Nzambi hahosheli nindi wukumubabesha haya nyaka muheluku. Ilaña, Bayibolu yawaKatolika yaNew American Bible yashimuna mazu ahosheliyi Nzambi ñane: ‘Chiña wukasulwili kumesu eyi mwaka wakadyi yakudya, nichiwamba kafunta cheñi kumaseki, muloña diku kwakufumishiluwu; muloña eyi wulunkuñu, nochu wakafunta cheñi kwoku lunkuñu.’ (Kutachika 3:19) Mazu ahosheliyi Nzambi alumbulula nawu chelili Adama nafwi dehi kwosi chidi chatwelekeluhu kuhanda. Chafwiliyi Adama, wumi waAdama wafwili.

Komana muntu wejima wekala nawumi wakabulaña kufwa? Nzambi wamulejeli kaprofwetu Ezekeli nindi: “Yowumi wukuvulumuna diwu wakafwa.” (Ezekeli 18:4, The Holy Bible—New International Version) Kapostolu Pawulu wasonekeli nindi: “Dichi kudi muntu wumu [Adama] nshidi yeñilili mumpata yamunu mwishina, ninshidi yaleteli kufwa, nikufwa kwenjili hadi antu ejima, muloña wejima wawu avulumwini.” (Aroma 5:12, NAB) Neyi antu ejima avulumunaña, dikwila nawu mawumi ejima afwaña.

Komana wumi wunafwi welukaña hela kutiya? Izu daNzambi dahosha nawu: “Amomi eluka nawu akafwa, hakwila afu hiyeluka chumaku.” (Mukwakutaŋisha 9:5, NAB) Hakushimuna yuma yamwekanaña neyi muntu nafwi, Bayibolu yahosha nawu: “Hakufunta cheñi kwindi hamaseki indi; dodena ifuku odu mwafuukulayi munakisiki dehi.” (Masamu 146:4) Neyi chakwila afu “hiyeluka chumaku” nawa ‘mwafuukulañawu munakisiki dehi,’ akwiluka ñahi nawu anakukabakana muhelu?

Yesu Kristu wesekejeli kufwa natulu, bayi nayuma yayumuku. (Yowanu 11:11-14) Antu amakwawu anateli kukaana nawu Yesu watañishili nindi helu hiiluña ditata nawa nawu akwanshidi akayinatila mukesi kahelu. Tutalenu chahosheliyi Yesu kutalisha hahelu.