Indi Kwiluka Walala Hadi Helu Kunateli Kuyikwasha Ñahi?

ANTU atañishaña nawu helu hiiluña dakubabeshelamu atamishaña chikupu ijina daYehova Nzambi niyililu yindi. Eña, Bayibolu yahosha nawu Nzambi wakajilumuna antu atama. (2 Atesalonika 1:6-9) Ilaña kuzuwa munjila yaloña bayi neyi hichililu chaNzambi chabadikaku.

Nzambi hafuntishaña katama hakatamaku. Wehulaña nikwihula nindi: “Chafwaña muntu watama, ami natiyañamu kuwaha hela hanti, tahindi?” (Ezekeli 18:23) Neyi Nzambi waneñaña neyi muntu watama nafwi, natweshi kuzañalala ñahi haya nyaka hakumona antu wenawa anakuyiyandisha?

Chililu chaNzambi chasweja kubadika hikukeña. (1 Yowanu 4:8) Chalala, “MWANTA himuwahi kudi antu ejima; watiyilaña yuma yonsu yaleñeliyi wushona.” (Masamu 145:9, The Holy Bible—New International Version) Dichi, Nzambi nakukeña etu tusweji kumukeña chikupu.—Matewu 22:35-38.

Chumanyi Chayisañumunaña—Kuchiina Helu Hela Kumukeña Nzambi

Ntañishilu yakwila nawu wumi wahaña muhelu yaleñelaña antu kumutiya Nzambi woma wakumesu hohu. Ilaña, muntu wamwilukaña Nzambi nikumukeña wamwakamaña chikupu. Mukanda waMasamu 111:10 washimuna nawu “Kumutiya Mwanta woma dikutachika kwakwiluka maana; akwamaana diwu elañamu.” (New American Bible) Kumutiya Nzambi woma, bayi neyi hikufwa mutentuku, ilaña hikumulemesha nikumwakama Nleñi chikupu. Kwatuleñelaña kwikala nawoma waweni wakuchina kumuneñesha Nzambi.

Talenu kudiza chalala hadi helu chikwakwashili Kathleen wayaaka yakuvwalika 32 wadiñi nakuzatisha yitumbu yashetana. Waswejeli kukeña yiseki, madombu, kudihela niyililu yatama. Wetejeli nindi: “Nelileña neyi nimutala mwanami wamumbanda wachaaka chimu nadihoshesheleña nami, ‘Inakumuhemba chiwahi wanyi. Nakaha muhelu.’” Kathleen wesekeli kuleka kuzatisha yitumbu yashetana, ilaña wakañenyi. Watwalekeluhu nindi: “Nakeñeleña kwikala muntu wamuwahi, ilaña yuma yejima muchihandilu chami nimukaayi yanneñesheleña. Hinamweni chuma chadi kunleñela kwikala muntu wamuwahuku.”

Nkumininaku, Kathleen wadiweni nawaYinsahu jaYehova. Wahosheli nindi: “Nadizili nami hikwekala kesi kaheluku. Wunsahu wamuBayibolu wankwashili nankashi. Chinelukili nami hinakaha mukesi kaheluku nanzañaleli chikupu.” Nawa wadizili cheñi chikaninu chaNzambi chakwila nawu antu amba kashakama haya nyaka hanu hamaseki hakafumishawu kutama. (Masamu 37:10, 11, 29; Luka 23:43) Wabidikili nindi: “Ichi dinu nikweti kuchiñeja kwakweni, kwakushakama haya nyaka muParadisa!”

 Komana Kathleen wadi kuleka kuzatisha yitumbu yashetana chakadi kuchiina kesi kahelu kanakumutalila? Washimwini nindi: “Hampinji yinadiñi nampwila chikupu yakuzatisha yitumbu yashetana, nalombeleña, nakumulembelela Yehova Nzambi kulonda yankwashi. Nadiña nakutoñojoka chamonañayi Nzambi iyi yaaku yatama, nawa hinakeñeli kumuneñeshaku. Wakwili kulomba kwami.” (2 Akorinda 7:1) Hamuloña wakubula kukeña kumuneñesha Nzambi dikwamuleñeleli Kathleen kuleka yuma yamuteñwili.

Eña, kumukeña Nzambi nikumwakama—bayi woma wakuha muheluku—kunateli kutusañumuna kwila nkeñelu yaNzambi kulonda tudiluñisheña muzañalu wakabulaña kumana. Ñimbi yamasamu wasonekeli nindi: “Anakooleki ejima amwakamaña Yehova, endaña munjila jindi.”—Masamu 128:1.

[Chikasha/Nyevulu yidi hefu 9]

HIYANYI AKAFUMISHAWU MUHELU?

MaBayibolu amakwawu aletaña kukala kuhitila munsonekelu yamazu achiGriki ayedi —Geʹen·na niHaiʹdes neyi hiizu dimu dakwila nawu ‘kaluña kachinana’ hela helu. MuBayibolu, izu dakwila nawu Geʹen·na datalisha hakujilumuna chikupu, chakadi kuchiñeja kwakusañuka. Kwambukaku, antu adi muHaiʹdes, hela Hadesi, akweti kuchiñeja kwakusañuka.

Dichi, hanyima yakufwa kwaYesu nawa chelili nasañuki dehi, kapostolu Petulu wakolesheli izaza nindi Yesu “hiyamushiyili mukaluñaku.” (Yililu 2:27, 31, 32; Masamu 16:10) MuchiGriki izu dabalumunawu ‘kaluña kachinana’ hela helu muniyi vasi hiizu dakwila nawu haiʹdes. Yesu hayili kwiluña dakesuku. Hadesi, hela ‘kaluña [helu]’ kadiñi ijamu. Hela chochu, bayi neyi Yesu diyi muntu kankawindi alubwiluwu kufuma muHadesuku.

Kutalisha hakusañuka, Bayibolu yahosha nawu: “Kufwa nakaluña hiyakulubula afu adiñumu.” (Chimwekeshu 20:13, 14) Kufumisha antu ‘muhelu’ chikalumbuluka kusañula antu ejima akamonayi Nzambi nindi atela kusañuka. (Yowanu 5:28, 29; Yililu 24:15) Iku hikuchiñeja kwakumbidi kwakuwahi chikupu, kwakumona antu itwakeña hiyakufuma kumajamu. Yehova, Nzambi wakukeña kwahaya nyaka, wakela mwenimu.