Ilukenu Chikupu Mudimu waYesu Wadimena muNkeñelu yaNzambi

‘Ami yami njila, yami walala, yami wumi. Kwosi muntu niwumu wukwinza kudi Tata chiña hadami.’—YOWANU 14:6.

1, 2. Muloñadi wutukukeñela kwiluka mudimu waYesu wadimena munkeñelu yaNzambi?

 HAYAKA yayivulu, antu amavulu azata nañovu kulonda kufwila kwikala adimena nawakwawu, ilaña amavulu akañanya. Antu antesha anateli kuhosha nawu adimena muyuma yayivulu. Ilaña, Yesu Kristu Mwana kaNzambi, wadimena munjila jajivulu.

 ² Muloñadi wutukukeñela kwiluka mudimu waYesu wadimena? Muloña munabombeli wulunda wetu naTata yetu wamwiwulu Yehova. Yesu wahosheli nindi: “Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” (Yowanu 14:6; 17:3.) Tushinshikenu jinjila jikwawu jamuleñela Yesu kwikala wadimena. Kwila mwenimu chikutukwashaku kwiluka mudimu windi munkeñelu yaNzambi.

‘Mwana waSemuka Nkawindi Hohu’

3, 4. (a) Muloñadi wutukuhoshela netu Yesu wadimena mumudimu windi neyi Mwana wasemuka nkawindi hohu? (b) Indi mudimu waYesu wakuleña wadiñi wadimena munjilanyi?

³ Yesu hekala hohu ‘mwana kaNzambuku.’ Dichamutenenuwu Yesu kudi Satana hampinji yamwesekeleñayi. (Matewu 4:3, 6) Yesu amutenaña nawu ‘Mwana kaNzambi wasemuka nkawindi hohu.’ (Yowanu 3:16, 18) Izu dachiGriki dabalumunawu nawu ‘wasemuka nkawindi hohu’ adilumbulula nawu “chuma chimu hohu” hela “muntu wumu hohu wambukaku” hela “wadimena.” Yehova wukweti yihita yayivulu yawanyana awamayala akuspiritu. Hanu dinu, munjilanyi mwekalilayi Yesu wumu hohu “wadimena”?

⁴ Yesu wadimena muloña diyi hohu waleñeluwu kudi Tata yindi. Diyi Mwana wawedi. Eña, diyi “wedi wayuma yaleñeluwu yejima.” (Akolose 1:15) Diyi “mukulumpi wayuma yaleñeluwu kudi Nzambi.” (Chimwekeshu 3:14) Mudimu wukwetiyi Mwana wasemuka nkawindi hohu mukuleña wadimena cheñi. Hadiñi Nleñi, hela Nsulu yayileñaleñaku. Ilaña Yehova wamuzatishili neyi wakumwimenaku, hela njila mwakuleñela yuma yejima. (Tañenu Yowanu 1:3.) Kapostolu Pawulu wasonekeli nindi: “Hakwinza etu twamonaña netu kudi Nzambi wumu hohu, diyi Tata; kudi yena diku kwafumaña yuma yejima, diyi twahandilaña. Kudi niMwanta wumu hohu, diyi Yesu Kristu, mudi yena dimu mwekala yuma yejima, dimu twahandilaña nawa.”—1 Akorinda. 8:6.

5. Indi Nsona yamwekesha ñahi jinjila jikwawu mwekalilayi Yesu wadimena?

⁵ Hela chochu, Yesu wadimena munjila jikwawu jajivulu. Nyikanda yamutena jinkumbu jajivulu hela majina amwekeshaña mudimu windi wadimena munkeñelu yaNzambi. Ichi tushinshikenu hanyidimu yitanu yaYesu muNyikanda yawakwaKristu yachiGriki.

“Izu”

6. Muloñadi chichatelela kumutena Yesu nawu “Izu”?

⁶ Tañenu Yowanu 1:14. Muloñadi Yesu chamutenenañawu nawu “Izu” hela Logos? Iyi nkumbu yamwekeshaña mudimu watachikiliyi kuzata kufuma tuhu haleñeluwu yileñaleña yikwawu yikweti maana. Yehova wamuzatishili Mwanindi kulonda kushimuna nsañu ninshimbi kudi anyana amakwawu awamayala akuspiritu, neyi chamuzatishiliyi Nzambi iwu Mwana kushimuna Mazwindi kudi antu hamaseki. Walala wakwila nawu Yesu diyi Izu, hela Mukwakumuhoshelaku Nzambi wamwekena mumazu alejeliyi Kristu antiyilili jindi aYudeya nindi: “Kuleja kwami hikwamami awenuku, kwambala kwayena wantemesheli. Neyi kudi muntu nakeñi kwila mwaya muchima windi, wakeluka kulejiku, neyi kunafumi kudi Nzambi, hela neyi nahoshi chakumuchima wamami aweni.” (Yowanu 7:16, 17) Yesu watwalekahu kwikala nankumbu yakwila nawu “Izu daNzambi” nihampinji yafuntiliyi mwiwulu.—Chimwekeshu 19:11, 13, 16.

7. Tunateli kwimbujola ñahi kudizoza kwamwekeshañayi Yesu hamudimu windi hamu neyi “Izu”?

⁷ Toñojokenu ntahi iyi nkumbu muyatalisha. Hela chakwila Yesu wukweti maana chikupu kubadika yileñaleña yaYehova yejima, hashindamenaña hamaanindi yomwenuku. Wahoshaña yuma yamulejañawu kudi Tata yindi. Mpinji yejima wamutwamijañaku Yehova kubadika yomweni. (Yowanu 12:50) Hichakutalilahu chachiwahi chitwatela kwimbujola. Anetu nawa atwinka mudimu walema nankashi wakushimwina “nsañu yayiwahi yayuma yakuluñisha.” (Aroma 10:15) Kwiluka chakutalilahu chachiwahi chaYesu chakudizoza kukutuleñela kutondolwela kuhosha hansañu yetwetu aweni. Hampinji yitunakushimwina nsañu yakupulwisha antu yamuNsona, hitwakeñaña ‘kupandakana yuma yasonekawu dehi munyikandaku.’—1 Akorinda 4:6.

 “Amena”

8, 9. (a) Indi izu dakwila nawu “amena” dalumbulukadi, nawa muloñadi Yesu chamutenenañawu nawu “Amena”? (b) Munjilanyi mwashikijililiyi Yesu mudimu windi hamu neyi “Amena”?

⁸ Tañenu Chimwekeshu 3:14. Muloñadi Yesu chamutenenañawu nawu “Amena”? Izu dakwila nawu “amena” dafuma kwizu dachiHeberu dalumbuluka nawu “chikali chochenochu” hela “chalala.” Izu dadeni dachiHeberu kwadifumishawu dalumbuluka nawu kwikala “washinshika” hela “wakashinshi.” Izu dodimu adizatishaña hakulumbulula kashinshi kaYehova. (Kuhituluka 7:9; Isaya 49:7) Hanu dinu munjilanyi mwekalilayi Yesu wadimena hakumutena nawu “Amena”? Talenu 2 Akorinda 1:19, 20 chiyakula: “Mwana kaNzambi Yesu Kristu, ashimwinuwu mukachi kenu . . . , hadiñi mukwantadi wakwila aha nindi eña, aha nindi nehuku, yena yowu eña chikupu. Muloña hela yikaninu yaNzambi yasweja kuvula, mudi Yesu diyi eña, mudi yena dimu mwekala ‘Amena,’ kulonda Nzambi ekali walema.”

⁹ Yesu diyi “Amena” hayikaninu yaNzambi yejima. Chihandilu chindi chaloña hampinji yadiñayi hamaseki, hamu tuhu nikulambula wumi windi, kwaletesheli kushikija yikaninu yaYehova Nzambi yejima. Kuhitila mukwikala washinshika, Yesu wamwekesheli hatooka to-o makudi aSatana, asonekawu mumukanda waYoba, akwila nawu ambuña aNzambi anateli kuleka kuMukalakela neyi amona yihuñu hela kweseka. (Yoba 1:6-12; 2:2-7) Hayileñaleña yaNzambi yejima, Mwana wawedi diyi waheni ñakwilu yalala kumakudi wenawa. Kubombelahu, Yesu waheni wunsahu waweni wakuhakwilaku Tata yindi hansañu yasweja kutoha yakuyula kwaYehova mukuleña kwejima.

10. Tunateli kumwimbojola ñahi Yesu mumudimu windi wadimena neyi “Amena”?

¹⁰ Tunateli kumwimbojola ñahi Yesu mumudimu windi wadimena hamu neyi “Amena”? Kuhitila mukwikala ashinshika kudi Yehova nikuhakwilaku wanta windi mukuleña kwejima. Neyi twila mwenimu, tukuhana ñakwilu yayiwahi hansañu yasonekawu haYishimu 27:11 hahoshaña nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.”

“Ihaku daChitiyañenu Chachiha”

11, 12. Indi mudimu waYesu hamu neyi Ihaku wekala wadimena munjilanyi?

¹¹ Tañenu 1 Timotewu 2:5, 6. Yesu diyi ‘ihaku wumu hakachi kaNzambi nawantu.’ Diyi “ihaku dachitiyañenu chachiha.” (Aheberu 9:15; 12:24) Hela chochu, Mosi niyena amushimuna neyi ihaku—ihaku daNshimbi yachitiyañenu. (Aŋalija 3:19) Munjilanyi mudimu waYesu hamu neyi Ihaku muwekalila wadimena?

¹² Izu dachiGriki dabalumunawu nawu “ihaku” hiizu danshimbi. Dahosha hadi Yesu hamu neyi Ihaku danshimbi (hela ihaku) wachitiyañenu chachiha waletesheli kuvwalika kwamuza wawuha, “aIsarela ambala aNzambi.” (Aŋalija 6:16) Iwu muza watuñewa nawakwaKristu awayishewa naspiritu, atuña ‘wanta wawatupristu ajila’ wamwiwulu. (1 Petulu 2:9; Kwidika 19:6) Chitiyañenu chaNshimbi chadiñi naMosi hamu neyi ihaku hichatwesheli kutuña muza wudi neyi iwuku.

13. Indi mudimu waYesu hamu neyi Ihaku walumbulukadi?

¹³ Indi mudimu waYesu hamu neyi Ihaku walumbulukadi? Yehova wazatishaña kulema kwamashi aYesu kudi antu atambikawu muchitiyañenu chachiha. Muniyi njila Yehova wayilemesha nakuloña. (Aroma. 3:24; Aheberu 9:15) Nzambi wayimonaña nindi atelela kwiñila muchitiyañenu chachiha nakutalila kwikala anyanta nawa atupristu amwiwulu. Hakwikala ihaku dawu, Yesu wayikwashañaku kutwalekuhu kwikala awunyonji kumesu aNzambi.—Aheberu 2:16.

14. Muloñadi akwaKristu ejima chili akweti chikuhwelelu chakuya mwiwulu chili chakushakama hamaseki chiyatelela kwilukila mudimu waYesu neyi Ihaku?

¹⁴ Hanu dinu chakekala ñahi kudi antu abula kwikala muchitiyañenu chachiha, adi nachikuhwelelu chakwikala nawumi wahaya nyaka hamaseki, bayi mwiwuluku? Hela chakwila hiyekala muchitiyañenu chachihaku, ahetelañamu. Ayanakenaña nyiloña yawu nawa ayishimunaña  nawu aloña hamu neyi amabwambu jaNzambi. (Yakoba 2:23; 1 Yowanu 2:1, 2) Chili tukweti chikuhwelelu chakuya mwiwulu chili chakushakama hamaseki, wejima wetu twatela kwiluka chikupu mudimu waYesu neyi Ihaku dachitiyañenu chachiha.

“Kapristu Muneni”

15. Indi mudimu waYesu hamu neyi Kapristu Muneni wambuka ñahi namudimu wawantu ejima akalakeli neyi atupristu amaneni?

¹⁵ Kunyaka antu amavulu akalakeli neyi atupristu amaneni, ilaña mudimu waYesu neyi Kapristu Muneni wadimena chikupu. Munjilanyi? Pawulu walumbulwili nindi: “Hakweti mudimu wakulambula hefuku hefuku neyi awa atupristu amaneni acheñuku; wena asambililaña kuketula yimuna yahanyiloña yawu awenawu, nkumininaku niyawantu amakwawu nawa; Yesu welili mwenimu kamu hohu hadiheniyi yomweni ekali mulambu. Muloña nshimbi jakunjikaña antu azeya kwikala atupristu amaneni, hakwila izu dakusanyika dalondeleli muNshimbi, hidikukunjika Mwana wela dehi walala chikupu haya nyaka.”—Aheberu 7:27, 28. *

16. Muloñadi mulambu waYesu chiwadimena chikupu?

¹⁶ Yesu wadiña muntu wawanina, neyi chochadiña Adama henohu kanda yavulumuni. (1 Akorinda 15:45) Dichi, Yesu hohu diyi muntu wateleleli kuhana mulambu wawanina, mulambu washikila chikupu—mutapu wamulambu wabulaña kukeñeka kufuntisha-funtishahu. MuNshimbi yamwinkeluwu Mosi nyilambu ayilambwileña hefuku hefuku. Hela chochu, nyilambu yejima ninyidimu yawatupristu yazatileñawu yadiña hohu nakumwekesha mwevulu, wayuma yadi kashikijayi Yesu. (Aheberu 8:5; 10:1) Hamuloña wakwila Yesu natweshi kuzata yuma yayivulu kubadika atupristu amaneni nawa wakazata haya nyaka, mudimu waYesu hamu neyi Kapristu Muneni wadimena.

17. Muloñadi wutwatela kwilukila mudimu waYesu hamu neyi Kapristu Muneni, nawa tunateli kwila ñahi mwenimu?

 ¹⁷ Twakeñaña mudimu waYesu neyi Kapristu Muneni kulonda kutukwasha kwikala nañimenu yayiwahi naNzambi. Tukweti Kapristu Muneni wamuwahi chikupu. Kapostolu Pawulu wasonekeli nindi: “Tukwetu kapristu muneni watweshaña kutiya wushona chitwazeyazeyañetu, niyena amwesekeli muyuma yejima neyi chatwesekañawu etu, ilaña mudi yena nshidi nehi.” (Aheberu 4:15) Kwiluka chikupu ichi chikuma kwatela kutusañumuna kubula ‘kudihandila cheñi etwaweni ilaña tumuhandili yena watufwilili.’—2 Akorinda 5:14, 15; Luka 9:23.

‘Mbutu’ yaKaninuwu

18. Wuprofwetwinyi washimwinuwu chelili Adama yovulumuni, nawa chumanyi chashimwinuwu kutalisha haniwu wuprofwetu?

¹⁸ Chelili antu anajimbeshi dehi yuma yejima muEdeni, wulunda wawuwahi naNzambi, wumi wahaya nyaka, muzañalu, niParadisa, Yehova Nzambi washimwineñahu dehi Mpulwishi. Yeniwu amuteneni nawu ‘mbutu.’ (Kutachika 3:15) Mbutu yeniyi yabulili kutenawu yekalili mutu wampanji yawuprofwetu wawuvulu wamuBayibolu kushika nimakonu. Wadi kwikala nkakulula yaAbarahama, Isaka niYakoba. Wadi kufuma cheñi mumutaña waMwanta Davidi.—Kutachika 21:12; 22:16-18; 28:14; 2 Samweli 7:12-16.

19, 20. (a) Indi Mbutu yakaninuwu hinyi? (b) Muloñadi wutukuhoshela netu mbutu yashimwineñawu dehi mwekala antu amavulu kubadika hadi Yesu hohu?

¹⁹ Indi iwu Mbutu yakaninuwu wadiñanyi? Ñakwilu yanilu lwihu yinateli kuwanika haAŋalija 3:16. (Tañenu.) Hela chochu, mukapetulu kokamu Pawulu watwalekahu kuleja akwaKristu awayishewa nindi: “Neyi munekali ambala aKristu, komana munekali dehi anyana kaAbarahama, muyanswana achikaninu.” (Aŋalija 3:29) Munjilanyi mwekalilayi Kristu Mbutu yakaninuwu, henohu kudi nianswana amakwawu?

²⁰ Amavulu aditenaña nawu afuma kumutaña waAbarahama, amakwawu akalakalaña neyi atuprofwetu. Nsakililu yikwawu yahoshaña chikupu nawu atuprofwetu awu hiyankakulula jaAbarahama. Hanu dinu antu ejima awa hiMbutu yakaninuwu? Inehi. Neyi chamonenenuwu kapostolu Pawulu kuhosha, bayi neyi ankakulula jaAbarahama ejima atela kuhosha nawu hiMbutu yakaninuwuku. Ankakulula anyana kaAbarahama amakwawu ayizatishili wanyi hakukiswila antu. Mbutu yankisu yadi kufuma mudi Isaka bweñi. (Aheberu 11:18) Nkumininaku, muntu wumu hohu Yesu Kristu, wukweti muyachi wafuma kudi Abarahama wasonekawu muBayibolu, diyi muntu watachi wambutu yakaninuwu. * Ejima ekalaña chibalu chamuchiyedi chambutu yaAbarahama himbutu yakaninuwu muloña “ambala aKristu.” Mwamweni, mudimu waYesu wakushikija iwu wuprofwetu wadimena chikupu.

21. Chumanyi chinayitiyishi kuwaha munjila mwazatiliyi Yesu mudimu windi wadimena munkeñelu yaYehova?

²¹ Yumanyi yitunadizi muniku kuhitulukamu kwakwihi kwamudimu waYesu wadimena munkeñelu yaYehova? Kufuma tuhu hampinji yamuleñeluwu, Mwana kaNzambi wasemuka nkawindi hohu wekala wadimena chikupu, wambukaku. Hela chochu, iwu Mwana kaNzambi wadimena wekalili Yesu wekala wadizoza mpinji yejima hakukalakala kwesekeja nankeñelu yaTata yindi, nawa hakeñaña kudilemesha yomwenuku. (Yowanu 5:41; 8:50) Ichi hichakutalilahu chachiwahi nankashi kudi etu makonu! Kufwana Yesu, twimikenu chikonkwanyi ‘chakwila yuma yejima kulonda kumulemesha Nzambi.’—1 Akorinda 10:31.

[Tumazu twaheshina]

Munakwanuka?

• Yumanyi yimunadizi kutalisha hamudimu waYesu wadimena kutalisha hankumbu jindi hela majina? (Talenu chikasha.)

• Munateli kwimbujola ñahi chakutalilahu chaMwana kaYehova wadimena?

[Malwihu aKuzatisha haKudiza]

[Chikasha/Mwevulu wudi hefu 23]

Nkumbu Jikwawu Jamwekeshaña Mudimu waYesu Wadimena muNkeñelu yaNzambi

◼ Mwana waSemuka Nkawindi Hohu. (Yowanu 1:3) Yesu diyi aleñeluwu hohu kudi Tata yindi.

◼ Izu. (Yowanu 1:14) Yehova wamuzatishaña Mwanindi hamu neyi Mukwakumuhoshelaku kulonda kushimuna nsañu ninshimbi kudi yileñaleña yikwawu.

◼ Amena. (Chimwekeshu 3:14.) Chihandilu chindi chaloña hampinji yadiñayi hamaseki, hamu tuhu nikulambula wumi windi, kwaletesheli kushikija yikaninu yaYehova Nzambi.

◼ Ihaku daChitiyañenu Chachiha. (1 Timotewu 2:5, 6) Hamu neyi Ihaku danshimbi, Yesu waletesheli kuvwalika kwamuza wawuha, “aIsarela ambala aNzambi,” atuñewa nawakwaKristu akatuña ‘wanta wawatupristu’ wamwiwulu.—Aŋalija 6:16; 1 Petulu 2:9.

◼ Kapristu Muneni. (Aheberu 7:27, 28) Yesu diyi hohu muntu wateleleli kuhana mulambu wawanina, wabulileña kukeñeka kufuntisha-funtishahu. Nateli kututookesha nshidi nikutukuula kukufwa.

◼ Mbutu yaKaninuwu. (Kutachika 3:15) Muntu wumu hohu Yesu Kristu, diyi muntu watachi wambutu yakaninuwu. Ejima ekalaña chibalu chamuchiyedi chambutu yaAbarahama “ambala aKristu.”—Aŋalija 3:29.